Luc 10
10
Jésus amatôma nzima tsambué n’oma abaé
1Va mbenene vane, Kumu Jésus amasevôa nzima tsambué yamôgôô na amôgôô abaé. Amatôma angô abaé gôéôbégéda ahngô gôéyanza gô misenge mietso mingabuéangô amuene. 2Jésus amavovo mbe: Tsagane éndé épôni. Na éne émakandani na émoodoni éndé ti éyekani. Ivô ayanzie asaba ayekani gôéendéga éne émagaabôkôni. T’ebandô nanôtôma mbe: Dukani kumu atsagane mbe anôétsa ayanzi gôéengéda éne émagaabôkôni. 3Kiakani. Nanôkeda mônongovo ga mandombo mandé va gatse anzego. 4Nômbiatsua ta na dode, ta na gébémbé, ta na pondu. Nômbiasikama gô nzéa gôékômbôana. 5Vangeengéa anye na gô eba amôma, pangani évovo mbe: Gétabé saNzambé gébaké gô ebee ôdôô. 6Okô kumu ebee abé môma agétabé, kômbône éanyô éagétabé éngeenanô gôndé angô. Okô kumu ebee asiba môma agétabé, nôtôani kômbône éanyô éagetabé gôndé angô. 7Nôdigaa te gô ebee ôngatubédu anye. Nôaa na nônyua te éne éngeetsô anye. Gôébégô môyanzi avanôkô te gô éne éyanzangô. Nômbiatôta gô yeba na yeba. 8Vatsiganye gô mbôka, na kumu yambôka anôétsa môyakô, aakani éne éétsiô anye. 9Dôngédani ane angadenganye abeeani. Nigôani kumu yambôka mbe: Okumu aNzambé ôweseyi na gôndé anye. 10Ivô vangatsiganye gô mbôka, ôkô kumu yambôka asinôsingéa, temani éta gôéevéda kumu yambôka mbe: 11Buéyé ébisi éatoto éambôkane éanyô, we tôduméda éangô gô makôdô masô. Ivô menyani mbe éébéyéé nane, ôkumu aNzambé ôweseyi na gôndé anye. 12Nanôbeenda na gô pie mbe, gô nyaa amôtsundu asi mbôka nene angasisédu. Na gésisédéôge saô géngootéa géne sasi Sodome.
Asi dipo mbôka ahmatsuma paga
(Bono na Matt. 11:20–24)
13Jésus amavovo mbé: Ti gô maguga mangaba gôndé anye asi Chorazin. Maguga mangaba gôndé anye asi Bethsaïda. Mayanza mami mangudi mayanzi me va gatse anyô, mbe namayanziki gôndé asi Tyr na asi Sidon, ahngô mbe amaata seeda na mbe amoko mioto gô yôtô yaô gôétubéda mbe: Tôndé oma abévani na tôkoi mitémamie. 14T’ebandô nanôevéda mbe, gô nyaa amôtsundu gésisédéôge sanyô géngootéa na géne sasi Tyr na asi Sidon. 15Na anye asi Capernaüm, tambô anye nôabatéda anyene mbe: We tôôtéa oma muetso we tôsaba oma abévani. Anye nôngasugédu gôésisédu gô mungu asoto.
16Jésus amavovo n’aneengie edi mbe: One ookéô anye, ookéô te na me. One akina anye, akina te na me. Na ône akina me, akina te na ône amatôma me.
Génikéô sanzima tsambué n’oma abaé amatômukuni
17Ane amatômukuni, nzima tsambué n’oma abaé, amanika ahtsôkéa ahngô mbe: Ah Kumu, we tôtômi édidi ébévani gô inoo, na éangô égobedi we. 18Jésus amanigôa ahngô mbe: Me nameena Satan amaaga g’ôba ga môkadikadi. 19Oôkôni édué. Me nameetsa anye ngudi yeyeta nyogo na ngôtô, na gôébunza manyangame metso mamôdudeo. Anye nôsangookô pievia. Gôsaba sôma génganôbévédani. 20?Anye nônyôngéô étsôkéa-a? Tsinôénda mbe nômbiatsôkéa gôgobedu anye n’edidi ébévani, ivô ootéani étsôkéa gômatendu miname manyô gô migandamie miag’ôba.
Jésus amatsôkéa na gényônga
(Bono na Matt. 11:25–27, 13:16–17)
21Gô ndéô nene, Jésus amatsôkéa na gényônga gévôni saGédidi SaNzambé, na amavovo na Nzambé mbe: Ah Téta, éwe Kumu atsina n’oba, nagôkuméda. Ewe ômatsutsuéda mabégô mavôni gôndé ana anéngé mbe amamenya. Géé gôndé oma eodo na oma agéneenga gévôni ômasuéga mangô. Na gô pie Téta, éndé te nane gôébégô ômuene ômanyôngéô te nane. Nagôkuméda gô éangô.
