Lukas 19
19
O Jesus ta o Sakeo
1O Jesus dia ando Jeriko ta phirda maskar o foro. 2Kote zivila iek lleno barvalo kai ikhardola Sakeo, vou saia gazda katar e publikanura. 3Mangela te pinllarel e Jesuse, ta nasti dikhela le soke sea but llene, ta e Sakeoki esnaga saia minoni. 4Goleke prastio angle, ta te dikhel le likisto pe iek kas kai saia pase katar saia te nakhel o Jesus. 5Kana o Jesus nakhlo kotar, dikhla upre ta phenda leke:
Sakeo, fulie oma, soke allive ka achav ande cho cher.
6O Sakeo fulisto oma ta veselimaia avilo pachivalo e Jesusea ande po cher. 7Kana dikhle gua, sa die e Jesuseke orbe, ta phenena kai llelo te achel ando cher iekhe bilacheko. 8Ondaka o Sakeo ustilo ta phenda e Gazdake:
Gazda, ka dav e chorren dopas katar sa so si man ta te chordem vareka, ka iriu leke star droma mai but.
9O Jesus phenda:
Allive avilo o braduipe ande gava cher, soke i gava lleno si katar e vicha e Abraameki. 10Soke o Chavo e Manuseko avilo te rodel ta te braduil so jasailoa.#Ez 34.16; Mt 18.11.
E paramichi katar e love
11E llene asunena sar o Jesus phenela gala alava, ta vou phenda lenge iek paramichi, soke ia saia pasa o Jerusalem ta von mislina kai e charoina e Devleki ka avel isto ondaka.#Mt 25.14-30.
12Phenda lenge:
Saia iek lleno kai saia katar e vicha e charonengi, kai llelotar dur ande aver foro, te cheren le charo ta te irilpe. 13Ta kana llalatar, ikharda desen katar leke sluge, ta phenda lenge:
Radisaren gale lovenchar lligo ni ka iriv man. 14A e llene katar leki phuv murzina pe lete, ta bichalde pala le nesave llenen te phenen:
Ni kama gava lleno te avel amaro charo.
15A gole llene cherde le charo, ta irisailo kai pi phuv. Kana avilo, phenda te ikharen e slugen kai diaia lende e love te radin, te llanel pe gachin chari cherdaia suako iek. 16O purvo avilo lete ta phenda:
Gazda, che love cherden len des droma mai but. 17O charo phenda leke:
But sukar, san iek lacho sluga, soke avilan chacho pe iek ezgoda gia minoni. Ka dav tut te gazdari pe des forura. 18Avilo i o gua sluga ta phenda:
Gazda, che love cherdem len panch droma mai but. 19Ta i goleke phenda:
Ka gazdari pe panch forura.
20Ta avilo aver ta phenda:
Gazda, etalen kate che love. Gurudem len ande iek dikhlo, 21soke darailem tutar, soke tu san iek lleno zuralo, kai le septelie kote kai ni chudian simiche ta chide o lliu kotar katar ni thodan e simicha. 22Ondaka o charo phenda leke:
Esluga bilacho, isto che alavenchar dosare tut. Llanea kai sem iek lleno silno, ta kai chidau katar ni diem ta kai ikanav o lliu kotar katar ni thodem e simicha ande phuv, 23¿soke ni thodan me love ando banko, ta gia diea tut chari kana me irisailema chere? 24Ta phenda e llenenge kai sea kote:
Len letar e love ta den le kai o lleno kai dobisarda des droma mai but. 25Von phende leke: Gazda, ¡le ia si des droma mai but! 26O Charo phenda:#Mt 13.12; Mk 4.25; Lk 8.18.
Phenav tumenge kai gole kai si le, ka avel leke dino mai but. A gole kai inai le, i so si le ka avel letar ikando. 27A me dusmanura kai nikamena te avav lengo charo, anen len kate ta mundaren len angla ma.
O Jesus del ando Jerusalem
Mt 21.1-11; Mk 11.1-11; Jn 12.12-19
28O Jesus dia goia orba ta mapalal llelo karing o Jerusalem. 29Kana aviloa pasa o Betfage, ta pasa e Betania pasa o burdo kai ikhardol e Maslinkengo, bichalda duien katar pe disipulura, 30ta phenda lenge:
Llan kai e forichura kai si anglal, ta kana ka aven ka malaven iek magarcho phanglo, kai niko ni likisto pe lete ni ios, Putaren le ta anen le. 31A te puchla tumen vareko soke putaren le, phenen leke kai trubul e Gazda.
32E disipulura llele ta malade sa isto gia sar phendaia lenge o Jesus. 33Kana putarena e magarcho, avile e gazda ta puchle len:
¿Soke putaren le?
34Von phende:
Soke trubul e Gazda.
35Thode pe gertacha po magarcho, inllarde le kai o Jesus ta pomozisarde e Jesuse te likel pe lete. 36Ta kana o Jesus llala, e llene buliarena pe gertacha po drom. 37Ta kana reslo kote kai o drom fuliel katar o burdo e Maslinkengo, sa e llene kai llana pala le urkisarde veselimatar ta blagosina e Devle pala e bare ezgode Devlikane kai von dikhle. 38Ta phenena:#Sal 118.26.
¡Blagosime o Charo kai avel ando anav e Devleko! ¡pas ando miloso ta blagosipe upre!
39Ondaka nesave fariseura kai sea maskar e llene puchle le:
Kovachi, de pe llene kai llan pala tu.
40A o Jesus phenda lenge:
Phenav tumenge kai gala llene te achen, e barra ka urkin.
41Kana avilo pasa o Jerusalem, ta dikhla po foro, o Jesus rovda pala le, 42ta phenda:
¡Te achardana i tu allive so sai del tut pas! A akana gava si tutar gurudino ta nasti dikhe le. 43Soke ka aven chuke llivesa bilache, kai che dusmanura ka cheren iek zido truial tutar, ta ka thoven pe truial ta ka chalaven tut katar suako rig, 44ta ka zatrin tut chitavo. Ka mundaren e llenen kai zivin andre katar che zidura, ta ni ka muken barr upral po barr, soke ni acharden o vreme kana o Del avilo tumende.
O Jesus chistol o cher e Devleko
Mt 21.12-17; Mk 11.15-19; Jn 2.13-22
45Mapalal, o Jesus dia ando cher e Devleko ta thoda te tradel sa e llenen kai chinena ta bichinena andre, 46ta phenda lenge:#Is 56.7; Jer 7.11.
Ando Pisipe phenel gia:
Mo cher ka ikhardol cher e molimako, a tumen cherden letar iek than kai gurudon e chorane. 47Suako llive o Jesus sikavela ando cher e Devleko, a e gazda e poponenge, e kovacha e zakonoke ta i e gazda e foroke rodena sar ka mundaren le.#Lk 21.37. 48A ni malavena sar te cheren le, soke sa e llene prezona so ka phenel o Jesus.
Επιλέχθηκαν προς το παρόν:
Lukas 19: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.