Wepélisiananu 41
41
Jozɛfu Faraɔn lé nyɛ gi fe
(WP 40; Dan 2:4)
1’Bɛ zuo lɛɛ fié yé Faraɔn nyɛ gyɛ. É a ye nyɛ fla léé, ’é a é dɔle yuu sɔnɔ. 2Tɔɔn, dirida sɔrafié si yuu va yé wo kun lu blele ma bwi la. Wa é zima yé wa é buale. 3A zuo dirida sɔrafié bɛ si yuu va é ziin yé wo dɔ wo va yuu gɔ la. Wa naané yé wa é kwééle é ziin. 4Yé dirida naané kwéélenu, wo dirida zima buale ’konu mini. Yé Faraɔn vuo.
5Faraɔn yi gyɛ é ziin yé é nyɛ fiézan gyɛ, ’té ’sanɛnɛ blɛn zima sɔrafié a é dɔle ’sagɔ do nwiin. 6Yé ’sanɛnɛ pia sɔrafié lé é ke é fou nya, ’té yirinwana fu a gyɛ, ’bɛ a é dɔle wo sɔnɔ. 7’Sanɛnɛ blɛn lé ke é kanle é kɔlɛ nya, ’sa founu ’ko wo mini. Yé Faraɔn vuo. Nyɛ lé é a gyɛ, yee lé ke bɛ.
8’Bɛ é tu kini, Faraɔn gi kyɛ dɔ, yé yokɛlɛmunu faa valé wedɔɔmunu faa lé ke Éjipiti tɛrɛ la, é munu nwunvɔ wo laana. Wo da aan wo, é ’élé nyɛ zuo fe wo lɛ. Naa, wo va mi do kpen ’ka bɔ lɛ wo gi fele lɛ Faraɔn lɛ lo.
9Yé dɔrɔtabinzan segele we fe yé é lé Faraɔn lɛ léé: An gi san turu; we do sele dɔ an gi kyɔ. 10Faraɔn bli fli maa valé burukɛlɛzan segele ma bléyian va, é ko vɔ bokɔn gi gaadénu nwiinzan lé fɛna. 11Ko fiénu nyɛ gyɛ yi do nya é béli; yé wo kolé nyɛ gi fe ko lɛ do do. 12Ébru pɛniɛ do a ko va ’bɛna, é a gaadénu nwiinzan lé luu nya. Ko ’kolé nyɛnu zuo fe a lɛ yé é a gi fe ko lɛ. 13É a gi fe ko lɛ fɛan zo, a lɛ sɔɔ a zo. Faraɔn an pla anlé nyanama ta é ziin, yé é burukɛlɛzan segele dun.
14Faraɔn mi nwunvɔ Jozɛfu laana. Wa bɔra bokɔn gi fiéfié. É puoma gun bo, élé sɔ tavɔɔ yé é go Faraɔn va. 15Faraɔn lé Jozɛfu lɛ léé: An nyɛ gyɛ. Mi do kpen ’ka bɔ lɛ a gi fele lɛ an lɛ lo, yé maa a ’ma léé, dé wo nyɛ zuo fe i lɛ, ’té i a a gi fena. 16Jozɛfu lé Faraɔn lɛ léé: Maa kaan lo. Kazambale ɛ dan a gi fe lɛ Faraɔn lɛ é zima. 17Yé Faraɔn lé Jozɛfu lɛ léé: Maa ye nyɛ fla mi, ’té maa a é dɔle yuu gɔ ta. 18Yé dirida buale zima sɔrafié si yuu va yé wo kun lu blele ma bwi la. 19Dirida sɔrafié bɛ si yuu va wo zuo; wa é kwééle yé wa naané é baba; wo nɛ ’ka wo wɔlɛ ma lo; maa ’ka tan ’bɛ zoɛ dirida naanénu ye lɛ Éjipiti tɛrɛ faa la lo. 20Dirida vininnu sɔrafié lé ke é buale, dirida kwééle naanénu wo mini. 21Wo wo mini aan wo, mi ’ka a yé léé, fɛ do kpen go wo plɛ gi lo; yé wa naané wo dɔbɛ gi duowo. Yé an vuo. 22Maa ye é ziin mi léé, ’sanɛnɛ sɔrafié zima ana, ’té wa é kanle é kɔlɛ nya, ’té wa é dɔle ’sagɔ do nwiin. 23Yé ’sanɛnɛ sɔrafié lé ke é pia nya, é fou nya, ’té yirinwana fu wo kyɛ ble, wa é dɔle wonu zuo. 24’Sanɛnɛ founu wo ’sanɛnɛ zima sɔrafié mini. Maa a fe yokɛlɛmunu lɛ, naa, wo va mi do kpen ’ka a gi fe lɛ an lɛ lo.
