LUKA 18
18
Na maramaraveta renirerua na gete na nâ ma na mane ni hagatamasinga
1Ma o Jesu ki tamasi maramaraveta vikê tangara na enoni, ki hagesurira, hanana vi tuguhira, ga nunginungi tare, ma siana hagetage ki meme na apeta, vi ge nunginungi. 2“I ta na hinua ki oga igê na maneraha ni hagatamasinga, i pe magutenia God ma ki pe hanetasira na enoni nikâ. 3Ma i hinua ngekana ki oga nikâ na gete na nâ, i ama ni arâ ma me tare i pasina, ma ki nungia tare, vi tamania. Ngaia ki vi, ‘Gu hagaotoa na tarana i berarogamami inê ma na merongaku!’ 4I arihu me noga na maneraha ni hagatamasinga ki usi, vi ge tamania. Me hemuri ngaia ki tako, ki vi, ‘Naka ma inê kê pe magutenia God, sê ge pe hanetasira na enoni, 5inê be tamania na gete na nâ ikê ma be hagaotoa na tarana, i hagate renia, suria ngaia ki hagamarâ apeku tare. Manga i mareha, ngaia ki page ama ni arâ ma me, ma ki hagâsi apeku.’”
6Ma na Araha ki vi: “Mu karinga na marâ, i visia na maneraha ni hagatamasinga, i era na parongana. 7Hoi, i hega? Mu takusia vari, vi God ki pe tamanira na kariana, ga avarasia tare i na ara ni tangiani ma na bungiani? Mareha! 8Be vi tangagamu: ngaia ki hatani tamanira rêrê. Ma na matena o Karena Enoni ki page arâ me igê, i hega, ngaia ki page tarahua vari na tongesuriha i pasita na enoni, se i mareha?”
Na maramaraveta renirerua na Pariseo ma na mane i totora takesi
9O Jesu ki tamasi maramaraveta vikê tangara na enoni, ga vi, vi ngaira ka koro, ma ka kitenira na ara ni enoni getera. 10“Na mane gi rua karu akê i Ruma ni Rotu, hanana vi garu nunginungi. Ta na mane ki na Pariseo, ma ta na mane ki na mane i totora takesi. 11Na Pariseo ki ura getea ma ki nunginungi, ki vi, ‘God, inê kê visigo koro, renia inê kê pe hagatage, ma kê pe hagahagaparu, ma kê pe gamogamo mangara na ara ni enoni getera. Inê kê visigo koro, renia inê kê pe manga o vani i totora takesi ikê. 12Inê kê harite ngêra i na ara ni tangiani gi rua igê na wiki. Ma inê kê vatego na tangahuruta tenigi na ara ni meku, gê tagara.’ 13Ma na mane, i totora takesi, ki ura hagatê, ma ki tu bê so ma, ma ki tahurua na matona, ma ki vi, ‘God, gu takiê, inê na enoni era!’”
14O Jesu ki vi: “Be vi tangagamu: bâ, na mane ngekê ki aporo i pasina ma ki koro i maana God, ma na Pariseo ki mareha. Renia na enoni ka page kasia so na enoni, i kasia akê marena, ma ka page kasia akê na enoni, i kasia so marena.”
O Jesu ki têbuhira na kare
(Mt 19.13-15; Mk 10.13-16)
15Tani na enoni ka merarâ me na kareta sisite tanga o Jesu, hanana vi têtêbuhira. Ma na kariana ka bâsira ma ka ramonira renia. 16Ma o Jesu ki unira me na kere kare i pasina, ma ki vi: “Mu nakara na kere kare ka râ me i pasiku. Siana kamu vi pusira, renia na enoni, ga mangara na kere kare ngegê, ngaira ka tê viteana God na Araha. 17Mu rongo! Na anima na enoni, i têtê viteana God manga na kere kare, ngaia ki obania, vi God ki marungia.”
Na mane ruruguha
(Mt 19.16-30; Mk 10.17-31)
18Ta na mane ruruguha, i maneraha i pasita na Siu, ki hagatea o Jesu, ki vi: “Araha koro, na ta kani tuguhiê, ve katoa, hanana ve nahunia renia na mêriha mora ma tarema?” 19O Jesu ki hagatea, ki vi: “Hega kanigo visiê, vi gê koro? Mareha ta na enoni, vi ge koro. God, ngaia getea ma, kani koro. 20Igo ko bani giraragi na ramata: ‘Siana ko gamogamo; siana ko nahu enoni; siana ko hanago; siana ko hagaparu; go takuirerua hete o vaemamu ma kenamu.’”
