Yowann 13
13
Golghi Treys an Dhyskyblon
1Mes kyns goel an pask, pan wodhva Yesu y eur dhe vos devedhys rag tremena a'n bys ma dhe'n Tas, ow kara y dus y honan, ev a's karas bys y'n diwedh. 2Pan esens ow tybri soper, wosa an jowl dhe worra yn kolonn Yudas mab Simon Skaryoth dh'y drayta, 3ow kodhvos an Tas dhe ri pup-tra oll ynter y dhiwleuv, hag ev dhe dhos dhiworth Duw ha dehweles dhe Dhuw, 4ev a sevis a'n soper ha gorra dhe denewen y dhillas, ha kemmeres towell hag omwrogysa. 5Ena ev a dhiveris dowr yn bason, ha dalleth golghi treys an dhyskyblon, ha'ga sygha gans an towell ganso mayth o grogysys. 6Ytho ev a dheuth dhe Simon Peder, neb a leveris dhodho, ‘Arloedh, a wolghydh tejy ow threys vy?’ 7Yesu a worthybis, ‘Ty ny wodhes lemmyn pandr'a wrama, mes ty a wodhvydh a-wosa.’ 8Yn-medh Peder dhodho, ‘Nevra ny wolghydh ow threys evy’ Yesu a worthybis dhodho, ‘Mar ny wrav vy dha wolghi, nyns eus dhis rann genev vy.’ 9Yn-medh Simon Peder dhodho, ‘Arloedh, na wra golghi ow threys hepken, mes ynwedh ow diwleuv ha'm penn!’ 10Yn-medh Yesu dhodho, ‘Neb yw golghys, nyns eus dhodho edhomm a wolghi marnas an treys, mes ev yw glan yn tien; ha hwi yw glan, mes nyns owgh hwi oll.’ 11Rag ev a wodhva neb a vedha orth y drayta, rakhenna y leveris, ‘Nyns owgh hwi oll glan.’
12Ytho wosa golghi aga threys ha kemmeres y dhillas hag esedha arta, ev a leveris dhedha, ‘A wodhowgh pandr'a wrugavy dhywgh? 13Hwi a'm gelow Mester hag Arloedh, ha hwi a gews yn ta, rag yndella yth ov. 14Ytho mar kwrugavy, agas Mester ha'gas Arloedh, golghi agas treys, peub ahanowgh ynwedh a dal golghi treys y gila. 15Rag my re ros dhywgh ensampel, may hwryllowgh hwi kepar dell wrugavy dhywgh. 16Yn hwir, yn hwir y lavarav dhywgh, nyns yw an kethwas brassa es y vester, na nyns yw an gannas brassa es neb a'n dannvonas. 17Mar konvedhowgh an taklow ma, gwynn agas bys mara's gwrewgh. 18Ny gowsav ahanowgh hwi oll; my a woer piw a dhewisis; mes hemm yw rag may fo an skryptor kollenwys, “Ev neb a dhybris bara genev#13:18 Ev neb a dhybris bara genev: War-lergh re a'n dornskrifow Ev neb a dhybris ow bara. re dhrehevis y wewenn er ow fynn.” 19Lemmyn my a lever dhywgh kyns y hwarvos, rag may kryssowgh pan hwarva, my dh'y vos. 20Yn hwir, yn hwir y lavarav dhywgh, neb a dhegemmer piwpynag a dhannvenniv a wra ow degemmeres vy, ha neb a'm degemmer vy a dhegemmer neb a'm dannvonas.’
Yesu a Dhargan y Fydh Traytys
Mat 26:20-25; Mark 14:17-21; Luk 22:21-23
21Wosa leverel hemma, Yesu o troblys y'n spyrys, hag ev a dhustunias ha leverel, ‘Yn hwir, yn hwir y lavarav dhywgh, onan ahanowgh a wra ow thrayta.’ 22An dhyskyblon a viras an eyl orth y gila, owth ombrederi piw esa ow kewsel anodho. 23Onan a'n dhyskyblon, ev neb a wre Yesu y gara, esa ow krowedha orth moes ryb askra Yesu; 24ytho Simon Peder a wrug sin dhodho dhe wovynn a biw y kewsis. 25Ytho ev a boesas war-dhelergh orth bronn Yesu ha leverel dhodho,#13:25 Ytho ev a boesas war-dhelergh orth bronn Yesu ha leverel dhodho: War-lergh re a'n dornskrifow Ytho ev neb esa a'y wrowedh orth bronn Yesu a leveris dhodho. ‘Arloedh, piw yw?’ 26Yesu a worthybis, ‘Ev yw, dhe neb y rov soubenn wosa my dh'y throghya.’ Ytho ev a droghyas an soubenn ha'y ri dhe Yudas mab Simon Skaryoth. 27Ha wosa an soubenn Satnas a entras ynno. Ytho Yesu a leveris dhodho, ‘An pyth a wredh, gwra yn skon.’ 28Mes denvyth a'n re growedhys ena ny gonvedhas prag y kewsis dhodho. 29Rag re a dybis, drefenn Yudas dhe witha an pors, Yesu dhe leverel dhodho, ‘Pren an taklow usi edhomm dhyn anedha rag an goel’; po may rolla neppyth dhe'n voghosogyon. 30Ytho wosa kemmeres an soubenn, ev eth yn-mes dison. Ha nos o hi.
An Gorhemmynn Nowydh
31Ytho pan o gyllys yn-mes, Yesu a leveris, ‘Lemmyn glorifiys yw Mab an den, ha Duw yw glorifiys ynno. 32Mars yw Duw glorifiys ynno, Duw ynwedh a'n glorifi ynno y honan, hag a'n glorifi a-dhistowgh. 33A fleghes vyghan, hwath termyn berr yth esov genowgh. Hwi a'm hwila, ha dell leveris vy dhe'n Yedhewon, “Le mayth av ny yllowgh dos”, lemmyn my a'n lever dhywgh hwi. 34Gorhemmynn nowydh a rov dhywgh, hwi dhe gara an eyl y gila; dell wrugavy agas kara, hwi ynwedh dhe gara an eyl y gila. 35Dre hemma pub den oll a woer hwi dhe vos dyskyblon dhymm, mars eus dhywgh kerensa an eyl orth y gila.’
Nagh Peder Dargenys
Mat 26:31-35; Mark 14:27-31; Luk 22:31-34
36Simon Peder a leveris dhodho, ‘Arloedh, ple'th edh?’ Yesu a worthybis dhodho, ‘Le mayth av ny yllydh lemmyn ow siwya, mes a-wosa ty a wra ow siwya.’ 37Yn-medh Peder dhodho, ‘Arloedh, prag na allav vy dha siwya lemmyn? My a dhaskorr ow bewnans ragos.’ 38Yesu a worthybis, ‘Ty a dhaskorr dha vewnans a'm govis? Yn hwir, yn hwir y lavarav dhis, ny wra an kulyek kana kyns ty dhe'm nagha teyrgweyth.
Currently Selected:
Yowann 13: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023