Popular Bible Verses from Deuteronomio 4

Share

Yan teme spisil awo'tanic soc spisil ach'ulelic ya aleic te Dios awu'unic te c'alal tey ayex a, ya me ataic ta leel.

te bit'il mero lec yo'tan stuquel, ma me ba ya spijt'esex, soc ma me ba ya slajinex. Ma ba ya xch'ay ta yo'tan te trato la spas soc te antiguo ame'-atatic, te jc'axel yaloj te ya sc'otes ta pasele.

melel te Cajwaltic Dios cu'untique jc'axel ma smulan teme ay mach'a yan ya xbajt' awo'tanic ta stojole. ¡Te Diose jich c'oem te bit'il c'ajc' te spisil ya xchiq'ue!

Ja' yu'un mero tsajtaya me abaic, ma me xach'ay ta awo'tanic te bitic awilojique, soc ma me ayuc bi ora ya xch'ay ta ajolic. Ya me sc'an te ya awalbeyic yaiyic te awal-anich'anic soc te amamataquique.

“Ja' yu'un ac'a ta awo'tanic soc ta ajolic, te bit'il ja' Dios stuquel te Cajwaltic cu'untique. Ja' Dios ta ch'ulchan soc ja' nix Dios ta balumilal, ma'yuc yan te Diose.

Melel ¿ay bal yan nación te mero muc' te nopol ay ta stojol te diosetic yu'une, jich te bit'il mero nopol ayotic soc te Cajwaltic te Dios cu'untic, te jujun buelta te ya calbeytic wocole?

Te c'alal c'axix awu'unic spisil a te tulan wocoletique, teme ya asujt'es xan awo'tanic ta stojol te Cajwaltic soc te ya ach'uunbeyic te smandale

Ma me xach'ayic soc ma me xawac'beyic sjoy jxujt'uc te bila mandalil ya calbeyexe. Pasaic me te mandaliletic yu'un te Cajwaltic te Dios cu'untic, te yacon ta yalel ta atojolique.