Luc 13
13
Kalulanu diela
1Mbana bamosi bamatsingula. Jesus rie: Pilate amabokisa bisi Galilee ava bamavagulila pagu ombu Nsambi. 2Jesus amabawaka rie: Duitasi yiri bisi Galilee beni abamaboku nana bamaba bavayitsi bamasumu uviolila bisi Galiiee botsu basusu? 3Padukasi nana dumadunsu. Nyidutsinguli rie: Pa dugokalula diela jenu botsu dufu nana jogu bamafuila. 4Yika tsie na digumi na yinana yieni abamafu ava bamavikulu na yibaga yiSiloe? Duitasi yiri jogu bamaba bavayitsi bamasumu uviolila bisi Jerusalem botsu? 5Pa duitasi nana dumadunsu. Nyidutsinguli rie: Pa dugokalula diela jenu botsu dufu nana jogu bamafuila.
Mumanga agugaabura
6Mbana Jesus amababuayila nongu ejiji rie: Mutu amaba na mumanga o dikusa diandi. Amawenda uyedokula mimanga tumba asamadila ne umosi. 7Mbana amavosa na musalitsi rie: Labati bilima birieru bikavu abi nyiruyingi udokula mimanga mu mumanga egugu tumba ngedili ne umosi. Mu mbari yi uiveyili fuyi? Wanga! 8Musalitsi amamugabusila rie: Fumu, legusilati ne yilima yieyiyi; nyufutsa biari biotsu na nyusobana butamba budibumbu muna. 9Tanguji ubura yilima ayiuruga; pa ugobura tukawanga.
Jesus ubelusa ebelusi mugetu yilumbu yitsona
10Tsona mosi Jesus amalonsa o Ndagu Yibenguna. 11Vamaba mugetu vana agumabelanga; amabana yinyunyi yibi ayimamurungiganga digumi na yinana yibilima. 12Jesus anomulaba amamunengila na amamutsingula rie: Bubomfi buagu bumagusulu.
13Jesus amamusakiga miogu na vana vana amanotuga na amadodisa Nsambi. 14Tumba yivunda yiNdagu Yibenguna amanyoga mu mbari Jesus amamubelusa yilumbu yitsona. Amavosa na batu rie: Vavu bilumbu bisiamunu abivu biwelimina usala. Kabogu ruganganu uyibelusungu bilumbu bieni tsiri yilumbu yitsona.
15Jesus amamuwaka rie: Ka muna yijaku yi! Jenu botsu dugepalisi bangombi benu vo baburu uyebanuisa yilumbu yitsona? 16Na labatianu mutegula agugu uAbraham, Satan amamukelisa muviga digumi na yinana yibilima; mbe ayapalusu yilumbu yitsona? 17Jesus anowagula nana abamamutsoyisa bamalaba yisonyi tumba basusu bamalaba yika ubueji na ubueji na bisalu biandi biboti.
Nongu jitsangu jimutarada
(Matt 13.31-32; Marc 4.30-32)
18Jesus amawivula rie: Durumu duNsambi tsie dubila? Na yima yi nyudubagusunu? 19Duibagunu na tsangu jimutarada aji mutu amavara o nungi andi; yivaru yibendi na yineyi te na yibi yika muiri uneni na batsoli berungi muva muna.
Nongu jidufunusu
(Matt 13.33)
20Jesus amamuewivula rie: Yima yi nyubagusunu na Durumu duNsambi? 21Duibagunu na dufunusu adu mugetu amasobana na bietsu birieru bifufu umatisa dituka diotsu.
Munu ndagu ubandana
(Matt 7.13-14, 21-23)
22Ava Jesus amabila mu nsila uwenda o Jerusalem amasisikamanga o misiengi nesi o mimbu uyenalonsanga. 23Mutu amamuwivula rie: Fumu batu abogobulu yika mua pesu buandi? Jesus amagabusila rie: 24Galananu ukota mu mbari munu ndagu ubandana; bapuela boronda ukota tumba bagorungula.
25Fumu ndagu orelama nobindiga ndagu. Jenu aduvu va gusu kana dudukisa novosa rie: Fumu, tudibulili. Oduwagula rie: Ngejabi agu duiruyisini! 26Mbana dumutsingula rie: Jetu tumaji na tumanu nagu na gumalonsa o musiengi etu. 27Omueduwagula rie: Ngejabi agu duiruyisini. Gusuganu vana jenu bavayitsi bamasumu botsu. 28Dulila na dunyonga ava dulabila yiri Durumu duNsambi dumavegu ombu Abraham na Isaac na Jacob na babiyitsi botsu tumba jenu duduwimunu. 29Abotsana va tavula va mosi na Fumu boruyila o yiari ayi wisi epalili no yiari ayi wisi ewendisini no banda no tandu. 30Bapuela abavu baneni namunyi boba bageyi na bapuela abavu bageyi namunyi boba baneni o gusu.
Jesus na Jerusalem
(Matt 23.37-39)
31BaJuif bamosi abamaba baPharisie bamaruga ulubusa Jesus rie: Gusuga vava mu mbari Herode erondi uguboka. 32Amabagabusila rie: Wendanu notsingula ndetsi eni rie: Laba nyipalisi binyunyi bibi na nyibelusi bibedu namunyi na mugesa mbana mu yilumbu ayimurieru nyumana yisalu. 33Tumba uwenda nyiwendi namunyi na mugesa na muna mosi; mu mbari digaa diwelimina yiri mubiyitsi ofuila o yiari yisusu yika o Jerusalem.
34Jerusalem, Jerusalem! Duiboki babiyitsi na duitindili bilumbi biNsambi mamanyi! Ngorungula udutsingula kumbu kwe mbe nyironda udugukiga nana koku egukiyili baana bandi o tsi mapapi tumba dusamagaru! 35Kabogu ndagu enu jiusiala mududu. Jabanu rie: Dugondaba te na temu aji duvosa rie: Nsambi agabili jandi oyiruyi na diina diFumu miula!
Επιλέχθηκαν προς το παρόν:
Luc 13: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.