Popular Bible Verses from Māa̍ti̍u̍ 5

Share

Wānā mɛ̍ndūl la̍mbūi̍yo̍ mā ku̍u̍mbu̍u̍ hɛ̄ŋgɔ̍ɔ̍ lēchōo̍ le̍. Wānā mɛ̍ndu̍l la̍mbūi̍yo̍ pɛ̍, nāa̍ te̍māa̍ ŋ̄ kɛ̄sī ni̍. Lo̍ŋ o̍ wa᷅ ni̍ le̍ mī wānāa̍ cho̍ chīɛ̄ī ni̍ŋ nda̍ kpo̍u̍ mā wa̍ chɔ̄ɔ̍. Mɛ̄ɛ̍ le̍nde̍ ko̍ni̍, nyɛ̄ wa̍wo̍ŋ nya̍ nɔ̄ wo̍ ō nɔ̄ le̍ dīōndɔ̄ɔ̍ ni̍. Ko̍ŋ to̍sā ni̍, tē wāŋnda̍ chē pɛ̍ sɔ̍ɔ̍ŋ kɛ̍ndɛ̄ŋ nya̍ tōsa̍ wo̍ŋ, ā sāŋga̍la̍ Mɛ̄lɛ̄ka̍ Fi̍nyā nyā o̍ cho̍ o̍ fo̍nda᷄ŋ ndɔ̄ɔ̍ wo̍.”

“Lā chō vɛ̄lɛ̄ māchūāā māā nyɛ̄ wa̍wo̍ŋ le̍ wāŋnda̍ kpo̍u̍ o̍ chi̍e̍ēŋndo̍ chōo̍. Chi̍e̍e̍ wa᷅ ho̍ō ō tāŋgūlāā o̍ pēmbēi̍ chōo̍ te̍mā wo̍ o̍ vi̍ŋnūŋ te̍.

Wānāa̍ cho̍ ha̍ā ma̍ dūāū kɔ̄llo̍ kpo̍u̍ o̍ Mɛ̄lɛ̄ka̍ lo̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, ā chō hūnɔ̄ɔ̄ wā nāa̍ pi᷅lɛ̍ nda̍ Mɛ̄lɛ̄ka̍ wa̍ā, ndu̍yɛ̍, mā chē ndu̍.

Wānāa̍ la̍ndu̍ŋ kɔ̍l māā wāŋnda̍ ā tōsa̍ nyɛ̄ Mɛ̄lɛ̄ka̍ hɛ̄na̍ŋ ndo̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō tōsā mā hīni̍ kɔ̄l mɛ̍ɛ̄.

Kɛ̍, ya̍ ya̍, I̍ cho̍ nya̍ dīmūllo̍ māā lā kāāla̍ wa̍nāa̍ tu̍l nya̍ lēyɛ̄ wa̍. Ndu̍yɛ̍, mī lā pīɛ̍i̍ Mɛ̍lɛ̄ka̍ le̍ mbō dɔ̄ū wānāa̍ tu̍sī nya̍ nyɛ̄ pālāa̍ chōo̍ wa̍ sa̍lā.

Mi̍ Chi̍i̍sū di̍mūl nda̍ māā, wānāa̍ cho̍ ha̍ā ma̍ sīnā māā ā chō ā tāmbɛ̍i̍ o̍ nyi̍nāā ni̍ŋ, ā nɔ̍ ti̍i̍nda᷄ŋ o̍ tīīnda᷄ŋ che᷅le̍ŋ te̍, mɛ̄ɛ̍ Mɛ̄lɛ̄ka̍ ma̍ tīīnda᷄ŋ nda̍, wānāā kāŋ ā pɛ̄l tɔ̄nɔ̄ɔ̍. Kāni̍ fo̍ndōle̍, ā kāndu̍ ni᷅ŋ bɛ̍ɛ̍ tɔ̍nɔ̄ɔ̍ sɔ̄lāa̍ le̍ mɛ̄ɛ̍ Mɛ̄lɛ̄ka̍ cho̍ nda̍ chōo̍ ma̍sāa̍ yɛ̍.

Wānāa̍ to̍sā mī kɔ̄l nyūlōo̍ mīīŋgu̍ wāŋnda̍ tɛ̍ɛ̄ŋ nda̍, nda̍ bɛ̍ɛ̍ ā pɛ̄l tɔ̄nɔ̄ɔ̍. Kāni̍ fo̍ndōle̍, nda̍ Mɛ̄lɛ̄ka̍ chūā ni̍ŋ ni̍ māā chūāūwāā ndɔ̄.

