Mateo 27
27
Chuiquid tapa Pidato yacno Esus buanaid
(Madc. 15.1; Duc. 23.1-2; Uan 18.28-32)
1Adnubien Nuquin Papa ismequin nëish iua cuessunneshun pichicaquidon chuiquidobëd isadaidbo tsësiobobëdi Esus isec tabadec ushenquio yec badiadbudpanëdash. Adec badiadbudshun Esus chieshënquin: Ma Esus uënës uamenu. Buanec nidnunid, queshun 2podo cataneshun Doma yacnocquid chuiquid cobednadod Pidato cuëmëdquid yacno Esus buampanëdash.#27.2 Doma yacnocquidon chuiquid tapan: Anocquidon chuiquid cobednadod icta, cac Doma yacnocquid iquec isadaidbo icsaquid cuidquid Pidato nepanëdash. Esus uënës uamete bunquin aid yacno isadaidbon chuiquidon Esus buampanëdash.
Esus bedmequid Udas tëtaniadec uënësaid
3Adnubien Udas Esus bedmebued: Cuessunnemechitembien iquec. Cuessunnemetiapimbo iquebique. Umbi shocosh ushu nacnenaid piucquid tsasicquid 30ted bedbued meneuatannu, quianec abi menebued nëish iua cuessunneshun pichicaquidon chuiquidobëta tsësiobo menec nidpanëdash. 4Nidshumbic chuiquido naden chuituidpanëdash: Cuessunnemenuen bëdambocquidi mibi bedmec icsachitobi. Nëid mimbi menebued mibi menenuec chobi. Në bed, caquien chuiquidon: Padi. ¿Atotsieshun nai? Ma mimbi bedmepaboc, quepanëdash Udas caic. 5Adoaquien Nuquin Papa tabadte shubu dapa puduedte shëcuën ambi bedbued shocosh ushu nacnenaid piucquid tsasicquid 30ted ansecanec uanno cuenash Udas tëtaniadec uënëspanëdash.
6Aden piucquid tsasicquid ansecacsho bedashien Nuquin Papa ismequin nëish iua cuessunneshun pichicaquidon chuiquido: Nuqui dayun uaid piucquid tsasicquid utsibëta dayun uatiapimbo iquec. Cuessunnemenuen meniaid piucquid tsasicquid dayun uatemaid nec, quedenneque. 7Matsu nacnenquidën tied bedquin nëid piucquid menenuna. Matses utsi isedanquido uënësacsho ambo chococanun aid tied bednuna, queshun aid piucquid menequin bedpanëdash. 8Aidon bedacsho issun nëbi aid tied cuënquin nadopec: Intac mëyante tied nec, capec. 9Aden Udasën piucquid tsasicquid 30ted menete chuiquin nuquin tsusedpa Nuquin Papan oncamiaid Edemiasën naden dada uapampic: Iuanun bednuen isadaidbon piucquid tsasicquid 30ted matses meneuidaid beduashun 10matsu nacnenquidën tied bedquin piucquid menendac, quequin Nuquin Papan tantiamiacpadombuen dada uaombi, quepampic.#27.9-10 Piucquid menete Sacadiasëntsen chuipampic. Sac. 11.12-13bëta Ede. 18.1-7 isbanta.
Chuiquid tapa Pidaton Esus chuimiaid
(Madc. 15.2-5; Duc. 23.3-5; Uan 18.33-38)
11Adnubien chuiquid tapa cobednadod Pidaton abi yacno Esus bëacsho naden chuipanëdash: ¿Min matses isadaidbon chuiquid tapamboda mibi nepe? caquien Esusën: Mimbi chiacpadquid nebi, capanëdash. 12Adnubien Nuquin Papa ismequin nëish iua cuessunneshun pichicaquidon chuiquidobëtan isadaidbon chuiquid tsësiobon: Esusën icsambuen naosh, quequin Pidato chuipanëdash. Aden chuisho tantiashun Esusën ëcbedenquio icpanëdash.
