Echos 8
8
1O Saulo saia kote ta dikhela sar mundarena e Estebane ta phenda kai saia sukar so cheren.
O Saulo rodel te mundarel e llenen katar e khanlliri
Isto gua llive rodie but e llenen katar e khanlliri kai si ando Jerusalem. Ta sa e llene kai pachana ando Jesus rispisaile ande Judea ta ande Samaria. 2Nesave llene kai avila lenge zao prajosarde e Estebane ta rovde but pala le. 3A o Saulo llala te rodel e llenen katar e khanlliri, ta dela cher cherete ta ikanela terrindo llenen katar e chera e murusen ta e diskinien ta bichalela len ande rubie.#Ech 22.4-5; 26.9-11.
4A e llene kai saia te llantar katar o Jerusalem phenena e lachi viasta kaigo llana. 5O Felipe, iek lendar, llelo ando foro mai baro katar e Samaria ta dia orba e llenenge katar o Jesus. 6E llene chidiniaona, ta sa asunena ta thovena sama so phenela o Felipe, soke dikhena e bare ezgode Devlikane kai cherela. 7But llene kai sea ande lende duura bilache sastona, ta e duura likena lendar ta urkina, ta i but llene kai nasti phirena ta i e bange sastona. 8Sa gala ezgode cherde te avel but veselia ande gua foro.
9A kote saia iek lleno kai ikhardola Simono, kai omanglal cherela chirimate ta kojadaia e llenen katar e Samaria ta phenela kai vou si iek lleno but asundo. 10Sa e llene, katar o minono llik kai o mai baro, thovena leke but sama ta asunena le ta phenena:
Gava si o lleno kai phenen leke e bari zor e Devleke.
11Ta thovena leke sama soke kojadaia e llenen but vreme pe chirimatenchar. 12A kana o Felipe phenda lenge e lachi viasta katar e charoina e Devleki ta katar o Jesukristo, e murus ta e diskinie kristisaile. 13Ta isto o Simono pachaia ta kristisailo, ta llelo e Felipea, ta chudilape katar e bare ezgode Devlikane kai dikhela.
14Kana e apostolura kai sea ando Jerusalem asunde kai e llene katar e Samaria pachaie ande alava e Devleke, bichalde incha e Pedro ta e Juane. 15Kana avile, molisaile pala e llene kai pachan kai si katar e Samaria, te len o Santo Duo. 16Soke ni ios ni aviloia o Santo Duo pe ni iek lendar, samo kristisailea ando anav e Gazdako o Jesus. 17Ondaka o Pedro ta o Juan thode pe va pe lende, ta gia lie o Santo Duo.
18Kana o Simono dikhla kai o Santo Duo avela kana e apostolura thovena pe va pe llene, phenda kai ka del len love, 19ta phenda lenge:
Den i man goia zor, ta gia gola llene kai ka thovav me va pe lende i von ka len o Santo Duo.
20Ondaka o Pedro phenda leke:
¡Te ave proketo, tu ta i che love, soke manglan te chine e lovenchar so si dino llabe e Devletar! 21Inai tutar gala ezgode, soke angla o Del cho lio inai chacho. 22Muk o bilachipe kai chere, ta molisao e Devleke, te dikhe dal ka prostil chuke so mangea te chere. 23Soke me dikhav kai san pherdo zalba ta o bilachipe istarda tut phanglo.
24O Simono phenda leke:
Molintumen e Devleke pala ma, te na nakhav gola ezgode kai phenden mange.
25Kana llanatar katar e Samaria o Pedro ta o Juan phende e llenenge sa so nakhle kana sea e Jesusea. Ta e apostolura phende e lachi viasta ande but forichura kai si pasa e Samaria ta irisaile ando Jerusalem.
O Felipe ta o etiope
26Mapalal, iek suecho e Devleko phenda e Felipeke:
Uste ta llatar ando sur, katar o drom kai llal katar o Jerusalem karing e Gasa. Gava drom nakhel katar o pusto. 27O Felipe ustilo ta llelotar, ta e dromea maladilo iekhe llenea kai saia katar e Etiopia. Le saia iek rado but glamno, vou saia o lleno kai llinel e love katar e diskinia kai gazdarila ando Etiopia, ta lleloia ando Jerusalem te blagosil e Devle. 28Kana irilape kai pi phuv, ande po bordon chitila so pisisarda o profeta o Isaias.
29Ta o Duo phenda e Felipeke:
Lla ta thov tut pasa gua bordon. 30Kana o Felipe avilo pase, asunda sar o etiope chitila so pisisarda o Isaias, ondaka puchla le:
¿Achare so chiti?
31O etiope phenda leke:
¿Sar ka acharav, kana inai ko te sikavel man?
Ta mangla letar te likel ta te besel pasa le. 32Ta gava saia o pisipe kai chitila:
Inllarde le sargo iekhe bakre kai inllardol te mundaren le.
Sargo iek bakro kai ni basel
angla e llene kai chinen leke bal,
ta gia ni putarda po mui.
33Thode le ando lallao, ta ni chinde leke iek kris chachi.#Is 53.7-8.
¿Ko ka del orba katar leko porodo?
Soke ikande leko zivoto katar e phuv.
34O etiope puchla e Felipe:
Phen mange, ¿kaki orba del o profeta:
Del orba vou petar o katar aver lleno?
35Ondaka o Felipe, prema so chitila o etiope, phenda leke e lachi viasta e Jesukristoki. 36Mapalal, kana nakhena pasa iek pai, o etiope phenda:
Kate si pai, ¿si vareso te achavel man te na avav kristime? 37O Felipe phenda:
Te pachaia sa che liea, sai. Vou phenda:
Me pachau kai o Jesukristo si e Devleko Chavo.
38Ondaka phenda te achaven o bordon, ta e li dui fuliste ando pai, ta o Felipe kristisarda le. 39Kana likiste andar o pai, o Duo e Gazdako inllarda e Felipe, ta o etiope ni dikhla le ios, a llelo e dromea veselimaia. 40O Felipe avilo ando Asoto, ta llelo foro forote ta phenela e lachi viasta, lligo ni avilo ande Sesarea.
Επιλέχθηκαν προς το παρόν:
Echos 8: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.