Juan 10
10
O chobano ta e bakre
1Ondaka o Jesus phenda lenge:#Is 40.11; Ez 34; Lk 15.4-5; Ebr 13.20.
Chachimaia phenav tumenge kai kogo ni del katar o udar e rindoko, gua si chorano ta kochkari. 2A gua kai del katar o udar e rindoko, gua si chobano e bakrengo. 3Ta o lleno kai arakhel o udar putarel leke, ta o chobano ikharel suakone bakre pe leko anav, ta e bakre asunen leko avazi ta ikanel len katar o rindo, 4ta kana ikanel saurren, llal angla lende ta e bakre llan pala lete soke pinllaren leko avazi. 5A von ni ka llan pala iek lleno kai ni pinllaren, ta ka nasen letar soke ni pinllaren leko avazi.
6Gaia paramichi phenda lenge o Jesus, a von ni acharde e orba kai dela lenge.
O Jesus, o lacho chobano
7O Jesus pale thoda te phenel lenge: Chachimaia phenav tumenge: Me sem o udar e bakrengo. 8Sa gola kai avile mai anglal mandar, sea chorane ta kochkaria a e bakre ni asunde len. 9Me sem o udar: Ko nakhel mandar, ka avel braduime. Ta ka avel sargo iek bakro kai del andre ta likel, ta malavel char.
10A o chor avel samo te vazdel, te mundarel ta i te zatrisarel. A me avilem te avel tumen but zivoto. 11Me sem o lacho chobano. O lacho chobano po zivoto del pala e bakre. 12A o lleno kai radil samo te pochinen leke, kana dikhel kai avel o ruv mukel e bakren ta nasel, soke vou inai o chobano, ta inai leke e bakre. A o ruv lel peke bakren ta cherel len te fuladon. 13A gua lleno nasel soke cherel le samo pala e love, ta ni chitilpe leke e bakren.
14Me sem o lacho chobano, ta pinllarav me bakren, ta me bakre pinllaren man, 15gia sar pinllarel man mo Dad ta me pinllarav le ta thovav mo zivoto pala e bakre.#Mt 11.27; Lk 10.22. 16Si man aver bakre kai inai katar gava rindo, i golen si te anav. Von ka asunen mo avazi ta ka avel samo iek stoka, ta samo iek chobano.#Ef 2.11-22.
17Mo Dad volil man soke me dav mo zivoto te sai avel mange dino o zivoto pale. 18Niko ni lel mandar mo zivoto, soke isto me mandar dav le. Soke mange si dino te dav le ta i mange si dino te lau le pale. Gala si e alava kai phenda mange mo Dad te cherav.
19Kana e judiura asunde gala alava, pale jalepe maskar pete. 20But llene lendar phenena gia:
¿Soke asunen le kana iek llavolo si ande lete ta dilailo?
21A aver phenena:
Iek lleno kai si ande lete iek llavolo nasti phenel gala alava. ¿Sai iek llavolo sastarel e akha iekhe korreke?
Me bakre asunen mo avazi
22Ando Jerusalem cherena e eslava katar o cher e Devleko. Ta saia o viendea, 23ta o Jesus llala ando cher e Devleko katar o udar kai ikhardola Salomon. 24Truisarde le e judiura ta phende leke:
¿Pe gachin ios ka diliare amen? Te san tu o Mesias, phen le amenge.
25O Jesus phenda lenge:
Me phendemle tumenge, ta ni pachan. E bucha kai me cherav ando anav me Dadeko si kai den orba isto mandar; 26A tumen ni pachan, soke ni sen katar me bakre sar phendema tumenge. 27Me bakre asunen mo avazi, ta me pinllarav len, a von llan pala mande. 28Me dav len zivoto ostade, ta nikada ni ka meren, ta niko ni ka lel len katar mo va. 29Mo Dad kai dia len mange, si o mai baro, ta niko nasti lel len katar me Dadeko va. 30Me ta mo Dad sam iek.
31Ondaka e judiura pale lie peke barra te chuden ande lete, 32A o Jesus phenda lenge:
Me sikadem tumenge but lache bucha me Dadeke. ¿Katar savi lendar mangen te chuden e barrenchar ande ma?
33E judiura phende:#Lv 24.16.
Ni ka chuda e barrenchar ande tute pala nisavi lachi buchi kai cherdan, amen ka chuda barra ande tute soke che alavenchar kuslan e Devle, soke tu kai san manus chere tut o Del.
34O Jesus phenda lenge:#Sal 82.6.
Ande tumaro zakono si pisime: ‘Me phendem kai tumen sen dela.’ 35Amen llana kai so si pisime ando zakono nasti phagol, ta o Del ikharda dela golen kai avila lende leko alav. 36A me kai o Del bichalda man ando sueto, ¿sar tumen phenen mange kai kojavav soke phendem o Chavo e Devleko sem? 37Te na cherava e bucha me Dadeke, na pachan man. 38A te cherava len, ta te na pachana man, pachan ande ezgode kai cherav, te sai llanen kai o Dad si ande mande, ta me sem ando Dad.
39Pale mangena te phanden le, a o Jesus naslo lendar.
40Ta o Jesus pale llelotar pe o goia rig o Jordan, ta achilo po than kai o Juan kristila.#Jn 1.28. 41A but llene avena lete, ta phenena:
Chache si, kai o Juan ni cherda ni iek bari ezgoda Devlikani, a sa so phendaia katar gava lleno, saia o chachipe.
42Ta kote, but llene pachaie ande lete.
Επιλέχθηκαν προς το παρόν:
Juan 10: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.