Mateo 26
26
XII. ABIDED CUIDADEC UËNËSASH ESUS UINCUENAID
(26.1—28.20)
Esus bedshun uënës uamenuna, quequin chiaid
(Madc. 14.1-2; Duc. 22.1-2; Uan 11.45-53)
1Aden abi chote ënquin chuitanquimbic abi uënës uate abëd icquido Esusën naden chuipondash: 2Daëdec ushshun nuquin tsusedpabon: Ma cun mado uënësmenquio icnu, queshun obeca caniactsëc cuessunniampid tantiaquin penun obeca caniactsëc cuessunnec, quequin mibitedishun tantiec. Aid uëshëmbi Matsesën Tishaid icshobi cueste napotiaidën dectanmenun ubi bedendac, quepondash Esus.#26.2 Nëish iua obeca bacuëded uënës uampid chotaquën Pascuas capec. Isadaidbon nampid iste bunquin Buan. 12.1-27 isbanta. Chotaquën onqueten dada uaid M.I.Ch. 16.1-8 isbanta.
3Adnubien isadaidbon chuiquidobëd Nuquin Papa ismequin nëish iua cuessunneshun pichicaquidon chuiquido aton chuiquid tapambo Caipas cuëmëdquidën shubu dapan iccuededec pudued puduedpanëdash. 4Adashic: Nëbien utsibo ismenquio icquin Esus bedmeshun uënës uametiadpa, quenubien utsibo: 5Nuquin matses obeca pec tabadnuc bedmenquien ictiad. Esus bëdambocquidi bedec, queshun obeca pec chochoaidon nuqui cuestsiash, quecuededpanëdash.
Chidon bëdambo nuadquidën Esus machiuinaid
(Madc. 14.3-9; Uan 12.1-8)
6Adnubien Esus shubu daëdpactsëcquid Betania caid yacno choash Simonën shubun puduedshun pec tabadpondash. Simon aton dada daush daushpambo yec daicsaidquio icsho bëdanmiaid nepondash. 7Puduedshun pec tabadshobien chido choquin ambi piucquid dadpenquio menequin bedaid sedunte postichoquidën icquid danoshquete bëdambo nuadquidën Esus machiuimpondash. 8Aden nasho issumbien nëishtanquin abëd icquidon: ¿Adenda mimbi bëdambuen nape? Ma mimbi icsambuen naiyoc. 9Utsibo menequin dadpen piucquid bedshun piucquid nibëdquido aid piucquid menetiadquidi mimbi naic, quequin chido chushcapondash.
10Adsho tantiashumbien Esusën: ¿Atotsi quequin chido chushcai? Ubi tantiaquin ubi ismequin bëdambuen nashunoshibique. Chushcainda. 11Piucquid nibëdquido dadpen mibëd tabadec nibëdenquio iquendac. Ubien mibëd icbuedi nëbi nibëdquio yanendac.#26.11 M.I.Ch. 15.11 tantiaquin nëid dada uapanëdash. Chotaquën onqueten dada uaid M.I.Ch. 15.11 ista. 12Nëid chidon ubi uënës uacsho chococate tantiaquin machiuinoshibique. Chushcainda. 13Abimbo chiembique. Tantia. Nidaid utsi utsiec yacno Nuquin Papan Chiaid Bëda Umbi naid chuibenniacnoshombi nëid chidon ubi machiuinquin nabued tantiaquin chuibanendac. Aden aidën naid bëshunenquiocquin tantiendac, quepondash Esus ubitedi chiec.
Udasën Esus bedmenun piucquid bedaid
(Madc. 14.10-11; Duc. 22.3-6)
14Adnubien abëd icquid abentsëc Udas Iscadiote cuëmëdquid nëish iua cuessunneshun pichicaquidon chuiquido yacno isec nidpanëdash. 15Nidshumbic chuituidpanëdash: Utsibo ismenquio icquin mibiuidtsëqui Esus bedmenu. ¿Tedtsi piucquid ubi menetsia? caquien badedi bedtanquin shocosh ushu nacnenaid piucquid 30ted menepanëdash.#26.15 Aden matses iua bednuen aidted treintated icbo menepac cadennec. Adembidi Buan. 21.32bëta Sac. 11.12 tantiaquin Mateon dada uapanëdash. 16Aden piucquid meniac nidquimbi: ¿Mitsishunquiembi utsibo ismenquio icquin Esus bedmepeba? quequin tantiapanëdash Udasën.