22Jésus amavovo mbe: Téta amani édeekeda me mabégô metso. Gôsaba môma angoongôa émenya Muana ANzambé, buétsé te amuene Téta. Gôsaba môma angoongôa émenya Téta, buétsé te memuene Muanedi, na dôta ane angeena Téta gô ngudi yami.
23Vane Jésus amagéngôga gôébono aneengie. Amavovo n’ahngô mbe: Ti gô gényônga géndé n’anye, nôena mabégôme meenanye. 24Nanôbeenda mbe, apandôédi ayekani ambeego amatasa maNzambé, n’atômi atsenge amanyôngéô éena éne éenanye pitsi yedi. Ivô ahngô asiene. Amanyôngéô éôkô mane mookô anye, ivô ahngô asimookô.
Tsava éamôma amawedéa môkedi
25Gévovi amatema gôébambéa Jésus nyivô gôémôkanéga. Angô mbe: ?Môékédi, gôédiia monyo amôbô na môbô nangeenda nayee? 26Jésus amamônikéda mbe: ?Gô mitôma miaNzambé gômatendu nayee? ?Otanga nayee? 27Mômôgôô nône amaabéa Jésus mbe: Natangi mbe: Nyôngéô te Kumu Nzambé éoo na môtémoo wetso na matasa moo metso na ngudi yoo yetso na gédidi soo setso. Na dôta, nyôngéô môkoo ganyôngéô éwe ôtô omuene. 28Jésus angô mbe: Oaabéyi te kuanakue. Indaka te nane. Ongaba na monyo.
29Ivô môma nône amanyôngéô éakuméda amuene, amabambéa Jésus nyene nyivô. Angô mbe: ?Môkasô indaa? 30Jésus amamôaabéa gô tsava mbe: Gômabaka mômôgôô amatimôga gô Jérusalem gôékea na gô Jéricho. Gômakeangô amawanya n’asi môkôbé. Asi môkôbé ahmamôsasa mikandamie. Ahmamôbômôa. Ahmakea na ahmatsika angô aka gôpégôpé n’owa. 31Gô nzéa nene, gômakea dôta môdeekedi adigondoku agô eba aNzambé. Vameenangô mômôgôô nône amamôgônga nyene nzéa. 32Môvo dôta amoota wangô te môyanzi eba aNzambé, môsi géômbé saLévite. Na angô dôta amamôbono na te angô ootaga. 33Na môsi Samarie amakiaka môtôô edi gô nzéa nene, amaviga. Ameena mômôgôô nône. Amamôena ngeba. 34Amawesea gôémôôvôa pôtaye na maduka na madi mamabaka n’edi. Amakata yangô na mikanda. Amamôpekeda gô nyamane éedi émaviakangô. Amamôvegeda na gô eba agenda gôémôkenea gône. 35Ovo enya ameetsa kumu ebee dode. Angô mbe: Keneaka môbeene nône. Eetso éngadimbanéda éwe gôndé angô me nangagônikédéa vangaviga me. 36Jésus angô mbe: ?Gondé ahngô atatô ahmeena môbeene, môkedi indaa gamenya éwe? 37Mômôgôô nône amaabéa mbe: Môkedi te ône ameena angô ngeba. Jésus angô mbe: Kiaka, ôkeenda mônongovo.
Jésus amabuéa gô eba aMarthe na Marie
38Gômakea Jésus n’aneengi edi gô môtôô amabuéa gô épo mbôka. Gô mbôka nene ahmeengéa na gô eba amôgetone eendô mbe Marthe. 39Môdimine aMarthe inedi te Marie, amadigaa va makôdô maJésus gôéôkô mane mameekédangô. 40Jésus amadenga Marthe andé na katigi na pingône amayanza magô eba. Amavovo na Jésus mbe: Kumu, me tsigôénda mbe nagôééndi ébégô ?ivô ôseena gayekegéô me na mayanzame-a? ?Osiinda muaneya aviwedéa me-a? 41Kumu Jésus amamôsemba mbe: Ah ti éwe Marthe, ôkebangana te pingôye yoo yamayanza, na ôyungédu na mabégô mayekani, tambô mabégôme mapie masayeka. 42Ebégôe te évo na koo. Te éne éndé na muanayoo Marie. Asanganôtôu gô éangô.
Επιλέχθηκαν προς το παρόν:
Luc 10: TSV
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alliance Biblique du Gabon (Bible Society in Gabon) 1983