NINGPAWT NINGHPANG 19
19
Sodom Mare A Yubak
1Dai lamu kasa yan gaw nrim aten e, Sodom mare de sa du ma yang, Lawt gaw mare chyinghka e dung nga ai. Shi shan hpe mu ai hte rau shan hte hkrum na matu rawt sa wa wu ai. Shi gaw shan a man e gum dagup let, 2“Madu yan e, nan hpe daw jau lu n ga, ndai yang e ngai nga nga nngai. Chyeju hte nye a nta de sa wa ya mi. Nan a lagaw hpe shin lu nna shana tup nga nga lu na myit dai. Shing rai jahpawt manap jau jau rawt nhtawm nan a hkrun lam hpe matut sa wa mu,” ngu nna tsun wu ai.
Rai ti mung shan mahtang, “N rai law, ndai mare lam kaba hkan e she an shana tup nga nga na ga ai,” ngu nna htan ma ai.
3Shi gaw shan hpe akroi anoi nga nna matut shadut wu ai majaw, shan mung shi hte rau shi a nta de hkan wa ma ai. Bai manam ni a matu muk loi mi kabaw na matu mung, mu mai ai lusha hkyen lajang na shajin ngut jang, shan sha ma ai. 4Dai manam yan yup ra garai n shang yang, Sodom mare na lasha ni dai nta hpe grup di wang da mu ai. Mare na lasha kaji kaba yawng mung dai shara hta nga nga ma ai. 5Lawt hpe shanhte shaga shapraw la nhtawm, “Dai na nang hte rau nga na matu du sa ai yan gaw kanang rai nga ma ta? Shan hpe anhte hpang de shapraw ya mi!,” ngu nna san mu ai. Sodom mare na lasha nlang ni mahtang shan hte kanawn mayu nga ma ai.
6Lawt mahtang shinggan de pru nna shi a shingdu na chyinghka la tawn da wu ai. 7Shi gaw shanhte hpe, “Manang ni e, ndai zawn re ai n hkru n shawp ai amu hkum galaw nga myit! Ngai nanhte hpe hpyi nem nngai. 8Yu mu, ngai hta mahkawn jet naw re ai shayi sha lahkawng lu nngai. Shan hpe nanhte ra ai hku mi di lu na rai myit dai. Rai ti mung ndai masha yan hpe chyawm gaw hpa mung hkum di ya mi; shan gaw nye a nta na manam yan rai nga ma ai majaw ngai shan hpe makawp maga la lu na nngai,” ngu nna tsun wu ai. #Trg 19:22-24.
9Rai ti mung, shanhte mahtang, “Yen u, nang tsasam masha wa mi anhte hpe hpa galaw na lam tsun mi ai, nang gaw kadai wa rai nga n ta? Yen u, shing n rai jang shan hpe di ai hta nang hpe mahtang grau sawng hkra di na ga ai,” ngu nna tsun mu ai. Lawt hpe shingdu de shanhte kanawng shanga kau nhtawm chyinghka hpe agrawp daw kau na matu sit lung wa ma ai. 10Rai ti mung, nhku e rawng nga ai masha lahkawng mahtang lata ladawn dat nhtawm Lawt hpe nta de gang bang la nna chyinghka la kau mu ai. 11Dai hpang shan mung shinggan e nga ai lasha ni yawng hpe myi n mu kau ya mu ai majaw chyinghka hpe shanhte n mu tam lu ma ai. #2Hk 6:18.
Lawt Gaw Sodom Mare Kaw Na Pru Wa Ai
12Dai hpang masha lahkawng mung Lawt hpe, “Ndai yang nang hte seng ai shadang sha ni hte shayi sha ni, kahkri ni hte ndai mare hta shanu nga ai kaga jinghku jingyu ni kadai rai tim naw nga ai rai yang, shanhte hpe ndai shara kaw nna woi pru mat wa sanu; 13hpa majaw nga yang, ndai shara hpe an jahten kau na saga ai. Ndai masha ni a hkrit hpa mara shagun ai lam ni hpe na ai majaw Sodom mare hpe jahten kau na matu dai Madu an hpe shangun dat nu ai,” ngu nna tsun mu ai.
14Dai hpang Lawt gaw shi a shayi sha ni hpe la na hkyen ai kahkri ni hpang de sa nhtawm, “Alawan rawt manu, ndai shara kaw nna pru mat wa manu; dai Madu gaw ndai shara hpe jahten kau na nu ai,” ngu nna tsun dan wu ai. Rai ti mung, shi shatu nga ai ngu nna shanhte myit nawn ya mu ai.
15Nhtoi htoi ai aten hta, lamu kasa yan mung Lawt hpe shatin mu ai. Shan gaw, “Hkum lanyan nga masa; Ya ndai mare hpe jahten kau ai shaloi nanhte a asak n sum hkrum u ga, na a madu jan hte shayi sha lahkawng yan hpe woi nna pru mat wa manu,” ngu nna tsun mu ai. 16Lawt chyawm gaw ung ang ai hte htingnai nga wu ai. Hpa mi rai tim, dai Madu shi hpe matsan dum nga ai majaw dai masha yan gaw shi hte shi a madu jan hpe mung, shi a shayi sha yan hpe mung lata hte dun nhtawm shanhte hpe mare shinggan de woi shapraw da mu ai. #2Pe 2:7. 17Dai hpang lamu kasa langai mi gaw, “Na a asak lawt lu hkra hprawng u! Shingdu de hkum kayin yu et! Kadit hkam wam hta mung hkum hkring et; sat kau ai mung nang n hkrum ru ga, kawng ni de kagat lung wa u,” ngu nna tsun wu ai.
