Génesis 2
2
1Usokin ꞌatankëxun ka Nukën ꞌIbu Diosan naí ꞌimainun me, anua ꞌikë ñukama këñunbi ꞌakin kamabi sënëonkëxa. 2Mapai achúshi ꞌimainun achúshi nëtën ka Nukën ꞌIbu Diosan an ꞌakë ñukama sënëonkëxa, usokin ꞌatankëx ka tantiakëxa. 3Usa ꞌain ka mapai achúshi ꞌimainun rabë́ nëtë a upíokin sinánxuni a nëtëx ka upíira ꞌiti ꞌikë kiax kiakëxa, a nëtën ka kamabi ñukama uniotankëx tantiakëxa. 4Ënë banax ka usakin ka Nukën ꞌIbu Diosan naí ꞌimainun me uniokëxa kixun ñuikë bana ꞌikën.
Uni Edén kakë naësa menu ꞌiá
Usakin Nukën ꞌIbu Diosan naíkamë ꞌëo këñun me uniokin sënë́onkë ꞌaínbi ka, 5anu añu ñubi ꞌaima pain ꞌiakëxa, añu ñubi ka me mëuküax ꞌirukëma pain ꞌiakëxa, uñeribi ka Nukën ꞌIbu Diosan ꞌibumiama pain ꞌikën an me chabóti, ꞌimainun ka an naë mëníoti uni ꞌaima pain ꞌiakëxa. 6Usa ꞌaínbi ka menuax mekama chabói ꞌumpax shióbuakëxa. 7Usa ꞌain ka Nukën ꞌIbu Diosan mebi unisa ꞌinun ꞌatankëxun aín rëkinu rëxúnkakëxa, rëxúnkakëxëshi ka uíni uni ꞌiakëxa. Usai ꞌika uni uniakëxa.
8Usokin ꞌatankëxun ka Nukën ꞌIbu Diosan Edén kakë naësa me, auküaxa bari urukë, anu achúshi naësa okin ꞌaxun anuxun kamabi ñu bëruánti anubi ëankëxa. 9A naësa me anu ka Nukën ꞌIbu Diosan bëtsi bëtsi i upíbu ꞌixuan aín bimi upíbu pisabi ꞌinun tuati a koónun ꞌimiakëxa. Imianan ka naësa me a nëbëtsi a pia uni upiti tsóti ꞌimainun, a pikin uisa ñux kara upí ꞌikë a ꞌunánan uisa ñux kara ꞌatima ꞌikë a ꞌunánti aribi kónun ꞌimiakëxa.
10Usa ꞌain ka Edén kakë naësa me anuax achúshi baka an naësa a chabóti shióbukë, anuax ka amo rabë́ ꞌimainun amorabë́ ꞌinun baka saëakëxa. 11A baka achúshinëx ka Pisón kakin anëkë ꞌiakëxa, an ka Havilá kakë mekama bëararakë ꞌiakëxa. A menu ka ꞌitsaira kuri ꞌiakëxa. 12A menu ka kuri upíira ꞌimainun i bëpín sanuira ꞌianan ka ónice kakë maxáxribi anu ꞌiakëxa. 13Bëtsi baka ka Guihón kakin anëkë ꞌiakëxa, an ka Cus kakë me bëararakë ꞌiakëxa. 14Bëtsi baka ka Tigris kakin anëkëribi ꞌiakëxa, ax ka Asiria amiaxa bari urukë ami kikiani kuankëxa. ꞌImainun ka Bëtsi bakaribi ax Éufrate kakë ꞌiakëxa.
15Edén kakë me anu naësa achúshi ꞌatankëxun ka Nukën ꞌIbu Diosan an uniokë uni kakëxa: ënë bërúanan mënioi kamina ënu tsóti ꞌain, 16katankëxun ka ësokinribi kakëxa: Min kamina piti ꞌain kamabi i bimi naësa ënua ꞌikë ënë, 17ꞌën kana mi kain, anun upí ꞌimainun ꞌaisama ñu ꞌunánti a i ain bimi kamina pitima ꞌain. Uisaran karamina a bimi pin a nëtënbi kamina bamakë ꞌiti ꞌain. 18Katankëxun ka Nukën ꞌIbu Diosan kakëxa: uníxa ashira ꞌiti ka ꞌaisama ꞌikën. Usa ꞌain kana an ꞌakinti bëtsi ꞌaxúnti ꞌain.
19Usakin ꞌatankëxun ka Diosan menua uniokë ñuinakama ꞌimainun ñuina pëchiñukama unin anënun uninu uankëxa. A unían anëkë ꞌaish ka kamabi ñuinakama a piti a pitima ꞌimainun kamabi ñuina pëchiukama ꞌimainun raëkëmakama anëñu ꞌiakëxa, 20anëkëx ka aín anë ax anubi bërúakëxa. Usa ꞌaínbi ka a ñuinakama achúshinëxi a uni ꞌakinsama ꞌiakëxa.
21Usa aín ka Nukën ꞌIbu Diosan a uni ꞌaímai upiti ꞌuxtanun ꞌuxmiakëxa, ꞌuxmikëxa ꞌaímai upiti uxan ka aín putu achúshi bitankëxun aín naminbi amiribishi bëtasakëxa. 22A putúbi ka Nukën ꞌIbu Diosan achúshi xanu ꞌinun uniokëxa, uniotankëxun ka a uninu bëakëxa, 23bëia isi, ka uni kiakëxa: ¡Ënëx ka ꞌën namibi ꞌanan ꞌën xobi ꞌakë ꞌikën! Aín anëx ka xanu ꞌiti ꞌikën, ax ka Diosan unin putúbi bixun ꞌakë ꞌikën. 24Usa ꞌain ka unin aín xanu bikin aín papa aín tita ënti ꞌikën, usa ꞌaish ka a rabëtaxbi achúshi unisashi ꞌiti ꞌikën.
25Usakin ꞌakëx ka uni ꞌimainun xanu chupañuma ꞌiakëxa, ꞌaínbi ka usa ꞌixunbi a rabëxun rabinti sinánma ꞌikën, sinanima ka usabi ꞌiakëxa.
Επιλέχθηκαν προς το παρόν:
Génesis 2: cbrPB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© 1978, 1995, 2008, 2022 Wycliffe Bible Translators, Inc. All rights reserved.