JOHAN 4
4
Jesuh Le Samaria Nu
1Jesuh tu John tahin hnuahluntu tam deuh nai ai baptisma khai tam deuh pe i, tiin Farasite in za tlang i. 2A ngaingai ahcen Jesuh amah in aisu khai baptisma pe lo i; a hnuahlunte ian in pe tlang i. 3Ciatih ai amahte relhnak murhmo heh Jesuh in za fangin Judah ram in suak ai Galilee ah let i. 4A let kongin Samaria ram in feh i. 5Samaria ramah a vak laiah Cychar tihnak khua pakhat hleng i. Cia Cychar khua tu Jacob in a fapa Joseph hnenah a pehnak loram in hla hang lo i. 6Ciata ah Jacob namkum um i. Jesuh tu a khualtlawnghnak manin cawl roh ai cia namkum hiangah to i. A can tu sun dung ihang.
7Samaria nu pakhat tu ti cawi tuhin kawi ai Jesuh in a hnenah, “Ti ding tuh i pe tu,” tiin ngen i. 8A hnuahlunte tu rong lai tuhin khua songah feh tlang i.
9Cia nupang nu in, “Nang tu Judah mi isi ai kai tu Samaria mi ing; Zaimanin ti ding tuh i ngen isi?” tiin ti i. Judah mite in Samaria mite ai khohleng hmanghnakte hmang nuam tlang lo i.#4:9 Hemi tu; Jedah mi le Samaria mite tu zaikhai pehzomhnak nai lo i, ti khai i thai i. #Ezr 4:1-5; Neh 4:1-2
10Jesuh in, “Pathian ai na pehnak lehsawng heh ziang i, tihnak le ti na ngentu heh aisu i, ti ling silai amah sawn ngen tuhai ani in nunhnak ti na pe tuh napui i!” tiin ti i.
11Cia nupang nu in, “Bawipa, nangmah in barṭin nai lo ai namkum heh a thuk ze lawnsi i. A konteng in ciami nunhnak ti lang tuh isi? 12Kin pu Jacob in he tikhur heh kin pe i; amahte le a fapate ituseh, a tuurual le kawlpawrual ituseh, he namkum in ti ngah tlang i. Jacob tahin i lian sawn i tiin ruat dun isim?” tiin zawt i.
13Jesuh in, “Aisu khai ituseh hemi ti a dingtu in ti hal leh tuh i. 14Ikhalselai i pe tuhhnak ti a dingtu cenin ti hal leh tuh nawn lo i. I pe tuhhnak ti tu amah songah cirhti in cang tuhai ciami in nunhnak ti le kumkhua nunhnak pe tuh i.
15Nupang nu in, “Bawipa, ciami ti i pe tu! Ciatihin ti i hal tuh nawn lo ai heta ah ti cawi tuh kawi kul tuh nawn lo ing,” tiin ti i.
16Jesuh in, “Na pasal ko tulai kawi leh tu,” tiin ti i.
17Ani in, “Pasal nai lo ing,” tiin sawn i.
Jesuh in, “Pasal nai lo ing ti khiah thuhman rel isi. 18Nangmah in pasal panga nai zo ai tunai na umpuihnak mipa heh na pasal ngaingai ilo i. Thu dik i rel isi,” tiin ti i.
19Nupang nu in, “Bawipa, prophet isi ti na ling ing. 20Samaria kin pupate in he mual vumah Pathian bia tlang i; Ikhalselai ning Judah mite in Pathian tu Jerusalem ah bia tuhhnak i, ti i si,” tiin ti i.
21Jesuh in a hnenah, “Nupang nu, i relhnak heh sang tu: Mi in Pathian thu heh mual vumah ituseh, Jerusalem ah ituseh, a bia lo can hleng tuh i. 22Samaria mi ningte in aisu bia i ing ti ling ngaingai lo i si; ikhalselai kin Judah mite cenin aisu bia i ing ti ling i ing, zaimantifangin ohnak heh Judah mi hnenin hleng i. 23Ikhalselai Pathian rauhla hoihnak thawmin Pathian a biatu taktak in Pa khiah rauhla le thutak thawn a bia can hleng tuh i; i, cia can heh tunin hleng zo i. Ciatihin bia heh Pathian ai daihhnak i. 24Pathian tu rauhla i ai, a biatute in rauhla le thutak in bia tuh i,” tiin ti i.
25Nupang nu in a hnenah, “Messiah tu kawi tuhai a hleng fangin zaizongza amah in rel leh tuh sio i,” tiin ti i.
26Jesuh in, “Na hnenai a pongtu hnelhno heh amah i,” tiin ti i.
27Cialaitak in Jesuh hnuahlunte let tlang ai nupang nu thawn a pon dun hnelhno khiah hmu fangin ngaihtam tlang ngai i. Ikhalselai aisu inkhai cia nu heh, “Ziang na daih i? tiin zawt tlang lo i. Jesuh khai, “Zaimanin he nu pon isi?” tiin zawt tlang ve lo i.
