Wepélisiananu 37
37
Jozɛfu bwenu é dan
(WP 45:4–8; Kw 7:9)
1Jakɔb nyana Kanaan tɛrɛ la, fɛana lé a ti nyana, ana.
2Jakɔba lé nénu lé we lé ke ’ko.
Jozɛfu lɛɛ bɔ aan wo vu ta sɔrafié, yee valé é bwenu a trubɛnu tabinna; né ’ko a é ti nanu Bila valé Zilpa benu va. Yé Jozɛfu wolé wenyanénu zuo fe é ti lɛ. 3Izraɛl Jozɛfu yaa élé kwa ta gi, bɛwemalé a wea a lee é mini a be pɔnénu faa ta. Yé é varɔ nyɔɔzan do kini a lɛ. 4A bwenu a ye léé, Jozɛfu sɔ wo ti lɛ é mini wo faa ta, bɛwemalé a za a wo gi. Wo ’ka bɔa we drɔɔ fele lɛ a lɛ lo.
5Jozɛfu nyɛ gyɛ yé é a zuo fe é bwenu lɛ. Yé a za kɛlɛ wo bli gi blɛn é mini é vinin ta. 6É lé wo lɛ léé: ’Ka tɔné dɔ nyɛ lé maa a gyɛ, a lɛ. 7É kɛlɛ léé, kaa a féi mi, ’sa nwunnu yerena. Yé anzé ’sa nwun nwa yé é dɔ loru. Yé kazénu diri a zi, yé wo dia ’wo bli la anzé ’lɛ. 8A bwenu lé a lɛ léé: I dan pla lɛ ko nwiin? Bii ɛ dan kɛlɛ lɛ ko nwiinzan nyaa? Alé nyɛgyɛlenu valé a dérenu lé we ma, a za kɛlɛ é ziin é bwenu bli gi blɛn é mini é vinin ta.
9Yé é nyɛ do gyɛ é ziin yé é a zuo fe é bwenu lɛ. É léé: An nyɛ do gyɛ é ziin. Yiri koo, moné koo, monéné vu ta do koo, wo dia ’wo bli la an ’lɛ. 10É a zuo fe é ti valé é bwenu lɛ. A ti we pla a lɛ, yé é léé: Nyɛ lé bé gyɛ bɛ, a gi lé nɔɔ? É a lé, maa koo, i bu koo, i bwenu koo, ko dia ko bli la tɛrɛ va i ’lɛɛ? 11A va maawole a é bwenu bli gi, naa, we ’konu sele voo a ti gi.
12Jozɛfu bwenu go Sisɛm wo ti lé trubɛ tabin lɛ. 13Izraɛl lé Jozɛfu lɛ léé: I bwenu ’ka trubɛ tabinna Sisɛm loo? ’I da, maa i nwunvɔ wo va. Yé Jozɛfu léé: Maa lo. 14Izraɛl lé a lɛ léé: ’I go ma. Dé i bwenu anaa? dé trubɛnu a drɔɔ? ’i go bé nagini, yé i da wo ta we fe an lɛ. Yé é Jozɛfu pa zia; yé é nwa Ébrɔn gɔnu worona yé é go Sisɛm. 15Wo valé mi do kee, ’té é san bwi gi. Yé ’bɛ we laa a lee léé: Mɛ fɛ lé bé ginimaa? 16Jozɛfu lé a lɛ léé: Maa a an bwenu naginina. Fɛana lé wa trubɛ tabinna, bé fe an lɛ ma. 17Yé mi ’ko léé: Wo si ’ko, yé maa ’ma wo ta léé, kaa go Dotan. Jozɛfu go é bwenu zuo yé é bɔ wo ma Dotan.
