NAI VAKATEKIVU 33
33
Erau sa veitata ko Jekope kei Iso, a rau sa veilomani, 1-15. Sa lesu ki nona vanua ko Iso, 16. Sa yaco ki Sikemi ko Jekope, ka voli vanua kina, 18-20.
1A sa ta cake ko Jekope, a sa rai yani, ka raica, sa lako mai ko Iso, kei ira vata kaya na tamata e lewe va na drau. A sa wasei iratou na gone kivei Lia, kei Rejeli, vei rau talega na vada. 2A sa lesi rau na vada kei iratou na luvedrau me ratou liu, kei Lia kei na luvena me tarava, kei Rejeli kei Josefa me muri sara. 3A sa liu sara vei ira ko koya, ka cuva vakavitu ki na qele, a sa toro vua na tuakana. 4A sa cici ko Iso me veitata kaya, a sa mokota, ka baleta na domona, ka reguca: a rau sa tagi. 5A sa ta cake, ka kunei iratou na yalewa kei na gone; a sa kaya, Ko cei ko ira oqo era tiko kei iko? A sa kaya, Na gone sa solia e na loloma na Kalou vua na nomuni tamata. 6Erau sa qai toro mai na vada, koi rau, kei iratou na luvedrau, a ratou sa cuva: 7ko Lia talega kei iratou na luvena, eratou sa toro mai, ka cuva: a sa oti, sa qai toro mai ko Josefa kei Rejeli, a rau sa cuva.
8A sa kaya ko koya, A cava na kenai balebale ni vavakoso kecega oqo ka'u a veitata kaya? A sa kaya ko Jekope, A ka me'u kune loloma kina vua na noqu turaga. 9A sa kaya ko Iso, Sa levu na noqu ka, na taciqu; me tiko ga kei iko na nomu ka. 10A sa kaya ko Jekope, Me kakua mada, kevaka ko sa yalo vinaka vei au mo taura mada vei au na noqu ka ni loloma: ni sa vaka na noqu raica na mata ni Kalou na noqu raica na matamuni, ka ni ko sa yalovinaka vei au: 11Mo ni kauta mada na noqu ka ni loloma sa kau vei kemuni oqo; ni sa loloma vei au na Kalou, ia ka'u sa rawata na ka kecega. A sa cikevi koya; a sa qai kauta.
12A sa kaya ko Iso, Daru yavala mada me daru lako, ia ka'u na liutaki iko. 13A sa kaya vua ko Jekope, Ko ni sa kila na noqu turaga ni ra sa malumalumu na gone, a sa vakaluveni na sipi kei na pulumokau sa tiko kei au; ni ra na mate kece talega na manumanu, kevaka era na kau vakayawa e na dua na siga: 14ni lako mada yani na noqu turaga mo liutaki au na nomu tamata; ia koi au, ka'u na lako vakamalua me vaka era rawata na manumanu sa liu tiko, kei ira na gone, me'u yaco mada ki Sia vua na noqu turaga. 15A sa kaya ko Iso, Me'u lesia mada eso na tamata era tiko vei au, me lako vata kei iko. A sa kaya ko koya, Mei cavai oqori? me'u kune loloma mada vua na noqu turaga.
16A sa lesu ko Iso e na siga ko ya, e na sala ki Sia. 17A sa lako voli yani ki Sukoci ko Jekope, a sa tara e dua na nona vale, a sa cakava eso na vale ni manumanu e na taba ni kau: o koya sa vakatokai kina na yaca ni yasana ko ya ko Sukoci.
18A sa yaco e na vakacegu ko Jekope, ki na koro ko Sikemi, mai na vanua ko Kenani, ni sa lako mai Petani-erama ko koya; a sa birika na nona vale laca, ka me donuya na koro. 19A sa volia e dua na tiki ni vanua, maivei ira na luve i Amori, na tama i Sikemi, e na yasana ka birika kina na nona vale laca, ka sa dua na drau nai lavo na kenai voli. 20A sa cakava maikea e dua nai cabocabo-ni-soro, a sa vakayacana ko Eli-eloe-Isireli.
Επιλέχθηκαν προς το παρόν:
NAI VAKATEKIVU 33: FOV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Vakavakadewa Makawa (Fijian Old Version) © Bible Society of the South Pacific