Marc 1
1
Malongi maJean Baptiste
(Matt 3.1-12; Luc 3.1-18; Jean 1.19-28)
1Dibandu diMusamu Uboti uJesus Christ, Muana Nsambi 2dimaba nana mubiyitsi Esaie amasonina rie:
Nsambi evosi rie:
Nyisindiyi yilumbi yiami va gusu agu
ugutsonsiyila nsila.
3Adidi la diufi dimutu oyigamuyi o kumu rie:
Solanu nsila Fumu
Futsanu mansila mandi!
4Jean amalabana o kumu; amabatisanga na amalonsanga malongu mandi rie: Kalulanu diela nobatusu na Nsambi odutanda masumu menu. 5Bisi Judee na bisi Jerusalem botsu bamawendanga uyegulu Jean. Bamatubulanga masumu mogu na jandi amababatisanga o mujamba Jourdain.
6Jean amaduaranga bikutu abimavagu na mionyi mitsungu na amabiwarisanga na munsiyi umukata. Amajanganga makokoku na buji. 7Amalonsanga batu rie: Jandi oyiruyi o nsima ami epiolili mangolu; nyisaweliminane unyangula mikudu mibapondu bandi. 8Menu risidubatisa na mamba, jandi odubatisa na Yinyunyi yiNsambi.
Batema na dumangu duJesus
(Matt 3.13—4.11; Luc 3.21-22; 4.1-13)
9Mu temu eni Jesus amaruga o Nazareth o yiari yiGalilee na Jean amamubatisa o Jourdain. 10Ava Jesus amasabuyila o mamba, julu jimadibuga na Yinyunyi yiNsambi mu yibagunu yidibembi amamubetama. 11Jandi amagulu diufi adimaruyila o julu rie: Guji Muana ami udurondu. Nyilabi nsangu jineni nagu.
12Vana vana Yinyunyi yieni amasindiga Jesus o kumu. 13Amaviosa magumana mabilumbu guna na Satan amamumanga. Amatsana va gari bibulu bibukanyi na biansa bimamusalila.
Jesus unengila enengili bavubitsi bana
(Matt 4.12-22; Luc 4.14-15; 5.1-11)
14Jean anokotusu o tsugu Jesus amawenda o Galilee uyelonsa Musamu Uboti uNsambi. 15Amavosa rie: Temu jimatola namapapa; Durumu duNsambi dujabunu. Kalulanu diela na vayilanu Musamu Uboti yitu.
16Ava Jesus amavioyila va mugula yiliba yiGalilee amalaba Simon na muana nguji andi Andre, uvuba bevubi na mbusa tsiogu. 17Jesus amavosa nogu rie: Ndukianu na nyuduvaga tsiri yika bavubitsi tumba jogu abedili batu. 18Vana vana bamasila mbusa tsiogu na bamamuduka.
19Anowenda mua vala o gusu agu amalaba Jacques muana Zebedee na muana nguji andi Jean, abamatsana mu bota uyenalondanga mbusa tsiogu. 20Yiotsu ayi Jesus amabalabila amabanengila; kabogu bamasila taji ogu Zebedee na basalitsi mu bota na bamaduka Jesus.
Dibaala na yinyunyi yibi
(Luc 4.31-37)
21Jesus na badukitsi bandi bamawenda o Capernaum. Yilumbu yitsona Jesus amakota o Ndagu Nsambi na amabanda ulonsa. 22Batu abamamugulu bamakambulu na malongi mandi mu mbari amalonsa na mangolu tsiri nana milonsi mimigaga bamalonsilanga.
23Vana vana mutu omaba na yinyunyi yibi amakota o Ndagu Yibenguna na amagamuga rie: 24Jesus muisi Nazareth diambu yi divu va gari jetu nagu? Guirondi utubunga? Nyigujabi! Guji yilumbi yiNsambi. 25Jesus amaruma yinyunyi yibi rie: Vola sui! Dunda dibaala diedidi! 26Yinyunyi yibi yimamututusa na mangolu, yimagamuga mugamu uneni na yimamudunda. 27Botsu bamakambulu puela na bamawivusana rie: Diambu yi? Malongi magona vo yi? Jandi ana mangolu uruma binyunyi bibi na bimudedili? 28Ubongila va diweru dieni diduma diandi dimanyava o biari biotsu biGalilee.
Jesus ubelusa ebelusi bapuela
(Matt 8.14-17; Luc 4.38-41)
29Banogusuga o Ndagu Yibenguna bamawenda o ndagu Simon na Andre; Jacques na Jean bamawenda nogu. 30Boji buSimon amaba asilama na dibagu; yika Jesus etoli bemutsinguli maguga mandi. 31Kabogu amawenda ombu gandi, amamugaanga na dikaka na amamuretsiga. Vana vana dibagu dimasaguga na jandi amabasalila.
32Wisi unotsima bamamubeyila bibedu biotsu nesi abamaba na binyunyi bibi. 33Bisi musiengi botsu bamagukama va munu ndagu. 34Jesus amabelusa batu bapuela abamaba na maali mamunongu na munongu na amapalisa binyunyi bibi bipuela wandi. Asamasingisa binyunyi bibi uvosa mu mbari bimamujaba.
Jesus ulonsa elonsi o Galilee
(Luc 4.42-44)
35Ava mavuvungi Jesus amarambuga na amawenda o kumu uyesambila. 36Simon na jogu abamaba nandi bamamuduka; 37ava bamamulabila bamavosa nandi rie: Botsu begurombi. 38Tumba Jesus amawaka rie: Tʼwendianu o misiengi amibambana mu mbari vengu nyulonsa muna wandi; mu dionyi nyimaruyila. 39Amalinganga o Galilee jiotsu na amalonsanga o Mandagu maBibenguna na amapalisanga binyunyi bibi.
Jesus ubelusa ebelusi yibedu yinyambi
(Matt 8.1-4; Luc 5.12-16)
40Yibedu yinyambi amaruga ombu Jesus, anokutama amavosa nandi rie: Pa guirondi gurungula umbelusa. 41Jesus amagaangu na munyongu na amasimbula gogu; anomubemba amavosa nandi rie: Nyirondi, beluga. 42Vana vana nyambi jimabeluga. 43Mbana Jesus amamuganina na amamutsingula rie: 44Gulu, guyaditsingula mutu. Tumba yekelasa ombu bavagulitsi bapagu nana gumabeluyila, vagula pagu aji Moise amaruma yiri batu botsu bolaba gumabeluga. 45Tumba mutu eni amayenadisamunanga yiari na yiari te na Jesus asamamuerungula upala o musiengi ukelasa ombu batu. Amatsananga o kumu na batu abamaruyila yiari na yiari bamamurasuna.
Επιλέχθηκαν προς το παρόν:
Marc 1: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.