Pulim 17
17
Peina gwonim taane
1Abaram déem na yi bena funogo-nogo to mo Baŋa Wɛ tu o veere o tete ded‑o. O maa we, “Amo mo ye Dam-fɔrɔ Tu Wɛ wom.#17:1 Dam-fɔrɔ Tu Wɛ wom: Hiburu = El Shaddai Ta‑n sɛ a ni konto, se n yé ta‑n jege tusim. 2Amo maa wó pa se ni-gwonim delo a dedaane nmo na ke daane to zege chekke, ye a pa se nmo dwi puli de kɔgɔ dedɛ.”
3Abaram ma vwi o yibia tega ne se o zuli Wɛ, ye Wɛ ta ded‑o we, 4“Ko ná ye amo, amo ni-gwonim dem a na ke de nmo to mo tento:
Nmo lage n ji teene dedɛ nabaaro mo. 5Ba daa bá taa bwoi nmo we Abaram,#17:5 Abaram kuri mo ye kwo wolo na jege yere to. nmo yere laam wó taa ye Abaraham mo,#17:5 Abaraham kuri mo ye kwo wolo na jege dwi tiina dedɛ to. kokuri to, a pɛ se nmo ji dwi tiina dedɛ nabaaro mo. 6Amo wó pa se n na dwi dedɛ. A wó pa se teene nwoŋi nmo yera ne. Pwa maa wó taa wora nmo dwi dem wone. 7A wó pa se ni-gwonim delo dé na zo daane to zege chekke. Ko ná ye nmo dwi delo na wó saŋe n kwaga ne to, ni-gwonim dem konto ta wó zege ko pa-ba se ko taa vei wuu mo. Amo wó taa ye nmo Wɛ, de n dwi dem de Wɛ. 8Kanaan tiina tega kanto mɛ nmo ta na ye veiru tento to, mo amo lage a kwei a pa nmo de n dwi dem se á ta‑á tei se ko taa vei wuu. Amo wó taa ye banto de Wɛ.”
9Wɛ laam ma ta de Abaraham we, “Ko ná ye nmo, n jege se n ta‑n jege a ni dem mo, se nmo de n kwaga kam ta‑á sɛ-de taa wuu. 10A ni dem mo tento a na gwoni dede‑m de n kwaga kam maama to. Ni-gwonim dem konto mo á nam jege se á ta‑á zege de wone to:
Abam wone baaro maama jege se o gwoni o peini mo. 11Abam jege se á ta‑á ke peina gwonim mo á yera yam ne. Konto mo wó taa ye memaŋe delo na bere we dé ke ni-gwonim daane. 12Nmo dwi ne se ko taa vei wuu, bakeira wolo maama ná wo á wone ye o yi da nana, á jege se á gwoni kotu peini mo, ko ná maŋe ko ye balo na bere ba dae abam dwi dem nɔɔna to de. Ko ná ye kabɛ selo ba na loge á sam dem ne to, dedaane balo á na maŋe á yeigi de sabu ye ba ye veira to, á jege se á gwoni bakeiri maama peina mo. 13Ba na loge-ba á sam dem ne, naa á yeigi-ba de sabu mo, ko jege se á gwoni ba peina mo. Tento mo amo ni-gwonim dem wó taa wo abam yera yam ne se ko bere we ni-gwonim dem bá taa jege kweelim. 14Ba ná wo gwoni baaro wolo maama peini, kotu daa bá tɔge o woli Isarele dwi dem wone, o na chɔge amo ni-gwonim dem to ŋwaane.”
15 Baŋa Wɛ daa ma ta de Abaraham we, “Ko daare nmo kaane Sarai, daa‑n yé ta‑n bwoi‑o we Sarai, o yere laam ye Sarah mo. 16A lage a ke zaane mo a ke o yuu ne. A nam lage a tɔge wonto baŋa ne mo a pa nmo bakeira. Amo wó swɛ o swolim se o taa ye teene dedɛ nu. Teene dedɛ pwa mo lage ba nwoŋi wonto wone.”
17Abaraham daa ma chɔɔle o yuu tega ne. O ma mɔne ye o ta o wone we, “Nɔɔno ná yi bena bi, o ta wó wane o lo bu na? Ko woli da, Sarah na yi bena funogo to, o ta wó wane o lo na?” 18O laam ma ta o bere Wɛ we, “Nmo ná maŋe n pa Isameli jege yazura ye nmo ná ke zaane n ke wonto yuu ne, ko wó taa daga ko pae amo.”
19 Baŋa Wɛ ma ta ded‑o we, “Ko na wó taa ye tei to, n kaane Sarah mo wó lo bu o pa‑m, ye nmo wó pa o yere we ‘Izaak’. Amo wó pa se ni-gwonim delo a na wó ke ded‑o to zege chekke mo se ko taa vei wuu. De nam ta wó taa wora de pae o dwi delo na wó saŋe o kwaga to de mo. 20Ko nam ná ye Isameli taane dem, a niga n na tage tei to. Amo wó swɛ wonto de swolim. Amo wó pa se o dwi puli o na kɔgɔ dedɛ.#Pulim 21:13 Pwa fuga-balei mo wó taa wo ba wone, ye ba ji te-zɔŋɔ. 21A ni-gwonim dem mo a laam za wó pa se de zege dedaane Izaak, wolo wom Sarah na wó lo o pa‑m bene dento maŋa kanto ne to.” 22Wɛ ma na ŋɔɔne dedaane Abaraham o ti to, o ma kɛ dáa o tei ne.
23Dento dɛ dem ne mo Abaraham jaane o bu Isameli dedaane baara balo dwi maama na zoore o sɔŋɔ kom ne to o ja o nwoŋi. O ma gwoni ba peina, nenɛɛne Wɛ na tage tei to, ko woli de kabɛ selo ba na loge o sɔŋɔ kom ne to de selo o na yeigi de o sabu to maama. 24Abaraham déem ye bena funogo-nogo mo ye ba gwoni o peini dem. 25O bu Isameli de maa jege bena fuga-yatɔ mo. 26Abaraham de o bu-baaro Isameli maama déem gwoni ba peina dɛ dedwe mo. 27Abaraham sɔŋɔ kom baara maama, ko ná ye balo ba na loge-ba dáane, naa balo ba na yeigi veira tei ne to, ba maama mo déem dɛ ded‑o ba gwoni ba peina.
Επιλέχθηκαν προς το παρόν:
Pulim 17: KBG
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 2020, Ghana Institute of Linguistics, Literacy and Bible Translation (GILLBT)