LUKA 22
22
Isua an phiar
(Mt. 26:1-5; Mk. 14:1,2; Jn. 11:45-53)
1Tin, chhang dawidim telh loh kût, Kalhlên Kût an tih chu a lo hnai ta a. #Exod. 12:1-27. 2Puithiam lalte leh Dân zirtîrtute chuan amah tihhlum dân tûr kawng an dap ta a; vântlâng an hlau si a.
Judan Isua mantîr a tum
(Mt. 26:14-16; Mk. 14:10,11)
3Sâwmpahnihte zînga chhiar tel, Juda, Iskariota an tiha chhûngah Setana a lût a; 4tichuan, a va kal a, puithiam lalte leh vêngtu sipai hotuten an man dân tûr a va sawipui ta a. 5Anni chu an lo lâwm hle a, pawisa pêk an tiam a. 6Ani pawh chuan a remti a, mipui awm loh laia mantîrna hun remchâng a zawng ta a.
Kalhlên Kût chaw buatsaih
(Mt. 26:17-25; Mk. 14:12-21; Jn. 13:21-30)
7Chhang dawidim telh loh kût ni, Kalhlên Kût berâmno an talh ni chu a lo thleng a. #Exod. 12:18-20; Deut. 16:5-8. 8Tichuan, Petera leh Johana chu a tîr a, “Kalhlên Kût chaw kan ei tûr va buatsaih rawh u,” a ti a. 9Anni chuan “Khawiah nge va buatsaih ila i duh?” an ti a. 10Ani chuan, “Ngai teh u, khawpuia in va luhin pa pakhat, hlumbêla tui chawiin a rawn tâwk ang che u, a luhna inah zui lût ang che u. 11Tin, in neitupa hnênah, ‘Zirtîrtuin, ka zirtîrte nêna Kalhlên Kût chaw kan eina tûr pindan chu khawiah nge, a ti a che,’ ti ang che u. 12Ani chuan pindan chungnung zau tak, engkim awm a kawhhmuh ang che u; chutah chuan buatsaih rawh u,” a ti a. 13Tichuan an kal a, an hnêna a sawi ang ngei khân an va hmu a, Kalhlên Kût chaw chu an buatsaih ta a.
Lalpa Zanriah
(Mt. 26:26-30; Mk. 14:22-26; 1 Kor. 11:23-25)
14Tin, a ei a lo hun chuan ani leh a zirtîrte chuan chaw chu an kîl ta a. 15An hnênah, “Ka tuar hmain he Kalhlên Kût chaw hi eipui che u ka duh tak meuh a ni. 16Ka hrilh a che u, Pathian rama a tak tak a thlen hma loh chu kût chaw hi ka ei leh tawh dâwn lo,” a ti a. 17Tin, no a la a, lâwmthu a sawi zawhin, “Hei hi la ula, in rawh u. 18Ka hrilh a che u, tûn a chinah Pathian ram a lo thlen hma loh chu grep rah tui hi ka in leh dâwn tawh lo,” a ti a. 19Tin, chhang a la a, lâwmthu a sawi zawhin a phel a, an hnênah a pe a, “Hei hi ka taksa a ni, in tâna pêk chu; min hriat reng nân hetiang hian ti ṭhîn rawh u,” a ti a. 20Zanriah ei zawh chuan chutiang bawkin no chu a la a, “He no hi ka thisena thuthlung thar, in tâna chhuak chu a ni.#22:20 Mss ṭhenkhatah ‘in tâna...’ tih aṭang hian tel lo. #Jer. 31:31-34.
21“Nimahsela, ngai teh u, mi mantîrtu tûr chuan he dawhkân hi a kîl ve reng a ni. #Sam. 41:9. 22Mihring Fapa hi Pathian ruat angin a kal dâwn; amaherawhchu, a mantîrtu tûr mihring chung chu a pik e,” a ti a. 23Anni chuan an zîngah chutiang ti tûr chu tu tak ni ang maw, tiin an inzâwt a.