18Rai ti mung Lawt mahtang, “N rai law, Madu e, chyeju hte dai zawn re ai hpe hkum di shangun mi. 19Nang mung ngai hpe myi man grai pa shangun nit dai hte nye a asak hpe hkye mawai la nit dai, rai ti mung kawng ni nau tsan la nga ai rai nna tsin-yam tsindam gaw ngai hpe hkan lep nang nna dai shara de ngai garai n dang hprawng yang si na ring ngai. 20Wora mare kaji hpe nang mu ai n rai ni? Dai gaw ani sha rai nga ai. Dai de mahtang tawng hkra ngai hprawng lung we ga. Dai shara mung kaji sha re ai hpe nang mu lu nga ndai; ngai mung shim lum lu na nngai,” ngu nna tsun wu ai.
21Shi mung, “Rai sa, ngai hkraw ya nga nngai. Dai rai nna, 22mare dai hpe ngai n jahten kau na we ai. Dai re ai majaw alawan kagat hprawng sanu! Nang dai de du mat wa ai aten du hkra, ngai hpa mung n galaw na nngai,” ngu nna tsun wu ai.
Lawt gaw dai mare hpe kaji ai ngu wu ai majaw mare dai hpe Zoara ngu nna shamying mu ai.
Sodom Hte Gomora Mare Hten Mat Ai
23Zoara mare de Lawt du shang wa yang ajan pru wa nga sai. 24Dai Madu gaw Sodom hte Gomora mare yan a ntsa de kan hte grung ai wan hpe akajawng sha jahtu dat nhtawm, dai mare lahkawng hpe mung, 25kadit ting hte dai mayan hkan shanu nga ai masha ni yawng hte ga ntsa e tu matu mahkra hpe jahten kau mu ai. #Mat 10:15; 11:23-24; Luk 10:12; 17:29; 2Pe 2:6; Yud 6. 26Rai ti mung, Lawt a madu jan chyawm gaw hpang de nhtang yu nna jum shadaw tai mat lu ai. #Luk 17:32.
27Abraham mahtang hpang jahpawt jau jau rawt nna dai Madu a man e, shi tsap yu sai shara de tin tin sa mat wa wu ai. 28Sodom hte Gomora mare ni hte kadit ting hpe shi mada yu wu yang, wan htung kaba kaw na pru ai wan hkut zawn ga kaw nna mawng lung nga ai hpe mu lu wu ai. 29Rai ti mung Lawt shanu nga yu sai dai kadit na mare ni hpe Karai Kasang jahten kau ai majaw, Abraham hpe shi dum wu ai rai nna Lawt hpe shim ai shara de shalawt dat na ahkang jaw wu ai.
Moba Hte Amon Masha Ni A Daidaw Daihpang Ga
30Lawt gaw Zoara mare hta nga hkrit wu ai majaw, shi hte shi a shayi sha lahkawng yan hte rau kawng nga ai de lung wa nhtawm lungpu langai mi hta wa rawng nga ma ai. 31Ya kana mahtang kanau jan hpe, “An a kawa dingla magang wa nga sai; dai sha n ga, kashu kasha lu na matu an hpe la na lasha ni kadai mung htung hte maren ndai mung, ndai mungkan ga ntsa ting hta n nga masai. 32Sa wa rit, an a kawa hpe shanang da gaw; shaloi an shi hpe rau lu yup nna shi a matu mara ni pra wa lu na rai nga ai,” ngu nna tsun wu ai. 33Shan gaw dai shana e nan shi hpe sabyi jaw shanang da nhtawm kana jan mahtang shi hte rau kanawn wu ai. Rai ti mung shi grai nang nga ai majaw shing re ai lam hpe shi n chye wu ai.
34Hpang shani e mung, kana gaw kanau jan hpe, “Mana e ngai shi hte rau yup ni ai; ya dai na mung shi hpe jaw shanang da gaw; nang shi hte rau yup u. Shaloi an a kawa a majaw an hta kasha langai hpra lu la na ga ai,” ngu nna tsun wu ai. 35Dai rai nna shan gaw dai shana e, shi hpe jaw shanang da nhtawm kanau jan shi hte kanawn wu ai. Shi mung grai nang nga ai majaw shing re ai lam hpe shi n chye wu ai. 36Ndai lam hku nna Lawt a shayi sha lahkawng yan gaw kawa hta na na-um nasin hkum ni tai wa masai. 37Shaloi kana mahtang shadang sha langai shangai nna dai ma hpe Moba ngu nna shamying wu ai. Shi gaw dai ni du hkra nga ai Moba amyu masha ni a kaji kawa rai nga ai. 38Kanau jan mung shadang sha langai shangai nhtawm dai ma hpe Benami ngu nna shamying wu ai. Bai shi gaw dai ni du hkra nga ai Amon amyu masha ni a kaji kawa rai nga ai.
Επιλέχθηκαν προς το παρόν:
NINGPAWT NINGHPANG 19: JCLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Jinghpaw Common Language Bible © Bible Society of Myanmar, 2009.