ಲೂಕೆ 20
20
ಯೇಸುನ ಅಧಿಕಾರೊನು ಪ್ರಶ್ನೆ ಮಲ್ತಿನವು
(ಮತ್ತಾಯೆ 21:23-27; ಮಾರ್ಕೆ 11:27-33)
1ಒಂಜಿ ದಿನ ಯೇಸು ದೇವಾಲಯೊಡು ಜನೊಕುಲೆಗ್ ಬೋಧನೆ ಮಲ್ತೊಂದು ಸುವಾರ್ತೆ ಸಾರಿಯೊಂದುಪ್ಪುನಪಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸಭೆತ ಹಿರಿಯಾಕುಲುಲಾ ಯೇಸುನ ಕೈತಲ್‌ ಬತ್ತ್‌ದ್ 2“ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್‌ದ್ ಕೇಂಡಿನೆಕ್ಕ್ 3ಯೇಸು ಅಕ್ಲೆಡ, “ಯಾನ್ಲಾ ನಿಕ್ಲೆಡ ಒಂಜಿ ಪಾತೆರ ಕೇನ್ವೆ ಎಂಕ್ ಪನ್ಲೆ. 4ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಪರಲೋಕೊಡ್ದಾ ನರಮಾನಿಲೆಡ್ದಾ?” ಅಂದ್‌ದ್ ಕೇಂಡೆ. 5ಅಕುಲು ಒಟ್ಟು ಕೂಡುದು ಚರ್ಚೆ ಮಲ್ತೆರ್, “‘ಪರಲೋಕೊಡ್ದು,’ ಅಂದ್‌ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್?’ ಅಂದ್‌ದ್ ಪನುವೆ. 6‘ನರಮಾನಿಲೆಡ್ದ್ ಬೈದ್‌ಂಡ್,’ ಅಂದ್‌ದ್ ಪಂಡ್ಂಡ, ಜನೊಕುಲು ಮಾತೆರ್ಲಾ ಯೋಹಾನನ್ ಪ್ರವಾದಿ ಅಂದ್‌ದ್ ನಂಬೊಂದು ಉಪ್ಪುನೆಡ್ದ್ ಅಕುಲು ನಮನ್ ಕಲ್ಲ್ ದಕ್ಕ್‌ದ್ ಕೆರ್ವೆರ್,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 7ಐಡ್ದ್ ಬೊಕ್ಕ ಅಕುಲು, “ಅವು ಒಲ್ತುಡ್ದು ಬತ್ತ್ಂಡ್ ಪಂಡ್ದ್ ಎಂಕ್ಲೆಗ್ ಗೊತ್ತುಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್. 8ಅಪಗ ಯೇಸು ಅಕ್ಲೆಗ್, “ಉಂದೆನ್ ವಾ ಅಧಿಕಾರೊಡು ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ,” ಅಂದ್‌ದ್ ಪಂಡೆ.
