Juan 12
12
Iek diskinia chudel meriso po Jesus
1Achena sou llive te avel e Paskua ta o Jesus avilo ande Betania, kote kai zivila o Lasaro, gua kai vou llungadaia le katar o meripe. 2Kote cherde e Jesuseke iek pachiu. E Marta thoda e sinia a o Lasaro saia iek katar e llene kai besela pe sinia ta jala lea. 3E Maria lia cherricha meriso, kai saia but kuch, ta thoda pe Jesukristoke porrne ta kosla len pe balenchar. Ta sa o cher khandela ando meriso.#Lk 7.37-38. 4Ondaka o Judas Iskariote, iek katar leke disipulura kai saia te phukavel e Jesuse phenda:
5¿Soke ni bichindinailo gava meriso pe so mol o rado iekhe burseko ta te pomozilpe gole lovenchar e llenen kai si chorre?
6A o Judas ni phenda gava soke saia leke zao katar e chorre, gua phenda le soke saia chor, ta lete saia e anbava kai thovena e love ta chorela peke so thovena andre. 7O Jesus phenda leke:
Mukla, soke voi cherda gava pala o llive kana ka prajon man. 8Soke e chorre ka aven tumenchar suako llive, a me iok.#Dt 15.11.
But katar e judiura pachana.
9But katar e judiura llangle kai o Jesus saia ande Betania ta avile, na samo pala o Jesus, avile te dikhen e Lasaro gole kai o Jesus llungadaia katar o meripe. 10Ondaka e mai preche popura chinade te mundaren i e Lasaro, 11soke cheres lete but katar e judiura avenatar ta pachana ando Jesus.
O Jesus del ando Jerusalem
Mt 21.1-11; Mk 11.1-11; Lk 19.28-40
12Thiarinako but llene kai avilea pe Paskua llangle kai o Jesus avelatar ando Jerusalem. 13Ondaka lie peke krangura katar e palmere ta lleletar angla lete, ta urkina:#Sal 118.25-26.
¡Osana! ¡Blagosime gua kai avel ande Devleko anav, o Charo Israeleko!
14O Jesus malada iek magarcho ta likisto pe lete, sar phenel ando Pisipe:
15Na dara chei e Sioneki#Zak 9.9.
cho Charo avel,
pe iek magarcho.
16Leke disipulura ni acharde gala ezgode. A kana o Jesus blagosisailo, llangle kai sa gala ezgode kai cherde leke, sea pisime ando Pisipe.
17E llene kai sea e Jesusea kana ikharda e Lasaro katar o limori ta llungada le, phenena so dikhle. 18Goleke e llene avile angla lete, soke asundea kai o Jesus cherdaia gaia ezgoda. 19A e fariseura phenena iek avereke:
Dikhen gia amen ni ka dobi niso galea. Dikhen ¡sa o sueto llaltar pala lete!
Nesave griegura roden e Jesuse
20Andar gola kai llelea ando Jerusalem te blagosisaren pe Paskua, sea nesave griegura. 21Gala avile pasa o Felipe, kai saia katar e Betsaida e Galileaki, ta molisaile leke:
Gazda, manga te dikha e Jesuse.
22O Felipe llelo kai o Andres ta phenda leke gava, mapalal e dui avile kai o Jesus ta phende leke gaia ezgoda. 23O Jesus phenda lenge:
Avilo o llive te avel blagosime o Chavo e Manuseko. 24Chachimaia phenav tumenge, e simicha katar o lliu te na perela pe phuv ta te na merela, achela korkorre. A te merela, ka del but kuchorra.#Mt 10.38; 16.24; Mk 8.34; Lk 9.23. 25O lleno kai volil po zivoto, ka jasarel le. A o lleno kai ni volil po zivoto ande gava sueto ka zivil ando zivoto ostade.#Mt 10.39; 16.25; Mk 8.35; Lk 9.24; 17.33. 26Gua kai mangel te avel mo esluga, morabi te llal pala mande. Ta kaigo te avava me, kote ka avel mo esluga. Kogo llal pala ma, mo Dad ka falil le.
O Jesus phenel kai si te merel
27¡Akana sem but tristome! ¿A so ka phenav? ¿Ka phenav, Dade: ‘braduisar man akana’? ¡A goleke avilem pe gava llive! 28Dade, blagosisar cho Anav.
Ondaka iek avazi avilo e milosotar kai phenela: Blagosisardem le, ta pale ka blagosiv le.
29E llene kai sea kote phenena kai so asundilo saia iek germipe. Ta nesave phenena:
Iek suecho dia orba.
30O Jesus phenda lenge:
Gava avazi ni avilo pala ma, avilo pala tumende. 31Akana avili e kris pe gava sueto, ta o llavolo ka avel tradino avri. 32A me kana ka avav vazdino katar e phuv, ka anav saurren me mande.
33Ta phenela gava te sai acharen sar saia te merel. 34E llene phende leke:#Sal 110.4; Is 9.7; Ez 37.25; Dn 7.14.
Amen asundam e zakonotar kai o Mesias zivil ostade. ¿Sar phene tu kai o Chavo e Manuseko si te vazdinaol? ¿Ko si gava Chavo e Manuseko?
35O Jesus phenda lenge:
O villelo cherricha ios si tumenchar. Llan kana si tumenchar o villelo te na perel pe tumende o truniariko, soke ko llal ando truniariko ni llanel kai llal. 36Pachan ando villelo akana kai o villelo si tumenchar, te aven e villeloke.
Kana phenda gala ezgode o Jesus llelotar ta gurudilo lendar.
Soke e judiura ni pachana
37O Jesus cherda but bare ezgode, ta von ni pachana ande lete, 38soke saia te cherdol so phendaia o profeta o Isaias:#Is 53.1.
Devla, ¿ko pachaia ande amaro alav?
¿Kake sikadilo e Devleko va?
39Goleke nasti pachana soke o Isaias phenda:
40O Del korrada lenge akha#Is 6.10.
ta zuriarda lengo lio,
te na dikhen,
te na acharen,
te na keimpe,
a me te sastarav len.
41O Isaias phenda gava kana dikhla e Jesuseki dragostia, ta phendaia cheres lete.
42Ta but judiura pachaie ando Jesus, ta i but katar e gazda e foroke, a ni phenenale pala e fariseura, te na aven tradine katar e khanllira e judionenge. 43Soke mai but volina e murusengi dragostia neko e Devleki dragostia.
O Jesus avilo te braduil e sueto
44O Jesus phenda ando baro avazi: Kogo pachal ande mande, ni pachal samo ande mande, pachal i ande gua kai bichalda man. 45Kogo dikhel man, dikhel gole kai bichalda man. 46Me, o villelo, avilem ando sueto te sai suako lleno kai pachal ande mande te na achel ando truniariko. 47Gua kai asunel me alava ta ni cherel len ni thovav pe lete kris, soke ni avilem te thovav kris po sueto, me avilem te braduiv e sueto. 48Gua kai ni kamel te guruvel me alava, si le ko te thovel pe lete e kris, o alav kai me phendem, vou ka thovel pe lete e kris ando llive mai anglal. 49Soke ni dav orba me mandar, o Dad, kai bichalda man, vou phenda mange so si man te phenav, ta so si man te sikavav. 50A me llanav kai leko zakono si zivoto ostade. Goleke so phenav me, o Dad phenda mange te phenaule.
Επιλέχθηκαν προς το παρόν:
Juan 12: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.