لوقا 13
13
تؤوبه ادئن
1بو زامان اورادا اولانلاردان بعضئسی گلدئلر و او جلئللی‌لردن اونا خبر وردئلر کی، پئلاط اونلاری اؤلدوروب، قانلارینی، کسدئردئیی قوربانلارلا قاریشدیرمیشدی.
2عئسا جاواب ورئب ددی: «آیا اِله گومان ادئرسئنئز کی، بو جلئللی‌لر، قالان جلئللی‌لردن داها چوخ گوناهکار اولدوقلاری اوچون بو عاقئبته دوچار اولدولار؟! 3سئزه دیئرم؛ خیر. آمّا، اگر تؤوبه اتمه‌یه‌سئنئز، هامینیز اونلار کئمی هلاک اولاجاقسینیز. 4و یا او اون‌سکّئز نفر کی، سئلوآم بورجو اونلارین اوستونه دوشوب اؤلدوردو. آیا اِله گومان ادئرسئنئز کی، بونلار اورشلئمده یاشایان آیری اورشلئملی‌لردن داها چوخ گوناهکار ائدئلر؟! 5سئزه دیئرم؛ خیر. آمّا، اگر تؤوبه اتمه‌یه‌سئنئز، هامینیز اونلار کئمی هلاک اولاجاقسینیز.»
میوه ورمه‌ین آغاجین مثلی
6و اونلارا بو مثلی ددی: «بئر نفرئن باغیندا اکئلمئش بئر انجئر آغاجی وار ائدی. او آدام گلئب آغاجدا میوه آختاردی، لاکئن تاپمادی. 7و باغبانا ددی: ”باخ، اوچ ائلدئر کی، بو انجئر آغاجین یانینا گلئب میوه آختاریرام، آمّا تاپمیرام. اونو کس. نئیه بوش یره تورپاغی توتسون؟!“
8آمّا باغبان اونا جاواب ورئب ددی: ”آغا، اونو بو ائل ده قوی قالسین. من اونون اطرافینی بل‌له‌یئب پِیئن تؤکه‌رم. 9اگر گلن ائل میوه گتئرسه، یاخشی. اگر گتئرمه‌سه، اونو کسرسن.“»
بئر آروادین شفاسی
10عئسا سبّت گونو کنئسه‌لرئن بئرئنده تعلئم ورئردی. 11اورادا بئر آرواد وار ائدی کی، اون‌سکّئز ائلدن بری ناخوشلوق اَلئنه دوچار اولموشدو کی، باعئثی بئر روح ائدی؛ بِلی بوکولموشدو و اصلا دوزَ‌له بئلمئردی. 12عئسا اونو گؤرن واخت، یانینا چاغیریب اونا ددی: «آرواد، ناخوشلوغوندان آزاد اولوبسان.» 13و اَللرئنی اونون اوستونه قویدو. آرواد او آندا دئک دوردو و تارییا شوکور اتمه‌یه باشلادی. 14بو واخت، کنئسه‌نئن ریئسی عئسانین سبّت گونونده شفا وردئیی اوچون قضبله‌نئب، خالقا ددی: «ائش گؤرمک اوچون آلتی گون وار. شفا تاپماق اوچون سبّت گونونده یوخ، او گونلرده گلئن!»
15رب اونا جاواب ورئب ددی: «ای رئیاکار آدام! مگر سئزلردن هچ کئم سبّت گونونده اؤز اؤکوزونو و یا اِششه‌یئنی آخوردان آچیب سووارماغا آپارمیر؟ 16بو آرواد کی، اون سکّئز ائلدن بری شیطان طرفئندن باغلانیب، ائبراهئمئن بئر قیزی‌دیر. آیا سبّت گونونده اونو بو اسئرلئکدن آزاد اتمک جائز دیئل؟!»
17عئسانین بو سؤزلری اونون ضئدّئنه قالخان آداملارین هامیسینی اوتاندیردی و بوتون خالق اونون گؤردویو شؤوکتلی ائشلرئن هامیسینا سوئنئردئلر.
خاردال توخومو و مایا
(متّا 13:31-33، مرقوس 4:30-32)
18سونرا عئسا ددی: «تارینین پادشاهلیغی نه‌یه بنزه‌یئر و اونو نه‌یه بنزه‌دئم؟ 19خاردال توخومونا بنزه‌ر کی، بئر آدام گؤتوروب اونو اؤز باغیندا اَکدی. توخوم بؤیودو، بؤیوک آغاج اولدو و گؤیون قوشلاری اونون بوداقلاریندا یووا تئکدئلر.»