Abi uënës uate anuenannuc abëd icquidobëd Esus pec tabadaid
(Madc. 14.12-25; Duc. 22.7-23; Uan 13.21-30; Cod.1. 11.23-26)
17Adnubien abëd icquidon: Equipito yacnouësh puduanec niquenun pan bidiscamiabi piampid 6tedec ushquin tantiaquin tauaid uëshë nëbi nec, queshun Esus naden chuipondash: Nuquin Papan nampid tantiaquin nuqui nëish iua obeca caniactsëc penun ¿mitsishumbimbi nacnempe?#26.17 Isadaidbo Equipito yacnouësh cuennu, quequin ambi aton pan nami bidiscamiabi aid buanec cuempampic. Adec cuenaid tantiec tabadec Nuquin Papan chiacpaden sieteted ushquin pan aton nami bidiscamiabi icquiduidi pepanëdash. Adembidi Equipito yacnouësh cuennun isadaidbon aid obeca caniactsëc cuessunniampic. Aid chiaid istiadquio icquin Buan. 12.1-28 isbanta. caquien Esusën: 18Edusaden yacno nidshun nuqui isondaid dada chiec nid. Nuquin Icbo nadosh: Nëbi Nuquin Papan chiacpadombuen naimbudembi, quiosh. Min shubumbo caic: Aidën shubun puduedshun Nuquin Papan nampid tantiaquin ubëd icquidobëtan obeca caniactsëc pec tabadcuedednu, quiosh, quequin chuita, 19cac nidquimbi shubu icbo chuituidpanëdash. Adoac: Ai, ma chonona, quesho tantiashumbien abia nidbuedon aidën shubun puduedshun penun nëish iua caniactsëc shuishun Esusën chiacpadombuen nacnempanëdash.
20Aid inchëshbudtsëqui abëd icquidobëd choash tabadquin Esusën pepondash. 21Aden pec tabadquimbien Esusën naden chuipondash: Abimbo chiembique. Tantia. Ubi chieshënquin isadaidbon chuiquid tapabo ubi bedmequid abentsëc nëmbobi iquec, quepondash. 22Adsho tantiash uënësquio yanquin abentsëcshun abentsëcshunquien ubitedishun naden Esus chuipondambi: ¿Ubida cai, Icbo? cabededpondambi. 23Adoaquien Esus: Ubëtambi pan cuëshën ënë punshun pequidën ubi chieshënquin isadaidbon chuiquido ubi bedmendac.#26.23 Chotaquën onqueten Esusbëtan pec abi bedmequid tabadpanëdash, quequin ëndenquimbo Cuëd. 41.9 dada uapanëdash. 24Nuquin Papan ubi bedmete chuiquin dada uamiampicpadombuen Matsesën Tishaid icshobini bedmendac. Aden ubi chieshënquin bedmequid cumapenen cuidtequidquio nendac. Aidi aton titan tishenquio icpatecnëdan, quepondash.
25Adoaquien Udasën abi bedmequidënquio: ¿Ubida cai, Icbo? caquien: Ai, mibibi caimbi, capondash.
26Aden pec tabadquimbi Esusën pan sananquin: Mimbi uaid nëid pete bëdambo iquec, Papa, quequin Nuquin Papa chuitanquin cuëshcuëshshun abëd icquido menebannun naden chuipondash: Ubi uënës uate tantiaquin nëid cun dadabimbuecquid neque. Pe, cac pebededpondambi. 27Adoshombic uba chinaid ënë actequid cushtoaid dëshote sananquin: Mimbi uaid nëid actequid bëdambo iquec, Papa, quequin Nuquin Papa chuitanquin: Nëid mibitedishun acbeded, quequin meniac aniactse aniactsen acbededpondambi. 28Aid actequid acshobien Esusën: Nëid cun intacbimbuecquid acquin: Ubi cuidmenquiocnoen Esusded Nuquin Papan cuidmiac aton intac siquebudpambuec uënësposh. Adsho issun Esus tantiaquid icsho Nuquin Papan aid matses icsaid tantienquio yec bëshunquin cuidenquio iquendac, quequin tantiata, quepondash Esus.#26.28 Nëidtedi dada uaid tantiaquin nëid dada uapanëdash. Nëidic Buan. 24.6-8. Nëidic Ede. 31.31-34. Nëidic Sac. 9.11. Aidtedi isbanta.
29Adashic: Nadquid uba chinaid ënë nidaidënshun padpiden aquenquiocquimbi Cun Pan namiacnoshon actequid chucambo padpiden mibëtambi aquendambi, quepondash Esus ubitedi chiec.
