HMOTAOPAZY 8
8
Sawla ta Awnanopa a taola
1Sawla chhao ta Stiphana ama thie awpa cha paryhsa ta. Cha noh tawhta, Zerusale liata Awnanopa cha taolana thata a tyh pathao ta. Lyuhchâpazy dei leipa cha, Zudia nata Samâri râhzy lâta paipatla khai ha ei ta. 2Khazohpa a pachâpazy ta Stiphana cha pabu ei ta, a ri chô liata chaphôh thata tu ei ta. 3#Hmt 22.4,5; 26.9-11Sawla deikua cha Awnanopa taola lymâ ta, o to a ngia ta, a chanô chapaw ta a daophi ta, patâhna o liata khô lymâ ta.
Phili Samâri liata Thâtihpha a chho
4Paipatlapazy cha su to liata siepa ta, bie chho lymâ ei ta. 5Phili cha Samâri khihpi lâ zu ta, ama hnohta Krista thâtih chho ta. 6Hmonoâhpa a taopazy thei ei ta ama hmô nahta, zawpizy cha palôh miakha phaopa ta, Phili bie reipazy cha nathlie ei ta. 7Thlahpa puapazy cha ao paro ngaitapa ta awhna chôta ama patupa chyhsa hluhpi chhôh tawhta vaw pua ei ta, asypa nata pheisypazy chhao patlâhpa châ ei ta. 8Chatanachata cha khihpi liata alyna thata tlô ta.
Dyuthaipa Saimaw pipathina
9Chyhsa pakha a moh Saimaw ama tahpa y ta. Ano cha dyu hmâpa ta, chyhsa rônahpa pakha hawhta a reih ta, Samâri khihsawzy noâh ngaitapa ta a vaw paysa tyhpa a châ. 10Chyhsa zydua, hawti chaipa tawhta a lai chaipa taihta, “He chyhsa he Khazohpa hmotaotheina, Rônah ama tahpa kha a châ hih,” tah ei ta, a bie ama nathlie kaw tyh. 11A dyu hmâpa ta bohpi noâh ngaitapa ta a vaw paysa hapa vâ ei ta, a bie ama nathlie kaw tyhpa a châ. 12Phili ta Khazohpa khinarâh thâtihpha nata Zisu Krista moh a chhopa cha, Samâri mo ta a ngiapâ ei ta, a chanô chapaw ta bâti châ ei ta. 13Saimaw chhao a ngiapâ ha hra ta, bâti a châ khai nahta, Phili hnohta y lymâ ta. Ngiana nata hmonoâhpa rônah ngaitapa a taopazy hmô ta, a noâh ngaita ta.
14Zerusale liata a ypa lyuhchâpazy ta Samâri khih mo ta Khazohpa bie amâ ngiapâ hapa thâtih ama thei nahta, Pity nata Zawhâna cha âmo lâ tuah ei ta. 15Pity nata Zawhâna cha zu ei ta, Samâri khih liata ngiapâtuhpazy cha Thlahpa Pathaihpa ama to thei nawpa ta thlahchhâpa ei ta. 16Thlahpa Pathaihpa cha ahy chô liata hmah tlô mâh leipa ta, Abeipa Zisu moh ta bâti a châpa deita châ chy ei ta. 17Lyuhchâpazy ta ama chô liata ama ku pahnieh ei ta, Thlahpa Pathaihpa hnei ha ei ta. 18Lyuhchâpazy ku pahniehpa vâta Thlahpa Pathaihpa piepa a châ tahpa Saimaw ta a hmô nahta, lyuhchâpazy cha tâkâ pie ta, 19“He hawhpa hmotaotheina he na pie hra teh u, ama chô liata ku ei pahniehpa maihta Thlahpa Pathaihpa a to hra nawpa ta,” tah ta. 20Pity ta a hnohta, “Khazohpa hmopiepa cha tâkâ sôh ta chalei thei awpa ta na pachâpa vâta, na tâkâ cha na leidiana liata leidia hra mawh sy! 21Na palôh phaozie Khazohpa hmiakô liata â doleipa vâta, he hmo liata a hlao hra leipa chi ta, tovyuh chhao hnei va chi. 22Chavâta na moleina ro la, na palôh phaozie a châ ngiahthai thei nawpa ta, Abeipa lâ thlahchhâ mah y. 23Ahaona châmaih ta bie chi ta, molei ta a cha chahry tahpa ei pahno,” tah ta. 24Saimaw ta a chhy ta, “Nama bie reipa cha khâpa hmah ei chô liata a tlô lei nawpa ta, Abeipa lâ thlah na chhâpa teh u,” tah ta.
