Jean 11
11
Dufu duLazare
1Vamaba dibaala adimabela, diina diandi Lazare. Jogu na Marie na muana nguji ogu Marthe bamatsananga o Bethanie. 2(Marie eni ajimagotsa Fumu muyombu na amamufienyi makulu na nanga tsiandi; omabela muana nguji andi Lazare.) 3Bibusi biandi bamasindiga mutu uyetsingula Jesus rie: Fumu, mbatsi agu ubela ebeli. 4Jesus anogulu dionyi amavosa rie: Buali buLazare bugomuboka; buonyi bumalabana ulasa bundumba buNsambi na mu buonyi Muana Nsambi ododusu.
5Jesus amarondanga Marthe na yibusi yiandi na Lazare. 6Kabogu ava amagululu yiri Lazare ubela ebeli amabuesa utsana bilumbu bibeji va mbura aji amaba 7mbana amatsingula badukitsi bandi rie: Tugabusilianu o yiari yiJudee.
8Badukitsi bamamuwagula rie: Mulonsi, baJuif bamaleronda uguboka ne nana guirondi umuegabusila o Judee?
9Jesus amabawivula rie: Yilumbu yigaa na digumi na maweru mabeji? Pa mutu elingi nyangu ageduku dibaku mu mbari yijalala yivu. 10Tumba pa mutu elingi o tsi pisama eduku dibaku mu mbari yijalala yigatsi.
11Jesus anomana uvosa nana amabatsingula rie: Mbatsi etu Lazare aka yilu tumba nyiwendi umurambusa.
12Badukitsi bamamugabusila rie: Fumu pa aji yilu kabogu obeluga.
13Jesus amabatubulila mfuanga tumba bamagulu yiri aji yilu. 14Mbana Jesus amabatsingula na buranga rie: Lazare amafu. 15Mu diambu dienu nyilabi ubueji mu mbari ngaabetsi vana yiri yitu yienu yiuwara. Tʼwendianu ombu gandi.
16Thomas (ajimanengulungu divasa) amavosa na badukitsi basusu rie: Tʼwendianu yiri tufuanu na Mulonsi.
Jesus la durambugu na monyu
17Jesus anotola amarasuna yiri Lazare aka bilumbu bina o ngila. 18Nana Bethanie jimaba yika kilumetera yirieru na Jerusalem 19baJuif bapuela bamawenda ombu Marthe na Marie uyelila muana nguji ogu.
20Ava Marthe amagululu yiri Jesus aka bebeli amawenda umubengusana tumba Marie asamamuduka. 21Marthe amatsingula Jesus rie: Fumu mbe ndeʼ gubetsi vava muana nguji ami mbe agaafu. 22Tumba nesi nana nyijabi yiri motsu ama ndeʼ guwivula Nsambi, Nsambi ogusingisa monyi.
23Jesus amamutsingula rie: Muana nguji agu orambuga.
24Marthe amamugabusila rie: Nyijabi yiri jandi orambuga mu yilumbu yinsimunina.
25Jesus amamutsingula rie: Menu ladurambugu na monyu. Jandi oyipayili yitu odila monyu nesi amafu; 26na uotsu aguvu monyu na epayili yitu agofu, via! Guidivayili yitu? 27Amamugabusila rie: Nyiina, Fumu nyina yitu yiri ndeʼ la Christ Muana Nsambi agumaruga o bulongu.
Jesus ulila elili
28Banomana uvosa nana Marthe amayenengila muana nguji andi Marie o musuega nomutsingula rie: Wagula Mulonsi.
29Yika Marie egulu nana amamuwagula mbangu. 30(Mu mbari mbe Jesus asakakota o dimbu akivu o mbura aji Marthe amamubengunina.) 31BaJuif abamalilanga na Marie o ndagu banomulaba upala epali, bamamuduka. Bamavosa rie: O ngila ewendi uyelila.
