Mitteko 7
7
Wiiteteza wa Sitefano
1Mullupa mukutho muullupalli aamukoha Sitefano wi, “Ethiyo tti ddawoona ddenndda?”
2 #
Gen 12.1
Sitefano ahaakhulla wi, “Asinnaka ni attiitthaaka, kiiwelleni miyaano! Nikhollo nahu Abrahamu aariiye o Mesopotamiya ahinaye wi akhalle o Harana, Mulluku antitimiho aamooneyella, 3nave aallota wi, ‘Hiya ellapwaawo ni abalaawo nave oye o ellapo kinuutthoonyihelleemi.’ ” 4#Gen 11.31; Gen 12.4Sika aahiya ellapo ya Akaladeya aya akhalla o Harana. Attiitthinnya yakhwilliiwa, Mulluku aamuvenyihawo amuwiiha wuno munakhalleenyuwo vano. 5#Gen 12.7; 13.15; 15.18; 17.8Mulluku khaamuvahille Abrahamu naari nipuro ning'onong'ono wi nikhalle naaye koma aamulonjeza wi aneeromuvaha ellapweeyo nave enaakhalle yaayeyaaye ni edduullu ddaye. Enthawi yeeyo Mulluku amulonjezilleeye, Abrahamu khaarina mwaana. 6#Gen 15.13,14Mulluku allotillena wi, “Edduullu ddawo ddineerokhalla alleto o ellapo yaaneena, wenko ddineerokhalla wonanko akaporo nave ddineerohoosiwa wa miyakha 400. 7#Eks 3.12Koma kineerewaallaka athu enaarumeyellekeewaayo, vano edduullu ddawonnddo ddineerokhumawo o ellapweeyo wi ddikillapelle miyaano weewuno. 8#Gen 17.10-14; Gen 21.2-4; Gen 25.26; Gen 29.31—35.18Vano Mulluku aamulamulella Abrahamu dda ophaddiwa wi okhalle echizindikiro ya echipanganwiiwa. Vano Abrahamu aamuphadda mwanaye Isaki aariiye ni mallapo matthanu ni mararu. Isaki aamuphadda mwanaye aamullopwana Yakobo, nayeenettho Yakobo ahaaphadda anaaye aallopwana khumi ni eelli, ayottho eri makhollo a nlloko nahu.
9 #
Gen 37.11;
Gen 37.28;
Gen 39.2,21 “Anaaye aallopwana yaamukhallella ehache mwanamunniwa Yosefe nave yaamukulliha wi akhalle kaporo o Iguputo. Koma Mulluku aari ni olliye. 10#Gen 41.39-41Nave aamuvullusa mu ddoohoosa ddittheddene. Yosefe ayiilleeye wi oonane ni Farao, mwene a o Iguputo, Mulluku aamuvaha ezeru nave aamweeriha mwenooyo wi amukonde Yosefe. Nave mwenooyo aamutthoolla Yosefe wi akhalle oolamulella ellapweeyo navettho onyumbani waye otthewene. 11#Gen 42.1,2Vano waakhalla ettalla mu Iguputo mutthemwene owaakattho o ellapo ya Kanani, wawi athu yaahoowana wunchichi. Makhollwaahu kheyaaworille opata yoocha. 12Koma Yakobo iiwalleeye wi wookhalla tirigu o Iguputo, ahaarumiha anaaye aallopwana, makhollwaahu va olendwiiwa wawaamba oyaawo. 13#Gen 45.1; Gen 45.16Va olendo waneepiilli Yosefe ahiidduwelliha yeekha wa asinnaayo nave mwene a o Iguputo aadduwella dda nibanja na Yosefe. 14#Gen 45.9,10,17,18; Gen 46.27Vano Yosefe aarumiha othenga wa attiitthinnya, Yakobo, omulleella wi awe o Iguputo olliye vamodda ni nibanja naye nittheene, ayo yaari vakhuviru athu 75. 15#Gen 46.1-7; Gen 49.33Yakobo aayaawo o Iguputonko, akhwenlle wenko olliye ni anaaye, makhollwaahu. 16#Gen 23.3-16; 33.19; 50.7-13; Yos 24.32Mitembo ddiwa ddaatukhulliwa oyaana o Shekemu, ddaavitthiwa mu mahame ayo Abrahamu aakunlleeye wa nlloko na Hamori o Sekemunko.
