NAI VAKATEKIVU 31
31
Sa kaya ko Jiova vei Jekope me lako tani, a rau sa vinakata na watina. 3-16. Sa ra qai dro vakavuni, 17-21. Sa muri koya ko Lepani, a rau sa veileti ko Jekope kei Lepani, 22-44. Erau sa qai veiyalayalati, a sa lesu tale ko Lepani, 45-55.
1A sa rogoca ko koya na nodratou vosa na luve i Lepani ni ratou kaya, Ko Jekope, sa kauta tani na ka kecega nei tamadatou: ia sa vakaiyau vakaoqo e na ka nei tamadatou. 2A sa raica na mata i Lepani ko Jekope, ka sa qai dua tani mai vua.
3A sa kaya vei Jekope ko Jiova, Mo lesu mada ki na nodra vanua na tamamu, vei ira talega na wekamu; ia ka'u na tiko vata kei iko.
4A sa talaki ko Jekope ka kacivi Rejeli kei Lia me rau lako ki na veico ki na nona qele ni manumanu, 5a sa kaya vei rau, Au sa raica na matana na tamamudrau, ni sa qai dua tani mai vei au ka sa sega ni vaka eliu: ia sa tiko vata kei au na Kalou nei tamaqu: 6ia koi kemudrau, drau sa kila ni'u sa qarava e na noqu i gu kece na tamamudrau: 7Ka sa vakaisini au na tamamudrau, ka sa vukica vakatini na qau i voli: ia sa sega ni laivi koya na Kalou me vakacacani au: 8Kevaka sa kaya vakaoqo, Me kemui voli na kena sa tavukadikadiri; sa qai vakasucuma walega na manumanu na ka sa tavukadikadiri: ia kevaka sa kaya vakaoqo, Me kemui voli na kena sa vola koso; sa ra qai vakasucuma walega na manumanu na ka sa vola koso: 9ia sa kauta tani vakaoqo na Kalou na nona manumanu na tamamudrau, ka solia vei au. 10Ia sa yaco e nai tabayabaki sa ra kunekune kina na manumanu, ka'u a ta cake, ka kunea e na tadra, ka raica, na sipi tagane ka rikata na sipi sa vola koso, se tavukadikadiri, se veivolavolai 11A sa kaya vei au e na tadra ko koya na agilose ni Kalou, I Jekope: ka'u a kaya, Koi au saka oqo. 12A sa kaya, Mo ta cake mada, ka raica, na sipi tagane kecega sa rikata na sipi sa vola koso, se tavukadikadiri, se veivolavolai: ni'u sa kunea na ka kecega sa cakava vei iko ko Lepani: 13koi au na Kalou ni Peceli, ko a lumuta maikina na duru, ko a bubului talega kina vei au: ia mo cavu tu, mo lako tani e na vanua oqo, ka lesu ki na nodra vanua na wekamu. 14A rau sa vosa ko Rejeli kei Lia, ka kaya vua, Sa vo tiko li vei keirau e dua nai yau, se dua nai votavota, e na vale nei tama i keirau? 15Sa sega li ni vaka ko koya, keirau sa kai tani? ni sa volitaki keirau, ka sa vakaotia sara na neirau i lavo: 16ia nai yau kecega sa kauta tani na Kalou maivua na tama i keirau, sa neirau, kei na nodra na luve i keirau: ia mo kitaka ga na ka kece sa kaya vei iko na Kalou.
17A sa ia ko Jekope, ka vakavodoki iratou na luvena tagane, kei iratou na watina, e na kameli; 18a sa kauta yani na nona manumanu kecega, kei na nonai yau kecega sa rawata ko koya, io, na manumanu sa rawata ko koya, mai Petani-erama, ka me lako kivei Aisake na tamana ki na vanua ko Kenani. 19Ia ko Lepani, sa la'ki kotiva na nona sipi: a sa butakoca na matakau nei tamana ko Rejeli. 20Ia sa dro vuni yani maivei Lepani na kai Siria ko Jekope, ka ni sa sega ni tukuna vua ni sa dro ko koya. 21Sa dro ko koya, ka kauta na ka kecega sa nona; a sa cavu tu, ka qalo kosova na uciwai, a sa vakanamata ki na ulu-ni-vanua ko Kiliati.
22Ia e na kenai katolu ni siga sa tukuni vei Lepani, sa dro ko Jekope. 23A sa kauta vata kaya na wekana, a sa muri koya ka bogi vitu; a sa vauci koya mai na ulu-ni-vanua ko Kiliati. 24A sa lako mai na Kalou kivei Lepani na kai Siria e na tadra e na bogi, a sa kaya vua, Mo qarauni iko mo kakua ni vosataka na ka vinaka se na ka ca vei Jekope. 25A sa yaco sara vei Jekope ko Lepani. Ia ko Jekope, sa birika na nona vale laca e na ulu-ni-vanua: kei Lepani kei iratou na wekana, eratou a birika mai na ulu-ni-vanua ko Kiliati.
26A sa kaya vei Jekope ko Lepani, A cava ko sa cakava, ni ko sa dro vakavuni vei au, ka kauta tani na luvequ yalewa, me vaka na bobula sa rawa e nai seleiwau? 27A cava ko a dro vuni kina, ka lako lo yani; ka sega ni tukuna vei au, me'u talai iko yani e na marau kei na meke, na lali kei na api; 28a sa sega ni rawa kina me'u reguca na luvequ tagane kei na luvequ yalewa? ko sa kitaka ga na ka lialia: 29Sa rawarawa ga me'u vakacacani kemudou: ia na Kalou ni tamamudou sa vosa vei au e na bogi e na noa, a sa kaya, Mo qarauni iko mo kakua ni vosataka na ka vinaka se na ka ca vei Jekope. 30Ia sa dodonu ga mo lako, ni ko sa gu sara ki na vale i tamamu, ia ka cava ko sa butakoca kina na noqu kalou?
