Kejadian Uram 9
9
Er Iya Erebdobnyi biryi Nuh bisi, “Aminda ukubkwankin,” eboka uram talak ebdeibmou deyok
9:1-17
1Ura, Er Iya Erebdobnyi biryi Nuh ab er mabwe ab asi ato eboka kisal dakmou. “Sunci mabwe odei-odei yaldakde baramunyi ba, tukwetam nirya langkarikdarur! 2Ani, kamyoa ababyi nirya maka im karin langlang eryibarande dinyi babyi, tukwe kib kam kuboka yibarande dinyi babyi, me umbura lulungdur dinyi babyi nirya sun taruk dam karebsin. Ati, sun anda keica yala nirya aryi sun ninyi ati sun derlamabdobkwaming. 3Tukwetam kuboka lulungdur dinyi ab, betekoka bok lukluk erande dinyi ab nirya ara sun yina kibkwande. 4Ucab, tub umbura ining kunmaci ura, yina mem. A kamyoa er kam kurande ara ining aryi kam kurande ati ebman.#Im. 7:26-27; 17:10-14; 19:26; Ul. 12:16,23; 15:23 5Bok, sun ninyi ababyi kam kundarur ara ining aryi kam kundarur. Ati, ninyi mamun aryi tonyi bisi ining sakeibmaci ura, Niryi erbabyi ikin dinyi karebkwan. Ani, una kamyoa aryi ninyi asi ining sakeibmaci ura, erbabyi kisok dakwan. 6Sun ninyi mamun ababyi, unanyi biryi ninyi obmaci ura, ninyi ara Ni Imtamnyi bitoanun kiknibsise ati, a obmarinyi bisi erbabyi oboka kisok dakwanung. 7Sun ninyi ara mi odei-odei yaldaktabakde baramunyi tok asi nukman kumto kuboka, tukwetam nirya dukubkwande,” ebmou.
8Ura, tonda Er Imtamnyi biryi Nuh ab er mabwe ab asi ato eboka kisal dangna dinyi karebmou. 9-10“Niryi, Nuh kan ab, kan yaldangna ab, sun odei-odei binkwandum mabwe ab, kamyoa nirya ab, me deici yiban aia umbura aryi anaboka sakwetebmarum dinyi nirya ati ebkwinsin. Ara, tukwe kib kun dinyi babyi, maka im karin langlang eryiban dinyi babyi, ninyi winin dinyi babyi, bai kurande dinyi babyi nirya asi, ‘Kalikwansin,’ eboka uram talak ebdeibkwinsin ara: 11A talak aryi kuboka, aminda do talak kubde binkwandum talak ara ilila me kwan tubto dingiboka, tukwetam kam kun dinyi nirya kum danardeirina ton kum kubkwansin!” ebmou. 12Ura, Er Imtamnyi biryi, “Dib kum ebwe tenebingnyei,” tenebmou ura, tubto ato ebmou. “Niryi sun ninyi babyi, yuk kamyoa babyi asi, ‘Aminda ato ton kum kubkwansin,’ ebmasin dinyi sisa deibkun. 13Ara, Niryi Ni yin mita ara duwa deici deibdongobne.#9:13 A ayat deici Ibrani uram aryi sekyi ara Er Imtamnyi biryi ebmou to ara ato eboka sekyi. “Ni yin duwa deici deibdongoan,” ebmou to kerek sekyi. Ara, mita ara Er Imtamnyi biryi, “Aminda ara ninyi a me isin dakseking to aminda ato kum kubkwaming,” eboka er yin duwa deici deibdongobwe. A dinyi ara iya a kuanci tok asi, sunbabyi sun mabwe odei-odei binkwanduma nirya babyi ara iya kubkwande asi asing eirinkwandum. 14Aminda dinmamunyi ba, Niryi duwa aryi im libdongobnyi talak asi a mita lak kubkwande. 15-16A mita ara Niryi sunsi, ‘Aminda sun tukwetam ninyi ab, kamyoa nirya ab asi ereboka ilila me tubto kareboka, sunsi kum danardeirina ton kum kubkwansin,’ eboka sisa deianyi dinyi teneiboka kunubkwan,” ebmou. 17Ura, Er Iya Erebdobnyi biryi Nuh bisi ton ato ebmou, “A deibman dinyi ara Niryi sun ninyi ab, yuk-yuk kamyoa ab, tukwetam kurur dinyi nirya ab ati ebkwinsin. A sisa deibmasin dinyi ara ninyi babyi, yuk-yuk kamyoa nirya babyi ati, ‘A kubmanto aminda tubto ato kum kubkwansin,’ eboka kouna yal sirya koubman,” ebmou.
