LUKA 23
23
O Jesu i maana o Pilato
(Mt 27.1-2, 11-14; Mk 15.1-5; Jn 18.28-38)
1Ki tagenata ma, ma ka sura aharaga ngaira hato, ma ka merâ o Jesu i pasina o Pilato. 2Ma i ngekana ngaira ka haganega ka rangania igê, ka vi: “Igami kami tarahua vi na mane ikê, ngaia ki vi pusira na Siu, siana ka vuria na takesi tanga na araha raha teha igê na gavumane i Roma, ma ki vi, vi ngaia marena ka no Kirisito, i araha raha teha.”
3O Pilato ki hagatea, ki vi: “Igo vari ka na araha raha iata na Siu?” O Jesu ki arami, ki vi: “Manga go visia.”
4Ma o Pilato ki vi tangara na mane ni vogasiha ga teha ma na enoni, ki vi: “Inê kê tarahua, vi na mane ikê ki pe erasia rârâ ta na marâ, hanana vi gê hagaitangia renia.”
5Ma ngaira ka hingia bâraha, ka vi: “Ngaia ki hagesurira na enoni, ka sugaria na gavumane! Ngaia ki bani haganega i Galilea, ki râhigi na ara ni hinua i Jutea, ma i ngekê kani râ me nikâ ikê.”
O Jesu i maana o Herote
6Matena o Pilato ki rongo vikana, ngaia ki hagate, ki vi: “Na Ai ni Galilea vari ngekê?” 7Matena ngaia ki bani girara, vi o Jesu ki na mane tenia na apanena iana o Herote, ngaia ki tagarenia tanga o Herote, i oga nikâ i Jerusaleme i na matena ngekana. 8O Herote ki koro era na obana, matena i bâsia o Jesu, renia ngaia ki bani rongo tarohana, ma ki arihu me era noga, ngaia ki bani obania, vi bâsia. Ngaia ki obania, vi bâsigi tani na mena, i tanugi o Jesu. 9Vikana o Herote ki hagatea o Jesu renigi rako na hagatenga, mo Jesu ki pe arami rârâ. 10Na mane ni vogasiha ga teha ma na mane ni hagesuringa ni Rotu ka ura me, ma ka tuguria bâraha o Jesu. 11O Herote ma na mane ni me iana ka memarabe o Jesu, ma ka tamasi erasia. Ngaira ka hagatugunia renia na tuguni bâkoro, ma ka tagarenia aporo tanga o Pilato. 12Igê nga na tangiana ngekana o Herote mo Pilato karu kahu hekorokoro aporo, renia ngairerua karu bani hemeronge i nago ki râ me.
Ga suria o Jesu ki me
(Mt 27.15-26; Mk 15.6-15; Jn 18.39—19.16)
13O Pilato ki unira haku me na mane ni vogasiha ga teha ma na meraha, ma na enoni, 14ma ki vi tangara, ki vi: “Igamu kamu merâ me na mane ikê tangê, ma kamu vi, vi ngaia ki katora na enoni, ka sugaria na gavumane. Hoita, inê kê bani hagatea ikê i maami, ma kê tarahua, vi ngaia ki pe katoa rârâ ta na hitangini na tarani pe koro, mu tuguria renigi. 15Mo Herote nikâ ki pe tarahua rârâ nogana vi ta na marâ era i pasina. Tahema ngaia ki tagarenia aporo me tangagami. Na mane ikê ki pe katoa rârâ ta na tarana ge era, hanana vi ge araria, ge meme renia. 16Inê be vi tangara na me iaku, ke ramusia, ma kê kahu naka vê ki arâ.” 17[Igê na ara ni Tangiana Raha na Paseka, o Pilato ki tuguhia tare, vi rupasia ta na enoni tenia na ruma ni hagaitangiha; na ani na Siu ga obania.] 18Ma ngaira hato ka ngerengere, ka vivi: “Nahuia! Rupasia me o Baraba tangagami!” 19(O Baraba ki bani goga i na ruma ni hagaitangiha, suria na enoni i hinua raha ka sugaria na gavumane, ma ngaia ki nahuia ta na enoni.)