Petedo muate Esusën chiaid
(Madc. 14.26-31; Duc. 22.31-34; Uan 13.36-38)
30Adashic Nuquin Papan naid chiec cuëdënte cuëdënanec macuësh Odibos caid yacno Esusbëd nidannepondabi. 31Ambo nidash tabadquimbi Esusën naden ubitedi chuipondash: Nëid inchëshëmbi Nuquin Papan chiampicpadec ubi nianec mibitedi niquendac. Nuquin Papan Chiampid nad iquec: Icbo cuessunnesho istanec ambi iuaid obeca niquendac, quequin chuipampic.#26.31 Sac. 13.7-9 tantiaquin nëid chuipanëdash Esusën. 32Aden uënësuac uincuenash nidaid Cadidea yacno ubia nidendabi. Ambo mibitsen ubëd icnuec tsiuec nidta, quepondash Esus ubitedi chiec.
33Adoaquien Petedon: Mibi cuesnuec chochosho isash utsibo dacuëdec niquenubi umbien mibi nianenquio ictsiandac, capondash. 34Adshobien Esusën: Tantia. Mibi chuinu, Petedo. Nëid inchëshëmbi cachina 3tedec cuëdabi icnuc: Umbi isacmaidquio aid nec, mimbi ubi caindac, capondash. 35Adoaquien Petedo: Pada. Adtiapimbueni iquec. Chieshëmënquidon: Esusbëd icquid mibi neque. Mibi cuessunnenu, caqui: Umbi isacmaid neque. Padi, quenquio iquendabi. Mibëdquiobi uënëstsiandabi, Petedo quenubini: Ai, ubibic adecbidi ictsiac, quecuededpondabi ubitedi.
Quetsemani yacnoshon Esusën Nuquin Papa chianniaid
(Madc. 14.32-42; Duc. 22.39-46)
36Adanec abëd icquidobëd nidequi cute dadpen nitsinaid Quetsemani caid yacno nidpondash. Auëshquio Esus nadpondash: Nëmbobi tabadta. Udictsëc nidshun Nuquin Papa chuitannu, quepondash.
37Adashic Petedobëta Sebedeon mado daëd Uambëta Santiaco buanec nidequi natiaquiec uënësquioshë yampanëdash. 38Adshumbic: Ubibi uënëstiadquio yec uënësquimboshë iquec. Udictsëc nidebique. Chieshtomane, queshun nëmbobi tabadquin ushenquio icquin Nuquin Papa chuita, quepanëdash Esus ambi abëd icquid 3ted buambued chiec. 39Aden chianec udictsëc nidash dannëshën tinquebudec nidaidën bëccuësquebudquin Nuquin Papa chiec: ¿Ada ubi natiamequin mëyadmenquio ictsia, Papa? Ubi bunacpaden namenquiocquimbi mibi bunacpadombuen nata, Papa, quepanëdash Esus.
40Adtanec choshon isaquien ambi 3ted buambued ushec samëdsho istuidpanëdash. Adsho issun Esusën Petedo chuiquin: ¿Iuec iuecpactsec ushenquio icquin ubëtambi istiapimboda ique? 41Ushenquio icquin Nuquin Papa chuita. Nuquin Papan Chiaid niacmequid Mayan Icsa Satanasën: Icsambuen namequin tannu, cac: Chieshtoenquio iquebi, quebuedi min dada uidëmpentsëcquio icsho badedquio mibi chieshtomendac, quepanëdash Esus.
42Aden chuitanec ambi Nuquin Papa chuibocno padpidec niduashun Nuquin Papa chuiuaic: ¿Ada ubi natiamequin mëyadmenquio ictsia, Papa? Ubi bunacpaden namenquiocquimbi mibi bunacpadombuen nameta, quetanec 43padpidec chouaquin isaquien Petedo chedo ushuaic ushcas mëmuntiapimbo yec.
44Adsho istanec padpidembuec niduashun ambi chuibocpadombuembidi Esusën Nuquin Papa chuiuapanëdash.
45Adtanec choquin ushec samëdsho istuiduashumbien: ¿Ushcas mëmuntiapimbo yecta ushec mibitedi samëdec ne? Nëbimbobi Matsesën Tishaid icshobi icsambuen naquido ubi bedmeque. 46Baded nidnu. Isucun. Ubi chieshënquin bedmequid choeque. Is, quepondash Esus Udas chosho isash.