Nuh ab er mabwe ab deyok
9:18-29
18Nuh er mabwe me deici yiban aia umbura aryi anaboka sakwetebmai ninyi ara Nuh mabwe. Sun si ara: Sem ab, Ham ab, Yafet ab ukuboka sakwetebmai. Ba, Ham yaldangna aryi Kanaan mutuk nang kibmai. 19Nuh er mabwe winiryi nang aryi mi yaldakmai aryok tukwetam ninyi a kubde banung. 20Nuh bira wa ibde-koubde kuronanyi kuramwe. Nuh biryi wa ina deyok koubmouci, anggur wa ibkalibmou ba, wa ibde banung. 21Ura, Nuh anggur du me kikniboka yibmou uca, walina talebmou ba, er ai umbura asi den baning mabmou. 22Ura, er mi Ham, Kanaan nang sun nai, biryi diramwe uca, er nai Nuh den baning mabmou asi asing eibmou. Ura, ai dam sakweteboka er kwit yabwe Sem ab Yafet ab asi bindoka nukmou. 23Ba, Nuh er mabwe Sem ab, Yafet ab ara kaluna dobokabdeici, bin takonya-bin takonya labkweteboka ai umbura wengbinmarei. Ura, bindoka, “Nun nai den asing eibnimnyei,” tenebmarei ura, dong aniboka sun nai den asi kaluna libdongobmarei. 24Ura, Nuh walina talebmou ara sirya dikum kanya deibmou. Ura, Nuh er mi Ham weitnyi biryi er nai bisi den lak kibloboka mabmou dinyi lak eibmou. 25Ba, Nuh biryi ato ebmou,
“Ham kan yaldangna Kanaan mutuk nang ara subkin.
Kan du weit yabwe yaldangna aryi, ‘Li,’ teneboka sun wa il dimnankingnyi ba, sun wa ibde kunanyi kibkwandim.”
26Ani, tonda ato ebmou,
“Sem Er Imtamnyi molorurnyi, Iya Erebdobnyi bisi, si weik ebman.
Uca, Kanaan nang ara Sem er amwetam nang kiboka, il dimna nang kibkwande,” ebmou.
27“Ba, Yafet yaldangna ara Er Iya Erebdobnyi biryi sun kubde binkwamingyi mutuk nirya weik kibdeibkwande.
Ani, Sem yaldangna aryi dobdanamingnyi ai asi Yafet yaldangna ab tonkwa kubdobkwaming.
Ucab, Ham er mabwe Kanaan nang ara Sem ab Yafet ab sun amwetam nang kiboka sun wa il don nang kibkwaming,” eboka sun nai Nuh biryi sumna dinyi ton kisal dangna dinyi ton karebmou.
28Ereboka ilila me sirya yibmou talak kwalina yubwa ara 350 baryi kwalibmou. 29Ba, Nuh kam kuramwe talak nirya kwalina antaniboka nungna ara 950 baryi kwalibmou cok dibmou.
Επιλέχθηκαν προς το παρόν:
Kejadian Uram 9: MTG
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
@LAI 2007 (New Testament), @LAI2022 (Old and New Testament)