17 #
Eks 1.7,8 “Enthawi yaatamelliiwa wi Mulluku akwakhwanihe nnddo amulonjezilleeye Abrahamu, mutundwaahu waari wunnuwalle nave waatille wunchichi mu Iguputo. 18Vano mwene mmodda oyo ahidduwenlle dda Yosefe ahaamba olamulella mu Iguputo. 19#Eks 1.10,11; Eks 1.22Mwenooyo ahaalleka nave ahaahoosa makhollwaahu vawaawatiherani wi yaahiyeke aniiwa ang'onong'ono vaatte wi ekhweke. 20#Eks 2.2Enthawiine tti yeeyo Mose ayariweeye. Aari mwaana ooreera oomuhakallalliha Mulluku. Makhollwaaye yaamullella mpa mwiwa wa miyeri miraru. 21#Eks 2.3-10Nave akhumihiweeye mpammo, aahiyiwa vamodda vene, mwaana aamutthiyana a mwenooyo aamutota amullella wonanko mwanaye aamullopwana. 22Nave Mose aahuddihiwa ezeru ddittheddene dda o Iguputo nave akhalla muthu amasiva mu mawu ni mu ddaweera ddaye.
23 #
Eks 2.11-15
“Mose aariiye ni miyakha 40, aaganiza m'murimani mwaye wi awoone Aisraele akhwaaye mmo enakhallelliiwa. 24Aamoona mu Muisraele mmodda ahoosiwaka ni Muiguputo. Vano aayaawo amwaakihera nave voomwaakiherani aamwiipha Muiguputooyo. 25Vaweerani ddenndda aaganiza wi akhwaayaayo eneerewiiwesesa wi Mulluku apaalla omuphariha mutteko wi aavulluse koma kheyaawiiwesesille. 26Osaka wene aawoonattho Aisraeleve eelli yiikimawana nave aapalla wi awaattanihe voollotani wi, ‘Allopwana nyu, attheenenyu muri Aisraeleve vano munawanella tini?’ 27Koma oyo aamullikalle mukhwaayooyo aamukakhella Mose okhwipi amukoha wi, ‘Ttaani aweerille wi okhalle muullupallaahu nave aweeruzaahu? 28Onapaalla wi okiiphe miyaano wonanko Muiguputo wamwiiphalleewe oddilloolle?’ 29#Eks 18.3,4Mose iiwalleeye ddenndda aathawa ovenyera o Iguputo nave aaya akhalla o ellapo ya Midiyani. Wenko ahaayarawo anamwani aallopwana eelli.
30 #
Eks 3.1-10
“Viviralle miyakha 40 mungelo ahooneyella wa Mose m'munlloni wookhara vamakukhuni muchipululuni vakhuviru ni mwaango wa Sinai. 31Mose aattikhina ni nnddo oonilleeye nave aaya vakhuviru ni makukhwaayo wi oonesese phaama. Vano ahiiwa mawu a Apwiya oollota wi, 32‘Mi tti Mulluku a makhollwaawo, Mulluku a Abrahamu, Mulluku a Isaki ni Mulluku a Yakobo.’ Mose aatthukumella ni woova sika khaawehillewottho. 33Vano Apwiya yaallota wi, ‘Rulla esapato ddawo vawi vanipuroni wiimenlleewemvo tti vaweella. 34Kohoona ohoosiwa wa athwaaka o Iguputo. Kohiiwa okhuwa wiwa nave kookittha wi kaavulluse. Vano waawo, kuurume o Iguputo.’
35 #
Eks 2.14
“Mose tti olle akhootiwe ni Israele emukohaka wi, ‘Ttaani aweerille wi okhalle muullupallaahu nave aweeruzaahu?’ Tti oyottho Mulluku amurumalleeye mungelo amoneyella vamakukhuni ookhara munllo wi akhalle muullupalliiwa nave wi awoopolle. 36#Eks 7.3; Eks 14.21; Num 14.33Ahaahoollella athu okhuma mu Iguputo vaweerani ezizindikiro ni ddoottikhiniha mu Iguputo navettho va Enyanja Yoofiira nave muchipululuni wa miyakha 40. 37#Deu 18.15,18Moseene tti yoolle allotille wa athu a o Israele wi, ‘Mulluku aneerewuurumihellani namallotella ovenyera mwa nyuwaano, wonanko miyaano.’ 38#Eks 19.1—20.17; Deu 5.1-33Tti oyo aari ni athu a o Israele yatthukumanniiwa muchipululuni mulle. Wenko aari namunkhoswe a makhollwaahu ni mungelo oyo allota wa olliyooyo m'mwaangoni wa Sinai nave ahaakhella mawu ookumi a Mulluku wi anivahe hiyaano.