Wānāa̍ cho̍ ha̍ā wā cha᷄ŋndo̍ le̍ Mɛ̄lɛ̄ka̍ wa̍ bɛ̍ɛ̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō tōsā mā wa̍ a̍ kɔ̄ltā kɛ̄ndɛ̄.

Wānāā wāŋnda̍ tūsī nyɛ̍ pālāa̍ chōo̍ le̍ mɛ̄ɛ̍ nda̍ chō nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍ yɛ̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ ndu̍ cho̍ ni᷅ŋ nda̍ chōo̍ Māsāa̍ ni̍.

Wānāa̍ tu̍i̍i̍nūŋ wāŋnda̍ īnyīɛ̍ɛ̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, Mɛ̄lɛ̄ka̍ chō hūnɔ̄ɔ̄ nda̍ īnyīɛ̍ɛ̍ tūīīnɔ᷄ŋ.

Nya̍ wānāā wāŋnda̍ tɛ̄ɛ̄mbu̍u̍ tɔ̍ɔ̍ le̍ mɛ̄ɛ̍ nya̍ chō le̍ ya̍ yɛ̍ wa̍, o̍ ko̍ŋ kɔ̍ɔ̍lī, mā tūsi̍ nya̍ nyɛ̄ pālāa̍ chōo̍, ndu̍yɛ̍, mā dīmi̍ dīōmndā wɔ̄ɔ̍ŋndā fāŋgā a̍ nya̍ o̍kɔ̄ɔ̄ o̍ chōōla̍ŋ chōo̍ fo̍ndō fu̍u̍ wa̍, wānāā kāŋ lā pɛ̄l tɔ̄nɔ̄ɔ̍. Ndu̍yɛ̍, nya̍ wānāā wāā nu̍a̍ā, lā na᷄ŋ kɔ̍l bu̍tē. Kāni̍ fu̍u̍le̍, Mɛ̄lɛ̄ka̍ chō nya̍ nyɛ̄m kɛ̄ndɛ̄ŋ fāŋgā kɛ̄sūllo̍ o̍ fo̍ndāŋ ndɔ̄ɔ̍. Le̍nde̍ ko̍ni̍, nda̍ tōsa̍ a̍ wānāa̍ nda̍ a̍a̍ su̍a̍ā le̍ Mɛ̄lɛ̄ka̍ wa̍ a̍ hi᷅ŋ nya̍ tāse̍ wa̍ ni̍.

Wānāa̍ cho̍ ha̍ā ā tīīnda̍ŋ kpa̍āya̍ nda̍ pi̍la̍a̍ le̍ wa̍, ā pɛ̄l tɔ̄nɔ̄ɔ̍. Kāni̍ fo̍ndōle̍, wānāā kāŋ Mɛ̄lɛ̄ka̍ chō nda̍ nyɛ̄ o̍ nyɛ̄ kɛ̄ndɛ̄ o̍ chu̍e̍l nda̍ būŋgɛ̄i̍ kē.

O̍ ko̍ŋ kɔ̍ɔ̍lī, mi̍ Chi̍i̍sū di̍mī āā, “Mɛ̄ɛ̍ hɛ᷄lle̍ chō yɛ̍, le̍nde̍ nya̍ chō o̍ ŋ̄wāŋndā chīe̍e̍ lo̍ ni̍. Kɛ̍, tē hɛ᷄lle̍ ī ve̍ lɛ̍ nyɛ̄ i̍ nɔ̍ le̍ tōsāa̍ wo̍ tōsā le̍, wānā nɔ̍lā lɛ̍ ndi̍ mīŋgī mī ī tōsa̍ nyɛ̄ i̍ nɔ̍ le̍ tōsāa̍ wo̍ tōsā le̍. Vīōūwɔ̄ɔ̍ ko̍ni̍, nda̍ vīāū ni᷅ŋ ndi̍ ni̍. Tē ā vīōū yɛ̄ pɛ̍, wāŋnda̍ kēi̍ nīɔ̄ū lēchōo̍.

Le̍la̍ŋ, nya̍ nya̍, lā wa̍ a̍ bɛ̍ndāā o̍ nɛ̄ī o̍ nɛ̄ī ni̍ŋ mɛ̄ɛ̍ Mɛ̄lɛ̄ka̍ Fi̍nyā nyā o̍ cho̍ ɛ̄chɛ̍nɛ̄ wo̍ chō ō bɛ̄ndāā o̍ nɛ̄ī o̍ nɛ̄ī ni̍ŋ yɛ̍.”