Abi chieshënquidon Esus bedmiaid
(Madc. 14.43-50; Duc. 22.47-53; Uan 18.2-11)
47Aden chuinubien Esusbëd icbued Udasbëd matses dadpen chochopondash. Aido utsi utsiec chështe sanambededtsëquiec chonobi utsibo cueste sanambededtsëcquiec chochopondash. Nuquin Papa ismequin nëish iua cuessunneshun pichicaquidon chuiquidobëtan cun matses tsësiobon: Bedtan, cac chochopondash. 48Esus bednu, quequido tantiamequin chuiquin Udasën: Umbi tanchoccaid mimbi bedtequid neque. Aidquiobi bedshun buanta, queshun 49Udasën Esus tanchoccatuidpondash: Chobi, Icbo, quequin. 50Adoaquien Esusën: Umbi tantiabuedquio mibi nec. Adquid icquimbi mimbi tantiacpadombuen ubi bedmeta, queshobien chochoquidon Esus bedpondash.
51Aden Esus bedshobien abëd icquid abentsëcshun abi tsiusudaid chështe chictanquin nëish iua cuessunneshun pichicaquidon chuiquid tapan iua pabiate auc abentsëc pateshunnepondash. 52Adoshobien Esusën: Padi. Chën. Min chështe aucbidi tsiusud. Chështen sianquid icsho adembidi seshunniac uënësendac. 53¿Tantienquioda ique? Umbi chiac cun Pan abëd icquido sondadobimbuecquido dadpenquioshë 72mid ubi cudasmenuen chometsiash. 54Nuquin Papan aden ubi cudasmiac bedtiapimbo icsho ¿Mitsi paden Nuquin Papan Chiaid chuiquin dada uamiampicpadombuen ubi aden bedpatsiash? capondash pateshunnianquid chuiquin.
55Adshumbic abi bedquido chiec: ¿Ampec cuesanquid Esus nec, queshunda cuestebëta chështe sanambededtsëquiec ubi bedec chocho? Mambi badiadquidën badiadquidënquien Nuquin Papa tabadte shubu dapa daquënë uaidën tabadquin matses tantiamenuen chuibampaboc mibitedi tabadnubi. Aden chuibanshobi ma mimbi ubi bedenquio icpaboc. 56Bedenquio icbuedëmbi Nuquin Papan tantiacpadënquiobi mimbi ubi bedec. Aden ubi bedshun mëyante chuiquin Nuquin Papan oncamiaidon dada uampicpadombuembi mimbi ubi bedec, quequin chuinubini Esus abentsëqui nianec ubitedi niquepondac.
Isadaidbon chuiquido iccuededacno Esus buanaid
(Madc. 14.53-65; Duc. 22.54-55, 63-71; Uan 18.12-14, 19-24)
57Aden Esus bedshun nëish iua cuessunneshun pichicaquidon chuiquid tapambo Caipas cuëmëdquidën shubuno Esus buampanëdash. Ambobi Moisesën chiampid tantiamequidobëd isadaidbo tsësio utsibo chochoash tabadpanëdash. 58Adnubien Petedo uannoshon isbëec tsiuec chopanëdash. Adanec Nëish iua cuessunneshun pichicaquidon chuiquid tapan shubu yacno choash tsicatiaid shëcuën puduedpanëdash. Adec puduedash Nuquin Papa tabadte shubu isquido sondado tabadacno Petedo tsadtuidpanëdash. Chuiquidon Esus ¿mitsipadoeque? Isnu, quec adec tsadpanëdash.
59Adnubien abëtan chuiquidobëtan Nuquin Papa ismequin nëish iua cuessunneshun pichicaquidon chuiquid tapan Esus cuessunnemete bunquin: Esusën icsambuen nasho isombi, quequin muaquin chuisho tantianuna, queshun chochomiac muaquimbi dadpenshun: Esusën icsambuen nasho isombi, quequin chuibededpanëdash. 60Aden dadpenshun muaquin chuiquin Esus uënës uametequid chiambo icpanëdash. Adnubien utsi daëdshun naden chuituidpanëdash: 61Nuquin Papa tabadte shubu dapa caic: Uesquin chic chictanquin padpiden nacnenquin daëdec ushquin nainendambi, ma Esus quepondac, quepanëdash.