28Cen nupang nu tu a tithawl zam ai khua songah a feh hnuaah mizapui hnenah, 29“Hlanlai ai i bawn awnghnak hmuahhmuah i rel bentu pa heh kawi tu ilai sik tu ih! Ani tu Messiah i nitur im?” tiin ti i. 30Ciatihin khua songin suak tlang ai Jesuh hnenah feh tlang i.
31Cialai ah hnuahlunte in Jesuh tu, “Sayapa, rong ai tu,” tiin ruai tlang i.
32Ani in, “Ning ling lohnak rong ai tuh nai ing,” tiin ti i.
33Cen a hnuahlunte in, “Pakhatkhat in rong pe zo ini im?” tiin pakhat le pakhat ti dun i.
34Jesuh in anite hnenah, “I rong tu i hlattu ai daihhnak bawn le naṭuan i ruaihnak bawn ben heh i. 35Santehhnak ah ‘Hla li hnuaah rongkhawm can,’ tiin ti i si. Ikhalselai thungai in ning rel ing: lo song heh sik tu ih! Lo rong thar zo ai rong kawm can cu zo i. 36Rong khawmtu pa tu a hlawhman pe tuhai rong heh kumkhua a nunhnak ca khawm i. Ciatihin hlaici a cingtu le rong a khawmtu hmunkhat ah ṭang kawm tuh i. 37Zaimantifangin santehhnak ah ‘Mi pakhat in pawi i; a dang pakhat in at i,’ tihnak tu a dik ngai i. 38Ning vai awng lohnak lo songah fang at tuhin ning hlat ing. Ciata ah midang ai perciahnak in midang naper manin a miat ngah tlang i si,” tiin ti i.
39Nupang nu in, “I bawn awnghnak hmuahhmuah i rel leh sek i,” tiin a ti manin ciami khua songai a umtu Samaria mi tampui in Jesuh tu sang tlang i. 40A hnenah Samaria mite kawi tlang ai, “Kin hnenah zancam rih tu,” tiin sawm ai zan hnih cam i.
41Jesuh thurelhnak za tlang ai mi tam amam in sang i. 42Cen nupang nu hnenah, “Tun tu nangmah ai thurelhnak manin ilo in kinmah rori in a thurelhnak za ai sang tlang i ing; ani tu laivum Nunotu taktak i ti khai ling i ing,” tiin ti tlang i.
Jesuh In Bawi Pakhat ai Fapa Cakruai I
43Ciata ah ni hnih a cam hnuaah Jesuh tu suak ai Galilee ah feh i. 44Zaimantifangin amah rori in, “Prophet tu amah ai ram ahcen upathnak ngah lo i,” tiin ti i.#Mat 13:57; Mar 6:4; Luk 4:24 45Galilee ah a hleng fangin ciata ai mizapui in hmuak tlang i, zaimantifangin Jerusalem khua Kansuak Puai ah feh ai ciami puai songah a thil bawnhnak hmuahhmuah hmu tlang zo manin i.#Joh 2:23
46Cen Jesuh tu tidap khiah cabitti ai a cangruai hmun Galilee peng Kana khua ah feh lehthio i. Ciata ah acuzah bawi pakhat um ai a fapa pakhat Capernaum khua ah ur i.#Joh 2:1-11 47Jesuh tu Judea ram in Galilee hleng i, ti a za fangin a hnenah feh ai, Capernaum khua ah feh in a thi dawnmi a fapa cakruai tuhin ninghio ngen i. 48Jesuh in, “ngaihtamkul le ngaihsunurkul thilte hmu hlah isilai ningte in aisu inkhai i sang tuh lo i si,” tiin ti i.
49Ciami acuzah bawipa in “Bawipa, I fapa a thih hlanah kawi tu hram law,” tiin ngen i.
50Jesuh in a hnenah “Tlung ta tu, na fapa tu nung tuh i,” tiin ti i.
Ciapa in Jesuh ai ponghnak heh sang ai tlung i. 51A tlunghmun lampui in a hnenumte in hmuak tlang ai, “Na fapa tu nung tuh i,” tiin ti tlang i.
52Ani in, “Ziang camcu fangin i fapa heh cak deuh i?” tiin a zawt fangin anite in, “Mania zan lam nazi pakhat ah a hlawng lawm i,” tiin ti i. 53Cia can heh Jesuh in, “Na fapa nung tuh i,” ti ai a ti can cekci ah i, tiin a pa in ling leh i. Ciatihin amah le a innsang in sang tlang i.
54Hemi tu Jesuh Judea in Galilee ai a hleng hnua a vel hnihhnak ngaihsunurkul a bawnhnak i.
Επιλέχθηκαν προς το παρόν:
JOHAN 4: RZB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Zanniat Bible © Bible Society of Myanmar, 2018.