13Adshobien Pidaton Esus padpiden chuiuaquin: Mimbi icsambuen naid dadpen chuipec. ¿Tantienquioda ique? ¿Ëcbedtiapimboda ique? caquien 14Esusën ëcbedenquio icuapanëdash. Adsho isash tantiadempambo yec cobednadod Pidato: Adquid isambo iquembi, quepanëdash.#27.12-14 Aden muaquidon chuite Isayasën chuipampic. Isa. 53.7 ista.
Cueste napotiaidën dectanquin Esus cuessunne, quequin chiaid
(Madc. 15.6-20; Duc. 23.13-25; Uan 18.38—19.16)
15Min tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshën setan setanquien quënën tsadunmiaid isadaidbo icsho abentsëc Pidaton puduenmedednec. Adshun: ¿Tsutsi abentsëquimbi puduenmepe? cac isadaidbon chiacpadquid abentsëc puduenmepadednec. 16Adoaid icnuc chieshëmënquidquio icquin ambi icsambuen naid matses dadpenshun tantiaid icsho Esus cashumbic Badabas quequin cuënaid quënën tsadunmiaid icpanëdash.
17Adnubien Esus bëbuedo abi cuidte chuisho tantianuec chochoash dadpenquio tabadpanëdash. Adsho issumbien Pidaton: ¿Tsutsi abentsëquimbi puduenmepe? ¿Badabas cuënaidtambi puduenmepe? ¿Aid padenquio icquin nëbi mimbi bëbued Esuquidistu caidtambi puduenmepe? capanëdash. 18Naden tantiaquin Pidaton chuipanëdash: Esus chieshënquidon: Ubi chuiquid tapa icmenquio icquin Esus chuiquid tapa icmenushe, queshun chieshënquin isadaidbon chuiquidon Esus uënës uamete bunec, quequin Pidaton aden chuipanëdash.
19Adashic matses icsaido cuidte chuinuec tsadte dapan abucquio tsadtopondash Pidato. Adshobien iuan naden chuituidpanëdash: Min chidon: Naden chuitan, cac chobi. Esus caic: Aid dada bëdambocquid neque. Uënës uamenda. Dacuëdampambo icsho ushquin isombique. Uënës uamenda, quiosh, quequin chuituidpanëdash.
20Adnubien Esus chieshënquido Nuquin Papa ismequin nëish iua cuessunneshun pichicaquidon chuiquidobëtan isadaidbon chuiquid tsësiobon ambo tabadquido chuibudpanëdash. Pidaton: ¿Mitsicquidimbi puduenmepe? cac: Badabas puduenmequimbi Esus uënës uame, quequin chuidoneta, cac: Ai, adoendambi, quecuededpanëdash.
21Adnubien chuiquid cobednadod Pidaton padpiden chuiuaquin: ¿Mitsicquidimbi puduenmepe? caquien ambo tabadquidon: Badabas chicquin puduenmeta, cabededpanëdash. 22Adoaquien Pidaton: Ma Esuquidistu cuënaid ¿Mitsipadopembimbi aid ique? caquien: Uënës uame. Cueste napotiaidën dectanquin uënës uame, quecuededpanëdash.
23Adoaquien Pidaton: ¿Atotsi icsambuen nasho mimbi adope? caquien buëdanquiec cuëdcuededec: Cueste napotiaidën dectanquin uënës uame, quecuededpanëdash.
24Adsho: Padi icnuna, caqui niacbidanquiec adequi uënës uamete bunquiec cuesantiadpambo yansho isash: Acte bec cho, quepanëdash Pidato. Bëacsho tasun dapan acte cushtotanec mëpamëdquin abitedi ismepanëdash. Adashic Esus caic: Nëid uënës uametiapimbo iquebi. Nëid uënës uamete bunec mibitedi cuidadtequidombo nendac. Mëpamëdec bëchish ucudacbimbuec mimbi icsamebued ucudebi, quiash mëpamëdquin ismepanëdash Pidaton. 25Adsho tantiashien: Cun mado yec ubitedi yec quec adequi cuidadtequidombo iquebi, quecuededpanëdash abitedimbo.