21Na mane ki arami, ki vi: “Haganega tenia na matena gê sisite mênga, inê kê bani oto surigi me na ramata hato ngegana.” 22Matena o Jesu ki rongo vikana, ngaia ki vi tanga, ki vi: “Na ani gi tage ma na marâ kani mamênga, vi gu katoa. Go arâ ma ko hagavuringenigi na nahuninga hato iamu, ma na meni ko vatera na enoni matareha, ma hanana go page nahunigi na ruruguha i pasina God. Ma hemuri ko arâ me ma ko takuê.” 23Ma na matena na mane ki rongo vikana, ngaia ki bâ heruruhi, renia ngaia ki ruruguha teha ngavê.
24O Jesu ki bâsia, i bâ heruruhi, ma ki vi: “Aige, i bara tangara na enoni ruruguha, vi ge tê viteana God na Araha! 25I bara tanga na kamelo, vi ge tara banu igê na maana na nila, ma ki bara teha vê hete tanga na enoni ruruguha, vi ge tê viteana God.” 26Na enoni, ga rongoa, ka hagatea, ka vi: “Se, ti kani girara i tahitahi?” 27O Jesu ki arami, ki vi: “Na marâ, i bara tangara na enoni, ngaia ki pe bara tanga God.”
28Mo Petero ki vi: “I hega igami? Igami kami bani panigi na ara ni marâ hato iamami, hanana mi takugo.” 29O Jesu ki vi tangara, ki vi: “I monari. Ma be vi tangagamu vikê: na anima na enoni ma ki pania na ruma iana, se vi na gete iana, se vi na goana, se vi na enana, se vi na karena, hanana God ki marungia, 30ngaia ki page nahunigi rako na marâ i na matena i ngekê teharia i na matena i nago, ma ki page nahunia na mauriha mora ma tarema i na matena i muri me.”
Na oruta na tamasinga iana o Jesu renia na mera iana
(Mk 20.17-19; Mk 10.32-34)
31O Jesu ki mera ura râ na kariana tangahuru matarerua, ma ki tamasi tangara, ki vi: “Mu rongo! Igia ka arâ i Jerusaleme. Ma i ngekana ka page voravora me igê na ara ni marâ, na poropete ka bani segegi renia o Karena Enoni. 32Ga page mahatangenia tangara na enoni, ga pe Siu, ma ngaira ka page rurusia, ma ka page guharia, ma ka page musuria. 33Ngaira ka page ramusia, ma ka page nahuia ki meme. Ma ngaia ki page mauri aporo igê na oruta na tangiana.” 34Na kariana ka mareha ngavê, vi ge rongogiraragi na marâ ngegana, na girarani na tamasinga ngegana ka pe rongo mataha tangara, ma ngaira ka pe aitangisia na marâ, i visia o Jesu.
O Jesu ma na mane i guru na maana
(Mt 20.29-34; Mk 10.46-52)
35O Jesu ki hagarangia noga i Jeriko, ma ta na mane, i guru na maana ki oga so i na akerena na tara, ma ki baganunungi. 36Matena ki rongoa na hakuta na enoni ga ritare, ngaia ki hagate, ki vi: “Na ta ikê?” 37Ma ngaira ka vi tanga, ka vi: “O Jesu ni Nasarete kani ritare.”
38Ngaia ki ngere, ki vi: “Jesu! Karena Tavite! Gu takiê!” 39Na enoni, ga nanago, ka ramonia, ma ka vi tanga, ki muni. Ma ngaia ki ama ni ngerengere raha nga, ki vivi: “Karena Tavite! Gu takiê!”
40Vikana o Jesu ki ura so, ma ki bonasira na enoni, ka merâ me na mane, i guru na maana. Matena i hagarangi me, o Jesu ki hagatea, ki vi: 41“Na ta kanigo obania, vi gê tanua tangago?” Ma ngaia ki arami, ki vi: “Araha, inê kê obania ve bâbâ.”
42Ma o Jesu ki vi tanga, ki vi: “Ge marava na maamu. Gu rite aporo, suria go tongesuriê.” 43Ki parama, ma ki rite aporo, ma ki râ suria o Jesu i tara, ma ki visia koro God. Matena na enoni ka rigia vikana ngaira hato ka visia raha God.
Επιλέχθηκαν προς το παρόν:
LUKA 18: KCB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2011 Bible Society of the South Pacific