Popular Bible Verses from Injil 1: Moti 6

Share

Erlagi tumra foyla-u Allar morzi zugaia solo, tan bashshair dandat ro. Teu ita hokkolta-o tumra faibae.

Ḳailkur sinta ḳorio na, ḳailkur befar ḳailkur ufre saṛi deo. Dinor azab dinor lagi zotesṭo.

“Erdae ami tumrare ḳoiram, kila ḳaitam ar kila finditam, ita loia sinta ḳorio na. Ḳani taki zan boṛo, ḳafoṛ-sufoṛ taki shoril boṛo.

Oile tumi dua ḳorar bala goror dorza-zanala lagaia dua ḳorio, ar tumar niraḳar baf, zenre deḳa na gele-o azir asoin, hou Allar gese saio. Tain to gufon hoḳolta deḳoin, tain-u tumare fol diba.

Erlagi tumra olaḳan dua ḳorio, O baba, amrar behesti baf, tumar nam fak-fobitro mana ouk. Duniait tumar bashshai zoldi auk, shob tumar morzi mafik kora zauk, behesto zela oula duniait, behesto zela oula duniait.

O baba, aizkur ḳani aizku deo, maf ḳoro amrar hoḳol oforad

zara amrar birudde ḳorse faf, amra to tarare dilaisi maf.

Falaio na amrare forikkat, Shoytanor ḳobza taki koro ḳalas.

Huno, tumra zudi aroḳzonor oforad maf ḳoro, te tumrar behesti baf Allae-o tumrar oforad maf ḳori diba.

“Asmanor ou fakintor bae sao, tara zala-o bain ḳore na, foshol-o ḳaṭe na, ugaro kunta zomae na, ḳali tumrar behesti baf Allae tarar kuraḳ dein. Te tumra kunu ita taki aro dami nae ni?

“I zindegit tumra nizor lagi oto don-shompod zomaio na. Duniar shompodor maze zongare dore, fuke ḳae ar hing kudia sure ney. Oile behestor maze nizor lagi samana zomao, hino zongare dore na, fuke-o ḳae na ar suri-o oy na. Mono rakio, tumar don zeno, mon-o hono roy.

“Zano ni, kunu gulame-u dui munibor kezmot ḳorto fare na, he eḳzonre ginnaibo aroḳzonre bala faibo. Arnae eḳzonor bae kial ḳorbo, aroḳzonre elami korbo. Te tumra-o Alla Pak ar don-samana, duiotar kezmot eḳloge ḳortae faro na.

Deḳrae ni, zongolor maze ou zeta shundor ful oḳon ase, ḳail oile-u manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrare-o tain shundor ḳori hazaita nae ni?

Oile tumi kunu dan-ḳoyrat dile, tumar ḍain ate bilaile bau ate zanu na zane. Oula lukaia dan ḳorio. Teu tumar behesti baf Alla, zein lukaia hoḳolta deḳoin, tain-u tumare furuskar diba.

“Tumra hushiar roio, manshore deḳanir lagi ebadot-bondegi korio na, ila ḳorle tumrar behesti baf Alla Pakor ges taki kunu furuskar faitae nae.

“Tumra zebla ruza raḳo, ou shomoy bonḍo oḳlor laḳan muk kala ḳorio na. Tara ruza raḳsoin, oḳan deḳanir lagi souk-muk kala ḳori raḳoin. Ami tumrare hasau ḳoiram, itae to tarar furuskar failise. Oile tumi ruza raḳle muk-at doio, matat tel-fani dio, zela manshe buzto na fare, tumi ruza raḳso. Teu tumar niraḳar baf, zenre deḳa na gele-o azir asoin, hou Allae-u ita deḳba. Tain to gufon hoḳolta deḳoin, tain-u tumare fol diba.