Tu nge ropui ber
24An zîngah tu nge ropui bera ngaih tûr ni ang tih inhnialna a lo chhuak bawk a. #Mt. 18:1; Mk. 9:34; Lk. 9:46. 25Ani chuan an hnênah, “Jentail-ho lalte chu an intilal êm êm a, an chunga thuneitute lah chuan ‘Hotuṭhaa’#22:25 ‘thilṭhatitua’ tih theih a ni. tih hming te an invuah a.#Mt. 20:25-27; Mk. 10:42; Jn. 13:3-16. 26Nimahsela, nangni zîngah zawng chutiang tûr a ni lo ve. In zînga ropui ber chu tê ber angin awm sela, hotu ber chu rawngbâwltu angin awm zâwk rawh se. #Mt. 23:11; Mk. 9:35; Lk. 9:48. 27Tu nge ropui zâwk, chaw kîltu nge a rawngbâwltu? Chaw kîltu chu a ni lo vem ni? Nimahsela, kei zawng in zîngah rawngbâwltu angin ka awm hi.
28“Harsatna ka tawh chhûng zawng nangnin mi awmpui a. 29Ka Pain ram mi ruatsak ang bawkin kei pawhin ram ka ruatsak a che u; tichuan, ka ramah chuan ka dawhkânah in eiin in bâr ang a, 30lalṭhutthlênga ṭhuin Israel hnam sâwm leh pahnih ro in rêlsak ang. #Mt. 19:28; Mk. 10:37; Thup. 3:21; 20:4.
Peteran a phat dâwn
(Mt. 26:31-35; Mk. 14:27-31; Jn. 13:36-38)
31“Simon, Simon, ngai teh, Setanan buh thlei angin thlei a tum che u a ni; nimahsela, i rin a bo loh nân ka ṭawngṭaisak a che. #Job. 1:6-12; Amos. 9:9. 32Tin, i lo hawi kîr leh hunah i unaute tinghet ang che,” a ti a. 33Ani chuan, “Lalpa, i hnênah chuan tâng tûr leh thi tûr pawhin kal ve zêl ka inhuam asin,” a ti a. 34Ani chuan, “Peter, ka hrilh a che, ‘Ani chu ka hre lo ve,’ tia vawi thum mi phat hma chu zâninah âr a khuang lo vang,” a ti a.
Tangka ip te, khandaih te ken tûr
35An hnênah, “Tangka ip te, iptê te, pheikhawk te keng lova ka tirh che u khân tlâkchham in nei rêng em?” a ti a. Anni chuan, “Nei hauh lo,” an ti a. #Mt. 10:9,10; Mk. 6:8,9; Lk. 9:3; 10:4. 36Ani chuan, “Tûnah zawng tangka ip nei chuan keng sela, iptê pawh keng rawh se; khandaih nei lo chuan a puan hralh sela, lei rawh se. 37Ka hrilh a che u, ‘Ani chu mi sual zîngah an chhiar tel ta,’ tih Lehkha Thu kha ka chunga thleng ngei tûr a ni. Ka chungthu an ziak kha a thleng kim dâwn ta,” a ti a. #Isa. 53:12. 38Anni chuan, “Lalpa, en teh, hei khandaih pahnih chu a awm e,” an ti a. Ani chuan, “A tâwk e,” a ti a.
Oliv tlânga ṭawngṭai
(Mt. 26:36-46; Mk. 14:32-42)
39Tin, ani chu a chhuak a, a dân pângngaiin Oliv tlângah chuan a kal ta a; a zirtîrte pawh chuan an zui ve a. 40A hmun a va thlen chuan an hnênah, “Thlêmnaa in luh loh nân ṭawngṭai rawh u,” a ti a.
41Lung den phâk chin vêlah a va kal hrang a, a ṭhingṭhi a, a ṭawngṭai a. 42“Ka Pa, rem i tih zâwng a nih chuan he no hi mi lâk sawnsak rawh; nimahsela, keima thu ni lovin, nangma thu ni zâwk rawh se,” a ti a.#Mk. 10:38; Jn. 18:11. 43Vân ata vântîrhkoh pakhat, a tiharh tûrin a hnênah a lo lang a. 44A thlaphâng êm êm a, ṭhahnemngai lehzualin a ṭawngṭai a; a thlan chu thisen far lian tak angin a far a.#22:44 Mss ṭhenkhatah châng 43 leh 44 hi a tel lo.
45A ṭawngṭai zo chu zirtîrte hnênah a lo kal a, an lungngai tawngkhawng muthlu chu a rawn hmu a, an hnênah, “Engati nge in mutthlûk le? 46Tho ula, thlêmnaa in luh loh nân ṭawngṭai rawh u,” a ti a.
