Matayo 14
14
Yowani Mubatisayi êchibwa
(Mar 6:14-29; Luk 9:7-9)
1Mwe'si suku, Heroti iwábaa wèmire mwa chio che'Kalilaya. Era kûmva kwa ngulu ya Yesu. 2Bushi no'ku, era kubura ebashamuka bai mbu: «Oyola, àli Yowani Mubatisayi iwòmokire mwa bafu! Ne'chi chi chitúmire áata ebuashi bwe'kuíra ebisomerano.»
3Rero, Heroti ábaa àminyise Yowani. Era kumuuma mwa buroko bushi na Herotiya muka Firipo. Oyu Firipo, ábaa munyakabo Heroti. 4Yowani ábaa énjire ábura Heroti mbu: «Oyu Herotiya, eMwaso wetu àtakwêmerere mbu umúhweraa!» 5Bushi no'ku, Heroti era kuhonda kwîta Yowani. Si ábaa énjire ôbaa ebandu, bushi bábaa bèshi kwa Yowani àli murebi*.
6Mango elusuku lukulu lwe'kukengera ekubutwa kwa Heroti lwáikaa, mwali wa Herotiya era kusina era muhondo se'bandu ba bálalikwaa. Oku kusina kwai, kwera kusimisa Heroti busese. 7Mwo'lu, era kumuláanya mwa kulaisa kwa choshi cha angámwěma, angánamweresa'chi. 8Oyu munyere era nyuma se'kwéma nyina eano, era kwire ábura Heroti mbu: «Unano-unano, unyêresaa etwe lya Yowani Mubatisayi kwa mbare.»
9Echera chera kusibusa mwami. Si bushi ne'kulaisa kwa ábaa aláisise mira era muhondo sa'bu bábalikwaa, era kuteta mbu oyu munyere banámweresaa eri'twe. 10Era kutuma mundu muuma mwa buroko mbu aéndaa kuisha etwe lya Yowani. 11Eri'twe, bera kulireta kwa mbare na bályeresa ola munyere. Wamunyere nai, era kulyekera nyina. 12Chasinda, ebanafunzi* ba Yowani bera kuika kutola echirunda chai, na báya kutaba'chi. Ei myasi, bera kuya kuibalira Yesu.
Yesu êucha bandu byumbi bitano
(Mar 6:30-44; Luk 9:10-17; Yow 6:1-14)
13Mango Yesu ômvaa kwe'i myasi, era kutenga aola mwa bwato áya mu chisiki chai yeine. Ebandu bálolire bacha, bera kutenganga kwa misi yabo na bámukulikira ne'maulu. 14Ábere àtenga mwa bwato, era kubuana bandu banene, era kubafira bonjo. Ba bábaa bàli balwala mwa kachi-kachi kabo, era kubalamya.
15Mango lwábaa lwera luolo-olo, ebanafunzi* bai bera kuya kumubura mbu: «Enawetu! Mwa buyeye* muno tùli, kanji ne'butufu bweríre. Bushi no'ku, urékaa bano bandu báye kwa misi, báule ebiryo.» 16Yesu nai mbu: «Abu bandu, bàtěmire kuenda. Mubeine mubawaa ebiryo.» 17Nabo mbu: «eWaliya! Anola tunéte mikati etano ne'fi ebiri oshâo!» 18Yesu era kubabura mbu: «Munyíreteraa'bi.»
19Chasinda, era kubura ebandu mbu bafúmbamiraa kwa bichi. Era kutola era mikati etano ne'se'fi ebiri, era kutumbikisa kwa nguba, na átonga Ongo. Era kubiishanga, na kubyeresa abu banafunzi* bai. Nabo, bera kubiabiranga ebandu. 20Abu bandu boshi, bera kulya na kunêuta. Mango ebanafunzi* bálunda-lundaa bya byáshibaa, byera kwîhusa bitonga ekumi na bibiri. 21Mwa bandu ba bályaa ebi biryo, mwábaa mùli balume bàngaika ku'byumbi bitano, busira kuanja ebakasi ne'bana.
Yesu álambaira kwa nyanja
(Mar 6:45-52; Yow 6:15-21)
22Era nyuma se'bi, Yesu era kubura ebanafunzi* bai mbu běrukiraa mwa bwato, bàmuhondorere kwa mushirirya we'nyanja. Nai era kushiba álaa eluamba lwe'bandu.
23Ábere era aláaa'bo, era kwérukira yeine kwa ndulungu áya kwéma Ongo. Ebutufu bwera kwêra anáchiri yeine kwe'i ndulungu. 24Mwe'chi chihangi, ebwato bwábaa bwàika burerere kusibu ne'mushirirya. Echiusi chábaa chátengera era muhondo sabo. Bushi no'ku, emulaba era kutangirisa áurutanganya obu bwato.
25Ábere lumbuli-mbuli, Yesu era kuika ala banafunzi* bábaa bàli, áenda álambaira kwa nyanja. 26Ebanafunzi* mango bálolaa kwa álambaira kwa nyanja, bera kutungwa. Bera kuchilakangira busese mbu: «Musimu yolaee!» 27Unao-unao, Yesu era kubabura mbu: «Musésaa emuchima! Nyono onola! Mùtobaaa.»
28Petero era kumwǎkula mbu: «Enawetu! Akaba análi woyo, unyíburaa nyibáhe au ùli náenda nálambaira kwa meshi.» 29Nai mbu: «Bàhaa!» Petero kuna kutenga mwa bwato áya ala Yesu ábaa àli áenda álambaira kwa meshi. 30Si mango álolaa kwa chusi chàkaliire, era kwôbaa, na átangirisa ásika. Era kuchilakangira mbu: «Enawetu! Ùnyitabalaa!» 31Unao-unao, Yesu era kunanula emino na ámutola. Era kumubura mbu: «Era! Chi chéraa chátuma wáhungwa-hungwa? Unáli mundu wa bwemeresi bueke!»
32Mango Yesu na Petero bábaa bera bàhubaa kwérukira mwa bwato, echi chusi chera kuorera. 33Bushi no'ku, ebanafunzi* ba bábaa bàli mwo'bu bwato bera kufukama era muhondo sa Yesu na báteta mbu: «Kubinali! Unáli Mwana wa Ongo!»
Yesu álamya ebalwala
(Mar 6:53-56)
34Ábere Yesu ne'banafunzi* bai bera bàhabukaa ei nyanja, bera kuika mwa chio che'Kenesareti. 35Besha mwe'chi chio, mango bámenyereraa Yesu, bera kutuma emwasi mwe'bi bitambi byoshi. Bushi no'ku, bera kumureteranga ebalwala boshi. 36Bera kumwěma mbu ěmereraa chiro ebalwala bénde bánauma kwa musike we'luchimba lwai. Boshi ba báumaa'ko, bera kunalama.
Επιλέχθηκαν προς το παρόν:
Matayo 14: tbt
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2017 Wycliffe Bible Translators, Inc.