Génesis 4
4
So Caín qataq so Abel
1Qaq so ỹale hue'eguet co'ollaxa aso lhua Eva, nache asomaye hualaxai, nache huo'o so llalec le'enaxat Caín. Nache 'enapeco':
«Mashe huo'o na ỹalec ỹale. Ñim Nataxala' aỹem ỹanem.»
2Qaq ime co'ollaxa, nache qaltaq huo'o so lỹa llalec, le'enaxat Abel, som lqaỹa so Caín. Qaq so Abel, ỹataqta nalemaqteguet co'ollaxa da ilotague' ana qaguetapi, qaq so Caín, qalaq nalemaqteguet da ỹo'ottac na 'alhua.
3Qaq co'ollaq qaỹoqteguelo soua na'axa'te, nache huo'o so na'a'q da so Caín ndoua'a Ñim Nataxala' aso lachetaqtaxanaqte, ỹachegoxotaigui da lo'onataxanaxac na 'alhua. 4Qaq nataqa'en so Abel ndoua'a Ñim Nataxala' so ỹataqta 'onaxaic la'auaxanec llalaqpi aso lalo qaguetapi. Qaq Ñim Nataxala' ỹataqta ỹamaateguet so Abel, qataq aso lachetaqtaxanaqte, 5qalaxaye saishet da 'eetec de'era da ỹamaateguet so Caín, ivira'a aso lachetaqtaxanaqte. Ỹoqo'oye so Caín ỹataqta dalemata, nache qauem naqa'en da lashiguiỹaxac. 6Nache Ñim Nataxala' 'enapego' somaye, 'eeta':
«¿Ta'ainco' da 'aualemata, qataq da qauem da 'arashiguiỹaxac? 7Da 'auo'ot taxa ca ỹaỹamaqchiguiñi, qaq ishet taxa da 'anamatasheguem. Qalaxaye ye saishet da 'auo'ot, nache dam nasouaxashet mashe naỹamaxattai' da 'am loxonec qome. Qamaq 'am maye ishet taxa da 'oxonec damaye.»
8Qaq huo'o so na'a'q, nache so Caín icoyeguen so lqaỹa Abel da yaqto' tareuga so no'onaxa. Qaq co'ollaq mashe huetrauga so no'onaxa, nache so Caín iloquiaxan so lqaỹa Abel, nache ỹalauat. 9Qaq huaña nache Ñim Nataxala' inat so Caín, 'eeta':
«¿Hua'ague ca hueta'ague ca 'arqaỹa Abel?»
Nache so Caín ỹasat, 'eeta':
«Aque', sa saỹaten. ¿Maye nachaỹemo' da selotague' so ỹaqaỹa?»
10Nache Ñim Nataxala', 'enapego' somaye, 'eeta':
«¿Ta'ainco' da 'auo'ot de'era? Cha'aye naua ltago'q so 'arqaỹa, maye 'aucoreleguete ana 'alhua, aỹem ỹa'alaqto'oto da so'oteque ca nalochiguiñi lataxac. 11Qaq ỹoqo'oye qauem qome ca 'am talec, qataq 'am qanqateeguesop nam 'alhua maye huecoreleguete soua ltago'q so 'arqaỹa maye 'aualauat. 12Qaq na'aictoxo' da 'auo'onataxaalec na 'alhua, qalaxaye qaica qome ca ala ca 'añiguishec. Qataq chochaq tatec qome da 'aucoleeteguelec ana 'alhua, nache saishet da 'anmatec.»
13Qaq huaña, nache so Caín ỹasateguet Ñim Nataxala', 'eeta':
«Aỹem, saishet da ñalo'oguet de'era lta'araic ñeuaxanaguec. 14Nagui aỹem 'auo'orauec da sheca'ai ne'ena 'alhua, qaq chochaq tatec qome da secoleeteguelec ana 'alhua qaica ca ñemataxac, nache qaỹoqtaique da qoneta. Qaq da nache 'eetec de'era, nache camachaqca ca aỹem natenalec, nache aỹem ỹalauat.»
15Qalaxaye Ñim Nataxala', ỹasateguet somaye, 'eeta':
«Da huo'o ca 'am ỹalauat, nache camaye siete da qaỹe'eguelaxalec da qaỹauo'o ca nhuaxanaguec.»
Nache Ñim Nataxala', ỹauo'o so na'anaxat so Caín, da yaqto' cam natenalec somaye, nache saishet da ỹalauat. 16Nache so Caín jec da ca'ai yem huaña da na'aqtaxaatague' Ñim Nataxala', nache nqo'ona da nalec ye 'alhua maye le'enaxat Nod, maye pa'aỹa'ague da nala' lliguisheguem ye Edén.
So llalaqpi so Caín
17Qaq so Caín hue'eguet co'ollaxa aso lhua, nache asomaye hualaxai, qaq ñiguiñi co'ollaxa so llalec nache ỹanagui da le'enaxat Enoc. Qaq ime co'ollaxa, nache so Caín no'oxoosheguem so huaqta'a't nỹecpi, som ỹamata'ac da le'enaxat Enoc, maye 'eeta'am da le'enaxat som llalec. 18Qaq so Enoc, nacheso so lta'a so Irad, qaq so Irad, nacheso so lta'a so Mejuyael, qaq so Mejuyael nacheso so lta'a so Metusael. Qaq so Metusael nacheso so lta'a so Lamec. 19Qaq so Lamec dos co'ollaxa soua lhua't. Aso 'oonole le'enaxat Ada, qaq aso lỹa le'enaxat Silá. 20Qaq aso Ada, huo'o so llalec le'enaxat Jabal. Qaq somaye, nacheso som hua'auchiguiñi co'ollaxa da netaigui na npe'l, qataq lalo ana huaca. 21Qaq so Jabal huo'o so lqaỹa le'enaxat Jubal. Qaq nacheso som chegoqchigui da huo'o ana nvique arpa, qataq ana nasheere. 22Qaq nataqa'en aso Silá deco'o co'ollaxa, nache huo'o so llalec le'enaxat Tubal Caín. Qaq nacheso so ỹo'ottac co'ollaxa na bronce qataq na lcat. Qaq so Tubal Caín huo'o aso lqaỹa maye le'enaxat Noamá.
23Qaq huo'o so na'a'q, nache so Lamec 'enapegalo soua lhua't Ada qataq aso Silá, 'eeta':
«Ñaq qana'axaỹaxañiichigui da ỹa'aqtac:
salauat co'ollaxa so shiỹaxaua souaxat da aỹem ique'emaqchet,
qataq salauat co'ollaxa so nsoqolec souaxat da aỹem iuaxaatac.
24Qaq so Caín da siete da qaỹe'eguelaxalec da qaỹauo'o ca lvi',
nache aỹem iuen qome da setenta y siete
da qaỹe'eguelaxalec da qaỹauo'o ca ivi'.»
So lỹa llalec so Adán qataq aso Eva
25Qaq so Adán qaltaq ỹe'eguelaxalec da hue'eguet co'ollaxa aso lhua, nache asomaye huo'o so llalec, nache ỹanagui da le'enaxat Set, cha'aye 'enapeco':
«Ñim Lo'onatac 'Enauacna, aỹem ỹanem na lỹa ỹalec da nmeneguet naqa'en so Abel, som ỹalauat so Caín.»
26Qaq nataqa'en so Set, huo'o co'ollaxa so llalec, nache ỹanagui da le'enaxat Enós. Qaq nacheso so chegoqchigui da qaỹo'oxoren da le'enaxat Ñim Nataxala'.
Επιλέχθηκαν προς το παρόν:
Génesis 4: LÑLE13
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.