Isua man thu
(Mt. 26:47-56; Mk. 14:43-50; Jn. 18:3-11)
47Tin, a la sawi lai mêkin mipui an lo thleng a, Sâwmpahnihte zînga tel Juda an tih khân hma a rawn hruai a, fawh tumin Isua a rawn pan a. 48Nimahsela, Isuan a hnênah, “Juda, Mihring Fapa hi fâwpin em ni i mantîr dâwn?” a ti a. 49A vêla mite chuan thil lo thleng tûr chu an hmuhin, “Lalpa, khandaih kan lek mai dâwn aw?” an ti a. 50An zînga pakhat chuan Puithiam lalber bawih chu a sât a, a beng ding lam a hlawisak a. 51Isua chuan a chhâng a, “Khaih khaih, a tâwk e,” a ti a. A beng chu a khawihsak a, a tidam ta a.
52Puithiam lalte, Tempul pulis hotute leh upa lo kalte hnênah chuan Isuan, “Suamhmang man tûr ang ziazângin khandaih leh talhtum kengin in lo thawk a ni maw? 53Ni tin Tempulah in zînga ka awm ṭhin lai khân mi man si lo; nimahsela, tûn hi in chêt hun a ni, thim lal chêt hun chu,” a ti a. #Lk. 19:47; 21:37.
Peteran Isua a phat
(Mt. 26:57-58,69-75; Mk. 14:53-54,66-72; Jn. 18:12-18,25-27)
54An man ta a, Puithiam lalber inah an hruai lût a. 55Petera chuan hnung feah a zui a. Tin, in hual chhûng kawtlaiah mei an chhêm a, an ṭhu khâwm a, Petera pawh chu an zîngah chuan a ṭhu ve a. 56Mei ênga a ṭhu chu chhiahhlawh nula pakhat hian a han hmu a, a en vang vang a, “He pa hi a hnêna awm ve kha a nih hi,” a ti a. 57Ani erawh chuan, “Hmeichhia, ani chu ka hre lo ve,” a ti a, a phat ta a. 58A hnu lawkah mi dangin a rawn hmu ve a, “Nang pawh an zînga mi i nih hi,” a ti a. Petera chuan, “Mihring, ka ni awzâwng lo mai,” a ti a. 59Darkâr khat vêl hnuah chuan mi dangin, “He pa hi a hnêna tel kha a nih ngei hi maw, Galili mi a ni alâwm,” a ti tlat a. 60Petera chuan, “Mihring, i thu sawi chu ka hre hauh lo,” a ti a. A ṭawng lai mêk chuan âr a lo khuang nghâl a. 61Lalpa chu a lo hawi a, Petera chu a en a. Petera chuan “Zâninah âr a khuan hmain vawi thum mi phat ang,” Lalpan a hnêna a tih kha a hre chhuak a. 62Pâwnah a chhuak a, a ṭap ta zawih zawih a.#22:62 Mss ṭhenkhatah châng 62 hi a tel lo.
Isua an nuihzat a, an bêng
(Mt. 26:67,68; Mk. 14:65)
63Isua chelhtute chuan nuihza siam nân an hmang a, an bêng sawk sawk a. 64A mit an tuam a, “Tu nge bêng che, sawi teh,” te an ti a. 65Ṭawng chhe pui puiin an hau va.
Sanhedrin hmaah Isua a ding
(Mt. 26:59-66; Mk. 14:55-64; Jn. 18:19-24)
66Tin, ni a lo chhuah chuan vântlâng upaho, puithiam lalte leh Dân zirtîrtute chu an ṭhu khâwm a; an Sanhedrin-ah chuan Isua chu an rawn hruai a. “Krista chu i nih leh nih loh min hrilh rawh,” an ti a. 67Ani chuan, “Hrilh che u mah ila, in awih chuang lo vang; 68zâwt che u mah ila mi chhâng chuang lo vang.#22:68 Mss ṭhenkhatah ‘chhuah pawh mi chhuah lo vang,’ tih a tel. 69Nimahsela, tûn aṭang chuan Mihring Fapa hi Pathian thiltihtheihna ding lamah a ṭhu tawh ang,” a ti a. 70An zavai chuan, “Chu, nang hi Pathian Fapa i ni maw?” an ti a. Ani chuan, “Nangman, ‘i ni’ min ti alâwm le!” a ti a. 71Anni chuan, “Hretu dang tu nge kan ngaih tawh ang? Keimahni ngeiin ama kamchhuak kan hre ta alâwm,” an ti a.
Currently Selected:
LUKA 22: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.