Génesis 8
8
Entsa nujagkrua kuyuamu
1Yuus Noénka ashi nijai arcanam chumpirainanka kajinmatkichuiti. Nutika asa nujagken ukuyuati tusa nasen akupkauwaiti. Turam nujag kuyutan nagkamawaiti. 2Tura yumi yutausha, tura nugkanmaya entsa jinainasha ashi nagkantrauwaiti. 3Tumamtai nujag kuyutan nagkama ciento cincuenta tsawan ejé kuyuki wea asamtai, 4siete nantu ejé nuiya diecisiete tsawan ejé, mura Ararat tutainam arca awamnaiti. 5Tura diez nantua nuna yama nagkamchak tsawamunam mura ainan tsakari wantintrauwaiti. 6Tura iimsatin chigkaimun cuarenta tsawan nagkamasmatai Noé urainaiti. 7Nutika entsa urukawak tusa nekaattsa chuagkan jiiki akupkauwaiti. Turam entsa kuyua nugkan ukumati tusa weká asa, tatsuk tuke megkaakauwaiti. 8Tumamtai entsa kuyuayash tusa nekaattsa, paumnasha akupkauwaiti. 9Antsu paumka entsa kuyua nugkan ukumeachu asamtai, ni ekeemsa ayammaintrin wainkach arcanam ataksha waketki jeaamtai, Noé uwejen atsapti nui ekeemsamtai arcanam awayaawaiti. 10Nutika siete tsawan nakas pauman ataksha akupkauwaiti. 11Turam kintamai olivon nuken apaku taawaiti. Turamtai kuyuawapi tusa Noé nekaawaiti. 12Tura siete tsawan nakas, pauman ataksha akupkauwaiti. Turam nuiyagka tachauwaiti. 13Noé seiscientos uno uwí ején ai, entsa kuyua nugkan ukumawaiti. Tura yama nagkamchak nantua nuna achik yama nagkamchak tsawamunam, Noé arcan urainaiti. Tura iikma nugkaka entsa kuyuak ukumam aun wainkauwaiti. 14Tura jimar nantua nui veintisiete tsawan jeaamtai, entsa kuyuak nugkan shir ukumawaiti.
Noé arcanmaya jinkimu
15Tumamtai Yuus Noén chicharuk: 16Yamaika ame, amina nuwem, uchiram aina, tura uchirmi nuwe ainajaimak jinkita. 17Tumakum kuntin aina, nanamtin aina, tagku aina, japinas wekain ainasha jiirta. Nutikam ashi nugkanam shiakar pampagkarti, tusa tinaiti. 18Tama Noé nina nuwe, nina uchiri, tura nina uchiri nuwe ainajaimak jinkinaiti. 19Tura kuntin aina, tagku aina, tagkuchu aina, nanamtin aina, tura japinas wekain ainasha ashi jiintraruiti. 20Turam Noé Yuusan eme anentas iiyak tagku aina maa patasa epeatnun najanawaiti. Tura umik kuntin pegker ainan iis, tura nanamtin ainancha pegker ainan juki epeawaiti. 21Noé turamun Yuus pegker enentaimtusuiti. Tura Yuus chichaak: Yamai nagkamsanka shuara tunaurin nugkanmaya ainan ashi ijinaj jutikashtinaitjai. Shuar ainaka uchichik nagkamsag tunau takatnaka enentaimtin ainawai. Tuma asamtai ashi kuntin ainan ijinaj jutikanka ijinashtinaitjai. 22Nugka meseatsaigka arakmaka árak juutka nagkankashtinaiti. Tsetsek tepeamusha, seemamusha, asatcha, tsetsemamusha, yumi tepeamusha, tsawaisha, tura káshisha atinaiti, tusa tinaiti.
Επιλέχθηκαν προς το παρόν:
Génesis 8: hubDBL
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2010, Wycliffe Bible Translators, Inc. All rights reserved.