26Adsho tantiashun Badabas chicquin puduenmequimbi Esus cueshcanten cacuesmepanëdash. Adshumbic: Cueste napotiaidën dectanquin cuessunnetan, quequin Pidaton sondado buanmepanëdash.
Esus mamënshunaid
(Madc. 15.16-20; Uan 19.2-3)
27Adoaquien Pidaton sondadon abi tabadtedniaid yacno Esus buanshun: Isec cho, cac aton sondado utsibo dadpen chochoash Esus datsidadpanëdash. 28Adshun: ¿Chuiquid tapada nedic? quetanquin abi dasiuidaid dashcute dachictanquin dashcute dapa piumbocquid dasiuinshun 29mauete pinchuc pinchucpambo icnuc nacnenaid Esus mauemepanëdash. Adshumbic chuiquid tapan sananacbimbuen sanannuc abiucshun cueste sananmepanëdash. Adotanquimbic chuiquid tapa ismiacbimbuen dannëshën sebudquin ismec: Mibi isash bëdambo iquebi, isadaidbon chuiquid tapa, quequin Esus oncabededquin mamënshumbededpanëdash. 30Adshumbic bëpishtucatanquin ambi cueste sananmiaid bedshundednequin aidëmbi macuestonepanëdash.#27.30 Aden Esusën mëyante Isayasën chuipampic. Isa. 50.6 ista. 31Aden oncaquin mamënshumbededtanquin ambi dasiuimbued dashcute dapa dachictanquin aton dashcutebidi dasiuinuapanëdash. Adoshon: Ma uënësnu. Cueste napotiaidën dectanec nidnunid, quianec nidquin Esus buampanëdash.
Esus cueste napotiaidën dectanaid
(Madc. 15.21-41; Duc. 23.26-49; Uan 19.17-30)
32Aden Esus buanquin abi dectante cueste iuënmemebanquimbi dada nidaid Sidene yacnouësh choquid Simon cuëmëdquid istuidshun Esusën iuënmiaid sondadon chiadtomebidampanëdash. 33Adobidanec nidec macuësh tapa mapi canitebimbuec isadquid yacno chopanëdash. Aid macuësh mapi canite quequin cun onqueten Codcota quequin cuënaid nepondash.
34Choshombien sondadon uba chinaid paëmbocquid dauë nëcushaid Esus meneuidpanëdash. Adoac pistsëc acquin tanquin aquenquio icpanëdash.#27.34 Chotaquën onqueten Cuëd. 69.21 ista. 35Adshobien cueste napotiaidën dectampanëdash. Dectanshumbic ambi dachicbued: Esusën dashcute bednu, quequin sondadobon abi cuëmëdquidtedi dada uabanshun tëchun sandoshon cadotannequin dada uaidëmpi abia puduenquid isbanquin Esusën dashcute bedpanëdash.#27.35 Chotaquën onqueten Cuëd. 22.18 ista. 36Adash: Esus uënësso isnu, quec sondado tabadcuededpanëdash.
37Adshumbic: Nadquid icsho cuidquin cuessunniac, quequin ma isquidon tantianu, queshun cueste pada uaidën naden chuiquin dada uapanëdash: Nëidquio Esus nec. Isadaidbon chuiquid tapambo nec, quequin dada uaid Esusën mapi abuctsëc dectampanëdash. 38Adshumbic ampequid daëd cuesten ëquë dectambudcuenquin dectantanquin nënantanquio Esus dectampanëdash.
