Luka 24
24
O Kalomowad ni Yis a Ma'orip nai Patay
(Matay 28.1-10; Maroko 16.1-8; Yohani 20.1-10)
1Sa'ayaway a romi'ad no fa^lohay a lipay, yo kaniharan i, alaen noya fafahiyan ko nipatalaan nangra a fangsisay a sapaiyo a tayra i tadem. 2Ma'araw nangra ko nika walinto no fokloh nai tadem. 3Comod sa cangra i tadem, awaay a ma'araw nangra ko tireng no Tapang ci Yis. 4Yo maoratho cangra i, fahal sa a ira ko matdiay ko riko' a tatosaay a tamdaw a tomireng i tatihi nangra. 5Tadamatalaw cangra saka, hinokop sa i sra. Pasowal sa koya tatosaay i cangraan, <<Nawiro mikilim kamo to ma'oripay a tamdaw i mapatayay a tamdaw saw? 6Awaayto i tini Cingra, o lomowadayto Cingra a ma'orip nai patay! Haratengen ko sowal Ningra i tamowanan yo i tiraho i Kalili Cingra toya, 7<Caay ka ^ca o mamapatorod i ciraraway a tamdaw ko Wawa no Tamdaw, mapacek i ciwcika. Ta sakatolo a romi'ad i, o lalomowad a ma'orip nai patay> saan kyami,>> han nangra.
8Itiya i, maharateng noya fafahiyan ko nano sowal ni Yis. 9Ta nokay sato cangra nai tadem, ta paratoh tonini a ma'araway a dmak a ma^min i ccay ko safaw a nisawawaan ato romaroma a tamdaw a ma^min. 10Onini a paratohay i tarokos tonini a dmak a fafahiyan i, ci Mariya no Maktala, ci Yoana ato ina ni Yakop ci Mariya ato romaroma a mihaklongay cangraan a fafahiyan. 11Nikawrira, maorat ko tarokos a mitngil tonini a sowal saka, caay paso'lin cangra to sowal noya fafahiyan. 12Nikawrira, lowad sa ci Pitiro a comikay a tayra i tadem, hkakan sa cingra a minengneng i, deng oya nisanga'an to kliw a kiradom a satafo ko iraay. Saka, safahka' sa cingra tonini a dmak a minokay.
O Karomakat a Tayra i Imaus
(Maroko 16.12-13)
13Itiya toya romi'ad i, tayra i Imaus hananay a niyaro' ko tatosa a mitooray ci Yisan. O kararaay nonini a niyaro' ato Yirusalim i, ccay ko safaw a kongli. 14Sacaciyaw sa cangra a tatosa to pakayniay tonini a dmak a ma^min. 15Yo caciyaw cangra a masasowal i, fahal ira ci Yis a miraod a mikapot cangraan a romakat. 16Ma'araw nangra ci Yis. Nikawrira, caay pakahapinang cangra to nika ci Yis korira. 17Sowal sa ci Yis i cangraan, <<O maan kora kasasowalan namo a romakat saw?>> han Ningra.
Tireng sa cangra a mararom ko pising. 18Paca'of sa ci Kliopas hananay ci Yisan, <<O i tiniay kiso i Yirusalim i, nawiro caay ka fana' kiso to nano dmak i niyaro' ita anini saw?>> han Ningra.
19<<O maan a dmak saw?>> han ni Yis a milicay cangra.
Paca'of sa koya tatosaay, <<O pakayniay i ci Yisan no Nacali. Onini a tamdaw i, o pali'ayaway to sowal, ano o dmak ito, ano o sowal ito i, o ci'icelay a pasowal to sowal no Kawas a tapalen no Kawas ato finawlan a ma^min. 20'Arawhani, patoroden no kakridan no citodongay to ta'ong ato kakrikridan ita Cingra a papipastek i patay, mipacek i ciwcika. 21O harateng niyam i, onini a tamdaw ko papa'orip to Israil nasa kami! Naira kora dmak i, o saka toloto a romi'ad anini. 22O romasato, mapackok no papinapina a kapot niyam a fafahiyan kami. Nawhani maratar cangra a tayra i tadem. 23Nikawrira, awaay a ma'araw nangra ko tireng ni Yis saka, patiko sa cangra. Sowal sa, Mapa'araw no coyoh kami. Ma'oripayto ci Yis saan a pasowal tamiyanan. 24Saka, tayra sa i tadem ko papinapina a kapot niyam i, mado^do ko sowal noya fafahiyan. Awaay a ma'araw nangra ko tireng ni Yis,>> han nangra ci Yis.
25Sowal sa ci Yis, <<Aya: kamo o maapaay o maoratay ko faloco' a tamdaw, caay paso'lin kamo to polong no sowal no pali'ayaway to sowal no Kawas. 26Caay ka ^ca o mamahaen ko nika pades ni Kristo, ta micomod Cingra i 'dil Ningra,>> han ni Yis. 27Ta pakaynien Ningra i tilid ni Mosi ato nitilidan no pali'ayaway to sowal no Kawas a ma^min ko pisahci Ningra a somowal i cangraan to matiliday i polong no Fangcalay Cudad a sowal to pakayniay i tireng Ningra.