25Jozɛfu lé Faraɔn lɛ léé: Nyɛ fiénu ’ko gi a do; we lé Kazambale é dan a kɛlɛ lɛ, é a gɔɔn Faraɔn lɛ. 26Dirida zima sɔrafié a lɛɛ sɔrafié nya. ’Sanɛnɛ zima sɔrafié a lɛɛ sɔrafié nya. Nyɛ fiénu ’ko gi a do. 27Dirida kwééle naanénu sɔrafié lé, wo bɔra a vininzannu zuo, wa lɛɛ sɔrafié nya. ’Sa pia sɔrafié lé ke é fou nya, ’té yirinwana fu wo kyɛ ble, wo dan kɛlɛ lɛ lɔrɔdɔlɛɛ sɔrafié nya. 28We lé maa a fe Faraɔn lɛ lao, yee lé; we lé Kazambale é dan a kɛlɛ lɛ, é a nagɔɔn Faraɔn lɛ. 29Lɛɛ sɔrafié gi fɛblele kiɛre é dan kɛlɛ lɛ Éjipiti tɛrɛ faa la. 30Lɔrɔdɔlɛɛ sɔrafié é dan bɔ lɛ ’bɛnu zuo, yé fɛblele kiɛre lé é bɔra Éjipiti tɛrɛ la é vinin bɛ, munu gi é dan san lɛ ’bɛ ma, yé munu é dan zamaga wo lɛ lɔrɔ lee. 31Lɔrɔ ’ko lé é dan dɔ lɛ fɛ kiɛre zuo, é dan kɛlɛ lɛ plɛplɛ, yé mi ’ka dan a gi dɔɔ lɛ léé, é vinin fɛ a kiɛre tɛrɛ ’ko la lo. 32Faraɔn lé nyɛ gyɛle gɔnɔ fié bɛ, ’bɛ gi léé, Kazambale ɛ a fe yé é dan a we kɛlɛ lɛ é kele. 33Sin, Faraɔn ’é mi do si ma, gi kinizan valé wedɔɔzan nya, yé ’é ’bɛzan pla Éjipiti tɛrɛ nwiin ma. 34Faraɔn ’é bɛgimunu dɔ élé tɛrɛ la ma, yé ’wo Éjipiti tɛrɛ la féifɛ soruzan si, lɛɛ sɔrafié lé, fɛnu é dan dɔ lɛ a gi di bɛ, a lɛɛnu gi. 35Lɛɛ zin ’konu lé wo dan bɔ lɛ bɛ, wo gi, ’é wolé fɛnu faa zén ékeva ma. Faraɔn é dan fe lɛ munu lɛ léé, ’wo ’sazunnu dɔ yé ’wo fɛblele zén kɔnnu gi, flanu ta, yé ’wa tabin. 36Fɛblele ’konu é dan vo lɛ é tadɔle munu zé nya, lɔrɔdɔlɛɛ sɔrafié lé é dan da lɛ Éjipiti tɛrɛ la bɛ, wo gi fɛblele nya, té munu é zamagawo lɔrɔ lee lo we gi.