ದ್ರಾಕ್ಷೆತೋಟದ ಒಕ್ಕೆಲ್‌ದಾಕುಲೆನ ಉಪಕತೆ
(ಮತ್ತಾಯೆ 21:33-46; ಮಾರ್ಕೆ 12:1-12)
9ಅಪಗ ಯೇಸು ಜನೊಕುಲೆಗ್ ಒಂಜಿ ಉಪಕತೆನ್ ಪನಿಯೆರೆ ಸುರು ಮಲ್ತೆ, “ಒರಿ ನರಮಾನಿ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಅವೆನ್ ಒಕ್ಕೆಲ್‌ದಾಕುಲೆಗ್ ಬೆನಿಯೆರೆ ಕೊರ್ದು ಬೊಕ್ಕೊಂಜಿ ದೇಶೊಗು ಪೋದು ಅಲ್ಪ ಮಸ್ತ್ ಕಾಲ ಇತ್ತೆ. 10ಫಲತ್ತ ಕಾಲ ಬನ್ನಗ ದ್ರಾಕ್ಷೆತೋಟದ ಬುಲೆತ ಪಾಲ್‌ನ್ ದೆತ್ತೊನೊರೆಗಾದ್ ಒರಿ ಚಾಕ್ರಿದಾಯನ್ ಒಕ್ಕೆಲ್‌ದಾಕುಲೆನ ಕೈತಲ್‌ ಕಡಪುಡಿಯೆ. ಆಂಡ ಆ ಒಕ್ಕೆಲ್‌ದಾಕುಲು ಆಯಗ್ ಹಾಕ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್. 11ಆ ಧನಿ ನನೊರಿ ಬೇಲೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಹಾಕ್‌ದ್ ಅವಮಾನ ಮಲ್ತ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್. 12ಬೊಕ್ಕ ಮೂಜನೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಗಾಯ ಆಪಿನಾತ್ ಹಾಕ್‌ದ್ ಪಿದಯಿ ಪಾಡಿಯೆರ್. 13ಅಪಗ ಆ ದ್ರಾಕ್ಷೆತೋಟದ ಧನಿ, ‘ಯಾನ್ ನನ ದಾನೆ ಮಲ್ಪೊಲಿ? ಎನ ಪ್ರೀತಿದ ಮಗನ್ ಕಡಪುಡ್ವೆ, ಒಂಜಿ ವೇಳೆ ಆಯಗಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ಪಂಡೆ. 14ಆಂಡ ಆ ಒಕ್ಕೆಲ್‌ದಾಕುಲು ಯಜಮಾನನ ಮಗನ್ ತೂದು, ‘ಇಂಬೆನೇ ಹಕ್ಕ್‌ದಾರೆ, ಇಂಬ್ಯನ್ ಕೆರ್ದ್ ಪಾಡ್‌ಗ, ಇಂಬ್ಯನ ಸೊತ್ತು ನಮ್ಮವು ಆವು,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. 15ಬೊಕ್ಕ ಅಕುಲು ಆಯನ್ ದ್ರಾಕ್ಷೆತೋಟೊಡ್ದು ಪಿದಯಿ ನೂಕುದು ಕೆರ್ದ್ ಪಾಡಿಯೆರ್.
“ಅಂಚಾಂಡ ದ್ರಾಕ್ಷೆತೋಟದ ಧನಿ ಅಕ್ಲೆಗ್ ಎಂಚಿನ ಮಲ್ಪೆ? 16ಆಯೆ ಬತ್ತ್‌ದ್ ಆ ಒಕ್ಕೆಲ್‌ದಾಕುಲೆನ್ ನಾಶ ಮಲ್ತ್‌ದ್, ತನ ತೋಟೊನು ಬೇತೆಕ್ಲೆಗ್ ಕೊರುವೆ.”
ಉಂದೆನ್ ಜನೊಕುಲು ಕೇಂಡ್ದ್, “ದೇವೆರ್ ಅಂಚ ಆವೆರೆ ಬುಡಿಯೆರೆ ಬಲ್ಲಿ,” ಪಂಡೆರ್. 17ಆಂಡ ಯೇಸು ಅಕ್ಲೆನ್ ದೃಷ್ಟಿ ದೀದ್ ತೂದು, “ಅಂಚಾಂಡ, ‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿನ ಕಲ್ಲೇ ಮೂಲೆದ ತರೆಕಲ್ಲಾಂಡ್,’ ಅಂದ್‌ದ್ ಬರೆತಿ ಪಾತೆರದ ಅರ್ಥ ಎಂಚಿನಾದುಪ್ಪು? 18ಈ ಕಲ್ಲ್‌ದ ಮಿತ್ತ್ ಬೂರುನ ಪ್ರತಿಯೊರಿಲಾ ತುಂಡು ತುಂಡಾದ್ ಪೋಪೆ; ಉಂದು ಏರೆನ ಮಿತ್ತ್ ಬೂರುಂಡಾ ಆಯನ್ ಪೊಡಿ ಪೊಡಿ ಮಲ್ಪುಂಡು,” ಅಂದ್‌ದ್ ಪಂಡೆ.
