Luka 2
2
Yelan Yesu Kǝristi
1Taa ayisa kyaa Agustus mee ni Kaisarng ruun ndar Roma. Foo nung ka kaa kori nzup maa sum kaa kǝshii ndarng tǝruun Roma. 2(Mari mee ni koora maa sum mang kǝ gaat, ta ayisang kǝ Kirinius ni mee Ruu maa angaa Suriya.) 3Pang nzup maa sum por nak taa ndarng kaa yal yen ta, tung ka kaa warang yen ta.
4Yusufu maa nanzu ket, pang kala Nazarat ndar kǝng kǝshii Galiliyaa turi nak Baitalami, ndarng kaa yal ruu Dauda ta, ndar kǝng kǝshii Yahudiya ni, tung ka ng tǝɗong maa Ruu Dauda ni. 5Nak ɗǝ Maryamu yiing kǝla mee, Kǝng ɗǝ fan teeli, tung ka kaa kori yen ta tang ket. 6Kaa ta tang shee yisan kǝ Maryamu ki yalak taa gang. 7Pang yal fan mee mang kǝ gaat fan morom, shee puk ma ɗǝ kuluk, pang ˈyii ma kǝshii gwombor#2.7 gwombor: Awuu ni mang kǝ a ɗǝ fura awura ryaa maa cak ta. kaa ɗǝ fura awura ryaa maa cak ta, tung ka a sok kǝshii ta lok maa sheeni kyaa rak.
Awandol ɗaa Awan Tokghaan Zar
8Ta nggǝrng ndar Baitalami kyaa, awandol ta shaa shak maa cak yena ɗǝ biibi. 9Fan tokghaan zar mang Mulok Vitor taa war yen maa, shee katlan makghaan Mulok Vitor taa nyendal ta aran kaa ta, shee wop kap yen. 10Shee fan tokghaan zar Vitor ki ɓan yen ka, “Kǝ yin shii wop rak, ng taa ɗǝ tokghaan nung zar ni mang kǝ katla aɗoon nzup maa sum. 11Ɓari, ta kǝshiin ndar maa Daudaa a yal yin maa mung kǝ taa ɓwakghaa yinaa. Mee ni Kǝristi#2.11 Kǝristi: Mee ni Mung kǝ Vitor shee ka mee tonak kǝ taa ɓwak war. Mulok. 12Yin naa ta ɓyaa ma kaa puk ma yaa ɗǝ kuluk#2.12 kuluk: Awuu ni mang kǝ a ɗǝ shiira awan nyeeshii ta dǝbaryaa., kaa ˈyii ma yaa kǝshii gombora. Awung kǝ zhakghaa yin ka mee ki ni pan.”
13Shee ɓum maa awan tokghaan zarng Vitor, war toora jir taa sok ɗakghai yen ki nyee, pang a makghaa Vitor, a sheeki ka,
14“Kaa mak Vitor mang kǝng ta gakghaa toora yang ɗaa aparryai,
ɗaan wom taa apar ryaa, kǝ ɗa ɗaa angaan kǝ Vitor yira wusungaa yen!”
15Kǝ awan tokghaan zarng Vitor ki por niyang toora kala yen, shee awandol ki ɓana aɗakghai yen ka, “Wo turang naan ta Baitalami kyaa koo ta ɓee awung koo yiri ri, mang kǝ Mulok ɓan war ri.”
16Shee a ɓeel yen ta pang a nakghai, pang a ta sok Maryamu ɗǝ Yusufu ɗǝ fan ki kǝng ta yisakyaa kǝshii gombora. 17Kǝ awandol kyaa#2.17 awandol: Tǝsak maa angaan kaa ɓyaa acak, afwol, akala, apǝrshii ɗaa dǝskyai. ɓee fan ki shee a kori ɓan asum awung kǝ fan tokghaan zarng Vitor ki ɓan yen shiin fan kyaa. 18Pang nzup maa angaa kaa yir nung kǝ awandol ki ɓan yen, pang ndus yen shiishii. 19Nzup ɗǝ kaɓan Maryamu, ˈyii nzup maa awen kyaa ta aɗoo myaa, pang ng gidaki ta karkǝɗoo myaa shii maa awuna kyaa. 20Awandol ki por ɗǝ nɗurng makghaan Vitor tung awung kǝ a yiri ɗǝ awun kǝ a ɓee ng kan kee awung kǝ fan tokghaan zarng Vitor ɓan yen ri.
A ryak Yesu maa Tǝsak
21Kǝ fan ki gang yisa nanas, shee a ˈyii ma twar, a ryak maa tǝsak ka Yesu, tǝsak ng kǝ fan tokghaa zar Vitor na ma, tung kaa pang kǝ nak mee cir fan teeli mee.
Napɓan Yesu Kǝshii Lok Vitora
22Kǝ ayisa gang mang kǝ a Maryamu ayen Yusufu a shaa awung kǝ shiiring Musa sheeri shiin bonzan peeng tǝlla, pang a cir Yesu pang a nak ɗǝ mee Urushalima tung kaa naa Mulok Vitor. 23(Ng warangaa ni ta shiiring Mulok Vitora ka, “Nzup fan kǝ mee ni malng fan morom ni nakghaa mang Vitor ni.”) 24Shee a nab kwak ket, kan kee awung kǝ shiiring Mulok Vitor sheeri ka, akuɓri mɓaa koo awan ghumɓur mɓaa.
