Kejadian Uram 7
7
Ilila me kwan deibmou deyok
7:1-24
1Ura, Er Iya Erebdobnyi biryi Nuh bisi ato ebmou, “A talak kunung ninyi kankan dam aryi, kanda Ni urasin dam aryi telebto akwe kunurum. Ati, kan ab, kan ai ninyi nirya ab me deici yiban aia umbura ur wengyibandarur. 2Ani, sun yina mem dinyi ara taklobokminyi ura, sun yina teleb dinyi akwe yim tabaryi, ner tabaryi aniboka bobkwandum. Ba, kamyoa yina mem dinyi ara yim ton, ner ton kuboka bobkwandum.#7:2 Er Imtamnyi biryi, “Kamyoa nirya, ‘Yina ur,’ tenerande dinyi ara tabaryi-tabaryi akaboka bobkwandum,” ebmou. “Bok, ‘Yina mem,’ tenerande dinyi ara yim ton ner ton demang bobkwandum,” ebmou. 3Ba, im dub langlang erande maka ara ner ton yim ton akaboka tabaryi bobkwandum. Ba, a bobmaminyi dinyi aryok aminda tukwetam yaldakoka weik kibkwande. 4Ilila mo tukwetam cebdeibkwan tum ara uki nungna tabaryi kubmar. Ba, ta tum kobdob berengci tum ara mo iya cemururanci tok asi kitingtam lukunda uki 40 baryi cebkwande. Ato kuboka mo cemnanci deici aryi tukwetam kiknibse bok, yu kanya bonung dinyi asi me isin daksekeiboka kum dandeibkwan,” ebmou. 5Ura, Nuh biryi Er Iya Erebdobnyi ebmou to dangbisina kum uca, Er a ebdeibmou to nirya kunubmou. 6Nuh er kam kuramwe uki ara kwalina yubwa 600 baryi kwalibmou talak aryi ilila me tukwetam nirya dingibmou. 7Ura, ilila me tukwetam nirya dingibde yanganmou ati, Nuh ab, er ner ab, er mabwe ab, er mabwe nerabwe ab me deici yiban aia umbura wengdorbinmai. 8Ura, kamyoa nirya yina teleb dinyi babyi, yina mem dinyi babyi, maka yala babyi, tukwetam yibarande kamyoa yala babyi, 9yim ton ner ton akaboka, Er Iya Erebdobnyi biryi ebdeibmou to kuboka, Nuh dam yanmaici akai umbura wengyanmai.
10Uki ta tum sirya berekmou ura, ilila me kwan aryi tukwetam nirya dingiboka siklibmou. 11A tum ara Nuh kam kuramwa talak kwalina 600 baryi dinyi wengbinmou. Ani, wala bitinyi dinyi dobmou wala asi tanggal 17 tum berekmou tum aryi ilila me tukwe amwetam u anamna ab imtam me deyok ab bublan kukmouci, a nirya me butukoka anabdanmou. 12Anabmou ura, lukunda uki 40 baryi, kitingtam uki 40 baryi ara mo cemuruna akwe kimnamwe. 13A talak aryi Nuh ab, er ner ab, er mabwe Sem ab, Ham ab, Yafet ab, sun nerabwe winiryi nirya ab ara me deici yiban aia doamwa umbura wekdamnyi. 14-15Ani, maka yala yim ton ner ton ab, yuk kamyoa yala yuk-yuk nirya yim ton ner ton ab, mitik dinyi babyi weik dinyi babyi, ninyi winiraming dinyi babyi, bai kurande dinyi babyi nirya boboka dongobmouci, tonkwa akai wekdobmai. 16Ura, Er Iya Erebdobnyi biryi ebdeiamwe to kunuboka kamyoa nirya ai dongonmou. Ani, Nuh aminda dakdobmou ba, Er Iya Erebdobnyi biryi Nuh dongtam kuboka bublan tirikdongobmou.
17Me anaboka tuba dingiramwe tok asi uki 40 baryi berekmou. A deyok aryi me langkarikoka im dub erebmouci, a me deici yiban aia ara me kwan dub bobkekmou. 18Ura, me tuba uruk-uruk eboka deibde weleramwe aryi a me deici yiban aia ababyi bowelena akwe kuramwe. 19Ani, me tuba dingibde welena akwe kimnamwe aryi tukwetam nirya me kwan dingiboka, ilila mutuk kon ereboka bukdanamwe mutuk kon nirya ababyi siklibmou. 20Ara me kwan asi mutuk kon aryi kuboka me sirya dingibmou asi 7 meter dingibmou ani, ilila mutuk kon nirya siklibmou. 21-22Ato kuboka me dingibmouci, im dub langlang eryibarande maka yala babyi, tukwetam ninyi winiraming kamyoa babyi, baitam kurande kamyoa babyi, tukwetam lulungnande dinyi babyi, ninyi babyi tukwe deici kuboka isin nebneb erande dinyi nirya me siklibmou ba, nirya isin dakoka dibsekmai. 23Tukwetam kurande dinyi nirya mitika babyi, weika babyi nirya isin dakoka dibsekmai. Eda, Nuh er ab, er ai ninyi ab akai umbura wekdobmai ninyi akwe kam tuba kubmai. 24Ura, me dingibmou uki ara 150 baryi berekamwe.
Επιλέχθηκαν προς το παρόν:
Kejadian Uram 7: MTG
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
@LAI 2007 (New Testament), @LAI2022 (Old and New Testament)