39“Koma makhollwaahu yaakhoota omwiiwellella olliye nave kheyaarina mutteko nave m'murimani mwiwa yaapaallattho ohokollweella o Iguputo. 40#Eks 32.1Vano yaamulleella Aroni wi, ‘Noopelle milluku ddawi ddinihoollelleke vawi khaninadduwella emweereyelle Mose, oyo anikhumihalle o Iguputo.’ 41#Eks 32.2-6Vano mallapo yaayo yahoopa ello yoophwanaphwana ni musaanaang'ombe, yaaheraatthella mukutho yeeyo nave yaahakallalla ni eyo yoopilliiwa. 42#Amo 5.25-27Sika Mulluku ahaahiya nave aavelleella omallapello a etheneeri ddooddullu, ollikana ni ddalembiwe mu nibukhu na namallotella wi,
‘Nyu athu a o Israele, ethiyo mwaavelleella mikutho ni emphaso
miyakha 40 mwaariinyu muchipululuni mulle?
43Mwaatukhulla musasa woomullapellamo mulluku Moleki
ni etheneeri ya mullukwaanyu Refani,
nndda ddaari mafano moopilleenyu wi muddillapelleke.
Sika kineerewuurumihani wa ellapo yaaneena ohiyana ni o Babiloni.’
44 #
Eks 25.9,40 “Makhollwaahu yaakhalla ni musasa woomboni wawooniha wi Mulluku ookhallawo o echipululu wulle. Yapangiwe ollikana ni ddallotille Mulluku wa Mose nave moollikanattho ni mamakello oonihiweeye. 45#Yos 3.14-17Ddimallille ddenndda makhollwaahu yahaakhella musasa ovenyera wamakhollwiiwa, yaawaana wuno Yoswa aariiye oohoollelliiwa nave yaakhilliiwa ellapo ovenyera wa mitundu nnddo ddiikarihiwe ni Mulluku alliwaayo yawiiwa. Yaari variyari viwa ophiyera enthawi ya mwene Davide. 46#2 Sam 7.1-16; 1 Epi 17.1-14Mulluku aamukonda Davide nave olliyooyo aamukoha Mullukooyo wi amwaakhullelle wi am'makelle enyumba Mulluku a Yakobo.#7.46: Mulluku a Yakobo: Ddoolemba ddimodda ddakhalle ddookhalla ni mawu awi athu a Israele. 47#1 Mam 6.1-38; 2 Epi 3.1-17Koma tti Solomoni oyo ammakenlle enyumbeeyo.
48“Koma Mulluku Muullupalli khanakhalla mu enyumba ddoomakiwa ni athu moollikana ni mmo alembille namallotella wi,
49 #
Yes 66.1,2 Apwiya enallota wi, ‘Oddullu sika mpandwaaka woomwene,
ellapo yavatthi sika voonyingallavo manyallwaaka.
Ethiyo munaakimakelle enyumba yawiidde?
Niri wuuwi nipuro nawiithuuwellamo miyaano?
50Ngihiyo miyaano meekha kaphatusalle ddeko ddittheddenenndda?’ ”
51 #
Yes 63.10
Sitefano aallota wi, “Athu a etiyamaaru nyu! Mirima ddanyu ddiri wonanko dda athu oohimullapella Mulluku nave khamuniiwellella mawu a Mulluku! Muri wonanko makhollwaanyu, nyuwaano munnakhoota Munepa Waweella mallapo mattheene! 52Makhollwaanyu yaamuhoosa arive namallotella. Yaawiipha athu ayo khalle yallalleyille dda owa wa muthu oolungama oyo mwaamuvelleenlleenyu wi iiphiwe. 53Tti nyuwaano mwaakhenlle malamulo a Mulluku ayo yavelleelliwe ni angelo komattho khamwaawiiwellelle!”
Sitefano aniiphiwa voovokhiwani malluku
54Attekweene a va nthato na millatwaayo yiiwalliiwa mawu a Sitefanooyo, yaasha murima navettho yaananariwa. 55Koma Sitefano addalliwe ni Munepa Waweella, aaweha oddullu oona ntitimiho na Mulluku ni Yesu iimenlle onnattanatta na Mulluku. 56Vano aallota wi, “Ngoonani, kinnoona oddullu woohulleya nave Mwaana a Muthu iimenlle onnattanatta na Mulluku!”
57Attekweene a va nthato namillatu yaakhuwa ni mawu oowella nave yaatiyella m'maaruni mwiiwa ni matta. Vano attheenaayo vamodda yaamuthamakella. 58Yaamukhumihella otte wa muzinda nave emuvokha malluku. Amboni ayo yamuvaanyiha Sitefano yaahiya ddoowara ddiwa m'mattani mwa musombwe mmodda ooromolliwa Saulo wi addiwehereke. 59Yamuvokhiiwa mallukwaayo, Sitefano aavekella wa Apwiya wi, “Apwiya Yesu, akhellani munepaaka!” 60Aakokhora nave inlla ni mawu oowella wi, “Apwiya! Muhineerengella ochimwa wiwanngu!” Allotille ddenndda aakhwa.
Επιλέχθηκαν προς το παρόν:
Mitteko 7: MW2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible in Elhomwe © The Bible Society of Malawi, 2019.