Lukas 24
24
O Jesus ustel katar o meripe
Mt 28.1-10; Mk 16.1-8; Jn 20.1-10
1A o purvo llive katar e efta irisaile kai o limori but rano, ta inllarena e merisura kai cherdea. 2Kana avile, dikhle o barr kai ni saia pe po than, 3ta die andre, a ni malade e esnaga e Jesuseki. 4Ni llanena so ka cheren. Ta dikhle duie llenen pe porrne pasa lende, ta lenge patave kai klichina. 5E diskinie gia daraile kai die changa ta lengo chikat dodisarda e phuv, a gola dui llene phende lenge:
¿Soke tumen roden maskar e mule gole kai si llundo? 6Inai kate, vou ustilo katar o meripe. Den tumen golli so phenda tumenge kana saia ande Galilea: 7kai o Chavo e Manuseko ka avel dino ande va e bilachenge, kai ka mundaren le ta kai pala e trin llive ka ustel katar o meripe.#Mt 16.21; 17.22-23; 20.18-19; Mk 8.31; 9.31; 10.33-34; Lk 9.22; 18.31-33.
8Ondaka von die pe golli katar so phenda lenge o Jesus, 9ta kana irisaile kotar phende sa e desuiekhe apostolenge ta sa ogolenge. 10Gola kai inllarde e viasta e apostolenge sea e Maria Magdalena, e Juana, e Maria e dei e Santiagoki, ta ogola diskinie, 11A e apostolura mislina kai so phenena saia dilipe, ta ni kamena te pachan len.
12A o Pedro llelo prastindo kai o limori. Ta kana dikhla andre, dikhla samo o chiti. Ondaka irisailo chere, ta chudisailo katar gala ezgode kai nakhle.
Po drom kai llal karing o Emaus
Mk 16.12-13
13Isto gua llive, dui katar e disipulura llana karing o Emaus, des kilometrura katar o Jerusalem. 14Dena orba katar sa so avilape. 15Ta kana dena orba, isto o Jesus avilo pasa lende ta phirda lenchar. 16A makar dikhena le, vareso ni mukela te llanen ko saia vou. 17O Jesus puchla len:
¿Savi orba si tumen e dromea?
Zalbaia achile, 18ta iek lendar, kai ikhardola Kleofas, phenda leke:
¿Samo tu san ando Jerusalem kai ni llanel so avilape kote ande gala llivesa?
19Vou puchla len:
¿So avilape?
Von phende leke:
So nakhla o Jesus katar o Nazaret, kai saia iek profeta zuralo ande so cherela ta ande so phenela angla o Del ta angla sa o foro. 20Ta sar e gazda e zakonoke ta amare sudura chinde leke pe kris te krustosaren le ta te merel. 21A amen uzdisailam kai vou ka mukliarel e foro katar o Israel. A cherel trin llive kai sa gala ezgode nakhle. 22A nesave diskinie kai si amenchar darade amen, soke llelea thiarinako rano kai o limori, 23ta sar ni malade e esnaga, irisaile chere. Ta phenen kai iek suechura avile lende ta phende lenge kai o Jesus zivil. 24Nesave llene amare llele mapalal kai o limori ta malade isto gia sar phendea e diskinie, a e Jesuse ni dikhle le.
25Ondaka o Jesus phenda lenge:
¡Inai tumen bizaipe ta gia poloke pachan ande sa so phende e poraukura! 26¿A ni saia te nakhel gala ezgode o Mesias ta mapalal te avel blagosime ando miloso?
27Mapalal phenda lenge sa so phenena letar e alava e Devleke, katar o Moises llik kai sa e poraukura.
28Kana avile ando foro kai llana, o Jesus cherda sargo kana llala ios e dromea. 29A von pe zor cherde le te achel, ta phende leke:
Achi amenchar, soke nakhle but saiata. Ta lel te perel e riat.
O Jesus dia andre, te achel lenchar. 30Kana besle pe sinia, lia ande pe va o marrno, dia fala e Devle, ta diale lende 31Ondaka putaile lenge akha ta llangle kai saia o Jesus, a vou sumbisailo. 32Ta phende iek avereke:
¿Ni phabola amaro lio kana dela amenge orba e dromea ta kana sikavela amenge so phenel ando Pisipe?
33Ni aduricharde ios ta irisaile ando Jerusalem, ta malade e desuiekhe apostolonen ta ogole llenen kai sea lenchar, 34kai phende lenge:
De istina o Gazda ustilo katar o meripe, ta sikadilo e Simonoke.
35Ondaka von phende so nakhle e dromea, ta sar llangle kai saia o Jesus kana phagla o marrno.
O Jesus sikadol e disipulonenge
Mt 28.16-20; Mk 16.14-18; Jn 20.19-23
36Von dena orba katar gola ezgode, kana o Jesus thoda pe po maskaral lendar ta phenda lenge:
Pas tumenge.
37Von daraile but, soke mislina kai iavilape. 38A o Jesus phenda lenge:
¿Soke daran? ¿Soke inai tumen pachape ande tumare lie? 39dikhen pe me va ta pe me porrne. Isto me sem. Dodisaren man ta dikhen:
Iek duo inai le mas ni kokala, sa tumen dikhen kai si man.
40Kana phenda gua, sikada lenge pe va ta pe porrne. 41A sar von ni pachana, katar e veselia ta o chudo kai saia lenge, o Jesus puchla len:
¿Si tumen kate vareso te jalpe?
42Von phende leke iek kotor macho peko, 43vou liale ta jalale angla lende.
44Mapalal phenda lenge:
So avilape manchar si so phenava tumenge kana sema tumenchar:
Kai saia te cherdol sa so si pisime mandar ando zakono e Moiseseko, ando pisipe e profetonengo ta ande salmura.
45Ondaka cherda te acharen e alava e Devleke, 46ta phenda lenge:
Pisime si kai o Mesias saia te merel, ta kai saia te ustel katar o meripe pala e trin llive, 47ta kai ande leko anav ka phendol pe sa e suetoke te irinpe kai o Del, te prostil lengo bilachipe. Katar o Jerusalem ta kotar angle, 48tumen morabi te phenen gala ezgode. 49Ta me ka bichalav pe tumende so phenda tumenge mo Dad. A tumen ka achen kate ando foro katar o Jerusalem, lligo ni ka len e zor kai avel katar o miloso.#Ech 1.4.
O Jesus llal upre ando miloso
Mk 16.19-20
50Mapalal o Jesus inllarda len avri katar o foro, llik ande Betania, ta pe vastenchar upre blagosisarda len. 51Ta kana blagosila len, durilo lendar ta avilo inllardo ando miloso.#Ech 1.9-11. 52Blagosisarde le ta mapalal, irisaile ando Jerusalem but vesele. 53Ta von sea sa o vreme ando cher e Devleko, ta blagosina e Devle.
Επιλέχθηκαν προς το παρόν:
Lukas 24: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.