39Adshobien podquied cuëmanquio Esus diadsho isbidannequin mapi tacuquequin mamënshunquin naden chuipanëdash:#27.39 Chotaquën onqueten Cuëd. 22.7bëta Cuëd. 109.25 ista. 40Nuquin Papa tabadte shubu dapa chic chictanquin daëdec ushquin nacnenuaquin nainendambi, quiondaid yec uënësenquio yec bud. Nuquin Papan madombo yec auëshquiobi mibibi bud, cabidannepanëdash. 41Adecbidi nëish iua cuessunneshun pichicaquidon chuiquido yec Moisesën chiampid tantiamequido yec isadaidbon chuiquid tsësiobo yec quequin Esus icsambuen chuishunquin mamënshunec nadpanëdash: 42Utsibo ismenuembien cumapenen tantiaquin nadatiambocquin matses bëdanmechitosh. Adquid yec budsho isnuqui. Isadaidbon chuiquid tapambo nebi, quequid yec mibibi uënësenquio yec bud. Adec budsho issun: Nuquin Papan Chomiaid yec Aidën Madombobi nec, catsiambi. 43Nuquin Papa tantiaquid yec aton Madombo nebi, quequid icsho: Ai, cun madombo nec, quequin Nuquin Papan budmiac uënësenquio icsho isnu, quecuededpanëdash.#27.43 Chotaquën onqueten dada uaid Cuëd. 22.8 ista. 44Adnubien ampequido abëta cuesten dectambuedontsen Esus icsambuen chuishumpanëdash.
Esus uënësaid
(Madc. 15.31-41; Duc. 23.44-49; Uan 19.28-30)
45Adnubien uëshë cuembo icnuc inchëshpondash. Uëshë cuembo icnuc bedanec uëshë budambi 3 icnuc cuësquec nidaid abichobimbo inchëshquio icpondash. 46Uëshë budec 3 yannubien Esus cumapenec cuëdec nadpanëdash: Edi, Edi, dama sabactani, quec cun onqueten cuëdec: Papa, Papa ¿Atotsi queshun ubi isenquio icquin niano? quec adpanëdash.#27.46 Chotaquën onqueten dada uaid Nuquin Papan Chiaid Cuëd. 22.1 ista.
47Adec cuëdsho tantiash isquido utsi utsiec nadpanëdash: Nuquin Papan oncamiampid Edias cuënchitequien nec, quecuededpanëdash. 48Adnubien utsi badedi titinqueshun uba chinaid actequid mucambocquid nëcushtanquin shapu shapupactsëcquid puntanquin cueste dëdectanshun chishmequin acmenuen ëccuëscadoneshobi#27.48 Ëndenquimbo Esusën nate chiampid iste bunquin chotaquën onqueten dada uaid Cuëd. 69.21 isbanta. 49utsibon: Chiata. Isbono. Edias Esus bedec chonoshe, capanëdash.
50Adnubien padpidec cumapenec cuëdtanec Esus uënëspanëdash. 51Adec Esus uënësnubi Nuquin Papa tabadte shubu dapa yacno: Quënë ëquëduc Nuquin Papa tabadtembo nec, caidën utsi puduednushe, queshun dashcute dapa ënapen icquid dectanaid#27.51 Dashcute dapa ënapen icquid dectanaid: Seta utsin utsinquiec Nuquin Papa tabadacnombo aid dectanaid utsiuc nidshun nëish iua cuessunneshun pichicaquidon chuiquid tapambo abentsëcshun nacnenshunac Nuquin Papan matses bëdambuen ismepampic. Esus uënësnubi Nuquin Papan ambi Esus tantiaquido bëdambuen iste tantiamenuen dashcute canchedmepanëdash. Nëish iua pichicaquidën nainquio icnuc Esusën abi tantiaquido Nuquin Papan bëdambuen ismete tantiamec. Buan. 26.31-33. abucuësh budec tembi daëdquio canchedbudcuempanëdash. Adnubic nidaid ishcudquidën cuënote dapa dadpen cuëshëdbudnepanëdash. 52Adnuc uënësaid nauedaid shëcuë bëtashaid shëcniadnuc Nuquin Papa tantiaquido ënden uënësaido dadpen uincuempanëdash. 53Adec uincuenaido Esus uincuenambi abi nauedacnouësh choec shubu dadpen icquid Edusaden Nuquin Papan bëdamboshëcquid caid yacno nidacsho matses dadpenshun ispanëdash.