Jozɛfu kɛlɛ minwiinzan nya
(LvS 105:17–22; 113:7–8; Kw 7:9–10)
37Dére ’konu sɔ Faraɔn valé é wuomunu faa lɛ. 38Yé Faraɔn lé é wuomunu lɛ léé: Ko mi bɛ yé bélé mi ’ko zo, ’té Bale léli a a gii? 39Yé Faraɔn lé Jozɛfu lɛ léé: Kazambale fɛ ’konu faa gɔɔn i lɛ, amalé mi do lé ’bɛ gi ke é kinile yé ’bɛ we dɔɔ bélé bii zo, ’bɛzan ’ka lo. 40Maa i dɔ kyɔ anlé kɔngimunu nwiin, yé anlé munu faa é dan i lɛdɔ lɛ a ma wenu faa lé bé fé wo lɛ, a ma. Maa ɛ ke minwiinzan blɛn nya; dé maa kaan lo, mi bɛ ’ka mini lɛ i lɛ lo. 41Faraɔn lé Jozɛfu lɛ léé: Bé ye, maa i pla Éjipiti tɛrɛ faa tere nwiin. 42Faraɔn é bɛmazéné si é bɛ ma, yé é a vɔ Jozɛfu bɛnwɔlɛ ma. Yé é lɛnsɔ zima zén a ta, yé é bɔrɔmakyan vɔ a bɔrɔ ma. 43Yé é a vɔ goro lé ke ’ézé zuo, a gi, yé wo siaa a ’lɛ léé: ’Ka powuo zun! A zo lé Faraɔn Jozɛfu pla Éjipiti tɛrɛ faa nwiin. 44Yé é lé Jozɛfu lɛ é ziin léé: Maa lé ke Faraɔn nya. Dé bii ’ka tan a fe lɛ léé, ’wo bɛ valé ’wo gane nwa lo, té mi do a kɛlɛ Éjipiti tɛrɛ faa la lo.
45Faraɔn tɔ pa Jozɛfu ma Safanat‐Paénéa, yé é Onfla balebanzan Poti‐Féra lu Asinat nɔ a lɛ a na nya. Yé Jozɛfu go Éjipiti tɛrɛ nagini lɛ. 46Jozɛfu da aan wo Éjipiti mununwiinzan blɛn Faraɔn ’lɛ, ’té a lɛɛ a yɔ do wɔlɛ vu, yé é si Faraɔn va yé é gié Éjipiti tɛrɛ faa la.
47Fɛ kiɛre dɔlɛɛ sɔrafié bléyi va, tɛrɛ fɛ dɔ di. 48Jozɛfu lɛɛ sɔrafié ’konu gi fɛblele faa zén ékeva Éjipiti tɛrɛ faa la. É fɛblelenu zun dɔ flanu ta. É flanu faa do do ta féifɛnu si, yé é wo zun dɔ flanu ta. 49Jozɛfu ’sazun dɔ kiɛre bélé wɛyi gɔɔn ma nyéné zo. É a kiɛre fɛan zo, bɛwemalé wo daan a nɔnɔle ma; a nɔnɔ’léé ’ka lo, azama.
50Lɔrɔdɔlɛɛ sɔrafié ’lɛ, Onfla balebanzan Poti‐Féra lu Asinat négɔné fié yaa Jozɛfu lɛ. 51Jozɛfu élé né vininzan tɔ pa Manasé. Naa, é léé: Anlé nyanéblele koo, an ti lé kɔngimunu koo, Kazambale wo faa sele saan an gi. 52Yé é ’é be fiézan tɔ pa Éfraim. Yé é léé: Bale an fan anlé nyanébletɛrɛ la.
53Éjipiti tɛrɛ la fɛdɔlɛɛ sɔrafié gié. 54Yé lɔrɔdɔlɛɛ sɔrafié pélisia, Jozɛfu a fe fɛan zo, a zo. Lɔrɔ dɔ tɛrɛ faa la, naa, fɛblele ana Éjipiti tɛrɛ faa la. 55Dé fɛ nyaa Éjipiti tɛrɛ faa la é ziin, ana munu da wuvɔ lɛ Faraɔn ma, léé, ’é fɛblele nɔ ’wo lɛ. Faraɔn lé Éjipiti munu faa lɛ léé: ’Ka go Jozɛfu va, yé we lé é dan fe lɛ ka lɛ, ’ka kɛlɛ. 56Lɔrɔ dɔ fɛfaana. Jozɛfu fɛblele kɔnnu lɛ so yé é ’sa dan Éjipiti munu lee. Yé lɔrɔ dɔle Éjipiti tɛrɛ la gi gyɛ. 57Lɔrɔ dɔ plɛplɛ tɛrɛnu faa la, yé munu si ’wolé tɛrɛnu faa la yé wo da Éjipiti, ’sa lɔle Jozɛfu lee we gi.
Επιλέχθηκαν προς το παρόν:
Wepélisiananu 41: GOURU
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alliance Biblique de Cote d'Ivoire 1979