Ə́rɨ́b nùb tómé yi ə́llé 3
3
Nɨ̀ŋgwá kɨ̀ɓók kù wáaŋtɨ́
1-2Mvii ɓɨ̀r kù no, Píyéèr ɓe Jâŋ yaá wúínɨ gìnɨ Dúú Jíri Mèèín gwɨ̀ì mɨ̀yú̧ mvii taarɨ́bí. Nɨ̀ŋgwá kɨ̀ɓók fɨnni kù yaá ku. Ye lâs kùb yaá ŋgə́ hàìnsònɨ Dúú Jíri Mèèín ku dɨ̀ɨ̀nɨ gín ɓavɨ̀r kùb ya ɓékom «Ɓavɨ̀r Nyɔ̧ɔ̧́» àm ŋgə́ ɓwei nùb yi du gònɨ lénɨ yó kuù mòné. 3Ŋgə́ ɨ́ pê Píyéèr ɓe Jâŋ gònɨ lénɨ, á ŋgə́ ɓwei ŋgáb ɓoré. 4Ŋgáb ɨ́ kpáàŋndê ŋgə́ íí no, á Píyéèr tana ŋgə́: «Góomye nɨ́m.» 5Nɨ̀ŋgwá rè ɨ́ yà ŋgáb góòmnyààŋnɨ, ɓetí ŋgə́ yaá lə́ə̀mnɨ ŋgáb ɓa ní nànɨ nɨ́m kù á. 6Kí á Píyéèr tana ŋgə́: «Mɨ ɓe njɔdì ɗàà, ɨ́dù nɨ́m mɨ du ɓe kíí, mɨ á wu nànɨ. Ɓe ɨ́r nyòm Yésù Krístù nò Nàsàréèt, éíwúum còóm, gɨm gùr!» 7Á Píyéèr ɗamwú ŋgə́ còóm ɓe ŋgáár lam. Ɓè mu̧u̧ gurub kɨ̀ɓók lèè ɨ́ tàmcù. 8Ŋgə́ ɨ́ sɨ́mwû ɗàá ku, ŋgə́ ɨ́ ə́ŋhȩ̀, ɗà ŋgə́ ɨ́ yàrê gùr. Ŋgə́ ɓe nùb tómé ɨ́ lə́gì Dúú Jíri Mèèín ku ŋgə́ a ga̧a̧gece, ŋgə́ a sáktɨmgbíice Mèín. 9Nɨ̀vɨ́tɨ̀b lâs ɨ́ pê ŋgə́ gìnɨ gùr ŋgə́ a mgbíigece Mèín. 10Ɓwâ ŋgáb yi ɗəəŋcu ɨnayâna nɨ̀ŋgwá yi dukom gín ɓavɨ̀r nyɔ̧ɔ̧́ Dúú Jíri Mèèín, ɓoréé rɨ á mè rè na rèé, ŋgáb ɨ́ yà dùkɨ́nɨ ɓɔ̧ ha̧a̧ ɓe nɨ́m yi ndɨŋ kɨ́.
Píyéèr á Dúú Jíri Mèèín no nyìnnànɨ nɨ̀vɨ́tɨ̀b
11Hȩ nɨ̀ŋgwá rè ya du nɨ́ mbɨ́kwa tùtèé Píyéèr ɓe Jâŋ ndèé, á nùb ya du ɓèé ya gbɨɨŋɓa àm kíì lâs, ya lugainwo ŋgáb gwa jíri kùb ya du ɓénɨ «Gwa Sàlòmóòŋ» ndɨ no. 12Ɓwâ Píyéèr ya pə́ u̧nèé, ŋgə́ ɨ́ fɔ̂ nɨ̀vɨ́tɨ̀b ɨnè: «Nùb Ísràyéèl, nyí gbɨɨŋce ɓe wáàŋkî yáb lèè àm níì? Nyí góomkɨ́ce nɨ́ nɨ́m hȩ nɨ́m tɨ wáaŋɓa nɨ nɨ̀ŋgwá rè ɓe nyòm nɨ́m nɨ̀mibi, kɨ́ kù àm nɨ́m du nùb jəŋɓɔ̧́ Mèèín ɓe àm níì? 13Mèín Àbɨ̀ràhâm, Ìsâk, Yákòb ɓe tákɨ̀rɨ́b ndùtì ndútí nɨ́mè ya jəŋɗómkomndé ɨ́ túumɓa nɨ́ dɨmɨɨr Yésùù nò ə́ré ŋgéé ru. Nyí nɨ̀miib, nyí tɨ áá ŋgə́, ɗà nyí ɨ́ sə́rɨ̀kɨ́nà nùb kɨ́ɨ́ ti rèè. Nyí ɨ́ mvúlèhè ŋgə́ Pìláàt tíí, u̧nè kɨ́ nò kɨ́ ya ɗú nɨ́ ŋgə́ mbɨ́ɨ́nɨ. 14Nyí ya mvúlehií nò ya du járkɨ́ták ɨ́ dùgwà ɗɨ́ɗɨ̧́ Mèín íhín, nyí ɨ́ ɗúbɨ́ŋhȩ̀ Pìlât mbɨ́khó̧nà nyí ŋgàŋgáŋ kàm kwíhɨ nɨ̀rì. 15U̧nè á nyí ya kwíhɨ nò du nànɨ mèè. Ɨ́dù Mèín yi səəmcuhó̧ó̧ ŋgə́ mvókín nɨ̀kwíbí, nɨ́m á cè mɨ̀námé àm kíì. 16Nɨ̀ŋgwá nyí ɗəəŋɓa mîn, nyí pə́kɨ́ rè, nyòm du ɓe ɨ́r Yésùù, ɓe ə́ə́m yɨ́ɨwo ɨ́r kɨ́ yaà ɨ́ nacu ŋgə́ nyòme ru. Ə́ə́m du ɓe ɨ́r Yésùù ɨ́ ndɨŋ ŋgə́ wáàŋɓà gwìí mwi̧ hȩ nyí pə́ ɗàrɨ́ ru.