25Pity nata Zawhâna cha Abeipa bie a châhkhei ei ta, ama chho khai nahta, Samâri râh khih hluhpi liata thâtihpha chho lymâna chôta, Zerusale lâ a lie ha ei ta.
Phili nata Ethiôpia molaipa
26Abeipa vâlyuhchâpa ta Phili cha bie a chho ta, “Thyu la, Zerusale tawhta Kâza lâ zuna lâpi, chho lâta râhchawhpa a chapiapa lâpi lâta sie teh,” tah ta. 27Phili cha thyu ta, sie ta. Ethiôpia chyhsa pakha y ta. Ano cha Ethiôpia beinô Kandaki ry liata molaipa, hrilyupa châ ta, abeinô sôh mohôhtuhpa a châ. Khazohpa a chhy awpa ta Zerusale lâ khy ta. 28A zâ liena lâta, a talailih liata atyuna chôta hrohsopa Isai châbu reih ta. 29Thlahpa ta Phili hnohta, “Talailih lâ hao vawh la, a kei hnia teh,” tah ta. 30Phili cha a kei râ ta, hrilyupa ta hrohsopa Isai châbu a rei haipa thei ta, a hnohta, “Na reipa kha a yzie na pahno ma?” tah ta. 31Ano ta, “Ahy hmahta eina chhopasia leipa ei ta cha, kheihta ma a yzie ei pahno thei aw?” tah ta. Talailih lâ kiah ta, a hnohta a tyuh awpa ta Phili cha hrua ta. 32#Isai 53.7,8He he Ethiôpia molaipa ta a reipa Biehrai cha a châ:
“Thie awpa mietaku hawhta
Ano cha a chhi ei ta,
A hmi ngyutuhpa hmiakô liata
Mietakutaw â chalih thlâh hapa hawhta,
Ano chhao a pakah â vei.
33Maoh paphyuhpa châ ta,
Pachiana dopa pie veih ei.
A pathlazy thâtih ahy a reih aw?
A hrona khizaw tawhta la hapa châ tlôh ta.”
34Hrilyupa ta Phili hnohta, “Ei cha hiahri tua aw, hrohsopa ta he biezy he ahy kyh ma a reih? Anosasyh kyh ma, mohropa kyh maw?” tah ta. 35Phili cha a pakah â ta, cha Biehrai bie tawhta pathaopa ta, Hrilyupa cha Zisu thâtihpha chho ta. 36Lâpi liata ama sie hai nota, ti yna tlô ei ta, hrilyupa ta, “Moh tua, he liata ti a y! Bâti châ awpa ta khâpa ma na pakhâ?” tah ta. 37Phili ta a hnohta, “Na pathipalôh tlokhuh ta nâ ngiapâ khiahta cha, bâti na châ thei aw,” tah ta. Ano ta, “Zisu Krista cha Khazohpa Sawchapawpa a châ tahpa ei ngiapâ,” tah ta.#8.37 Châh 37-na he hlâno kuropa Biehrai thokha liata y vei. 38Talailih paduasa awpa ta biepie ta, Phili nata hrilyupa cha ama pano ta ti lâ zu ei ta, Phili ta hrilyupa cha bâti pachâsa ta. 39Ti tawhta ama kaw pua nahta, Abeipa Thlahpa ta Phili cha a chhi ha ta, hrilyupa ta ano cha hmô khao leipa ta, thapha ngaitapa ta sie ha ta. 40Phili cha Azôtu khih liata hmô ei ta, cha khih tawhta sie ta, Kaisarâ khih a tlôna taihta, khi to liata thâtihpha chho lymâ ta.
Επιλέχθηκαν προς το παρόν:
HMOTAOPAZY 8: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.