ತೆರಿಗೆ ಕೊರ್ಪಿನ ಸಂಗತಿಡ್ ಚರ್ಚೆ
(ಮತ್ತಾಯೆ 22:15-22; ಮಾರ್ಕೆ 12:13-17)
19ಶಾಸ್ತ್ರಿಲುಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ತನ್ಕ್‌ಲೆಗೇ ಈ ಉಪಕತೆನ್ ಪಂಡೆ ಅಂದ್‌ದ್ ತೆರಿಯೊಂದು; ಅವ್ವೇ ಗಳಿಗೆಡ್ ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್, ಆಂಡ ಜನೊಕುಲೆಗ್ ಪೋಡಿಯೆರ್.
20ಬೊಕ್ಕ ಅಕುಲು ಯೇಸುನು ಅಧಿಕಾರೊಗ್ಲಾ ಅಧಿಪತಿನ ವಶೊಕ್ಲಾ ಒಪ್ಪಿಸಾವೊಡು ಅಂದ್‌ದ್ ಕಾತೊಂದಿತ್ತೆರ್. ನೀತಿವಂತೆರೆಲೆಕ್ಕ ನಟನೆ ಮಲ್ಪು ಗೂಢಾಚಾರೆರೆನ್ ಆಯನ ಪಾತೆರೊಲೆಡ್ ಎಂಚಾಂಡಲಾ ಪತ್ತಿಯೆರೆ ತಿಕ್ಕೆನಾ ಅಂದ್‌ದ್ ಕಡಪುಡಿಯೆರ್. 21ಮೊಕುಲು ಯೇಸುಡ, “ಬೋಧಕಾ, ಈ ಸರಿಯಾದ್ ಪಾತೆರೊಂದು ಬೋಧನೆ ಮಲ್ಪುವ; ನಿನ ಮೋನೆಡ್ ದಾಕ್ಷಿಣದಾಂತೆ ದೇವೆರೆ ಮಾರ್ಗೊನು ಸತ್ಯ ಆದ್ ಬೋಧನೆ ಮಲ್ಪುನಾಯೆ ಆದುಲ್ಲ ಅಂದ್‌ದ್ ತೆರಿದ. 22ರೋಮ್ ದೇಶದ ಅರಸು ಆಯಿ ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ?” ಅಂದ್‌ದ್ ಕೇಂಡೆರ್. 23ಯೇಸು ಅಕ್ಲೆನ ಉಪಾಯೊನು ತೆರಿಯೊಂದು ಅಕ್ಲೆಗ್ ಪಂಡೆ, 24“ಎಂಕ್ ಒಂಜಿ ಪಾವೊಲಿನ್ ತೋಜಾಲೆ, ಉಂದೆಟ್ ಏರೆನ ತರೆಲಾ ಮುದ್ರೆಲಾ ಉಂಡು?” ಅಂದ್‌ದ್ ಕೇಂಡಿನೆಕ್ಕ್, ಅಕುಲು “ಕೈಸರನವು,” ಅಂದ್‌ದ್ ಪಂಡೆರ್. 25ಅಂಚಾಂಡ, “ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ.
26ಆಯನ ಪಾತೆರೊಡು ಅಕ್ಲೆಗ್ ದಾಲಾ ತಪ್ಪು ತಿಕ್ಕಂದೆ ಜನೊಕುಲೆ ಎದುರುಡು ಆಯೆ ಕೊರಿನ ಉತ್ತರೊಗು ಅಚ್ಚಿರ ಆದ್ ಮನಿಪಂದೆ ಕುಲ್ಲಿಯೆರ್.