20و گئنه ددی: «تارینین پادشاهلیغینی نه‌یه بنزه‌دئم؟ 21او، خمئر مایاسینا بنزه‌ر کی، بئر آرواد گؤتوروب اونو اوچ اؤلچو#13:21 یونانی متنده «سِه‌ساتا» گلئب کی، تقرئبن ۲۲ لئتر اولور. اون ائچئنه قاتدی، اله کی، بوتون خمئر تورشودو.»
دار قاپی
(متّا 7:13-14، 21-23)
22عئسا شهرلر و کندلری گزئب، اونلاردا تعلئم وره-وره اورشلئمه طرف گدئردی. 23او واخت بئر نفر اونا ددی: «یارب، آیا نئجات تاپانلار آزدیرلار؟»
عئسا اونلارا ددی: 24«دار قاپیدان گئرمه‌یه چالیشین. سئزه دیئرم کی، چوخلاری گئرمک ائسته‌یه‌جکلر، لاکئن قادئر اولمایاجاقلار. 25اِو صاحئبی دوروب قاپینی باغلایاندان سونرا، سئز اشئکده دایانیب قاپینی دؤیمه‌یه باشلایاجاقسینیز و دئیه‌جکسئنئز: ”یارب، بئزه آچ.“
لاکئن او سئزه جاوابیندا دئیه‌جک: ”سئزی تانیمیرام، هارادانسینیز؟“
26او زامان سئز بله دمه‌یه باشلایاجاقسینیز: ”بئز سنئن حوضوروندا ییئب ائچئردئک و سن بئزئم کوچه‌لرده تعلئم ورئردئن.“
27لاکئن او دئیه‌جک: ”سئزه دیئرم کی، سئزی تانیمیرام، هارادانسینیز؟! مندن اوزاقلاشین، هامینیز حاقسیزلیق ادنسئنئز.“
28او زامان کی، ائبراهئمی، ائسحاقی، یعقوبو، و بوتون پیغمبرلری تارینین پادشاهلیغیندا و اؤزونوزو اورادان قووولموش گؤرورسونوز، اورادا آغلاشما و دئش قیجیرتماسی اولاجاق. 29شرقدن و قربدن، شئمالدان و جنوبدان گلئب تارینین پادشاهلیغیندا سوفره‌یه اوتوراجاقلار. 30باخ، اله آخیرکی‌لار وار کی، بئرئنجی اولاجاقلار و اله بئرئنجئلر وار کی، آخیرکی اولاجاقلار.»
ای اورشلئم!
(متّا 23:37-39)
31اله او زامان فرئسئلردن بعضئلری گلئب، اونا ددئلر: «بورادان چیخ، گت. چونکی هئرود سنی اؤلدورمک ائسته‌یئر.»
32عئسا دا اونلارا ددی: «گدئن او تولکویه دیئن: ”باخ، من بو گون و صاباح ناپاک روحلاری قوووب آداملارا شفا وره‌جه‌یم و اوچونجو گون مقصدئمه یتئشه‌جه‌یم. 33لاکئن بو گون، صاباح، و اِرته‌سی گون گرک گَزئم. چونکی مومکون دیئل کی، بئر پیغمبر اورشلئمدن کناردا هلاک اولسون.“ 34ای اورشلئم، ای اورشلئم، پیغمبرلری اؤلدورن و اونا گؤندَ‌رئلنلری داشا باسان! تویوق اؤز جوجه‌لرئنی قانادلارینین آلتینا ییغان کئمی نچه دفه ائسته‌دئم کی، من ده سنئن اؤولادلارینی ییغیم. لاکئن سن ائستمه‌دئن! 35باخ، اِوئنئز سئزه وئران بوراخیلیر. سئزه دیئرم کی، سئز ”ربّئن آدی ائله گلن موبارک اولسون“#13:35 مزمور ۱۱۸:۲۶ دئیه‌نه قدر، منی گؤرمه‌یه‌جکسئنئز.»
Currently Selected:
لوقا 13: موقدس کتاب
Highlight
Share
Copy
Want to have your highlights saved across all your devices? Sign up or sign in
© Elam Ministries 2013. All rights reserved.