18Wa ye baa. Dé é ’ka tan bié lɛ wo ma lo, wo ’wo gi pa a ma léé, ’wa gyɛ. 19Yé wo lé wo ke lɛ léé: Nyɛgyɛzan‐o, yee lé é dan mun. 20Sin, ’ka da, kaa a gyɛ, yé kaa a vuli ’yiguru do gi. Yé kaa dan a fe lɛ léé, wi nyané do a ble. Yé dé alé nyɛgyɛle é dan kɛlɛ lɛ kaa? kaa dan a ye lɛ. 21Rubɛn we ’ko ’ma, yé é né si wo lee a fele nya léé: Té kaa a gyɛ lo. 22Rubɛn lé wo lɛ é ziin léé: Té ka a nyɛ zana lo. ’Yiguru lé ke bwi gi ’ko, kaa a vɔ ’bɛ gi. Té ka wenyané kɛlɛ a lɛ lo. É a ’bɛ gi léé, é dan a si lɛ wo lee, a pale zia é ti va we ma.
23Jozɛfu bɔ aan wo é bwenu va, ’té alé varɔ nyɔɔzan a é zénle a ta, yé wo yee varɔ si a ta, 24yé wo né si yé wa vuli ’yiguru gi. Guru ’ko gi a é pla; ’yi do kpen ’ka a gi lo. 25’Bɛ zuo yé wo nyana fɛblena. Wo yara nwa yé wo Ismaɛl munu valé nyɔgɔménu ye dana. Wo si Galaad tɛrɛ la. Zianbla ginzannu koo, baumélia koo, mirélia koo, wa wolé nyɔgɔmé punu kɔné nya, ’té wo goan Éjipiti tɛrɛ la. 26Yé Juda lé é bwenu lɛ léé: Kaa zuané gyɛlɛ yé wa nyɛ yɔɔ, kaa dan mɛ fɛ ye lɛ ’bɛ maa? 27Kaa a dan Ismaɛl munu lee ma, té ka wenyané kɛlɛ a lɛ lo; é a kaa zuané nya, kaa faa ti a do. Yé a bwenu dɔ a dére la. 28Yaawomunu lé wo si Madian tɛrɛ la, wa giéna aan wo Jozɛfu bwenu wo zuané gana yé wa si ’yiguru gi. Yé wa dan Ismaɛl munu lee gɔɔli fu sikla yɔ do va, yé ’bɛnu go a nya wo lee Éjipiti tɛrɛ la.
29Rubɛn da é ziin ’yiguru ta, ’té Jozɛfu ’ka guru gi é dɛrɛ lo. Yé é ’élé sɔnu fia, 30yé é go é zuannu va é ziin yé é léé: Pɛniɛ ’ka ana é dɛrɛ lo. Yé maa, maa dan go lɛ kyɛɛn? 31Yé wo Jozɛfu lé varɔ si yé wo boligɔné do gyɛ, yé wo yee varɔ burula a nyɛ va. 32Yé wo yee varɔ nyɔɔzan pa wo ti lɛ zia yé wo we pa a lɛ zia léé: Fɛ lé ko a ye, yee lo. Dé i be lé varɔ léé, dé yee kaan lo, bé nagini yé bé fe. 33Jakɔb a dɔɔ yé é léé: An be lé varɔ lé. ’Té wi nyané a ble. É Jozɛfu wi kini ékema. 34Yé Jakɔb élé sɔnu fia yé é bɔlɔ dɔ é gyɛn, yé é mɔn ’é be gyɛ bona. 35A benu faa valé a lunu faa da a tɔrɔ paa lɛ; yé é ’ka ’bɛ nyi si lɛ monomono lo. É léé: An dan go lɛ an be va gamunu nyanana a wuvɔle nya. Yé é vo é be wuvɔna.
36Madian munu Jozɛfu dan Potifaa lee, Éjipiti tɛrɛ la. Potifaa a Faraɔn bɛgizan nya, gaadénu nwiinzan nya.
Επιλέχθηκαν προς το παρόν:
Wepélisiananu 37: GOURU
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alliance Biblique de Cote d'Ivoire 1979