ಸೈತಿನ ಏಳ್ ಕಂಡನಿಯಾಡ್ಲು
(ಮತ್ತಾಯೆ 22:23-33; ಮಾರ್ಕೆ 12:18-27)
27ಬೊಕ್ಕ ಸೈತಿನಾಕುಲು ಲಕ್ಕ್‌ನವು ಇಜ್ಜಿ ಅಂದ್‌ದ್ ಪನ್ಪಿನ ಸದ್ದುಕಾಯೆರೆಡ್ ಕೆಲೆವೆರ್ ಯೇಸು ಕೈತಲ್‌ ಬತ್ತ್‌ದ್ ಆಯಗ್ ಪ್ರಶ್ನೆ ಮಲ್ತೆರ್. 28“ಬೋಧಕಾ. ‘ಮದ್ಮೆ ಆದಿತ್ತಿನಾಯೆ ಜೋಕುಲು ಇಜ್ಜಂದೆ ಸೈತ್ಂಡ ಆಯನ ಮೆಗ್ಯೆ ಆಲೆನ್ ಮದ್ಮೆ ಮಲ್ತೊಂದು ತನ ಪಲಯಗ್ ಸಂತಾನೊನು ಪಡೆಯೊಡು ಅಂದ್‌ದ್ ಮೋಶೆ ಎಂಕ್ಲೆಗ್ ಬರೆದ್ ದೀತೆ ಅತ್ತಾ?’ 29ಅಂಚೆನೇ, ಏಳ್ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಬೊಡೆದಿ ಮಲ್ತೊಂದು ಜೋಕುಲುದಾಂತೆ ಸೈತೆ. 30-31ರಡ್ಡನೆದಾಯೆಲಾ ಆಯಡ್ದ್ ಬೊಕ್ಕ ಮೂಜನೆದಾಯೆಲಾ ಆಲೆನ್ ಮದ್ಮೆ ಮಲ್ತೊಂಡೆರ್ ಉಂದೇ ರೀತಿ ಏಳ್ ಜನಲಾ ಮದ್ಮೆ ಮಲ್ತೊಂದು ಜೋಕುಲುದಾಂತೆ ಸೈತೆರ್. 32ಕಡೆಕ್ಕ್ ಆ ಪೊಂಜೊವುಲಾ ಸೈತಲ್. 33ಅಂಚಾಂಡ ಪುನರುತ್ಥಾನೊಡು ಆ ಪೊಂಜೊವು ಏರೆನ ಬೊಡೆದಿ ಆದುಪ್ಪುವಲ್? ಆಲೆನ್ ಏಳ್ವೆರ್ಲಾ ಮದ್ಮೆ ಆದಿತ್ತೆರ್ ಅತ್ತಾ?” ಪಂಡೆರ್.
34ಯೇಸು ಅಕ್ಲೆಗ್, “ಈ ಲೋಕದ ಜನೊಕುಲು ಮದ್ಮೆ ಮಲ್ತೊನುವೆರ್, ಮದ್ಮೆ ಮಲ್ತ್ ಕೊರ್ಪೆರ್. 35ಆಂಡ ಆ ಲೋಕೊಡು ಸೈತಿನಾಕುಲೆಡ್ದ್ ಕುಡ ಲಕ್ಕ್‌ದ್ ನನೊಂಜಿ ಜನ್ಮೊಗು ತಕ್ಕಾದಿತ್ತಿನಾಕುಲು ಮದ್ಮೆ ಮಲ್ತೊನ್ಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್. 36ಅಕುಲು ನನ ಸೈಪಿನಿಲಾ ಇಜ್ಜಿ. ಸೈತಿನಾಕುಲೆಡ್ದ್ ಲಕ್ಕ್‌ದ್ ದೂತೆರೆಗ್ ಸರಿಯಾದ್ ದೇವೆರೆ ಜೋಕುಲು ಆಪೆರ್. 37ಸೈತಿನಾಕುಲು ಬದ್‌ಕ್‌ದ್ ಲಕ್ಕುವೆರ್ ಪನ್ಪಿನೆನ್ ಮೋಶೆಲಾ ಪನ್ತೆ. ಆಯೆ ಪುದೆಲ್‌ದ ಸಂಗತಿದ ಅದ್ಯಾಯೊಡು, ಕರ್ತವನ್ ಅಬ್ರಹಾಮುನ ದೇವೆರ್ ಇಸಾಕನ ದೇವೆರ್ ಯಾಕೋಬುನ ದೇವೆರ್, ಅಂದ್‌ದ್ ಪನ್ತೆ. 