Genèse 2
2
1Giɗfèk a herkeda a skwi ta tèlèba ta gaʼa aranta. 2A Bi Zhiklè a ndeva mizlinè nengaʼa man a ngau te mʼmèn matsaraɗaʼa. A pats matsaraɗaʼa a nsok va te mizlinè nengaʼa man a ngu tèlèba. 3A Bi Zhiklè a mpshè na ma pats matsaraɗaʼa, a nkezla patsaʼa, aman a pats nasa, Bi Zhiklè a nsok va te mizlinè nengaʼa tèlèba man a gau, a ndeva ma.
4Nasa nhinè giɗfèk a herkeda, man Zhiklè a nge ta.
Gi lak te Eden
A pats man Ndo nzi pèc pècèk Zhiklè a ngu herkeda a giɗfèk, 5wof nftsa a géɗ herkeda di bai, ko lak az di ɓai. Aman Ndo nzi pèc pècèk Zhiklè a nʼnga iyam a géɗ herkeda di bai, ndo mpizhè a géɗ herkeda az di ɓai. 6A minmèn a mshkè auda tʼherkeda, a nruɓa herkeda tèlèba. 7A Ndo nzi pèc pècèk Zhiklè a ngu ndo a mberfenèk herkeda, a nftè na nshèffè a htsan. Aranta, ndo a zhè a nshèffè ma.
8Te deɓaʼa Ndo nzi pèc pècèk Zhiklè a ngu gi lak te Eden, te civèɗ mvèng pats, a mfeda ndo man a gu a pa. 9A Ndo nzi pèc pècèk Zhiklè a ngu aman wofhi tsaɗ tsaɗ ta ftskaɗauda tʼherkeda, amba a dai, amba a skwi nʼndai. Te ndev gi lak, wof nshèffè, a wof man a ngreda skwi man amba a skwi man ambaɓai. 10Te Eden iyam a hakaɗauda te nlèlè, a ruɓ gi lak, te deɓaʼa woyam a nkezla va faɗ. 11Nzlembaɗ woyam nshèlèkuraʼa Pishon; nengaʼa a tèuda herkeda Havila, sam man guro a pa. 12Guro herkedaʼa, nzeladadaʼa. Votok bdellium a kwa mbelaʼa onyx ba a pa. 13Woyam macecèwaʼa, nzlembaɗ na Gihon. Nengaʼa a tèuda herkeda Cush a pa. 14Woyam mamakaraʼa, nzlembaɗ na Hiddékel. Nengaʼa a hi te civèɗ mvèng pats a Assyrie. Woyam mafaɗaʼa, nzlembaɗ na Euphrate.
15A Ndo nzi pèc pècèk a mco ndo, a mfeda a gi lak te Eden, aman a pizhèʼa, a ɓerèʼa. 16A Ndo nzi pèc pècèk Zhiklè a njè na ma a gèd a ndo, a ngaɗa: Te nyi wof tèlèba te gi lak ka ndiaʼa. 17Aman te nyi wof man a ngreda skwi man amba a skwi man ambaɓai, te nengaʼa ka da ndau bai. A pats man ka da ndau, ka metsi ngaya.
18A Ndo nzi pèc pècèk Zhiklè a ngaɗa: Ambaɓai aman ndo a nzi a gèd na. I woy a i ga na ndo ntakaha ara va na. 19A Ndo nzi pèc pècèk Zhiklè a ngu skwi dak a ɗiakihai tʼhwaɗ giɗfèk a mberfenèk, a nhel ta a sam Adam, a nda va ta nzlembaɗ. Ara man Adam a va ta nzlembaɗ, ta da baha ta arsa. 20A Adam a mva ta nzlembaɗ a skwi ndzhamhai tèlèba, a ɗiakihai tʼhwaɗ giɗfèk tèlèba, a skwi dak tèlèba; aman a ndo, a nʼngatsa skwi ntakaha ara va na ɓai. 21A Ndo nzi pèc pècèk Zhiklè a mpa na nzhunè tsektskaʼa a di a ndo, a nzhun na. A nco te va zlangredav staɗ, a nʼndèda sam a pa a zluèd. 22A Ndo nzi pèc pècèk Zhiklè a nrom ngwoz a zlangrendav, man a nco te Adam, a nɗaʼa a sam Adam. 23Adam a ngaɗa: Yowa, vatasl te va vatasl ga, zluèd te zluèd va ga. Sèi ta baha na ngwoz-ndo, te man ta co te va nguraʼa. 24A géɗ nengaʼa, nguraʼa a di a jèkeda bab na a man na, a zleɓi va a ngwoz na, a ta da ndi a zluèd va staɗ. 25A Adam a ngwoz na, cèw cèw ba, ta adai, a ta gi hori azbai.
Επιλέχθηκαν προς το παρόν:
Genèse 2: MOF89
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alliance Biblique du Cameroun 1989