20O Pilato ki obania, vi rupasia o Jesu. Tahema ngaia ki tamasi raha nikâ tangara na enoni. 21Ma ngaira ka ngiria bê aporo, ka vi: “Rapusia igê na kuruse! Rapusia!” 22Mo Pilato ki tamasi tangara na oruta na matena, ki vi: “Na tarana ta kani erasia? Inê kê tarahua, vi ngaia ki pe erasia rârâ ta na marâ, hanana vi ge meme renia. Inê be vi tangara na mane ni me iaku, ke ramusia, ma kê kahu rupasia vê, ki arâ.” 23Ma ngaira ka ami ni ngerengere raha nga, ka vivi: “Rapusia nga igê na kuruse!” Ma renia ngaira ka ama ni ngerengere nga, tahema o Pilato ki hagamarumu tangara. 24Ngekana o Pilato ki suria ki me o Jesu, suria ngaira ka nungia. 25Ngaia ki rupasia na mane, ga obania, na mane, i bani oga i ruma ni hagaitangiha, suria ngaia ki sugaria na gavumane, ma ki nahu enoni. Ma ngaia ki mahatangenia o Jesu tangara, ka nahuia suria na bani katoha iata.
Ga rapusia o Jesu igê na kuruse
26Ngaira ka merâ vê o Jesu. Matena ga râ, ngaira ka tarahua i tara ta na mane, o Simone na atana. Ngaia ki na ai ni hinua i Sairini. Ngaia ki bêbêbanu me i hinua raha tenia na bemu. Ngaira ka okea me, ma ka naka na kuruse i gaparana, ma ka bonasia, ki torea ki mumuria o Jesu.
27Ga rako era na enoni, ga râ suria. Ma i berarogata ka oga tani na gete, ga angisia ma ka angi maramara. 28O Jesu ki aharira, ma ki vi: “Gete ni Jerusaleme! Siana kamu angisiê inê, ma kamu angisigamu maremi hete igamu ma na karemi. 29Renia ga page arâ me na tangiani, matena na enoni ka page vivi igê, ‘E, ga babarisi na gete, ga gomara, ga pe apara kare, ga pe hagasusu kare!’ 30Igê na bevoana ngekana na enoni ka page vi tangagi na barani, ka vivi, ‘Mu guguru hurigami!’ Ma ka page vi tangagi na hungani, ka vivi, ‘Mu anuigami!’ 31Suria manga ga katogi na marâ ngegana tangê, inê, kê manga na apinige, i mauri, na ta ka page katogi tangagamu, mu manga na apinige maria?”
32Ngaira ka mererârua nikâ na manero gi rua, hanana vi ga nanahuirerua henia o Jesu. 33Matena ga ata me igê na agua, ga hêtana vi ‘Ratana Bê’, ngaira ka rapusia o Jesu igê na kuruse i ngekana, ma na manero gi rua nikâ, tani i otona o Jesu, ma tani i mahana. 34O Jesu ki vi: “Vaemaku, gu bonotenira. Ngaira ka pe girara na ta kani ga tanua.”
Ngaira ka pile taisi renigi na gahu iana o Jesu, hanana vi o ti ki page nahunia ta na gahu. 35Na enoni ka ura i ngekana, hanana ga boretenira, matena na meraha iata na Siu ga memarabe. Ngaira ka vi: “Bâ, ngaia ki bani hagatahira na enoni. Naka ke hagatahia marena, manga vi ngaia ki na Mesaia, God i bani atea!” 36Na mane ni me ka memarabe nogata. Ngaira ka ura râ i pasina ma ka tagarenia tanga na vaini, 37ma ka vi: “Vego, manga vi igo ki na araha raha iata na Siu, hoi, gu hagatahigo so maremu!” 38Na tamasinga ngegana ka bani segegi i avorana na bêna na kuruse, i vi: “Ikê ki na araha raha iata na Siu.”