38ಆಯೆ ಸೈತಿದಿನಾಕುಲೆನ ದೇವೆರ್ ಅತ್ತ್, ಜೀವ ಇತ್ತಿನಾಕುಲೆನ ದೇವೆರಾದುಲ್ಲೆ. ಆಯನ ದೃಷ್ಟಿಡ್ ಮಾತೆರ್ಲಾ ಬದುಕುನಾಕುಲೇ,” ಅಂದ್‌ದ್ ಪಂಡೆ. 39ಶಾಸ್ತ್ರಿಲೆಡ್ ಕೆಲೆವೆರ್, “ಬೋಧಕಾ, ಸರಿಯಾದ್ ಪಂಡ,” ಪಂಡೆರ್. 40ಆಯಡ ನನ ದಾಲಾ ಕೇನಿಯೆರೆ ಅಕ್ಲೆಗ್ ಏರೆಗ್ಲಾ ಧೈರ್ಯ ಬತ್ತಿಜಿ.
ಕ್ರಿಸ್ತನ ಸಂಗತಿಡ್ ಪ್ರಶ್ನೆ
(ಮತ್ತಾಯೆ 22:41-46; ಮಾರ್ಕೆ 12:35-37)
41ಅಪಗ ಆಯೆ, “ಬರೊಡಾಯಿ ಕ್ರಿಸ್ತೆ ದಾವೀದನ ಮಗೆ ಅಂದ್‌ದ್ ಪನ್ಪೆರತ್ತಾ ಅವು ಎಂಚ?” ಕೇಂಡೆ. 42-43“‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ,’ ಅಂದ್‌ದ್ ಕೀರ್ತನೆ ಗ್ರಂಥೊಡು ದಾವೀದೆ ತಾನೇ ಪನ್ಪೆ ಅತ್ತಾ? 44ದಾವೀದೆ ಆಯನ್ ‘ಕರ್ತವೆ’ ಅಂದ್‌ದ್ ಪಂಡಿ ಬೊಕ್ಕ ಆಯೆ ಆಯಗ್ ಮಗೆ ಆಪಿನವು ಎಂಚ?” ಅಂದ್‌ದ್ ಅಕ್ಲೆಡ ಕೇಂಡೆ.
ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ
(ಮತ್ತಾಯೆ 23:1-36; ಮಾರ್ಕೆ 12:38-40)
45ಜನೊಕುಲು ಮಾತೆರ್ ಕೇನೊಂದುಪ್ಪುನಗ ಆಯೆ ತನ ಶಿಷ್ಯೆರೆಗ್ ಪಂಡೆ; 46“ಶಾಸ್ತ್ರಿಲೆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ನೇಲ್ಯ ಅಂಗಿನ್ ಪಾಡೊಂದು ನಡಪುನವು, ಅಂಗಡಿ ಸಾದಿಲೆಡ್ ವಂದನೆಲು, ಸಭಾಮಂದಿರೊಡು ಮಲ್ಲಸ್ಥಾನೊಲು, ಲೇಸ್‌ಲೆಡ್ ಸುರುತ್ತ ಪಂತೆ, ಉಂದೆನ್ ಮಾತ ಇಷ್ಟ ಮಲ್ಪುನಾಕುಲಾದುಲ್ಲೆರ್. 47ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್, ತೋರಿಕೆಗಾದ್ ಉದ್ಧದ ಪ್ರಾರ್ಥನೆನ್ ಮಲ್ಪುವೆರ್. ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್,” ಅಂದ್‌ದ್ ಪಂಡೆ.
Επιλέχθηκαν προς το παρόν:
ಲೂಕೆ 20: ತುಳು
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Life Literature