लुका 19
19
कर उठालाहार जखायस
1येसु यरिहो सहर होख्ले जितिहि रहिक्। 2ओइ सहरमा जखायस नाउँ होख्लो मानिस रहिक्। ओइ धनि र कर उठालाहारको हाकिम रहिक्। 3ओइ येसु कुन्को होछ कहिकनि चाहे खोज्तरहिक्। तर पुड्को होख्लो कारनइ र मानिसहान्को भिडइ गर्ते येसुके चाहे नासकिक्। 4उसिगर्ते येसुके चाहे आघु दुगर्ले जाइकनि एउटा नेभाराको रुखमा चढिक। क्यारेकनिसिन येसु ओइबाटभि जितिहि रहिक्। 5जब येसु ओइ ठउँरिमा आइ पुगिक, तब ओइ उप्रो चाहातिहि जखायसके कहिक्, “ए जखायस छिटे तर आइ, आज मर्हाइ तोरो घरमा बिसे बाटि।”
6जखायस छिट्टे तर ओघ्रिक र रमाइले येसुके आफ्नो घरमा स्वागत गरिक्। 7जब मानिसहान्इ इ देख्वाइ, “येसु पापिको घरमा पहुना होखे जाइक्” कहिकनि गनगनाए लाग्वाइ।
8तर जखायस पर्भुको आघु ठेढाइकनि कहिक्, “चाहइ पर्भु, मइ आफ्नो आद्धा सम्पति गरिबहान्के बाटिदेतिन, यदि कुन्हुँसिन फटाइकनि लेलो होख्नि पनि ओख्रो चार गुना फर्काइ देतिन।”
9तब येसुइ ओख्राइ कहिक्, “आज इ घरइ मुक्ति पाउलाटि, जखायस पनि त अबराहामको सन्तान हो। 10मानिसको छउना भुलाइलोहान्के खोजे र बचाए कहिकनि आउलो हो।”#मति १८:११
सोनोको सिक्काको उखान
(मति २५:१४-३०)
11मानिसहान्इ येसुको बोलि सुनि धार्लो रहाइ। ओइबेरा उनहान येरुसलेम नजिक आइ पुग्लो रहाइ। अनि मानिसहान परमेस्वरको राज्ये आए लाग्लाटि कहिकनि सोच्लो रहाइ। उसिगर्ते ओइ एउटा उखान कहिक्, 12“कुन्हुँ एउटा खानदानि मानिस दुस्सिहि देसमा जाइकनि आफ्नो देसको राजा बनिकनि फर्कलाहार बिचार गरिक्। 13ओइ आफ्नो दस जना नोकरके बोलाइकनि एउटा एउटा सोनोको सिक्का देतिहि कहिक्, ‘मइ फर्किकनि नाआउनज्याल सम्म बेपार गरिकनि नाफा गर्हेउ।’ 14तर आफ्नो मानिसहान्इ ओख्राइ मन नापरातरहाइ, उसिगर्ते उ जाइ सक्लो पाछु इ मानिस हाम्रो राजा झिनहोखोस् कहिकनि खबर पठावाइ।
15“तर ओइ मानिस राजा बनिकनि फर्किक्, र आफिइ पइसा देलो नोकरहान्के बोलाइ बेपार गरिकनि कत्का नाफा गर्वाइ कहि सुध्याइक्। 16पहिलि नोकरइ आइकनि कहिक्, ‘मालिक, तइ देलो एउटा सिक्काइ अझइ दस ओटा सिक्का नाफा गर्लाटिन।’ 17मालिकइ ओख्राइ कहिक्, ‘स्याबास, तइ नाम्रो नोकर, तइ बिर्झिन चिजमा पनि बिस्वासिलो बाटेर, उसिगर्ते तोर्हाइ आब दस सहरको हाकिम बनातिन।’ 18आर्को नोकरइ आइकनि कहिक्, ‘मालिक, तइ देलो सिक्काइ अझइ पाँच सिक्का कमालाटिन।’ 19ओख्रो मालिकइ कहिक्, ‘तइ पनि पाँच सहरको हाकिम होख्तेर।’ 20फेरि आर्को आइकनि कहिक्, ‘मालिक, चाहि, तोरो सिक्का मइ इथि रुमालमा लोकाइकनि धार्लाटिन। 21क्यारेकनिसिन मइ तोरोसिन डराइन, तइ कठोर बाटेर, आफि नालगालो बालि काटिकनि लेतेर, तइ आफि लगानि नालगालोठुँ पनि नाफा लेहे खोज्तेर।’ 22मालिकइ ओख्राइ कहिक्, ‘ए फटाहा नोकर, मइ तोरो मुखको बोलि ज तोरो फइसला गर्तिन। मइ कठोर बाटिन्, नालगालो बालि काटिकनि लेतिन, मइ लगानि नागर्लोठुँ नाफा लेहे खोज्तिन तोर्हाइ थाहे रहिक्। 23उसिकनि मोरो सिक्का बइङ्कमा क्यारे नाधारेर त? मइ फर्कि आउलो बेरामा ब्याजसिन पाउलारिन्।’ 24ओइ ओइथि ठेढाइलारहान्के कहिक्, ‘एख्रोसिन ओइ सिक्का लुटिकनि दस ओटा सिक्का होख्लोके देहो।’ 25उनहान्इ कहाइ, ‘मालिक, ओख्रोसिन दस ओटा सिक्का बाटिनि!’ 26तब ओइ कहिक्, ‘मइ ताहान्के कतिन, जख्रोसिन बाटि, ओख्राइ अझइ देहेताइ। तर जख्रोसिन नाटि ओख्रोसिन होख्लो पनि लुट्हेताइ।#मति १३:१२; मर्कुस ४:२५; लुका ८:१८ 27आब मइ राजा होख्लो मन नापरालाहार दुस्मन्के इथि आनो, र मोरो आघु ओख्राइ मारो।’”#मति २५:१४-३०