31A sa vosa vei Lepani ko Jekope, ka kaya, Ni ka'u a rere: ni ka'u sa kaya, De ko kovea sara vei au na luvemu yalewa. 32Ia ko koya ko sa kunea vua na nomu kalou, me kakua ni bula: e na mata ni wekadatou mo liaca na ka sa nomu ka sa tiko vei au, ka mo kauta vei iko. Ni sa sega ni kila ko Jekope sa butakoca ko Rejeli.
33A sa curu ki na vale laca i Jekope ko Lepani, kei na vale laca i Lia, kei na nodrau vale laca na vada; a sa sega ni kunea. A sa curu yani e na vale laca i Lia, ka la'ki curuma na vale laca i Rejeli. 34Ia ko Rejeli, ka kauta eliu na matakau, ka vunia e nai yaya ni kameli, ka sa tiko e delana. A sa vakasaqara e na veitiki ni vale laca taucoko ko Lepani, a sa sega ni kunea. 35A sa kaya vei tamana ko koya, Me kakua ni ca vua na noqu turaga ni'u sa sega ni tu cake rawa e matamuni; ni sa tauvi au na mate vakayalewa. A sa vakasaqara ko koya, ia sa sega ni kunea na matakau.
36A sa qai cudru ko Jekope, ka vunauci Lepani: a sa kaya vua, A cava na noqu cala, a cava na noqu i valavala ca, ko sa cici muri au kina vakaca? 37Ia ko sa dikeva kece na noqu i yaya, sa dua beka nai yaya ni nomu vale ko sa kunea? Mo viritura mada e matadratou na wekamu, kei na wekaqu, me ra lewa vei kedaru. 38Sa qai yabaki ruasagavulu ka'u sa tiko kei iko; a nomu sipi yalewa kei na nomu me yalewa sa sega ni lutudole, kei na sipi tagane ni nomu qele ni sipi ka'u sa sega ni kania: 39A ka sa dresulaki ka'u sa sega ni kauta vei iko; au a sauma ga koi au; ko a tarogi au kina, se butakoci e na siga se na bogi. 40Au sa vakaoqo, sa kani au na katakata e na siga, kei na liliwa e na bogi; a sa yali vei au na moce. 41Au a yabaki ruasagavulu e nomu vale; au a qaravi iko ka yabaki tinikava e na vuku ni luvemu yalewa ruarua, ka yabaki ono e na vuku ni nomu manumanu: ia ko a vukica vakatini na qau i voli. 42Kevaka sa sega ni tiko vata kei au na Kalou ni noqu qase, na Kalou i Eparaama, ko koya sa rerevaka talega ko Aisake, ko sa qai vakatalai au wale tu ga. Sa kunea na noqu rarawa na Kalou, kei na oca ni ligaqu, ka vunauci iko e na bogi e na noa.
43A sa kaya vei Jekope ko Lepani, Ko iratou na yalewa oqo era sa noqu yalewa, ko iratou na gone era sa noqu, sa noqu na manumanu talega na manumanu oqo, ka sa noqu na ka kecega ko sa raica: ia ka cava me'u qai kitaka edaidai vei iratou na yalewa oqo, se vei ira na luvedra era sa vakasucuma? 44Ia oqo, me daru veiyalayalati mada koi kedaru; ka me dua kina vei kedaru na kenai vakadinadina.
45A sa vakaduria cake e dua na vatu ko Jekope, me tu. 46A sa kaya ko Jekope vei ira na wekana, Dou tomitomika mai na vatu; a ra sa binia vata na vatu, ka me dua na suva: a ra sa kana vata mai na dela ni suva. 47A sa vakayacana ko Lepani ko Jikari-saetuca: ia ko Jekope sa vakayacana ko Kaleti.
48A sa kaya ko Lepani, Na suva oqo sa kenai vakadinadina vei kedaru edaidai. O koya oqo sa vakatokai kina na yacana ko Kaleti; 49kei Misipa; ni sa kaya ko koya, Me vakaraici kedaru ko Jiova, ni daru sa dui tiko tani: 50kevaka ko sa vakararawataki rau na luvequ yalewa, se ko sa vakawati kei na yalewa tani mei kuri ni luvequ yalewa, sa sega na tamata vei kedaru, ia na Kalou sa na kila vei kedaru. 51Sa kaya talega vei Jekope ko Lepani, Raica na suva oqo, ka raica na duru, ka'u sa viritura e na vukudaru, 52Sai vakadinadina na suva oqo, ka sai vakadinadina na duru oqo, ni'u na sega ni sivia na suva oqo me'u lako vei iko, ka ni ko na sega ni sivia talega na suva oqo kei na duru oqo mo lako vakaca mai vei au: 53na Kalou i Eparaama, kei na Kalou i Neori, na Kalou ni tamadrau, me lewa mada vei kedaru. A sa bubului ko Jekope vei koya sa rerevaka ko Aisake na tamana.
54Sa qai vakacabora nai madrali ko Jekope mai na ulu-ni-vanua, a sa kacivi iratou na wekana me ra kana vata: a ra sa kana, ka moce e na bogi e na ulu-ni-vanua. 55A sa sou e na mataka ko Lepani, a sa reguca na luvena tagane kei na luvena yalewa, a sa vosavakalougatataki ira: a sa lako ko Lepani, ka lesu ki na nona yasana.
Επιλέχθηκαν προς το παρόν:
NAI VAKATEKIVU 31: FOV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Vakavakadewa Makawa (Fijian Old Version) © Bible Society of the South Pacific