Wepélisiananu 35
35
Jakɔb tɔ dɛrɛ ye — Izraɛl
(WP 48:3–4)
1Kazambale lé Jakɔb lɛ léé: ’I nwa, ’i go Bétɛl yé i nyana ’bɛna. ’I balebanna kɛlɛ, Bale lé é bɔra i va bléyian va lé i vɔ flii i bwe Ézau lee, a lɛ.
2Jakɔb lé élé kɔngimunu valé é mamunu faa lɛ léé: Bɛnnu lé balenu lé ke ka lee, ’ka wo si ka méléna. ’Ka kɛlɛ é zima, ’ka kalé sɔnu tavɔɔ. 3Kaa nwa, kaa go Bétɛl. Maa dan balebanna do kɛlɛ lɛ ’bɛna, Bale lé é an dére nyi si anlé kle ble yi nya, ’té é kɛlɛ an va anlé tawo bléyi va bɛ, azé nya.
4Bɛnnu lé balenu faa lé ke wo lee, é valé wo tɔnémakyan nya, wa nɔ Jakɔb lɛ. Jakɔb guru bo sɛnéyili lé ke Sisɛm sɔnɔ, a wuo, yé é wo zén a gi. 5A zuo wo go. Kazambale lé kanale zén flanu faa lé é ke wo zi, wo tamunu gi, yé wo ’ka Jakɔb benu zuo bin lɛ lo. 6Jakɔb valé munu faa lé ke a va, wo bɔ Luz, yee lé ke Bétɛl nya, Kanaan tɛrɛ la. 7Jakɔb balebanna do kɛlɛ ana, yé é fɛkona tɔ laa El‐Bétɛl. ’Bɛna lé Bale ébozen gɔɔn a lɛ, bléyian va lé é vɔ fli gi é bwe lee, a bléyi va. 8Rébéka pazan Débora ga. Wa pa Bétɛl, sɛnéyili do lé wa tɔ pa wuvɔsɛnéyili, a wuo.
9Jakɔb sile Padan‐Aram zuo Kazambale bɔra a va é ziin, yé é a drɔɔ vo. 10Kazambale lé a lɛ léé: I tɔ lé Jakɔb. Wo ’ka dan i laa lɛ Jakɔb é dɛrɛ lo, naa, i tɔ é dan kɛlɛ lɛ Izraɛl. Yé é a tɔ pa Izraɛl. 11Kazambale lé a lɛ léé: Maa a Plɛplɛfaazan Bale nya. ’I fan yé ’i kɛlɛ di ma. I dan bɛn do valé bɛn kiɛre yaa lɛ, yé i dan minwiinmunu yaa lɛ. 12Tɛrɛ lé maa a nɔ Abraam valé Izak lɛ, maa dan a nɔ lɛ i lɛ, yé maa dan tɛrɛ ’ko nɔ lɛ i kulunu lɛ, i zuo.
13Kazambale nwa Jakɔb ta loru, fɛana lé é we fe a lɛ bɛ, ana. 14Fɛana lé Kazambale we fe a lɛ, Jakɔb weseledɔmigifɛ dɔ ana. É a kɛlɛ gɔlɛnu nya, yé é baleban’yi valé nyɔnɔ zén a ta. 15Fɛana lé Kazambale we fe a lɛ, Jakɔb ana tɔ pa Bétɛl.
16Wo si Bétɛl; é vo sɛ yé wo bɔ Éfrat aan wo, Rasɛl né yaa. Alé né yaale kɛlɛ tɔntɔn. 17Alé né yaale tɔntɔn bléyi va, a zi le lé a lɛ léé: Té i kana lo. I négɔné do ye é ziin. 18Rasɛl a gona gana, naa, a lɛbole ’lɛ, é a tɔ pa Bɛn‐Oni, naa, a ti a tɔ pa Bɛnjamɛn. 19Rasɛl ga yé wa pa Éfrat zi sɔnɔ, yee lé ke Bɛtléɛm nya. 20Jakɔb tɔmase dɔ a vun ta. Yee lé ke Rasɛl vun ta tɔmase nya. É ana tan kyɔ. 21Izraɛl go, yé élé sɔkɔn dɔ Migidɔl‐Édɛɛ zi. 22Bléyian va lé Izraɛl a tɛrɛ ’ko la, Rubɛn go yi gyɛ lɛ é ti wuozan Bila va. Yé Izraɛl a we ’ma. Jakɔb benu a mi vu ta fié.
23Léa benu lé ke ’ko: Jakɔb lé né vininzan Rubɛn koo, Siméɔn koo, Lévi koo, Juda koo, Isakaa koo, Zabulɔn koo, woo lé. 24Rasɛl benu lé ke Jozɛfu valé Bɛnjamɛn nya. 25Rasɛl wuole Bila be lé ke Dan valé Néfitali nya. 26Léa wuole Zilpa benu lé ke Gad valé Azɛɛ nya.
Jakɔb benu lé wo wo yaa Padan‐Aram, wo lé ke bɛ.
Izak gale
27Jakɔb bɔ é ti Izak va Mamré, Kiijat‐Aaba, yee lé ke Ébrɔn nya. Ana lé Abraam valé Izak nyana.
28Izak tɛrɛlalɛɛ kɛlɛ lɛɛ yɔ sɔraziɛn. 29É ga yé é go élé munu va. É a é kwa yé alé yinu a di. A benu, Ézau valé Jakɔb a pa.
Επιλέχθηκαν προς το παρόν:
Wepélisiananu 35: GOURU
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Alliance Biblique de Cote d'Ivoire 1979