Chenesis 3
3
1Atuk o̱ sinti ak osh nahaksichi imponna kʋt nampoa haiaka itʋnowa Chihowah Chitokaka yʋt ikbi tuk a̱ moma i̱ shahli tok. Atuk osh ohoyo hash, Yohmi mʋhli cho? Iti puta osapushi anu̱ka aiasha ka̱ hʋch ik ai apo kashke, Chitokaka yʋt achi tuk oh cho? im achi tok.
2Mihma ohoyo hash osh sinti ya̱, Iti osapushi anu̱ka aiasha ka̱ ʋni ya il ai ʋpa hinla hoke:
3Amba iti osapushi iklʋnna hikia ʋni ak o̱, Chitokaka yʋt, Hʋsh ai ʋpa he keyu, micha hʋsh potola he keyu, yohmi cha hʋch illi ná, achi tuk oke, achi tok.
4Mihma sinti yash osh, ohoyo ha Hʋch illi pulla he keyu hoke.
5Yʋmma hʋsh ai ʋpakmʋt i̱ nitak mak inli ho̱, hʋchi nishkin ʋt fatuma hi yo̱ Chitokaka yʋt ithana hoka; mikmʋt Chitokaka chohmit, nana achukma, micha nana ik achukmo aiena ka̱ hʋsh ithana hi oke, im achi tok.
6Mihma ohoyo hash osh iti ya̱ ʋpa achukma ho̱, micha nishkin ishit pisa ka̱ achukma ho̱, micha hopoyuksʋla hi ya̱ iti ya̱ bʋnna he ʋlhpesa ho̱ pisa mʋt, yʋmmak ash o̱ ʋni ya̱ ishi cha, ʋpa tok: mikmʋt i̱ hatak ash kia aieninchit ipeta na, ʋpa tok.
7Mihma itatu̱klo kʋt nishkin ʋt fatuma cha, nipi bano hatuk ʋt akostininchi tok; mihmʋt fik hishi yo̱ it achonli cha tikba takali ikbit isht il atahlit okla tok.
8Atuk osh nitak ʋt kapʋssʋchit taha ho̱, Chihowah Chitokaka yʋt osapushi a̱ya na, im anumpa ha̱ haklot okla tok; mihmʋt Alam, micha tekchi itatuklo kʋt Chihowah Chitokaka ya̱ osapushi iti hiohma̱ya ka̱ ai in lumboʋt okla tok.
9Mihma Chihowah Chitokaka yʋt Alam a̱ pit i̱ howʋt, Katima ak o̱ ish anta cho? im achi tok.
10Mihma Osapushi ya̱ chim anumpa ha̱ a haiyaklo li mʋt, sa nipi bano hatuk osh, sa nukshopa cha, luma li tuk oke, achi tok.
11Mihma, Kʋta hosh chi nipi bano hoka, chim anoli tuk o̱? Ish ai ʋpa he keyu chim apesa li kash o̱ iti ya̱ ish ai ʋpa tuk o̱? achi tok.
12Mihma hatak ash osh, Si awant ahanta chi̱ ho̱ ohoyo is sʋma kash osh, iti ya̱ ai ishit ʋma na ʋpa li tuk oke, achi tok.
13Mihma Chihowah Chitokaka yʋt ohoyo hash, Ilʋppʋt nanta mak o̱ ish yʋmihchi tuk oh cho? achi tok. Mihma ohoyo hash osh, Sinti ak osh sa haksichi na ʋpa li tuk oke, achi tok.
14Mihma Chihowah Chitokaka yʋt sinti yash, Ilʋppa ish yʋmihchi tuk okʋt, kalakshi kʋt nanʋlhpoa moma, micha nampoa moma yakni haiaka aiasha ka̱ ish i̱ shahlishke: chikfoka ak o̱ ishit shalʋllit ish a̱ya cha, chi okcha̱ya ta̱kla nitak moma kʋt lukfi ak o̱ ish pa hi oke.
15Mikma chishno, micha ohoyo hash micha chishtaiunchololi micha ohoyo ishtaiunchololi aiena ka̱ hʋch itin tanampichi la chi̱ hoke: yʋmmak okʋt chi noshkobo ha̱ litolikma, chishno mʋt iyi̱kotoba ya̱ ish litola hi oke, im achi tok.
16Micha ohoyo hano, Chakalit isht chilbʋsha hi ya̱ chim apaknʋchi li fehna chi̱ hoke; ilbaiyʋsha hosh ʋlla ish esha hi oke; mikmʋt nana ish ahni kʋt chi̱ hatak ak o̱ ish anukchietokma, yʋmmak osh chi̱ shahlit chilauela hi oke, im achi tok.
17Micha Alam ano, Chi tekchi im anumpa ha̱ ish i̱ haponaklo cha yʋmmak oka chim apesʋt, Ish ai ʋpa he keyu hoke, achi li tuk iti ya̱ ish ai ʋpa tuk oka, chishno ak atuk pulla kak o̱ yakni ʋt kalakshi hoke; chi okcha̱ya nitak moma kʋt nukha̱klo hosh ish ai ʋpa hi oke.
18Nana halupa puta, micha shumo aiena ka̱ chi̱ wayʋcha he; mikma osapa haiyu̱kpulo aiasha kak o̱ ish ai ʋpa hi oke.
19Chi nashuka yʋt laiyaksha hosh pʋska i̱hi̱shpa tuk osh falamʋt lukfi ish toba hi oke; yʋmmak o̱ a chishi tuk oka: lukfi chia hokʋt, falamʋt lukfi ish toba hi oke, im achi tok.
20Mihma Alam ʋt tekchi ya̱ Ef hochifo tok: yʋmmak osh okcha̱ya moma ka̱ ishki yoka.
21Mihma Alam micha tekchi aiena ka̱ Chihowah Chitokaka yʋt na hakshup o̱ nafohka isht im ikbi cha, fohkʋchechi tok.
22Mihmʋt Chihowah Chitokaka yʋt Yakeh! hatak ash osh hʋpishno akinli chohmi ho̱ tobʋt, nana achukma, micha nana ik achukmo aiena ka̱ ithanʋshke: yohmi kʋt himak a̱ ibbak a̱ pit weli cha, iti aiokcha̱ya ak kia ai ishit ʋpa cha, okcha̱ya na bilia yoba ná, achi tok.
23Yohmi hatuk osh Chihowah Chitokaka yʋt yakni yʋmmak o̱ ai ishi tuk a̱ atoksʋla chi̱ ho̱ osapushi Eten a̱ a kochi tok.
24Yʋmohmi hosh hatak ash kocha pit chʋffichi tok: mihmʋt osapushi Eten hʋshi akochaka ont ʋhli ka̱ Chelubim ʋhleha, micha iti aiokcha̱ya aiona ya̱ atoni yosh bʋshpo falaia lihimbi, kanima moma pit bihliblit fullota aiena ho̱ hilechi tok.
Επιλέχθηκαν προς το παρόν:
Chenesis 3: CHH
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Published by the American Bible Society 1848-1886, reprinted 1913