येरुसलेममा येसुको स्वागत
(मति २१:१-११; मर्कुस ११:१-११; युहन्ना १२:१२-१९)
28इ बोलि कहिकनि येसु येरुसलेमपट्टि जाए लागिक्। 29जब येसु बेथफागे र बेथानिया गाउँ नजिक जइतुन कलाहार डाडामा पुगिक, ओइ आफ्नो दुइ जना चेलाहान्के इसि कहिकनि पठाइक्, 30“आघु गाउँमा जाओ, गाउँ पिस्ले बितिके एउटा गधाको बाछाके बाधिधर्लो भेटाताओ, आन्हा सम्म कुन्हुँ पनि ओइ गधामा नाचढ्लाटि, ओख्राइ फुकालिकनि इथि आन्हेउ। 31यदि कुन्हुँइ ‘क्यारे फुकाल्लो’ कहि सुध्यानि, ‘पर्भुके एख्रो खाच बाटि’ कहेउ।”
32ओइ दुइ चेलाहान गाउँमा गेहाइ येसुइ कलो जस्ने गधाको बाछाके बाधिधर्लो भेटावाइ। 33उनहान्इ बाछाके फुकाले लाग्ते बाछाको गोसाइनेकइ सुध्याइक, “ताहान्इ इ बाछाके क्यारे फुकाल्तिहि बाटो हँ?”
34उनहान्इ कहाइ, “पर्भुके एख्रो खाच बाटि।” 35उनहान्इ बाछाके येसुठुँ आन्वाइ, र आफ्नो लुगा बाछाको कन्ढमा ओच्छ्यावाइ अनि येसुके ओइ उप्रो बिसावाइ। 36बाटमा जितिहि गर्ते मानिसहान्इ आफ्नो आफ्नो लुगाहान ओछ्यातिहि येसुके स्वागत गर्वाइ।
37येसु येरुसलेमको नजिक जइतुन डाडाको ओरालोमा आइपुग्ते येसुको अचम्मको धन्दा सम्झिकनि बेस्के चिच्यातिहि चेलाहान्इ परमेस्वरके पर्सम्सा गरे लाग्वाइ, 38“परमपर्भुको नाउँमा आउलाहार राजा धन्येको हो। स्वर्गमा सान्ति होखुस, परमेस्वरको पर्सम्सा होखुस।”#भजनसङग्रह ११८:२६
39मानिसको भिडभि कुन्हुँ कुन्हुँ फरिसिहान्इ येसुके कहाइ, “गुरु, आफ्नो चेलाहान्के लाभि रहे कहि।”
40येसुइ जबाफ दिहिक्, “मइ ताहान्के कतिन, यदि इनहान लाभि बिस्नि पाथरहान चिच्याइतात्।”
येसु येरुसलेमको लागि रोइक
41जब येसु येरुसलेमको नजिक आइपुगिक्, तब सहरके देखिकनि उ रोइक। 42र कहिक्, “सान्ति क्या चिजभि पाहेताइ कहि जान्लो होख्नि बन्लाहारिक्। तर आब उ सभइ तोरो नजरभि लोकाइलाटि। 43आब तोर्हाइ एस्नो दिन आउताइ, तोरो दुस्मनहान्इ तोरो सभइ पट्टिभि घेरिकनि तोर्हाइ थुनिधार्तात्। 44दुस्मनहान्इ तोर्हाइ र तोरोभित्र बिस्लो तोरो सन्तानके भुइमा पछार्तात्, उनहान्इ एउटा पाथर उप्रो आर्को पाथर पनि नाछाड्तात्। क्यारेकनिसिन परमेस्वरइ ताहान्के बचाए आउलो दिन्के नाचिनो।”
येसु मन्दिरमा
(मति २१:१२-१७; मर्कुस ११:१५-१९; युहन्ना २:१३-२२)
45येसु मन्दिर भित्र जाइक्, अनि ओइ किनबेच गर्लाहारहान्के बाहिर लघारिक्, 46र उनहान्के कहिक्, “धर्मसास्त्रमा एस्नो लेखेलाटि, ‘मोरो घर पर्थनाको घर होख्ताइ।’ ताहान्इ त एख्राइ गुन्डाको ओडार बनालाटो।”#यसइया ५६:७; यर्मिया ७:११
47येसुइ दिन्के मन्दिरमा बचन सिखातरहिक्, मुख्य पुजारिहान, धर्म गुरुहान र मानिसको अगुवाहान्इ ओख्राइ मारे खोज्तरहाइ।#लुका २१:३७ 48तर उनहान्इ ओख्राइ मार्लाहार बाट नापावाइ, क्यारेकनिसिन मानिसहान्इ ओख्रो बचन सुने मक्ख पर्तरहाइ।
Επιλέχθηκαν προς το παρόν:
लुका 19: BOTE
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2024 (Active), Mother Tongue Translators Society and Wycliffe Bible Translators, Inc. All rights reserved.