YOANES 3
3
Yésus baa Nikôdém
1Môt éziñ a nga too e nsamba Befarizieñ, njôô Beyude, a too jôé na Nikôdem. 2E nde môt ate a nga ke e be Yésus a alu a jô nye na: A Rabbi, bi yemeya na ô ne ñyeʼele bôt, ô nga so e be Zambe; amu teke môt éziñ a ne bo bitua bi mam wo bo, nge Zambe a se ke be nye. 3Ane Yésus a nga nyoñe nkobô a jô nye na: Bebela, bebela émien, ma kate wo na, nge môt teke bialé mfefé, a se ngul ya yen Ejôé Zambe. 4E nde Nikôdem a jôô nye na: Môt a ne beta bialé aya éyoñ a nto nnôm? Ye na a bulane ke nyiin abume be nyia, éyoñe te a beta bialé? 5Ane Yésus a nga yalane na: Bebela, bebela émien, me ma kate wo na, nge môte teke bialé a mendim a Nsisim, a se ngule ya nyiin Ejôé Zambe; 6e jôme ja bialé a minsôn é ne minsôn, a e jôme ja bialé a Nsisim é ne nsisim; 7te wo vembe amu ma jô wo na: Mia yiane bialé mfefé. 8Evuñulu ja vuñ mfaʼa ja kômbô, wo wôʼô je éduñ, ve ô nji yem e mfaʼa ja so, nge mfaʼa ja ke; avale té fe e né a môt ase a bialé a Nsisim. 9E nde Nikôdem a nga yalan a jô nye na: Mame mete me ne boban aval avé? 10Ane Yésus ki a nga yalan a jô nye na: E wo ô ne ñyeʼele ya Israél, ye wo yiane dimi mame mete? 11Bebela, bebela émien, ma jô wo na bia kobô ajô bia yem, a bia boʼolô e jôme bi nga yen, ve jame bia kañete mi nji kômbô nyoñe de. 12Eyoñ ma kate mia mame ya si ndôn, mi teke yebe, mia ye buni aya nge ma kate mia mam ya yôp? 13Tekeʼe môt éziñ a nga tameya bet e yôp, foʼo ve nyô a nga so yôb a suse si nye a ne Mone Môt. 14Aval ane Môze a nga tyelé nyo mvot akône nlinga yôb e fé été, avale te fe Mone Môt a yiane tyeléban e yôp 15na, e môt ase a buni nye, a bi ényiñe ya nnôm éto. 16Amu Zambe a nga dañ nyeʼe si nyô, nde a nga ve atyiʼi Mone dé, ajô te e môt ase a buni nye, a ne teke jañ, ve bi ényiñ ya nnôm éto. 17Amu na Zambe a nji lôme Mon wé si nyô amu na a tyiʼi si nyô mejô, ve na si ndôn é bi ényiñ amu Mon. 18E môt a buni Mon a ne teke ajô; ve nyô ki a nji buni, nye ajô dé e tyiʼiya, amu a nji buni jôé atyiʼi Mone Zambe. 19Ntyiʼan ajô ô ne na, éfufub é nga zu e si ndôn, ane bôte be nga viane nyeʼe dibi alôt éfufub; amu mimboone miab mi mbe abé . 20Amu na e môt a bo mbia be mam a nji nyeʼe éfufup, a teke ke mfaʼa éfufub é né, amu mimboone mié mi za kulan. 21Ve môte ki a bo mame bebela, e nye a ke éfufup, mimboone mié mi yenéé na mi nga boban e be Zambe.
Yésus baa Yôanes Babtist
(Yoa 1:19-24)
22E mvuse ya valé, ane Yésus baa beyéʼé bé be nga ke e si ya Yudé, a ntoo wé, baa be be, a du bôt. 23Yôanes fe a mbe a du bôt e mendime me Ayinôn, bebé a Salim, amu mendim me mbe abui valé; bôte be nga zu ñhe a duban. 24Eyoñe te be ngenane te wua Yôanes e nda mimbôk. 25Ane nsañetane nkobô éziñ a nga boban ajô ntunan e zañe beyéʼé be Yôanes a mone Yude éziñ. 26E nde ñhe be nga ke e be Yôanes a jô nye na: A Rabbi, e môt mia nye mi mbe e kindiʼi Yordane yat, e nyô ô nga kañete ajô dé, ke nye a nga du bôte nyô, a bôte bese ba mane ke e be nye. 27Ane Yôanes a nga yalan a jô na: Môt a se ngul ya nyoñe jôme si jôme kala éziñ, nge é nji bo nye mveane ya yôp. 28Miabebien mi ne ma bengaa ane me nga jô na, sake ma me ne Krist, ve na, me me ne nye nlôman ôsu. 29E môt a bili mbom, e nye a ne nnôm; ve môt a ne mvôé ki, a tebe nye fefe, a wôʼô ane a kobô, a fônôk, amu a wôʼô tyiñ nluʼu minga. E nde mevaʼa mame mete me nto njalan. 30Nye a yiane nenenen, ve me ki ma yiane wulanwulan si.
E nyô a so e yôp
31E nyô a so yôb a ne bôte bese e nlô yôp; e nyô a so e si a ne jôme ya si, a kobô fe mame ya si; ve nyô a so e yôp a ne bôte bese e nlô yôp; 32e jam a nga yen a wôk nde ete, a kañete ane ngaa yʼété, ve teke môt a kañese nyoñe nkañetane wé. 33E môt a nyoñ e mvaʼa a tyik a kpwelé ndeme ya na Zambe a ne bebela. 34E nyô Zambe a nga lôm a kobô mejô me Zambe, amu Zambe a ve nye Nsisim teke vek. 35Esaa a nyeʼe Mon, e nde fe a nga ve nye mame mese e wo été. 36E môt a buni Mon, a bili ényiñe ya melu mese; e nyô ki a nji buni Mon, aa voʼo yen ényiñ, ve ayaa Zambe da kôm éto e be nye.
Επιλέχθηκαν προς το παρόν:
YOANES 3: BULU09
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© LʼAlliance Biblique du Cameroun, 2009