17«Ɨ́dù ɗàrò, mwin yàá bɨ, mɨ ɗəəŋɓatɨ́ mîn ɨnayâna, nyíne mvènnɨ́b nyínè tɨ ndɨŋ ɓe Yésù u̧ àm nyí tɨ du nɨ́ ɗə̀ə̀ŋwáá á. 18Ɨ́dù u̧ á Mèín yúhɨ nɨ́ nɨ́m ŋgə́ ya tawokɨ́yaye tɨ́kɨ̀nɨ́b ŋgéé ɓɔ̧ɔ̧ ɨnayâna Mèsî kwá pə́ jábɨ́r na rɨ. 19Ɓandɨnáam sum, nyí a gàìncùwò Mèín àm ŋgə́ a ákɨ́nà nyí cumí. 20U̧ á Mèín nò du Kékéé ɓa ndɨ̀ŋnɨ kəŋmbə́r kerîn ùhí sə̀mtɨ, ɗà ŋgə́ a tómnà nyí Yésù no du Mèsî ŋgə́ ya cakɨ́na nyínè. 21Kɨ́ ɗàròò, ɗú Yésù dùkɨ́yè ɓɨllin á, há̧á̧ hȩ ɓwâ nɨ́ɨ́b lâs nyaŋcuré ɓa ɗóòniì, hȩ Mèín yi takɨ́yaye tíí kúríí tɨ́kɨ̀nɨ́b ya éínakom ŋgéé ɓɔ̧ɔ̧ rɨ u̧. 22Mòyîs yi taɓacéyetɨ́ ɨnè: ‹Kéké nò du Mèín nyínè kwá tómna nyí tɨ́kìn hȩ ŋgə́ tómwoɓwée mɨ rè. Tɨ́kìn kɨ́ kwá du nò nyínè gbàŋné. Nyí a jə̀ŋ nɨ́m ŋgə́ tana nyínè lâs. 23Nò kwá du tɨ́kìn kɨ́ jə̀ŋwáá, kùb kwá ŋgɨ́íhó̧kɨ́ ŋgə́ gbàŋ Mèèín no, ɗà kùb a kwíhè ŋgə́.› 24Tɨ́kɨ̀nɨ́b Mèèín, yàwònɨ Sàmíyèl ɓe nùb ya turé ŋgéé lâs, ya ɓéeɓwéetɨ́ jíìb lè. 25Ɓwáár Mèín ya ɓwáíwo tɨ́kɨ̀nɨ́b noò ɓɔ̧ɔ̧ kɨ́ ók ɓe nyí á, àm kɨ́ á nyí kwaɓwéhe gɔ̀ jin nyàáŋ Mèín ya jin ɓe tákɨ̀rɨ́b ndùtì ndútí nyínè ɓwâ ŋgə́ ya tana Ábɨ̀ràhâm: ‹Mɨ kwá fam gbàŋ ɗɔ̀bɨ́nné lâs ɓe ɨ́r nyȩrɨ́b woò› rɨ. 26U̧ á Mèín ndɨŋ nò ə́ré noò fó̧cùyàyè sèrìn ɓe ɨ́r nyínè, ŋgə́ ɨ́ tôm ŋgə́, ŋgə́ gènà nyí lâs faám, ŋgə́ a ndɨ̀ŋ nɨ̀mwi̧ cə́ndɨ ɗɨ́m ɓáŋhɨ́b no sóò.»
Επιλέχθηκαν προς το παρόν:
Ə́rɨ́b nùb tómé yi ə́llé 3: NTV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2007 Alliance Biblique du Cameroun, B.P. 1133, Cameroon