Mak 5
5
Yensa afaŋi n’afuuh fáguhoŋo
1Afúrumi na, Yensa ingi ñantaalibehinem anfúrum gulibilino gu beŋen k’anjucum resiyoŋo no ñamhu Gerasen. 2Bankuci a sídeeno údiigeen úduk mu fáguhoŋo aŋŋanne afég Yensa k’agírer burahálinkinem. 3Agida n'afúrumor a bawúboŋo maro na gagune. Údiigeeno úmár, yikireŋ m’apirenem, haani ingi ceenenku balomboono. 4Jamaŋo halabahi ganceenemne a hádiho ingi a halaho, kanda ganceenehem, úmár ayik sembe n’ópájulne ahallun ceeneŋo ámáráŋ k'apah. Wúur pirendom. 5Gadékinadekina jaket báárig a bawúboŋo ingi a montañaŋo k’ayíililineh. Adoohoh bawaalo k'agiihorah arinkinem.
6Angu dam údiigeeno úmár baŋandenti Yensa agírer arahálinem k’ aruŋa a binaanam. 7-8Yensa bafégem ayéj:
- Fi fáguho, fút imbi údiigeeno ummu m’uŋanne!
Údiigeeno apeej ayéjem:
- Yensa Úbáku Díino n'afaŋumne n'ayik sembe, horaŋ akanne k'umitenem? Kalir baŋ karo dúfegineem!
9K'angu Yensa amiihem, ayéjem:
- Fi gurethen neeraŋ?
Ayéjem:
- Me gurethum «Barumuno» maro mint fáguhoŋo iŋanmiŋŋan imbi ummu irumunmiŋ na tip. 10Yensa! Bonkerer way ki dahu úfunn mint a didiiraŋo indi!
11Agida ayikyik koorehu jifekeŋ adé antéeja na a montaaño n'aŋŋay gufoola. 12Fáguhoŋo anyéj Yensa:
- Inini, Bonkereri way! Bénner mint k'ídek iŋanmiŋ imbi jifekeŋo inoŋ.
13Yensa alóki, k’angu andék anŋan imbi jifekeŋo. Agida jifekeŋo ámáráŋ barumunkánin ambábár wuuleŋ anakaŋ. Iyoo inini, fáguhoŋo baŋŋani imbi jifekeŋo maŋ na k’angune a raafo, jifekeŋo angírumer a jídonku montaaño andék annen a jakaamo anlím k’anniiro na nip.
14Afúrumi na, ñankooño banfégi maro jifekeŋo nip anniirone ampaas hágiro beŋen beŋen a bukooro ingi a kanaŋaŋo k'antifur jamaŋo h’ayikne. Banyennehini angírer ba búfego. 15Bampútri imbi Yensa, anlahun na údiigeeno mu fáguhoŋo jup anruurerne n’ajéb, akaana bayaaho, anoohum tum. F'anfégne hómár ambenuh. 16M'anfégne h'ayikne údiigeeno mu fáguhoŋo anruurerne ingi h'ayikne jifekeŋo, antifurtifur hómár nip jamaŋo. 17Banyennehini ankomb bumaanenku Yensa k'afúr a didiirahánin adék bíduk.
18Yensa ingi ñantaalibehinem antuŋul hadéko. Yensa baŋay guyifaŋo a sídeeno, mu fáguhoŋo anruurerne aŋayar butifo k’ayéj:
- Yensa! Túyoom k’inkokayoŋ. Bonkereri!
19Úmár ayéjem:
- Wówo! Dimpirenoŋ k’inkokayoŋ. Inini, fi ŋoolint ba imbi jamankan k’úduk utifureeniŋ ni Umuyhon akááñinahinenne ingi n'ayikne bankabaŋo a binankan.
20Adék akaan maŋ nim. Adék a resiyoŋo n’aretuhne Akooroŋo Haalaŋo k’atifur jamaŋo m'angune na a nintiku ho Yensa akandemne. Jamaŋo banyennehini mees abineeniŋ dáde.
Yensa afaŋi n’afuuh banéro ingi biniiroŋo
21Afúrumi na, Yensa ajuc jakaamo aŋoolin ba gúbido gu beŋen. Bapúti bim jamaŋo andéker anrumun tip k'ankolom maŋ na a bakaranku jakaamo. 22F'angune na údiigeen úduk apútor. Gurethinem Jayirus. Úmár ulaameku jaameŋo. 23Jayirus bapútri aruŋa a jannoku Yensa k’akiinaham ayéjem:
- Kógidhum, biniiroŋo gaŋane. Bonkerer k'índokoŋ a binaanam. Gímputoŋ úlobundom halakan k'ajéb.
