Gn 14
14
Max colchajcan el Lot yuj Abram
1A yet jun tiempoal tu', a Amrafel ayoc reyal bay Sinar, axa Arioc ayoc reyal bay Elasar, axa Quedorlaomer, ayoc reyal bay Elam, axa Tidal ayoc reyal bay Goim. 2A eb canwan ti' chi yak'lej eb owal yetok owanxa eb rey: a ton Bera, reyal Sodoma, Birsa reyal Gomorra, Sinab reyal Adma, Semeber reyal Zeboim, c'al yetok reyal Bela, ac'al oc jun conob tu' chi yik c'apax Zoar. 3A eb owan rey ti', max lajtinej ba eb, junanen ay eb is soldado bay jun ac'al chi yik Sidim, bay ay a' Mar Muerto tinani'. 4A eb rey ti', lajcawebxa abil ayoc eb yalan yikbej rey Quedorlaomer, axa yinxa yoxlajoneb abil xin, max naon eb tol c'amxa chi yak' eb is tojlabal bay cham tu'. 5Axa yet junxa abil, max toj cham rey tu' yetok eb oxwan rey ayoc yetok, bay yul yet Astorot Karnaim. A tu' max ayc'ay eb nak refaíta yuj eb, cax max ayc'ay pax eb nak zusita yuj eb, yul yet Ham, axa eb nak emita max ak'on ayc'ay eb bay Save-quiriataim. 6Axa eb nak horeo xin, max ayc'ay eb nak bay tx'otx' tzalan chi yik Seir, uktebil oc eb nak masantac'al bay mimek ac'al Parán, bay cawilal tx'otx' takin tx'otx'. 7Axa yet max meltzojtek cham rey Quedorlaomer c'al masanil eb ajun yetok, max jayoc eb bay En-mispat, ac'al oc jun lugar tu' chi yik c'apax Cades. A bay tu' max yak'can lajwok el masanil tzet max chaloj yulak be yuj eb yul yet eb amalecita. Cay c'apax tu' max yut c'apax can eb, eb amorreo ay yul is makbej Hazezón-tamar.
8-9Axa eb owan rey yet Sodoma, Gomorra, Adma, Zeboim, c'al Bela, max toj eb yowanil bay ac'al Sidim. A bay tu' max yak'lej eb owal yin eb rey Quedorlaomer, Tidal, Amrafel, c'al Arioc. A eb ti' rey eb bay Elam, bay Goim, bay Sinar c'al bay Elasar. 10A bay masanil yac'alil Sidim, xiwilxa bay chi ajol nuk' asfalto natural. Yuj tu xin, a yet max elaj eb reyal Sodoma c'al Gomorra, ay is soldado eb max ayc'ay bay yulak juntzan olan tu', axa juntzanxa eb xin, max toj eb elaj bay jolomlak witz.
11A eb canwan rey max ak'on ganar tu', max bet yioncantek eb masanil tzet chi loji, c'al masanil tzet caw ay is tojol bay Sodoma, c'al bay Gomorra, cax max toj eb. 12A pax Lot, yican Abram, a tu' cajan bay Sodoma tu', xan max ilaytok preso yuj eb yetok masanil is tzetak yetal. 13Axa jun nak maxto elcanok max bet alon bay cham Abram, cham hebreo, tol mayal ilaytok Lot preso. A tu' cajan cham bay cawilal juntzan te matx'ji yul makbej cham Mamre, cham amorreo. A cham Mamre tu', yuẍtak ba cham yetok Escol, c'al yetok Aner. A eb tu', yetok Abram ayoc eb.
14A yet max yaben Abram tol mayal ilaytok Lot preso, catatu' max wajban oc masanil eb is chekbej tol ayoc yipok is c'ul, a ton eb aljinak yintak, tol 318 eb yin masanil, cax max tzakloj eb yintak eb canwan rey tu'. A ta tu' max michchaj eb yuj eb bay conob Dan. 15Axa yet ak'balil max yiontok Abram masanil is winak tu', cax max toj lemnaj eb yin eb canwan rey tu', max yukten eb masantac'al bay Hoba. A jun lugar tu', a tu' ay sataktok conob Damasco. 16Max yion ec' Abram masanil tzet max yi bey eb, axca tu' max yun coloncan el Lot is yican yetokc'al masanil is tzet yetal; max colchaj c'apax can el eb ix ix, c'al eb nak winak max ilaytok tu'.
Is watx' k'anej Melquisedec yiban Abram
17A yet mayal ayc'ay cham rey Quedorlaomer, yetokc'al eb rey ayoc yetok yuj cham Abram, max meltzoj cham yetok eb max colchajcan yuj tu', axa yeltok cham reyal Sodoma tu' bet chaon Abram bay jun jobe chi yik Save, chi yik c'apax Jobeal Rey. 18Ilab c'apax Melquisedec, reyal Salem, sacerdote c'apax yet Cham Dios Axac'al Ocok, max yak' pan c'al vino bay Abram. 19Cax max yalon watx' k'anej yiban axca ti':
Yak'okab Cham Dios Axac'al Ocok, is watx'c'ulal eban, Cham max watx'nen satcan c'al sat tx'otx'.
20Al-layokab watx' k'anej yin Cham max oc etok, yuj tu' xan max ayc'ay eb ajc'ul oc en, ẍi bay Abram.
Lajwi tu', max yak'on Abram bay Melquisedec diezmoal jantak tzet max bet yican ec' eb bay eb rey tu'. 21Axa yalon cham reyal Sodoma bay Abram axca ti':
—Asannej eb anima chak' ayin, axa masanil tzet yetal, chi can ayach, ẍi bay Abram tu'.
22Axa tak'wi Abram tu' bay, max yalon axca ti':
—Mayal wak' in ti' bay Jehová Cham Dios Axac'al Ocok, Cham max watx'nen satcan, c'al sat tx'otx' ti', 23tol c'am jabok ok witok xol masanil a tzet yetal, tamwal jabok tx'al ma junok tx'anil xanabej ok witok, yet watx' c'am chala' tol oj chin oc beyomal. 24C'am jabok tzet max bet wiec' tu' chi wochej chi occan wetok, asan tzet max lo' eb in chekbej. Axa eb ajun wetok ti', a ton Aner, Escol, c'al yetok Mamre, a eb cham ti', chaokab eb is parte atac'ala' eb, ẍi Abram.
Επιλέχθηκαν προς το παρόν:
Gn 14: ATBYK89
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Kanjobal (Q’anjob’al) © Sociedad Bíblica de Guatemala 1989