25Ta ayisa kyaa ni pang sum yen kǝng ɗaaki ta Urushalima mang kaa tokghaa ma ka, Simiyon. Sum ki ng ɗǝ aɗoo zar, mu byaan Vitor. Ng ta ɗaa shakghan, viin taan mung kǝ ɓwakghaa a Isaraila ya ng ɗǝ Awurkin Vitor. 26Awurkin Vitor ɓwak zhak ma yaa ka, shee mee ni ɓee Kǝristi mang kǝ Vitor ciri ta aɗoo mee ya ka tonak kaa pang kǝ kuu. 27Pang Awurkin Vitor wunak ma kǝshii lok Vitora. Maryamu ayen Yusufu kaa taa lǝri ɗǝ Yesu tung ka kaa shii awung kǝ shiiring Musa sheeri. 28Pang Simiyon yal fan ki ta kwak myaa pang ng makghaa Vitor ng sheeki ka,
29“Zheri Mulok Vitor, kan kee mang kaa ciri ta aɗoo mwaa,
fan kori mu kǝ kuu ɗǝ aɗoo shiisa.
30Tung ka yis min ɓee ɓwakghaa mu yaa,
31mang kǝ a lǝng ˈyii yisǝng nzup maa sum maa,
32Katlang kǝ zhakghaa shiin ɓwakghaa mu ta angaan kaa a ɗaa Ayahudu ni rak,
mang kǝ wura taak makghaa maa swaa mu a Isaraila.”
33Pang a Maryamu ayen Yusufu a ˈyii kwak nungaa pang a koora aɗoo shiin awung kǝ Simiyon shee. Shin fan yen kyaa. 34Pang Simiyon foo yen maa myak zar, pang ɓan Maryamu nak mee ka, “Ɓee Vitor ton fan mari kǝ ryakghaa pira maa sum pyak ɗǝ nanzwa maa sum pyak ta Isaraila. Nakghaa awuu zhakghaa mang kǝ asum pyak vanak. 35Ta kaɓan ni pang a ɓoosa awung kǝng ta aɗoo maa sum pyakghaa, awen kyaa kwana ku maa aɗoo, kan kee a ˈyob ku ni ɗǝ miis ni.”
36Yii kakshari yen ta tang kǝng mu fwan nung Vitor ni mang kaa tokghaa ma ka Hannatu, ng fan Fanuwel ni tǝɗong maa Ashiiru ni. Ɗa ɗǝ rong mee mang yee tarɓa ni en. 37Zheri yee mee warkǝ nanas nyar nangs kǝng ɗaaki kaɓan kǝshii lok Vitora, kǝng makghaa Vitor, ng kwarsa Vitor, ɗǝ kaɓan nung, vii ɗǝ biibi. 38Pang Hannatu lǝri nyee, pang shii katla maa ɗoo ɗǝ Vitor, pang shee nung shiin Yeswaa ta kutun nzup maa angaan kaa ta shakghaa kyaa ka Vitor taa naa Urushalimaa ɗaan shii yen.
39Kǝ a Maryamu ayen Yusufu kǝd shaan nzup maa awung kǝ shiiring Musa sheeri, pang a por ndar yena Nazarat ng kǝng kǝshii Galiliyaa. 40Tǝɓang ni pang fan ki mak ɗǝ shedna, ɗǝ yokgha, ng ɗǝ nggen kal ta Vitora.
Yesu, Fanshap Lok Vitora
41Dǝn Yesu ɗǝ nak mee a ɗǝ naaki Urushalimaa yee yee tung Lakng Nyera. 42Kǝ Yesu gang yee ware nyar mɓaa. Adaa mee nak ryaan maa wura ryaa kan kee mang kaa angaa Yahudu ɗǝ shaaki. 43Kǝ a kǝd ryaan ryaryaa ki, a cir shii naaki lokghaa, pang Yesu shambal ta Urushalima ɗǝ yokgha maa ɗaa mee ki rak. 44Kaa sǝri mang yira gaat pang a kap yera ma kǝshii maa tǝɗongaa ɗaa mar yen. 45Kǝ a sok ma rak shee a por nak yara ma kǝshii Urushalimaa. 46Dǝbarin yisa taatɗa pang a sok maa kǝng ɗaaki kǝshii lok Vitora ɗaa angaa maksa shiiring Musa kǝng yira yen, ng yiɓsǝna yen ket. 47Nzup mung kǝ yir Yesu ˈyii kwak nungaa pang a koora aɗoo shiin yokghan mee ɗǝ palang kǝng pala yen ta. 48Kǝ a daa mee ki ɓee ma, ndus yen shiishii, pang nak mee ɓan ma ka, “Fan min, yeni ryak pang a vǝvǝr war kan paa? Makghai ɗǝ dǝ mu wo ta vǝvǝraa koo yara ku.”
49Yesu pal yen ta ka, “Yeni ryak pang yin yarang mi paa? Yin ɗǝ yokghaki rak nyaa, ka makghai ng ɗaa min lok dǝ mina ni rakghaa?” 50Nzup ɗǝ kaɓan a yok awung kǝng sheeki rak.
51Shee nanzu bii yen a por nak Nazarat, kǝng yira nung maa daa mee, pang nak mee ˈyii nzup maa wunaki ta karkǝɗoo myaa. 52Yesu shii ta makghaaki ɗǝ yokgha ɗǝ makghaaki ta ndusa. Vitor katli aɗoo ɗǝ mee, asum katli aɗoo ɗǝ mee ket.
Επιλέχθηκαν προς το παρόν:
Luka 2: (Boi) Tiyaa
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
©️2022 Luke Initiative for Scripture Translation