32Ava Marie amatolila va mbura aji Jesus amaba amagudama va gusu andi novosa rie: Fumu mbe gubetsi vava mbe muana nguji ami agaafu.
33Jesus anolaba jandi na baJuif abamaruga nandi ulila belili amatsukama. 34Amawivula rie: Agunyi dumamubuaga? Bamamugabusila rie: Fumu ruga yilaba.
35Jesus amalila. 36Mu dionyi baJuif bamavosa rie: Labatianu nana atsimurondilanga. 37Bamosi bamawivula rie: Tsia jandi omatiemusa yidunga? Asamarungula ugandisa dufu duLazare?
Lazare amarambuga o dufu
38Jesus amamuetsukama mbana amawenda o ngila. Jimaba dilima adimadibugu na dimanyi. 39Jesus amavosa rie: Gusulanu dimanyi.
Marthe yibusi yimfumbi amavosa rie: Fumu aka mbunga; aka bilumbu bina o ngila.
40Jesus amamuwivula rie: Ngaalegutsingula yiri pa guna yitu gulaba mangolu maNsambi.
41La dibandu bamagusulila dimanyi. Jesus anogengila o julu amavosa rie: Tata nyigugabusili diboti mu mbari duikulu. 42Nyijabi yiri guikulungu temu tsiotsu tumba nsivosa nana mu diambu dibatu abavu nami yiri bojaba rie: Gumansindiga.
43Anomana uvosa nana amagamuga rie: Lazare, pala!
44Mfumbi jimapala, makulu na miogu bitungu na yinsi yipietu na tsanda. Jesus amabatsingularie: Munyangulianu na mudundianu, awendingi.
Fundu ajimatungulu Jesus
(Matt 26.1-5; Marc 14.1-2; Luc 22.1-2)
45BaJuif bapuela abamaduka Marie banolaba adi Jesus amavaga, bamamuvayila yitu. 46Tumba basusu bamawenda ombu baJuif abamaba baPharisie na bamabatsingula adi Jesus amavaga. 47Mbana bivunda bibavagulitsi bapagu na baPharisie bamanengila botsu o yibenguna yiogu na bamawivusana rie: Yi tuvaga? Mu mbari dibaala diedidi evayi bimaga bipuela. 48Pa tumudunda yiri avayingi botsu bomuvayila yitu na bisi Rome boruga uyipansa Ndagu Nsambi etu nesi dilongu dietu.
49Caiphe, umosi va gari ogu agumaba yivunda yibavagulitsi bapagu yilima yieni amabatsingula rie: Dugegulu ne diambu dimosi. 50Digaa diviolila ubueji yiri mutu mosi buandi afiiili batu yiri botsu bagobungana? 51(Kabogu asamavosa dionyi mu jaʼ beni. Amadivosa mu mbari amaba yivunda yibavagulitsi bapagu yilima yieni na amabiga yiri Jesus akifuiia baJuif 52na abandi botsu basusu na yiri ogukiga va mbura mosi abandi abamapansiga yiari na yiari.)
53Murta yilumbu yieni bivunda bibaJuif bamatabula diambu umuboka. 54La dibandu Jesus asamamuekelasanga va gari baJuif tumba amarina o kumu o musiengi aguinengulu Efraim na amayetsana na badukitsi bandi.
55Feta Paque jimaba bebeli. Batu bapuela bamawendanga o Jerusalem uyedugusungu migaga miogu mimuyitsa ne Paque jikatola. 56Bamarombanga Jesus na bamawivusananga o Ndagu Nsambi rie: Yi duitasi? Oruga o feta vo agoruga?
57Kabogu bivunda bibavagulitsi bapagu na baPharisie bamavosa rie: Pa mutu ejabi agu Jesus avu, adivosi yiri tumugaanga.
Επιλέχθηκαν προς το παρόν:
Jean 11: PUU1992
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La sainte Bible en langue Yipunu © Alliance Biblique du Cameroun, 1992.