28Yo mangatato nangra koya katayraan nangra a niyaro' i, mato papafsoc ko rakat ni Yis. 29Saka, patangic han nangra ci Yis a mifo'ot, <<Pilafin i tamiyanan, nawhani o pisakalafianto ko romi'ad. Miclemto ko cidal,>> han nangra. Saka, comod sato ci Yis i loma' a sapilafinan. 30Yo mikapot ci Yis i cangraan a mitahka i, tatoy sa ci Yis to ^pang. Kansiya sa to Kawas, ta pcih sa Cingra to ^pang a pafli i cangraan. 31Itiya i, mafohatto ko mata nangra. Mapalitato nangra ko nika ci Yis korira. Nikawrira, fahal sa a awato a ma'araw nangra ci Yis. 32Saka, sasowal sa cangra, <<Ha:naw aca, yo somowal Cingra i titaanan i lalan, yo misahci Cingra a pasowal to Fangcalay Cudad i, dihko ko faloco' ita,>> saan.
33Itiya i, tangsol sa cangra a lomowad a patiko a tayra i Yirusalim. Ma'araw nangra itira ko nika sa'opo no ccay ko safaw a nisawawaan ato romaroma a mitooray ci Yisan. 34Sowal sa koya itiraayto, <<So'linay o lomowaday ko Tapang a ma'orip nai patay, pa'araw ci Simonan,>> han nangra.
35Pasowalen noya tatosaay cangra to nano dmak i lalan ato nika yo mipcih to ^pang i, mapalita nangra ko nika o Tapang korira saan.
O Pipa'araw ni Yis i Nisawawaan
(Matay 28.16-20; Maroko 16.14-18; Yohani 20.19-23; Dmak 1.6-8)
36Yo caciyawho cangra tonini a dmak i, fahal sa ira ci Yis a tomireng i sifo' nangra. <<Pingan,>> han Ningra cangra.
37Ckok sa cangra a matalaw, matiya o tahakawasay. 38Sowal sa ci Yis cangraan, <<Nawiro marawraw ko faloco' namo saw? Nawiro cihinapec kamo saw? 39Nengnengen ko kamay ato wa'ay Ako! Kako ito, caay ka o cima! Mi'mi'en Kako a mipalita hna. Ano o pakawasay i, ira a mimaan ko hci ato 'okak, nikawrira, ira ko no Mako a ma'araw namo,>> han Ningra.
40Mahrek a somowal Cingra tonini i, patiri' sa to kamay ato wa'ay Ningra i cangraan. 41Yo paskaho ko paso'lin nangra to nika lipahak ato nika fahka' nangra i, <<Awaay ko maan a kakaenen i tini saw?>> han ni Yis cangra a milicay. 42Pafli han nangra ci Yis to ccay a krit a nitodohan a foting. 43Ala han ni Yis a komaen i ka'ayaw nangra.
44Pasowal sa ci Yis i cangraan, <<Yo mikapotho Kako i tamowanan i, mapasowalto Ako kamo toya caay ka ^ca o mamalahci ko matiliday i Rikec ni Mosi ato nitilidan no pali'ayaway to sowal no Kawas ato nitilidan a 'Olic to pakayniay i takowanan, han Ako kamo kyami,>> han Ningra.
45Orasaka, fawahen ni Yis ko faloco' nangra to sakafana'aw nangra to Fangcalay Cudad. 46Somowal haca ci Yis i cangraan, <<O sowal a matilid i Fangcalay Cudad i, caay ka ^ca o mamapasemsem ci Kristo, ta sakatolo a romi'ad i, o lalomowad Cingra a ma'orip nai patay. 47O papakaynien namo i ngangan Ningra ko nipipatnak to sakapalisomad ato sakahpol no raraw a Nga'ayay Ratoh, o papatnaken konini nai Yirusalim tangasa i kasakitakit. 48Kamo ko pawacayay tonini a dmak. 49O a ocoren Ako a patayra i tamowanan ko niktonan no Wama Ako a sowal. Saka, kaitini kamo i niyaro' a mitala, tangasa i pilayapan namo to nai fafaeday a 'icel,>> han Ningra.
Makakoy ci Yis a Talakakarayan
(Maroko 16.19-20; Dmak 1.9-11)
50Nanoya, krid han ni Yis cangra a miliyas to niyaro' a tayra i Pitani. Ta laya' sa ci Yis to kamay a mipalmed i cangraan. 51Kalanipipalmed han Ningra ko nipiliyas cangraan a makakoy a talakakarayan. 52Ta'ong sa cangra ci Yisan. Salipahak sa cangra a minokay i Yirusalim. 53Rarid sa cangra itira i Fangcalay Pita'ongan a pahmek to Kawas.
Επιλέχθηκαν προς το παρόν:
Luka 24: AMIS2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© The Bible Society in Taiwan, 2019