Luc 17
17
Masumu
(Matt 18.6-7, 21-22; Marc 9.42)
1Jesus amavosa na badukitsi bandi rie: Mbangulu tsivu, tumba ka muna maguga ma jandi oyimangingi batu olaba! 2Mbe otungu dimanyi dineni nobuagu o mubu mbe diwelimina yiri agomuerungula utsimbusu mutu ne muana ugeyi. 3Guluanu!
Pa muana taji agu evayi dibi, musiembi; pa ekaluli diela mutandi. 4Pa eguvayili mabi yisambuali yikumbu mu yilumbu yimosi na eruyingi yisambuali yikumbu uguvega kokolu, vengu gumutanda.
Yitu
5Bilumbi bimavonda Fumu rie: Royisa yitu yietu.
6Fumu amabawagula rie: Mbe duna yitu ayibagunu na tsangu jimutarada, ajivu jigeyi, mbe durungula uvosa na muiri egugu rie: Kerubula nomuevara o mubu na uonyi udivaga.
Yisalu yimusalitsi
7Tanguji mutu va gari enu ana muvaritsi vo mukelisi migamba. Ava musalitsi eni eruyili o musiru fumu andi omunengila novosa nandi rie: Leruga, biguji bimavi? 8Tsatsabi! Omuruma rie: Lendambila biguji nobibega nonsalila te na nyimamana uji nonu; mbana ndeʼ wandi gurungula uji nonu. 9Okakisa musalitsi eni mu mbari amavaga adivu diwelimina? 10Divu munongu mosi ombu genu ava duivayili motsu amamarumu, vosanu rie: Jetu yika basalitsi tuvu, tumavaga yika adiwelimina na basalitsi.
Jesus ubelusa ebelusi digumi dibibedu binyambi
11Jesus amawenda o Jerusalem, amavioyila mu nsila jimandilu maSamarie na Galilee. 12Ava amapalila va dimbu dimosi digumi dibibedu binyambi bamamubengusana. Bamasikama vala 13na bamagamuga rie: Jesus, Mulonsi, tulasi yingeba! 14Jesus anobagengila amabaruma rie: Wendanu noyekelasa ombu bavagulitsi bapagu. Ava bawendilanga jogu botsu bamabelusu. 15Umosi va gari ogu anolaba yiri amabelusu amagabusila muna amavioyila na amadodisa Nsambi na diufi dineni. 16Amagudama va tsi va gusu Jesus na amamugabusila diboti. Amaba muisi Samarie. 17Jesus amamuwivula rie: Digumi diotsu digaabelusu? Yifu, agunyi bavu? 18Bagorungula ugabuga uyigabusila diboti ombu Nsambi? Yika muenyi egugu amaruga?
19Mbana Jesus amamutsingula rie: Relama na wendanga; yitu yiagu yimagubelusa.
Durumu duNsambi nana dujabununu
(Matt 24.23-28, 37-41)
20BaJuif abamaba baPharisie bamawivula Jesus rie: Temu yi Durumu duNsambi dujabununu? Amabagabusila rie: Durumu duNsambi dugolabana na misu. 21Mutu agovosa rie: Duʼ vava vo rie: Duʼ vana. Jabanu rie: Durumu duNsambi duvu va gari enu.
22Jesus amatsingula badukitsi rie: O gusu dugulu nsala ulaba temu jiMuana Mutu tumba dugomuejilaba. 23Batu bovosa rie: Aji vava vo aji vana. Duyapupa, duyabaduka. 24Muana Mutu osundila ulabana mu temu andi nana dusiemu duivedimini yiari na yiari. 25Olelaba maguga maneni nobusu na dukula duedudu. 26Adimalabana mu temu Noe diumuelabana munongu mosi mu temu Muana Mutu. 27Batu bamajanganga na bamanuanganga; bamawelanga na bamawetsanga baana bogu te na yilumbu ayi Noe amakotila o dikumbi na nyidu jimabasa na batu bamafu. 28Adimaba mu temu Lot diuba munongu mosi. Batu bamajanganga na bamanuanganga; bamasumbanga nosumbisanga; bamavaranga na bamarunganga 29tumba yilumbu ayi Lot amagusuyila o Sodome mfula muji na fula jimanoga na jimaboka batu botsu. 30Diuba munongu mosi mu yilumbu ayi Muana Mutu olabinina.
31Jandi aguba o julu muansa ayasunduga uyebonga bima biandi abivu o gari ndagu; jandi aguba o musiru ayagabuga o ndagu andi. 32Rangiminanu mugatsi Lot. 33Oyirondi ukegobula otsiemuga tumba oyikevega ogobulu. 34Nyidutsinguli rie: Mukolu eni voba batu babeji va tangi mosi: umosi obongu na ususu osiala. 35Bagetu babeji boroka va mosi: umosi obongu na ususu osiala. [ 36Babaala babeji bowenda va mosi o musiru: dimosi diubongu na disusu diusiala.]
37Badukitsi bamamuwivula rie: Fumu, agunyi! Amawagula rie: Avoba mfumbi avana banyunga bobengunina.
Επιλέχθηκαν προς το παρόν:
Luc 17: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.