Le̍la̍ŋ, lā ti̍a̍nu᷄ŋ te̍. Wānā wa̍ sūɛ̍i̍ to̍sā pɛ̍ a̍ di̍mi̍ āā, ‘I̍ cho̍ he̍ī ndo̍ō to̍sā.’ Tē a̍ ve̍ to̍sā le̍, a̍ di̍mi̍ āā, ‘I̍ cho̍ he̍ī to̍sā le̍.’ Nyɛ̄ o̍ nyɛ̄ chēle̍ŋ a̍ ha̍ndu̍ lēchōo̍ pɛ̍, mɛ̄ɛ̍ Māsa̍ Nyi̍nāā Wɔ̄ɔ̍ŋnda̍ ō nda̍ vēēlū vɛ̍lɛ̄ āā, Wānā Wɔ̍ɔ̍ŋndo̍ wo̍, mɛ̄ɛ̍ ndu̍ dɔ̍ū nu̍m dīōmndā lāŋ o̍ sōndō ni̍.”

Mi̍ Chi̍i̍sū hi̍a̍ū lāchī a̍ wāŋnda̍ pɛ̄ɛ̄kōo̍. Mbo̍ dīmūl nda̍ āā, “Lā tūēī māā na̍a̍ Chu̍ūwa̍ ma̍ pɛ̄ɛ̄kū fi̍nyāā nāā ma̍māa̍ āā, ‘Tē wāŋndo̍ pɛ̄l chāa̍ŋ ndɔ̍ hɔ̄lte̍ŋ pɛ̍, ndu̍ bɛ̍ɛ̍ lā pīɔ̍l ndu̍ hɔ̄lte̍ŋ. Tē wāŋndo̍ bɛ̄ŋi̍ chāa̍ŋ ndɔ̍ chīŋnde̍ pɛ̍, ndu̍ bɛ̍ɛ̍ lā bɛ̄ŋi̍ ndu̍ chīŋnde̍.’ Kɛ̍, ya̍ ya̍, I̍ cho̍ nya̍ dīmūllo̍ māā tē wāŋndo̍ tōsa̍l nu̍m sūɛ̍i̍ wɔ̍ɔ̍ŋnde̍ pɛ̍, mi̍ŋgūl ndu̍ māa̍ le̍. Ndu̍yɛ̍, tē wāŋndo̍ lɔ̄ɔ̄ nu̍m kpa᷅ŋnde̍ pɛ̍, ma̍l ndu̍ ō lɔ̄ɔ̍ vɛ̍lɛ̄ ī pīlɛ̍ī.

Mi̍ Chi̍i̍sū lo᷅ lo̍ŋ mbo̍ yɔ̄ŋgū sīlāa̍ o̍ lētāle̍ ni᷄ŋ āā, “Le̍la̍ŋ, tē hɔ̄ltē nūmnde̍ŋ lē wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, mɛ̄ɛ̍ ka̍la̍ le̍ŋ mā vīōū. Kāni̍ fu̍u̍le̍, ō bɛ̄nda̍ mā fu̍la̍ hɔ̄lte̍ŋ mbo̍ hīāū dīāllūŋ nūmndo̍ŋ wāa̍ ŋ̄ chīīŋīāā kpo̍u̍, kɛ̍ ndu̍yɛ̍, mā hu̍ŋ kɔ᷅ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā yɔ̄ŋ wɔ̄ɔ̍ŋnda̍ wa̍. Ndu̍yɛ̍, tē bā nūmndo̍ wa̍ tōsāa̍ pɛ̍ mā tōsā yɔ᷅ŋ wɔ̄ɔ̍ŋndo̍, ki̍o̍lu̍ ndu̍ kpa̍li̍ mā vīōū. Kāni̍ fu̍u̍le̍, ō bɛ̄ndā mā fu̍la̍ bāa̍ ō pīlɛ̍ mbo̍ hīāū a̍ dīāllūŋ nūmndo̍ŋ wāa̍ ŋ̄ chīīŋīāā, kɛ̍ ndu̍yɛ̍, mā hu̍ŋ kɔ᷅ o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū ni̍ŋ wa̍nāā yɔ̄ŋ wɔ̄ɔ̍ŋnda̍ wa̍.”