Luc 19
19
Jesus na Zachee
1Jesus anotola o Jericho amananga musiengi. 2Vamaba yivunda yibabongitsi balepu, diina diandi Zachee, omaba yisina. 3Amaronda ulaba Jesus nana avu tumba mu diambu diyinombu asamanmgula umulaba mu mbari amaba na yirela yigufi. 4Amawenda mbangu o gusu na amamata o julu muiri ulaba Jesus ava evioyili. 5Jesus amatola va mbura eni, anobuaga misu o julu amalaba Zachee na amamutsingula rie: Zachee, lensa nosunduga, nyirondi usilama o ndagu agu namunyi.
6Zachee amalensa nosunduga na amamudila na nsangu. 7Ava batu bamalabila adi amavaga bamanyinga rie: Kabogu ewendi uyesilama ombu muvayitsi umasumu.
8Zachee amarelama va gusu Fumu na amavosa rie: Mulonsi, laba, nyuvega yiasi yibusina buami ombu bijaga na pa nyimadionga mutu nyumugabusila kumbu jina.
9Jesus amavosa rie: Namunyi dugobutsu duvu o ndagu ejiji mu mbari agugu wandi aji mutegula uAbraham. 10Muana Mutu amaruga uyiromba nogobula abamatsiemuga.
Nongu jimbongu atsimavegu ombu basalitsi
(Matt 25.14-30)
11Jesus amamuebuayila bagulutsu bamambu meni nongu mu mbari anokueka bebeli na Jerusalem amajaba yiri batu betasi yiri Durumu duNsambi duka bebeli. 12Kabogu amavosa rie: Dibaala adimaburu na buenyi amawenda o bulongu buvala; amabiatsu kaga mbana amayenagabusila. 13Ne akawenda amanengila digumi dibasalitsi bandi. Amabavega mutu mutu mbongu mosi jilora na amabatsingula rie: Tsisalisianu te na nyumueruga. 14Bisi bulongu buandi bamamuvina. Bamatinda yilumbi uyevosa rie: Jetu tugerondi yiri mutu eni oturuma.
15Anobiatsu kaga amagabusila o bulongu buandi. Mbana amanengila basalitsi abamasiala na mbongu tsiandi na amawivula mutu mutu ulasa nana amafunisila tsiandi. 16Agutega amaruga novosa rie: Fumu, mbongu agu jitsifuna yigumi yimbongu tsilora. 17Kaga amamutsingula rie: Guji musalitsi uboti! Gubetsi usigama mu abigeyi kabogu ruma digumi dimisiengi. 18Agumubeji amaruga novosa rie: Fumu, mbongu agu jitsifuna mbongu yiranu yilora. 19Kaga amamutsingula rie: Kabogu guruma misiengi miranu. 20Ususu amaruga novosa rie: Fumu, laba mbongu agu jilora; nyimajipieta va tsanda. 21Nyimagulaba goma mu mbari guji mutu uranga. Guibongi ayigaa yiagu na guitsonsiyi ne abi gusamavara. 22Kaga amavosa nandi rie: Guji musalitsi ubi! Ndeʼ beni gumakevega mbela na mambu magu! Gumajaba yiri nyiji mutu uranga, diwendi rie: nyibongi ayigaa yiami na nyitsonsiyi ne abi nyisamavara. 23Kabogu dibandu yi gusamaveyila mbongu tsiami ombu jogu abejabi ukelisa mbongu? Mbe nana mbe nyimadila mua mbika. 24Mbana amaruma abamaba vana rie: Mupatulianu mbongu eni na jiveyianu ombu ojivu na yigumi yimbongu. 25Bamamutsingula rie: Fumu, jandi ana yigumi yimbongu. 26Amawagula rie: Ona yima obuesu tumba ogaa na yima opatulu ne ayi etasi yivu nandi. 27Beganu bavinitsi bami, jogu abasamaronda yiri nyubaruma; babokianu va misu mami.
Jesus ukota ekoti o Jerusalem
(Matt 21.1-11; Marc 11.1-11; Jean 12.12-19)
28Jesus anomana uvosa nana amabarela o Jerusalem 29Ava Jesus amabambinina o Bethfage na Bethanie o yiari yimukongu umiOlive amaruma badukitsi bandi rie: 30Wendanu o dimbu adivu o gusu. Avana durasuna muana buru utungu agu mutu asakatsanina na kala. Munyangulianu na mubeyianu. 31Pa mutu oduwivula rie: Yi duivayi? Mugabusilianu rie: Fumu ana nsala uonyi.
32Bamawenda na bamarasuna motsu nana Jesus amabatsingulila. 33Ava bamanyangulila muana buru, abadila buru bamabawivula rie: Dibandu yi duimunyangulili?
34Bamabagabusila rie: Fumu ana nsala uonyi.
35Banobega muana buru ombu Jesus bamakunsa yitsiga na biduaru biogu umutsanisa mbana bamamatisa Jesus va julu yionyi. 36Ava amawendila batu bamayenawala biduaru o gusu andi. 37Ava amavindimina o Jerusalem bebeli na mukongu umiOlive, badukitsi bamabasa na nsangu ava bamarangiminina bimaga biotsu abi bamalabanga na bamabanda uyitsa Fumu na mufi maneni. 38Bamagamuga rie: Nsambi agabili miula ombu kaga oyiruyi mu diina diFumu! Duvotsu o julu na bundumba ombu Nsambi!
39BaJuif bamosi abamaba baPharisie bamavosa na Jesus rie: Mulonsi, votsa badukitsi bagu!
40Jesus amabawaka rie: Ne pa jogu bovola, mamanyi mokitsa.
Jesus uiila elili mu diambu diJerusalem
41Banokueka bebeli na dimbu Jesus amabuaga misu na amabanda ulila 42novosa rie: Aa, Jerusalem, mbe gumajaba adivu diwelimina uvotsa nguba namunyi! Tumba dionyi dimagusuegu! 43Bilumbu biuruga abi bavinitsi bagu bogukandila, bogudibiga na bogubandasana. 44Bogupansa na bobunga batu bagu; vagosiala ne dimanyi dimosi mu musiengi uotsu mu mbari gusamagaru ava Nsambi amarondila uguwamusa.
Jesus ukota ekoti o Ndagu Nsambi
(Matt 21.12-17; Marc 11.15-19; Jean 2.13-22)
45Jesus anokota o Ndagu Nsambi amabinga abamasumbisa bima biogu na 46amabatsingula rie: Bisonu bimasonugu rie: Ndagu ami jiunengulungu ndagu dusambu. Tumba jenu dumajivaga yisuemunu yibadayitsi.
47Yilumbu na yilumbu Jesus amalonsanga o Ndagu Nsambi. Bivunda bibavagulitsi bapagu na milonsi mimigaga na bivunda bisusu bamaronda umuboka. 48Basamajaba nana bodivayila mu mbari botsu bamaba liyiyi ugulu malongi.
Επιλέχθηκαν προς το παρόν:
Luc 19: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.