'Olic 35
35
O Pitolon a Milongoc to Pipadama
O 'olic ni Tafiti.
1 Tapangaw, mamana pacolien Iso ko pacoliay i takowanan,
mamana looden Iso ko milooday i takowanan.
2Nanay alaen ko sapatada ato sapilood a lalosidan Iso a mipadama i takowanan.
3Nanay tatoyen ko 'idoc ato caklis Iso a misi'ayaw to milaopay a milpel i takowanan a 'ada.
Nanay pasowalen kako, pa'oripen Ako kiso han kako a somowal.
4Mamana masefad ko faloco' a mapakangodo kora sapipatayananay i takowanan,
mamana matfad a malowid kora sapiri'angananay i takowanan.
5Mamana ano milpel ko coyoh no Tapang i cangraan i,
samatiya sa o nifiyokan no fali a afih a maliwasak cangra.
6Mamana ano milood ko coyoh no Tapang i cangraan i,
sato'manen, sakamlengen Iso ko lalan nangra.
7Caay pimaan kako i cangraan i, padteng sa cangra a sapitiloan i takowanan,
mikarkar cangra to rfong a mitalakal to sapirpetaw i takowanan.
8Mamana talifahal sa a ira ko pades nangra,
mamana cangra ko tahatiloay i nitlayan nangra a tilo,
mamana cangra ko tahakfengay i nikarkaran nangra a talakal.
9Itiya i, o lalipahak kako to pakayniay i Tapang,
nawhani o nipa'oripan Ningra kako saka, malipahak kako.
10O nai faloco'ay ako ko sasowalen ako i Tapang,
<<Tapangaw, cima ko sapasasotiri' i Tisowanan saw?
Dipoten Iso ko tadancaay a tamdaw a paliyas nai misamsamay a ci'icelay a tamdaw,
dipoten Iso ko pakosiya ato masamsamay a tamdaw a paliyas nai mi'afasay a tamdaw,>> saan.
11Pacfa sa ko tatiihay a tamdaw a pawacay a misanga' to sakaciraraw ako to kafokilan ako a raraw.
12O tatiihay a dmak ko sapaco'ay nangra to nga'ayay a dmak ako,
saka, matoled ko faloco' ako.
13Nikawrira, yo adada cangra i,
mica'dong kako to mowa a riko' a mararom to saki cangraan,
misaliway kako, mico'koy kako a mitolon to saki cangraan.
14Samatiya han ako o widang ato salikaka ako cangra,
samatiya han ako o wina ako ko pipa'ayaw a mararom i cangraan.
15Nikawrira, yo mapades kako i,
salipahak sa cangra a mitihlom a matawa i takowanan,
halokafokilan ako a tamdaw a mikihatiya i cangraan a mararid a mikari'ang i takowanan.
16Pasemsemen nangra kako a misamsam,
kelkel sa ko wadis nangra a matlii i takowanan.
17Tapangaw, tahacowa ko nika ^ca pikihar Iso i takowanan saw?
Nanay pa'oripenho kako a paliyas nai mikari'angay takowanan,
pa'oripenho kako a paliyas nai ngoyos nonini a masaflaway a layon.
18Ta miahowid kako i Tisowanan i kasa'opoan no finawlan,
o papahmek kako a romadiw i Tisowanan i ka'ayaw no finawlan.
19Aka haydaen ko nika tawa noya pacfaay a somowal a 'ada ako to nika tfad ako,
aka haydaen ko pipasikiw noya padteng sanay a mi'intel i takowanan a matawa to pisemsem ako.
20Caay pisanga'ay cangra to sowal,
mipakasmer cangra to faloco' no maolahay to rihaday.
21Cli' sa cangra a somowal a misamsam,
<<Yo kiso, ma'arawto niyam ko dmak iso,>> saan cangra.
22 Tapangaw, manengnengto Iso konini a dmak, nanay aka ka tomrep Kiso,
Kawasaw, nanay caay piraay Kiso i takowanan a caay pikihar.
23Kawasaw, kapalalto, nanay pa'adingen kako,
Tapangaw, kalomowadto, nanay patadoen kako a pa'ading.
24 Tapang a Kawas ako, nanay do^doen ko mo^celay a pisawkit Iso a mipastek i takowanan i awaay ko raraw,
mamana caay haydaen Iso ko nika lata'ang no 'ada ako.
25Aka haydaen ko piharateng nangra to, <<Yo, mado^do ko niharatengan ita,>>
aka haydaen ko pipasowal nangra to, <<Maplengto ita cingra,>> a saan.
26Mamana oya malipahakay to nika pades ako i,
mamana matfad cangra a ma^min a mapakangodo.
Oya mi^pecay i takowanan a misatakaraway a tamdaw i,
mamana masefad ko faloco' a mapakangodo cangra a ma^min.
27Nanay oya malipahakay to nika pastek ako i awaay ko raraw i,
malipahak cangra a ma^min a romadiw.
Nanay caay pitolas cangra a somowal toya,
<<O kakangodoen ko Tapang,
oya lipahakay to nika lahci no dmak no matayalay Ningra,>> a saan.
28Ta palosiyang kako to nika mo^cel Iso,
saromi'ami'ad sa kako a romadiw a pahmek i Tisowanan.
Επιλέχθηκαν προς το παρόν:
'Olic 35: AMIS2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© The Bible Society in Taiwan, 2019