Johani 5
5
1Pambele patsitsitsi pwu lyalepwo ilitsuva ilivalatse ilinge lya va-Juta. Namwene UJesu akatoga akabiha mu-Jelulsalemu. 2Mańa mumwa mu-Jelulsalemu pakibito kya ṅolo pwukili ikisima ikyu ilitavwa lya kyene munzovele jya va-Juta vita vi Betesita. Kili nameve gahano. 3Mwu vagonile avanu vavongosu sitso avatamu navaboswe amiho navisugasuga navasokwike ummana avapulikilaga amagasi ukuhusanika. 4(Ulwakuva unsuṅwa ikaga mmatsuva mmatsuva akingila nkisima akagahusanya amagasi. Mańa uvi alongwe pakwingila mmagasi vwu gahumile pakuhusanika, vi akapona uvutamu vwoni uvwu ali navwo). 5Mańa alipwo baho umunu uvi agonile nuvutamu vwa mwene imyaka imilevulo gidatu nannana (38). 6Umwene UJesu akambona vwu agonile baho, akapulika ukuta agonile sitso baho pwu akambutsa akata: Nda vunogwa ukupona? 7Pwu untamu akanda akata: Nkuludeva mańa nandili nave ujyunge umunu uva kumbika nkisima vwu amagasi gahumile pakuhusanika. Upwu ndingave ndita ndibihe ndimwene pwu ndivona ujyunge alongwe andekelye. 8Pwu UJesu akata: Ima pimba uvusaga vwako ubihage. 9Pwu umunu uju akaponela baho, akapimba uvusaga vwa mwene akaluta. Mańa pale pwu palitsuva lya sabati lilyo. 10Pwu ava-Juta vakambula umunu uvi aponile vakata: Mańa pwu palitsuva lya sabati lino, mwiko ukupimba uvusaga vwako. 11Umwene akanda akata: Umunu uvi amonitse vi ambulile atye: Pimbaga uvusaga vwako bihaga. 12Avene vakambutsa vakata: Veni umunu jujwa uvi akuvulile atye: Pimba uvusaga vwako ubihage? 13Mańa umunu uvi aponile vi nalumańe ulwakuva UJesu ajagile bahalya, ulwakuva vale vongosu avanu ikipuga. 14Ulwambele UJesu akambona mwa Tempeli akambula akata: Lola uponile lino, uvandikage lino ulandisaga ukutula inongwa, tsilakwitsilaga imbaha naku itsu vwali natso. 15Pwu akabiha umunu uju, akatsikuvavula ava-Juta akata: Vi Jesu uvi amonyaga. 16Pwu ava-Juta vakanswima UJesu vakata tumbude ulwakuva avombile tsitsitsi pasabati. 17Umwene UJesu akavavula akata: Udada avombile sikutsoni asike kulino kunu. Nune vwu ndigahile ndivomba vuvule. 18Lyu lilyo vakongelapwo ava-Juta ukuta tumbude mańa vatetsaga: Natulili jyene jija kulimbula usabati, bako ongelye nijakuta Unguluve vi dadaje, pwu kwu kuva ita ali ndu Nguluve.