39Na hitangiterua na manero, garu kavire igê na kuruse i ngekana, ki guharia, ki vi: “Na Mesaia kanigo? Hoi, gu hagatahigo so maremu megamirua!” 40Ma na tamana ki ramonia, ki vi: “Se, go pe magutenia God ngekini? Bâsia, igia hato ikê ka bani surigia, hanana vi ga meme. 41Tangagerua igerua ki araria vi garu meme, renia na hagaitangiha, i tarahugerua, ki ararigi na bagatauhakerua. Ma ngaia ki pe erasia rârâ ta na marâ.” 42Ma ngaia ki vi tanga o Jesu, ki vi: “Go takusiê, matena go page arâ me, hanana go marungira na enoni!” 43O Jesu ki vi tanga, ki vi: “Be vi tangago: i rikini akê igo ko page vagevage heniê i pasina God.”
O Jesu ki me
(Mt 27.45-56; Mk 15.33-41; Jn 19.28-36)
44Igê na ararina na ritovagana, ma na arito ki roto, ma na agua hagenani ki roto, mataro me ki pepe i oru na arito. 45Ma na gahu raha, i kuku i Ruma ni Rotu, ki tatari hegitigi i gupu. 46O Jesu ki ngere, ki vi: “Vaemaku, inê kê vatego na ataroku!” Ngaia ki tamasi hato vikana, ma ki me.
47Na araha iata na mane ni me ki rigia na tarana ngekana, ma ki visia raha God, ki vi: “I monari, na mane koro kani ngaia!” 48Rako era na enoni, ga bani haku me, ka boretenira. Matena ga rigia na tarana ngekana, ngaira hato ka aporo i pasita ma ka tahurugi na matota, suria i rugu na obata. 49Na enoni, ga bani girara o Jesu, ma nikâ na gete, ga bani arârâ suria o Jesu tenia i Galilea, ngaira ka ura tarege râ, hanana vi ga bâsigi na tarani ngegana.
Ga naka o Jesu
(Mt 27.57-61; Mk 15.42-47; Jn 19.38-42)
50-51I ngekana ki oga igê ta na mane, o Josepo na atana. Ngaia ki na mane ni Arimatea, na hinua iata na Siu. Ngaia ki na mane koro, ma ki oto na parongana, ma ki naasia na matena, God i page arâ me igê ma ki marungira na enoni. Ngaia ki na hitangita na mane igê na Kaunselo, ma ngaia ki pe obania henira na katoha iata ma na marâ, ga tanugi. 52Ngaia ki râ i pasina o Pilato, ma ki nungia renia na gahuana o Jesu. 53Ma hemuri ki tasia vato na gahuana, ma ki baraia renia na gahu ni gahua, ma ki naka igê na vaba, ga bani karua igê na hê. Na vaba ngekana ka pe bagi nuni rârâ igê. 54Ngaia ki na tangiana na rimata, ga hagarêa igê na Tangiana ni Mamaroha, i sugia ma, vi ge haganega.
55Na gete, ga bani râ suria o Jesu tenia i Galilea, ngaira ka râ henia o Josepo, ka rigia na vaba, ma ka bâsia, vi manga i he kaniga naka na gahuana o Jesu. 56Hemuri ngaira ka aporo i pasita, ma ka hagarêgi na rauga, ga sigini koro, ma na marâ manga na suru, hanana vi ga monea renia na gahuana o Jesu.
Igê na Tangiana ni Mamaroha ngaira ka mamaro suria na Ramata igê na Buka Apuna.
Επιλέχθηκαν προς το παρόν:
LUKA 23: KCB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2011 Bible Society of the South Pacific