54Nidaid uëdëquec ishcudnuc dacuëdampambo icsho isashien Esus isec tabadquido sondado aton chuiquid capitambëdi dacuëdtanec: Ma nëid dada Nuquin Papan Madombobi nepayoc, quecuededpanëdash.
55Adnubien ambobi chidobo dadpen nidaid Cadidea yacnouësh Esusbëd choquin abi nashunquin codocashumbuedo uannoshon Esus uënësso isec tabadpanëdash. 56Aidobëd nëidted icpanëdash. Nëidic Madia Macdadena.#27.56 Shubu dadpen icquid Macdada caid yacnoshon tishaid nec, quequin Madia Macdadena cuëmpanëdash. Nëidic Madia utsi Santiacon tita. Aidi Osen titabidi nepondash. Nëidic Sebedeon chido Uanën tita. Aidi Santiacon titabidi nepondash. Aidtedi uannoshon isbededec tabadpanëdash.
Esus chococaid
(Madc. 15.42-47; Duc. 23.50-56; Uan 19.38-42)
57Adnubien inchëshbudtsëqui shubu dadpen icquid Adimatea caid yacnoshon tishaid Ose cuëmëdquid Esus tantiaquid chopanëdash. 58Choshombic chuiquid tapa Pidato naden chuituidpanëdash: Esus uënësaidën dada buannun mibi chiec chobi, cac aton iua chuiquin: Ma buannu. Bedmetan, capanëdash Pidaton. 59Adoac Osen Esusën dada buanshun dashcute bëchish nibëdquidënquio nuamboshë icnuc datanepanëdash. 60Adotanquimbic nidaid cuënoteuidpambo icquid macuësh tsimpiduc ambi uëdëshcamiaid shëcuë chucanquio Osen Esus nauedpanëdash. Adotanquimbic cuënote dapabidi bëtashte uaid bincumbëshun bëtashanec Ose nidpanëdash.#27.59-60 Isa. 53.9 dada uampicpadombuen atona dadpen icquidën abibi uënësacsho nauedte shëcuë uaidën Esus chococapanëdash. 61Adnubien Madia Macdadenabëd Madia utsi Esus chococacnobi tëshëdash ambobi isec tabadpanëdash.
Esus nauedaid isec sondado tabadaid
62Aden Esus cuessunnemiash abentsëc ushash chonoadtemaid uëshëmbi Esus chieshënquido Pidato chiec nidpanëdash. Padiseobobëd nidshun Nuquin Papa ismequin nëish iua cuessunneshun pichicaquidon chuiquidon naden Pidato chuituidpanëdash: 63Esus muaquidquio yec nadpadennec: Uënësash daëdec ushash uincuenendabi, quec muapadenneque. 64Daëdec ushquin min sondado Esus nauedaid cudasmeta. Abëd icbuedon chicshun buannushe. Aden buanashic: Uincuenaccosh, quec muanushe. Uënësabi yec abi: Nuquin Papan madombo nebi, quec muaic icsambo iccoshe. Adembidi: Uincuenaccosh, quequin mua uac icsamboshë ictsiashe. Min sondado: Cudasta, quequin chuita, capanëdash Esus chieshënquidon. 65Adoaquien Pidaton: Ai, cun sondado buantan. Aden buanshun: Uënësaid nauedaid cudasquin isec databëdta, cata, capanëdash. 66Adoaquien Pidaton namiaido sondado buanshun: Cuënote dapa bëtashaid bucun bëbitaccameta, capanëdash. Aden bëbitaccaid isash: Chuiquid tapan bëbitaccamiaid nec. Cuidnushe. Esus chictiapimbo iquebi, ma quenu, queshun bucun bëbitaccapanëdash. Adoshon: Beduannushe. Isquiec databëdta, quequin sondado chuipanëdash.
Επιλέχθηκαν προς το παρόν:
Mateo 27: mcfNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023, Wycliffe Bible Translators, Inc. All rights reserved.