Nim gasunkurinne gukiinahu Yensa. 24Angu fo Jayirus alóbne nim Yensa alóki k'andék. Angu jamaŋo m'aŋŋáábineeniŋne anrumunrumun tip k'anliflifeh ba búteejahu Yensa.
25Agida a barumuno bámár ayikyik udikaam m'úpájul buruhu díineŋ haala ingi anakaŋ galeeñinehne. 26Angu udikaamo úmár adékdeker imbi ñansaajum ñanlabahi fo bakodihinem adéter bim, kanda pirendeŋeŋ gusaajhánam. Faka bisaajenkinin ayehenemyehen dáde, afak abecin banéro. 27Angu udikaamo ayennennehin gu Yensa ingi n'ahatne gújebunumo. K’angu dam adéker alahunam. Bafégem ajokála a barumuno a mángákánám k'adék amapun réeŋununku sabadóorhánom. 28Agida n’ayéjoora:
- Haani ídek imapun bayakánam íjebhineh.
29K'angu adak akaan maŋ nim. Bamapuni sabadóorhu Yensa abénn guleeño maŋ fam, k’ahar apájul maro k'agune ajébjeb. 30Samánduko Yensa apájul maro sembehinem ataalálataahála. Bapájuli hómár ahar anoorla k'aning jamaŋo, amiiheeniŋ ayéj:
- Hantaŋ amapunne bayakum?
31Angu ñantaalibehinem anyéjem:
- Eke jamaŋo nip ganliflifehne ba a binankan angu k'úyej: «Hantaŋ?»
32Angu Yensa aningilin a barumuno karo afég wúuro m'amapunemne. 33Udikaamo n'apájulne maro Yensa ajébunemjebun adék aruŋa a jannokunom k'añaŋunah kumbenuho. Baruŋay atifur Yensa h’ayikemne nip, suturaaraŋ honj. 34Babollay gutifo Yensa ayéjem:
- Bágidhum, aji úfegi újebi, a gubaarhu gufiyumo g'ufiyumeemne. Inini upiren údek angu ingi básuum. Banéro afúr arinken bandór.
Nim Yensa alóbne. 35Kanda f'aŋane balóbo ingi udikaamo jamaŋ índukoŋ ampútor na. Immi n’anfúrumor díku Jayirus, Jayirus ulaameku jaameŋo. Angu bampútri anyéj Jayirus:
- Buku uyehen Arafaŋo maro kógido akuckuc.
36Banlóbi nim Yensa ayennehin kanda jahárindeeniŋ. Ayéj Jayirus:
- Dahu ubenuh! Fiyint Díino!
37Balóbi nim mees ayéj barumuno:
- Mukureŋ nanka!
Balóbi nim úmár ankokay ingi Piyer ingi índonkayo inako Jak ingi Saŋ ingi Jayirus ingi jamanku díku Jayirus m'ambúuñuraane. Immereŋ ba bareŋ Yensa alókine k’ankokay ba imbi Jayirus. 38Bampút a díkinem anlahun jíwumo jup. Jamaŋo anhooŋoh, anyíililineh. 39Yensa aŋan a gufaco. Baŋani alahun na jamaŋo n'anwúmohne anhooŋoh. Ayéjeeniŋ:
- Horaŋ gúwumhoŋne ineeŋ? Horaŋ guhonkoŋne? Ingah! Wolo niirooroŋ. Sínduuf fanta gaŋane.
40Yensa balóbi nim jamaŋo anwúmoh k'anyeefihem. Angu ayéjeeniŋ anfúr a bílido. Banfúri ayéj Jak ingi Saŋ ingi Piyer ingi ñamboshu kógido aŋŋáábinem ba a kofaco k'anwaaninne kógido. 41Baŋŋani adék adak alah silaku kógido k’ayéjem:
- Talita kum!
Nim ingine «Kógido kenger!»
42Yensa balóbi nim, kógido akeng k'atuŋul hadéko. Agida kógido ayikyik anaman díineŋ haala ingi anakaŋ. Kógido bakengi a biniirohánom jamaŋo abineeniŋ dáde. 43K'angu Yensa amincin gúyejhu jamaŋo biki andék antéekin maro akengunkengun kógido a biniiroŋo. Ayéjeeniŋ:
- Nétemeŋ ayaahála!
Ankaan maŋ nim.
Επιλέχθηκαν προς το παρόν:
Mak 5: GD
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Copyright Vision Intégrale, Senegal