62Aden chuisho tantiash nëish iua cuessunneshun pichicaquidon chuiquid tapa nidtotanquin chiec: ¿Mimbi chiaid chiecquiobida nec? ¿Abimbo chuiquimbida nëid daëdshun chieque? Tantianu. Chui, capanëdash Esus chuiquin. 63Adoac ëcbedenquio yec otacquio icpanëdash. Adshobien nëish iua cuessunneshun pichicaquidon chuiquid tapan: Nuquin Papa uënëstiapimbocquidën cuidnushe, queshun abimbo chuita. ¿Nuquin Papan Chomiaidquio Quidistu caid yec aidën Madombobida mibi nepe? caquien#26.63 Isa. 53.7 tantiaquin nëid dada uapanëdash. 64Esusën: Ai, mimbi chiaidquiobi nebi. Tantia. Mibitedi chuinu. Matsesën Tishaid yec abuc niduash Nadatiambocquidën dayun abiucquio tsadsho mimbi isendac. Adembidi abucuësh abu ushu yacno ubi chouasho mibitedishun isendac, quepanëdash Esus.#26.64 Chotaquën onqueten Cuëd. 110.1 isbanta. Dan. 7.13 tantiaquin nëid dada uapanëdash.
65Adsho tantiash Nuquin Papa ismequin nëish iua cuessunneshun pichicaquidon chuiquid tapambo: Icsambuen chiec, quec nëishtanquin aton dashcute bëntsecquid dached dachedquepanëdash. ¿Ada mibitedishun tantio? Nuquin Papan Madombobi nebi, quequin Nuquin Papa icsambuen chuishunec muapayoc. Ambi icsambuen naid utsi chuisho tantiatiapimbo iquebi. Ambibi Nuquin Papa mua uasho tantiashun 66¿atotsi catiad? caquien abëtan chuiquid utsibo: Adquid cuidquin cuessunnequid, quedenneque. Uënës uamequimbien ictiad, quecuededpanëdash.
67Adshumbien Esus chieshënquin bëpishtucatanquin mëshëbudtanquin mëdanten bëse bësepanëdash. Bëse bësesho istanquin utsibontsen istiapimbo icnuc Esus dashcuten bëpuctanquin mëdanten tancues tancuespanëdash.#26.67 Isa. 50.6bëta 53.5 tantiaquin nëid dada uapanëdash. 68Aden tancuestanquin: Nuquin Papan Chomiaid Quidistu nec, canu. ¿Tsundan mibi cuesoshe? En chui. Tantianu, cabededquin Esus mamënshumbededpanëdash.
Umbi isacmaid Esus nec, quequin Petedon chiaid
(Madc. 14.66-72; Duc. 22.56-62; Uan 18.15-18, 25-27)
69Adnubien aid shubu daquënë uaid nuntan Petedo tsadacno choquin chido iuan naden chuituidpanëdash: Nidaid Cadidea yacnocquid Esus caidbëd icbuedien mibi nec, caquien: 70Tantiadenquiocnoc mimbi chiec. Umbi isacmaidquio mimbi chiec, quec Petedo muaic taëpanëdash utsibo dadpenshun tantianubi.
71Adanec daquënë uaid puduedte shëcuë dayun nidash nidtuidpanëdash.
Adshobien chido iua utsin: Nasaded yacnocquid Esusbëd ma nëid icpaboc, capanëdash, ambo tabadquido chuiquin. 72Adoaquien Petedo padpiden muaquin chiec: Ma umbi isacmaidquio Esus neyoc. Nuquin Papan isquin tantianubi mibi abimbo chiec nebi, queuapanëdash.
73Adshumbic iuec iuecpactsëcshun ambo tabadquidontsen Petedo chuipanëdash: Aidbëd icquidien mibi nec. Ma mibi nidaid Cadidea yacnocquid onquiacbimbuec onquepayoc, capanëdash. 74Adoaquien Petedo: Umbi isacmaidquio nec, quequin mibi abimbo chiombi. Umbi abimbo chienquio icsho ma ubi chian annëdënquequid Nuquin Papan nënepanuna, quepanëdash Petedo cumapenec cuëdec.
Adec 3tedec muanubien cachina cuëdpanëdash. 75Adsho tantiashumbien Petedon Esusën chuibuedquio tantiactampanëdash. Cachina cuëdabi icnuc ubi caic: Umbi isacmaid nec, quequin 3teden mimbi chiendac, quequin Esusën chuibuedquio tantiatanec umanuc puduenanec nidec uënësquioshë yec natiaquiec shubiquiopanëdash.
Επιλέχθηκαν προς το παρόν:
Mateo 26: mcfNT
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2023, Wycliffe Bible Translators, Inc. All rights reserved.