Luc 24
24
1Muna kedi yilumbu yitsona, bagetu bamagabuga o ngila. Bamabega matsi na miyombu abi bamakunsa. 2Bamarasuna dimanyi dimagusulu va munu ungila. 3Kabogu bamakota tumba basamalaba mfumbi Jesus. 4Ava bamaditasilanga, laba babaala babeji abamaduara biduaru abimaba vedi vedi bamalabana nogu. 5Bamagaangu na goma na bamagudama va tsi; babaala beni bamabawivula rie: Mu mbari yi duirombili ojivu monyu va gari abafu? 6Jandi agatsi, amarambuga o dufu. 7Rangiminanu ava amabila o Galilee amavosa nenu rie: Muana Mutu owakusu ombu batu babi; ogomunu va kurusu na orambuga o dufu mu yilumbu ayimurieru.
8Mbana bagetu bamarangimina mambu mandi. 9Ava bamaruyila o ngila bamatsingula mambu meni motsu ombu digumi na mudukitsi umosi nombu batu basusu. 10Marie, muisi Magdala na Jeanne na Marie nguji Jacques na basusu abamaba nogu bamatsingula mambu meni ombu bilumbi. 11Bilumbi bimatasa yiri bagetu bamavosa yika kulini na bisamabavayila yitu. 12Tumba Pierre amarelama na amawenda mbangu o ngila. Anobandama, amalaba yika matsanda na matsanda. Adimalabana dimamukambisa puela kabogu amagabuga o ndagu andi.
Muendu o Emmaus
(Marc 16.12-13)
13Muna yilumbu yieni badukitsi babeji bamawenda o Emmaus, dimbu adisamaba vala na Jerusalem. 14Bamayenavosanga mambu amamalabana. 15Utsunda betsundi muna nsila na Jesus amafubana nsila nogu 16tumba basamamujaba. 17Amabawivula rie: Diambu yi duitsundili? Bamasikama na mu diambu dimunyongu 18umosi, diina diandi Cleopas amawivula Jesus rie: Yika ndeʼ buandi aguitsani o Jerusalem agugejabi adimalabana guna bilumbu biebibi? 19Amabawivula rie: Diambu yi? Bamamuwaka rie: Mambu amamalasu ombu Jesus muisi Nazareth. Dibaala diedina amaba mubiyitsi nesi mambu na bisalu biandi bimayitsu na Nsambi na batu wandi. 20Bivunda bibavagulitsi bapagu na barumitsi bamamuvega mbela dufu na bamamugomina va kurusu. 21Jetu tumaletasa yiri jandi ogobula Israel. Motsu mana malabininanga tuka bilumbu birieru. 22Bagetu bamosi abamaba netu bamatusutusu; muna kedi bamawenda o ngila 23tumba basamalaba mfumbi andi. Banogabuga bamatutsingula yiri bamalaba yiriariamu na biansa bimabatsingula rie: Aji monyu. 24Basusu abamaba netu bamawenda o ngila na bamalaba motsu nana bagetu bamavosila; tumba basamamulaba.
25Mbana Jesus amavosa nogu rie: Aa, jenu biduka, dugevavayili amamavosu na babiyitsi yitu, mbeyianu? 26Dugejabi divu diwelimina yiri Christ olelaba maguga ne akalaba bundumba buandi? 27Mbana amabavindiyila motsu amamasonu mu diambu diandi ubongila na mambu maMoise te na mambu mababiyitsi botsu.
28Banobambana na dimbu jandi amaronda uvioga o gusu tumba bamamugoma novosa rie: 29Silama vava, wisi yika utsima etsimi.
Kabogu amakota nogu. 30Ava bamabila va tavula amabonga dipa na anomana ugabusila Nsambi diboti amadibukula na amabavega dionyi. 31Vana vana misu mogu mamadibuga na bamamujaba tumba amatsiemuga va gari ogu. 32Bamavosasana rie: La dibandu tumagululu yinoru ava amatuvindiyila Bisonu mu nsila!
33Bamarelama muna diweru dieni na bamagabusila o Jerusalem. Bamarasuna digumi na mudukitsi umosi na basusu bagukama. 34Abamaba vana bamavosa na jogu abamaruyila o Emmaus rie: Dingensa, Fumu amarambuga na amalabana na Simon! 35Mbana jogu wogu bamabatsingula adi bamalaba mu nsila na nana bamamujabila mu diweru adi amabagabila dipa.
Jesus ulabana elabini ombu badukitsi bandi
(Matt 28.16-20; Marc 16.14-18; Jean 20.19-23; Bis 1.6-8)
36Ava bamavosila mambu meni Jesus jaʼ beni amalabana va gari ogu na amavosa rie: Sunsanu mirima!
37Bamagaangu na keri na yomumu; bamatasa yiri bamalaba ditengu. 38Tumba Jesus amabawivula rie: Dibandu yi duireyimini? Dibandu yi duna matasa makulini? 39Gengilanu makaka mami na makulu mami nojaba la menu. Mbembianu na jabanu yiri ditengu digaa na musonyi vo bivisi nana duilabili nami.
40Ava avosilanga nana amabalasa makaka mandi na makulu mandi. 41Bamakambulu puela te na basamarungula umuvayila yitu, kabogu amabawivula rie: Duna mua biguji?
42Bamamuvega mua nyama tsigoku. 43Amatsibonga na amaji va gusu ogu. 44Mbana amavosa rie: Mambu memama nyimadulonsa ava nyimatsanina nenu: diwendi rie: Motsu ama Moise na babiyitsi na nyimbu beposili vengu molabana. 45Mbana amabadibulila matasa yiri bobitsiyisa. 46Jandi rie: Adimasonu adidi rie: Christ olelaba maguga mbana orambuga o dufu mu yilumbu yimurieru. 47Dukalulu dudiela na dutandulu dumasumu biulonsu mu diina diandi ubandila o Jerusalem te no malongu motsu. 48Jenu duji bambeji bamambu meni. 49Meʼ beni nyudutindila agu Tata amavangana nenu. Tumba letsananu o dimbu te na dudila mangolu ameruyili o julu.
Jesus ematusu o julu
(Marc 16.19-20; Bis 1.9-11)
50Mbana Jesus amababega te no Bethanie avana amanangula miogu na amabagabila miula. 51Mima diweru dieni amakakana nogu na amamatusu o julu. 52Bamamuyitsa mbana bamagabusila o Jerusalem na nsangu jineni. 53Bamabanganga o Ndagu Nsambi uyitsanga nogabusilanga Nsambi diboti.
Επιλέχθηκαν προς το παρόν:
Luc 24: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.