19Pwu UJesu akanda akata: Jilweli-lweli ndikuvavula ndita: Umwana navumańili ukuvomba akange akamwene jujwa, ukwu ambwene ukuvomba udadaje kwu ivomba kako namwene. Mańa koni ukwu ivomba jujwa kwu namwene umwana ivomba kako. 20Mańa udadaje vamńine nave umwana pwu ikumbonyaga koni ukwu ivomba. Alavuja alambonyaga nitsinge imbombo imbaha naku itsi mutsivwene itsa kudega uńe. 21Mańa namwene udadaje ikuvatsusa avaswe ikuvapa uvwumi, vwu agahile numwana ikuvapa uvwumi voni uvwu anogilwe ukuvapa. 22Mańa udadaje atsilekile inongwa nikummiga ujyunge umunu. Bako tsoni inongwa andekye ju mwana atye vi atsihige. 23Voni ukuta vandwadage umwana nduvwu vikundwada udadaje. Mańa uvi nikundwada umwana vi ilekilwe ukundwada nudadaje uvi ansuṅile umwana. 24Jilweli-lweli ndikuvavula ndita: Uvi atye nukupulika ilimeńu lyango atye nukumwidika uvi asuṅile une vi ali navo uvwumi vwa sikutsoni, vi nalasike pavuhigilo upwu vihigwa avanu. Bako vi alovwike ahumile kuvuswe abye kuvwumi. 25Jilweli-lweli ndikuvavula ndita: Kalitsa akavalilo, ena kitsile jilweli nalino, pwu avaswe valapulikaga ilimeńu lya nswambe va Nguluve, mańa voni avapulike vwu vivetsaga vumi vuvule. 26Ulwakuva vwu upwu udadaje vi mwenenavwo uvwumi jujwa vwu ampye vuvule-vule namwene unswambe ukuta avetsage vi mwenevwumi jujwa. 27Nakwene ukuhiga ampye atye kwako jyuve ulwakuva vi Ńamunu umwene. 28Tsu ndakeńemukaga tsitsitsi, mańa kikwitsa akavalilo, pwu voni avali mbuguli valapulika ilimeńu lya mwene, 29pwu valatengula nukuhuma. Avene avavombaga innonu valatsukilaga kuvwumi, avene avavombaga imbivi vwu valatsukila kukuhigivwa. 30Une nandivumańili ukuvomba nakange akango ndimwene. Upwu ndihiga inongwa pwu ndihigila umwu ndipulike. Pwu itsene itsu ndihiga ngolosu vuvule ulwakuva nandilonda itsu ndinogilwe ndimwene. Bako ndilonda itsu anogilwe uvi asuṅaga une.
31Ndingave nditsova ndimwene ndingave ndisimilitsaga, pwu ndili ukusimilitsa kwango nakuli kwa jilweli. 32Kwale umwene ujyunge uvi ikunzova isimilitsa une, mańa ulusimilitso lwa mwene ulwu isimilitsa une ndilumanile ukuta lwa jilweli. 33Uńe mwasuṅile kwa Johani, pwu umwene akatsova akasimilitsa itsa jilweli. 34Lola ndatetsaga ndigendela ndusimilitso lwa munu, bako upwu ndikuvavula ili pwu ndikuvavula ulwakuva ndita muponage nuńe. 35Umwene ali ńale ijivika jimulika. Mańa uńe munogilwe ukukina vuvule mundulangalilo lwa mwene. 36Une ndili nalwo ulusimilitso uluvaha naku lwa Johani. Lwu lusimilitso une imbombo itsu amye udada itsu atye utsimalisage. Imbombo itsu ndivomba tsu tsikunzova tsisimilitsa une, tsikunzova ukuta asuṅile udada. 37Namwene nudada uvi asuṅile une, vi anzovile asimilitse. Lola une nilimeńu lya mwene namupuliki lusiku, nukumbona namumbweni lusiku umwu avelye umwene. 38Nilyene nilimeńu lya mwene nandi nalyo mwitumbu mwańe, mańa uvi ansuṅile umwene vi namukumwidika uńe. 39Mulonda mwa kalata ulwakuva mwita mwu tukuvuvona uvwumi vwa sikutsoni, mańa vwu vene vikunzova une vikusimilitsa. 40Mańa uńe mubela ukwitsa kwane kutola uvwumi. 41Une uvuvaha nanditola uvwu vikuma avanu. 42Bako une ndivamańile ukuta ulugano lwa Nguluve nandi nalwo ulunge mwitumbu mwańe. 43Une ndigendye mwitavwa lya dada ukwitsa, mańa uńe namukuńupilila. Ujyunge uvi alagendela mwitavwa lya mwene jujwa ukwitsa kwańe vi ndamwupilila vuvule. 44Ńeńe mwatye mwidikage ndeti ńi mupetsana uvuvaha juńe ńivene vuvule, uvwene uvuvaha uvwa kwa Nguluve uvi ali mpamato vwu namulonda. 45Ndatetsaga pange nditsikuvahendama kwa dada. Bako kwale umwene uvi itsikuvahendama, vi Mose uvi muhuvila kumwene. 46Ngave mwamwidikaga UMose pwu ndili mukuńidika nune, mańa umwene itsu avigile mukalata va mwene tsu tsikunzova une. 47Apene ngave namukuvidika avakalata va mwene, pwu mugidikage ndeti amameńu ugwu nditsova une?
Επιλέχθηκαν προς το παρόν:
Johani 5: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.